Ma-thi-ơ 2
2
Dôm urang haluh ilimô thong patao Hê-rôt
1Tuk Pô Yê-su krung hu jrang mưnưk tak dhan Ƀêt-lê-hem nưgar Yu-đê dalam rai pakrang anưd patao Hê-rôt, hu dôm urang haluh ilimô#2:1 urang haluh ilimô: Mưng kal dôm urang haluh ilimô ni laƀong dôm boh patuk thong gruk pađôn khol nhu bloh dwah ganap lang yah gimnit ar. mưdok adih pur mưrai dhan Yê-ru-sa-lem tanhi laic: 2“Patao bôl Yo Thaic birau mưnưk tak halei? Kaywa khol dahlak krung hu ƀôh patuk Bhô gah adih pur nan ka mưrai piêh bhuktik Bhô.” 3Hamit khao nan, patao Hê-rôt mưthong abih dhan Yê-ru-sa-lem jang mưbuk mưbar. 4Patao patom nhom dôm gru mưliêng prong thong dôm gru pato adat dalam bôl vơk piêh tanhi khol nhu: “Dê Krist bihu mưnưk tak halei?” 5Khol nhu pathau laic: “Tak dhan Ƀêt-lê-hem nưgar Yu-đê; kaywa hu panôic pakat hôr vak laic:
6‘Hơic Ƀêt-lê-hem, bha di nưgar Yu-đê!
Hư ôh nje haget dôm mưdin dang akok nưgar Yu-đê,
Kaywa mưng hư mưca bhat tabiak tha ginôr pan akok,
Mưnuix mưca glang ba bôl I-sra-ên Ita.’”
7Hê-rôt halaup daa dôm urang haluh ilimô mưrai piêh dwah payah tani tanat ka tuk vag patuk krung hu bhat tabiak. 8Bloh patao pachai khol nhu mưrai dhan Ƀêt-lê-hem thong kakei: “Xang nao dwah tanhi biak tani tanat ka anưk rineh nan; tuk dwah ƀôh bloh, xang brei kami thau piêh kami lijang nao bhuktik Bhô.” 9Pang patao tathit bloh, khol nhu nao vêt. Mưni, patuk khol nhu krung hu ƀôh gah adih pur, nao dahlau khol nhu, ka tal libik anưk rineh mưdok mưng padơh vơk. 10Tuk ƀôh patuk, khol nhu biak bui ôn. 11Tamư tal thang, khol nhu ƀôh anưk rineh thong Ma-ri amek Bhô, yơ pam rup trun bhuktik Bhô. Bloh khol nhu pơh klap kaya banrik tabiak, ƀai tagôk ka Bhô dôm panôja nạn mưh, tapung hangau thong phun jru. 12Hadei di nan, dalam panik lipei, khol nhu bihu Pô Lingik brei thau dahlau jôi gilaic vơk libik patao Hê-rôt, nan ka khol nhu nao jalan pakan bloh mai nưgar drei.
Pleh tapa diya Ai-kâp
13Tuk dôm urang haluh ilimô nao truh, tha umat Pô bhat mưrai tom Yô-sep dalam panik lipei thong thurah laic: “Xang mưdơh tagôk, ba anưk rineh thong amek Bhô pleh tapa diya Ai-kâp! Kưk dok tak nan ka tal tuk Ita thurah, kaywa patao Hê-rôt mưca dwah anưk rineh nạn piêh pamưtai.” 14Krưh dok mưlam, Yô-sep mưdơh tagôk, ba anưk rineh thong amek Bhô pleh tapa diya Ai-kâp, 15Bloh kưk dok tak nan ka tal tuk patao Hê-rôt nao mưrup. Bruk ni mưjiơng tabiak piêh thit panôic Pô bihu bican tapa pakat hôr: “Ita krung hu iêu Anưk Ita tabiak truh Ai-kâp.”
Patao Hê-rôt pamưtai dôm likei xit
16Tuk ƀôh drei gok dôm urang haluh ilimô pagat, patao Hê-rôt biak dangih mưkek, thurah pamưtai abih likei xit mưng dwa thun gilaic trun tak dhan Ƀêt-lê-hem thong dôm nưgar jek taphia, tui njaup harei bilan bloh dôm urang haluh ilimô krung hu brei ka patao thau. 17Yau nan, panôic hôr Yê-rê-mi krung hu đôm bihu thit:
18“Mưnuix urang hamit tak Ra-ma
Xap patak parai, hia cok drut drôi;
Nan nạn Ra-cên hia ka dôm anưk drei,
Bloh ôh ciup pajiông,
Kaywa khol nhu ôh dok tra.”
Gilaic mai nưgar I-sra-ên
19Hadei di tuk patao Hê-rôt nao mưrup, tha umat Pô bhat mưrai tom Yô-sep dalam panik lipei tak Ai-kâp thong thurah laic: 20“Xang mưdơh tagôk ba anưk rineh thong amek Bhô gilaic mai nưgar I-sra-ên, kaywa dôm ra dwah pamưtai anưk rineh nan krung hu mưtai pajơ.” 21Yô-sep mưdơh tagôk, ba anưk rineh thong amek Bhô gilaic mai I-sra-ên. 22Min tuk hamit khao A-cê-la-u tagôk ngak patao kala amư drei nạn Hê-rôt pakrang nưgar Yu-đê yơ Yô-sep hôic, ôh khin mưrai libik ni. Hơl vơk, ong bihu pato ba dalam panik lipei nan ka ong mưrai nưgar Ga-li-lê, 23#Mag 1:24; Lu 2:39; Yâ 1:45.mưdok dalam tha dhan iêu nạn Na-xa-ret. Yau nan, panôic dôm pakat hôr krung hu đôm bihu thit: “Mưca Bhô bihu iêu nạn mưnuix Na-xa-ret.”
Aktualisht i përzgjedhur:
Ma-thi-ơ 2: CJM2024
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 Bible Society Vietnam. All rights reserved.