Soma Biblia Kila Siku 04/2025Mfano

Sadaka ya amani inafanana na ile ya kuteketeza, ila ni sehemu tu ya sadaka hii iliyoteketezwa kwa moto. Damu iliashiria kwamba upatanisho umefanyika na kuleta amani kati ya Mungu na mleta sadaka. Hivyo sadaka hii ilifuatwa na mlo wa agano ambapo Mungu, kuhani na familia ya mleta sadaka kila mmoja alipata sehemu yake ya sadaka (Musa akaitwaa ile damu, akawanyunyizia watu, akasema, Hii ndiyo damu ya agano alilolifanya Bwana pamoja nanyi katika maneno haya yote. Ndipo akakwea juu, Musa, na haruni, na Nadabu, na Abihu, na watu sabini miongoni mwa wazee wa Israeli; wakamwona Mungu wa Israeli; chini ya miguu yake palikuwa na kama sakafu iliyofanyizwa kwa yakuti samawi, kama zile mbingu zenyewe kwa usafi wake;Kut 24:8-10).Dhambi ilifanya tutengwe na Mungu, lakini kifo cha Yesu msalabani kiliondoa kile kilichotutenganisha. Hivyo tunaweza kuwa wamoja na Mungu, kama ilivyofafanuliwa katika Efe 2:13-18:Katika Kristo Yesu, ninyi mliokuwa mbali hapo kwanza mmekuwa karibu kwa damu yake Kristo. Kwa maana yeye ndiye amani yetu, aliyetufanya sisi sote tuliokuwa wawili kuwa mmoja; akakibomoa kiambaza cha kati kilichotutenga. Naye akiisha kuuondoa ule uadui kwa mwili wake; ndiyo sheria ya amri zilizo katika maagizo; ili afanye hao wawili kuwa mtu mpya mmoja ndani ya nafsi yake; akafanya amani. Akawapatanisha wote wawili na Mungu katika mwili mmoja, kwa njia ya msalaba, akiisha kuufisha ule uadui kwa huo msalaba. Akaja akahubiri amani kwenu ninyi mliokuwa mbali, na amani kwao wale waliokuwa karibu. Kwa maana kwa yeye sisi sote tumepata njia ya kumkaribia Baba katika Roho mmoja.