Zabúr 37
37
SAIṈTÍSWÍṈ ZABÚR.
Is zabúr kí áyateṉ asl zabán meṉ Ịbrí hurúf i tahajjí kí tariíb par haiṉ; aur is ká manshá pahlí aur dúsrí áyatoṉ meṉ hai, yạne, gunahgár áp ko halák karegá, pas munásib nahíṉ hai ki sádiq us se rashk kháke intiqám le, kyúṉki Ḳhudá ḳhud sádiq ke dushmanoṉ ko sazá degá, aur apne pák din aur apne haqíqí parastároṉ kí hifázat karegá,
Dáúd kí Zabúr.
1Badkároṉ ke sabab se, tú apne taíṉ na kuṛhá, aur buráí karnewáloṉ par rashk na khá. 2Kyúṉki ghás kí mánind wuh jald káṭe jáenge, aur hare sabze ke mánind murjhá jáenge.
3Yahowáh par bharosa rakh aur nekí kar; zamín par ábád rah aur amánatdárí par charáí kar. 4Aur Yahowáh par apne taíṉ ḳhush kar, aur wuh tujhe tere dil ke suwál púre karegá.
5Apní rah Yahowáh par chhoṛ de, aur us par tawakkul kar, aur wuh ḳhud baná legá; 6aur terí sadáqat ko núr ke mánind, aur terí ạdálat ko do pahar ke mánind nikálegá.
7Yahowáh ke áge ḳhámosh rah aur us kí intizárí kar; us par jo apní rah ko kámyáb kartá hai apne taíṉ na kuṛhá, us ádmí par jo bandisheṉ bándhtá hai. 8G̣usse se báz á aur g̣azab ko chhoṛ de, tú sirf badí karne ke liye apne taíṉ na kuṛhá; 9kyúṉki badkár kaṭ ḍále jáenge, aur Yahowáh ke muntazir hí zamín ke wáris honge.
10Aur thoṛe ạrse meṉ aur sharír hai hí nahíṉ; aur tú us ke maqám par g̣aur karegá, wuh bhí mutlaqan nahíṉ. 11Aur halím zamín ke wáris honge, aur salámatí kí kasrat se apne taíṉ ḳhush karenge.
12Sharír sádiq ke liye bandisheṉ bándhtá hai aur us par apne dánt pístá hai. 13Ḳhudáwand us par haṉstá hai, kyúṉki us ne dekhá hai ki us ká din áegá.
14Sharíroṉ ne talwár nikálí aur apní kamán khainchí hai, táki musíbatzada aur kangál ko girá deṉ aur unheṉ jin kí ráh sídhí hai zabh kareṉ. 15Un kí talwár unhíṉ ke dil meṉ dar áegí, aur un kí kamáneṉ toṛí jáengí.
16Thoṛá sá jo sádiq ká hai bahut sharíron ke g̣ul-shor se bihtar hai. 17Kyúṉki sharíroṉ ke bázú toṛe jáenge, aur sádiqoṉ ká sambhálnewálá Yahowáh hai.
18Yahowáh kámilon ke dinoṉ ko jántá hai, aur un kí mírás abad tak rahegí. 19Wuh musibat ke waqt sharminda na honge, aur kál ke dinoṉ meṉ ásúda rahenge.
20Kyúṉki sharír halák honge, aur Yahowáh ke dushman baroṉ kí charbí kí mánind faná húe; wuh dhúṉwe meṉ faná húe.
21Sharír qarz letá hai, aur adá nahíṉ kartá; aur sádiq mihrbání kartá hai, aur detá hai. 22Kyúṉki us ke mubárak log zamín ke wáris honge, aur us ke malún káṭ ḍále jáenge.
23 Nek mard ke qadam Yahowáh se sábit húe, aur wuh us kí rah meṉ ḳhush hogá. 24Kyúṉki wuh giregá, lekin paṛá na rahegá, is liye ki Yahowáh us ká dastgír hai.
25Maiṉ laṛká thá, búṛhá bhí húá; aur maiṉ ne sádiq ko matrúk, aur us kí nasl ko roṭí mángte na dekhá. 26Wuh tamám din rahm kartá hai aur qarz detá hai, aur us kí nasl barakat kí báis hai.
27Badí se báz á, aur nekí kar, aur abad tak ábád rah! 28Kyúṉki Yahowáh ạdálat se mahabbat rakhtá hai, aur apne muqaddasoṉ ko tark na karegá; wuh abad tak mahfúz haiṉ, aur sharíroṉ kí nasl kaṭ gaí. 29Sádiq zamín ke wáris honge, aur abad tak us par sukúnat karenge.
30Sádiq ká muṉh hikmat bayán kartá hai, aur us kí zabán ạdálat ká kalam kartí hai. 31Us ke Ḳhudá kí Tauret us ke dil meṉ hai, aur us ke qadam na haṭenge.
32Sharír sádiq kí ghát meṉ lagá rahtá hai, aur us ke már ḍálne ká ḳhwáháṉ hai. 33Yahowáh use us ke háth meṉ na chhoṛegá, aur jab us ká insáf kiyá jáe, tab use mulzam na ṭhahráegá.
34Yahowáh ke liye intizárí kar, aur us kí ráh ko tham, aur wuh tujhe zamín ke wáris hone ke liye sarfarází baḳhshegá. Jab sharír káṭ ḍále jáenge, tab tú dekhegá.
35Maiṉ ne sharír ko haibatnák aur desí hare daraḳht ke mánind apne taíṉ phailáte húe dekhá. 36Aur wuh guzar gayá, aur dekh! wuh thá hí nahíṉ, aur maiṉ ne use ḍhúnḍhá, aur wuh na milá.
37Kámil ádmí ko ták rakh, aur sídhe ko dekh; kyúṉki sulh-ḳhwáh ádmí ke liye ạ́qibat hai. 38Aur bargashta ek hí sáth halák húe; sharíroṉ kí ạ́qibat kaṭ gaí.
39Aur sádiqoṉ kí naját Yahowáh se hai; tangí ke waqt wuh un ká qalạ hai. 40Aur Yahowáh ne un kí madad kí aur unheṉ chhuṛáyá hai; wuh unheṉ sharíroṉ se chhuṛáegá aur unheṉ bacháegá, kyúṉki unhoṉ ne us par bharosa rakhá hai.
Iliyochaguliwa sasa
Zabúr 37: URDRPS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Historical text first published in 1863, and maintained by the British and Foreign Bible Society.