Lŭka 13

Dèbajalage Ane

1B́ĕnu bija tòcò d́ò̆sagè Jezŭ Galilĕapho tòcò awîakè̆, htè Pilăto htè̆lă hwă ci thwi cu hluhtaigè cî B́ĭcè nu. 2Kî Jezŭ d́òscĭgegè cè tòcò gōjo, “Thĭ gomo ḿî Galilĕapho ajo tòcò khab́è dè ajo ḿî cî kî̆kkè d́olĭ Galilĕapho alewe tòcò acè̆ ā? 3Jò d́ò̆sa thĭ; ńò! Ḿî thĭ gā da bajalage thĭ ne ńò nu thĭ gī thĭgè hlè̆mè̄ b́è gōnu lò lò. 4Òwed́ò̆ bija sciabwèlwīthô be htè Sĭloh Adèdôi ale ladēpha akho kî athĭgè tòcò nu be, thĭ gomo ḿî zè dèkèḿè òè d́olĭ bija alewe aò d́ŏ Jerŭsalèm u bu tòcò nu ā? 5Jò d́ò̆sa thĭ, tè b́è ńò. Barasă thĭ da bajalage thĭ ne ńò nu, thĭ gi thĭgè hlè̆mè̄ b́è gōnu lò lò,” Cò d́ògè lōwa tòcò do.

Thod́ohtĭmu Asò̆dèthè

6Mèhwă Jezŭ d́ò̆sagè bija dègèlè dèdè̆, “Bija dèbwè athod́ohtĭmu ògè d́ŏ thobiscige abu tòb́ò̆, kî ze le wāhlègè athè d́ŏ amulò nu. Ḿî ca da pahtîgè athè dèmè̆ ńò. 7Mègōnu d́ō cò d́ògè akhwèi thobiscimu dèbwè gōjo, ‘Tcabò̄, je le wāhlè thod́ohtĭthè d́ŏ amulò nu ò htŏ thŏd́e htŏ, ḿî ja da pani athè dèmè̆ ńò. Mègōnu d́ō gô̄kè̆bò̄ amu. Ò hnahnă agā zabālaglo ma lākho nè?’ cò d́ò lōwa do. 8Barasă dèmèpho d́òge cè, ‘Sara, khòthad́ò̆ mò̄kô ted́e be. Ju gū khu gòthò lākho khwè̆b́a amulò, bè̆lă lākho ahtoatcă. 9Agè̄ thèbò̄d́ò̆ lòmò̄. B́eḿĕ agè̄ tè thè côcô̆ ńò d́ō, bēkè̆ d́ò̆è amu,’ cò d́ògegè lōwa do.”

Amihmu Ajadē còkhŭ Dèbwè

10B́ĕ Munisòd́è̆ dini nu Jezŭ thôithò̆igè d́ŏ Sinagŏgā abu nu. 11Amihmu htè dèhnè mèjogè sciad́elwīthô ògè dèbwè, htè za jadē còkhŭ htô̆ ze de jehta ni thagò̆ co ko ńò nu. 12B́ĕ Jezŭ tcahtî cè nu, Zo jo lōwa d́ŏ cò ò nu kî Cò d́ò, “Ŏ amihmu, nò hlô̆htaphlòhta b́è htŏ nè dèscwidèsè̆ aklè̆,” Cò d́ò lōwa do 13kî htèlagè Cu cukhò lōwa akho kî za jadē danāge d́ō cò kòihtăigè Kib́ĭcè.

14Ḿî Jezŭ mèhmage bija b́ĕ Munisòd́è̆ nu d́ō Sinagŏgā akhoane tè è ńò d́ō cò d́ògè bija aboahò gōjo, “Bija mò mè dè d́ŏ muni thăthô abu nu, mègōnu d́ō le pra thĭ ne d́ŏ muni anu tòcò abu nu, lebò̄ ḿè Munisòd́è̆ ḿè,” cò d́ògè do.

15Jezŭ d́òge cè, “Ŏ bija abarasa tòcò, d́ŏ thĭ klè̆ nu bija abo ḿî̆dîḿî ńò athîrîd́ŏ kò òcŏglo d́ŏ agòbòbu d́ō, ca ta b́ăplèkè̆ kî ci ti cwile d́ŏ htĭ ò ale b́ĕ Munisòd́è̆ nu ńò ā? 16Tcabò̄ Sătana cŏglogjî̄glogè Abraham aphohmu dèbwè jo sciad́elwīthô adābugè, gō dò mò b́ăplè cè b́ĕ Munisòd́è̆ nu ńò ā?” 17Jezŭ d́ògè dèjî̄b́è ajo tòcò akhoacè̆ ahtad́ĕd́ò Cè tòcò thăwā lōgè, ḿî bija aboahò thalōthalaigè d́ŏ Zè mègè dè acòklîcòhjè̆ tòcò akhoacè̆ nu.

Thèplèphlo Agèlè

(Mattĕo 13.31,32; Mărko 4.30-32)

18Jezŭ d́ògè gōjo, “Jo kô d́ôthò̆dròb́è Kib́ĭcè ahtĭage kî danè̄? 19Zî ḿî acab́ô̆ thèplè aphlo htè bija dèbwè phî hwă za bālagè d́ŏ zè dèludèd́ŏ agebu nu, adohta kî amègè acab́ô̆ dèmu ado dumu nu kî htŏpho tòcò gè mè abi d́ŏ amēaphă alò nu,” Cò d́ògè do.

Gimi Agèlè

(Mattĕo 13.33)

20Kî Cò d́òwe, “Jô kô d́ôthò̆dròb́è Kib́ĭcè ahtĭage kî danè̄? 21Zî ḿî acab́ô̆ gimi htè amihmu dèbwè tokohmu thŏta aklè̆, apĕhta kî aphî̆htagè toko nu,” Cò d́ò do.

Khaglè̄ Îhnè̆pho

(Mattĕo 7.13,14,21-23)

22Jezŭ hèkô klè d́ŏ u tòcò kî d́ŏ tòcò abu nu, cô thôithò̆igè bija d́ŏ ze lekô klè ale d́ŏ Jerŭsalèm u nu. 23Bija dèbwè d́ògè cè, “Ŏ B́ĭcè, anib́è dèhlô̆htage tòcò ò tîkîpho lò ā?” cè d́è̆ lōwa do.

24Cò d́ò lōwa tòcò, “Htukhohtuăbò̄ agē lenīkô khaglè̄ aîhnè̆pho abu; manè̄, jò d́ò̆sa thĭ, bija òè̆bwè gā wāhlèkò̆ agē lenī Mò̄kho kî cè tè kèhtakò̆ ńò. 25Ḿî hib́icè gē lenī hwă hibu kî zè gè̄ glè̄b́i hwă khaglè̄ tapla, thĭ gò̄ sò̆hto ò hwă d́ŏ akhlŏ, tòklò khaglè̄ kî d́ò, ‘Ŏ B́ĭcè, b́ăhtanibò̄ wa khaglè̄!’ Kî cò kò d́òscĭgekò̆ thĭ, ‘Thĭ ò d́òlè̄ nu ji di thîhè̆ mè ńò!’ 26B́ĕnu thĭ kò d́òhtakò̆ ‘Wa a ò̆ plo thè̆ Nè nî̄, kî nò thôithò̆i thè̆ wa d́ŏ wu u bu nu nî̄,’ thĭ kò d́òkò̆ do. 27Kî cò kò d́òkò̆ thĭ, ‘Thĭ ò d́òlè̄ nu jî dî thîhè̆ ńò. Sè dòbò jè, thĭ amè dèkî̆kkèmèhlò̆ tòcò nu,’ Cò kò d́òkò̆ do. 28B́ĕ thĭ tcahtî Abraham kî Izăko kî Jăkòb kî Prò̆fèt lŏcăcè d́ŏ Kib́ĭcè ahtĭage abu nu, ḿî thĭ nu thĭ kè b́èhtîphlòḿĭkò̆ d́ŏ akhlŏ nu akhè̆, dèjodèha kî dè edithô̆edithè̆ kò òkò̆. 29Bija tòcò aò d́ŏ lumuhta, lumula kî lò̄khĭ, lò̄htè gā kha pwè̆ kha lakò̆ d́ŏ Kib́ĭcè ahtĭage abu nu. 30Kî tcabò̄, bija tòcò cò gî̄ ḿîkò̆ aŭsu kî aŭsu tòcò gî̄ ḿîkò̆ agudulă!” Cò d́ògè lōwa tòcò do.

Jezŭ Adèb́èlò̄ Jerŭsalèm u

(Mattĕo 23.37-39)

31B́ĕ anu dini nu Pharizè̆pho tòcò lehtî Jezŭ kî cò d́ò, “Sèphlòmĭbò̄, manè̄ d́ō Èrŏdè thaè mèthĭ Nè!” cò d́ò̆sa lōwa d́o.

32Ḿî Cò d́ò lōwa tòcò, “Le d́ò̆sabò̄ htwimi anu tod́ŏ gōjo, ‘Tcabò̄, khŏdini kî mòbĕ dini ja hna hèhta dèscidèhnè kî mèhmage bija, kî thŏni dini nu Jè klè gū kŭdu tèpwè.’ 33Mè nòthò̆ do hnò̆nu, je ge leb́è jè klè khŏdini, mòbĕ dini kî alekă dini be. Manè̄ prò̆fèt dèbwè nu zi di thĭ dè hlè̆mè̄ b́è d́ŏ Jerŭsalèm u akhlŏ ńò!” Cò d́òscĭgegè lōwa tòcò do.

34“Jerŭsalèm, Jerŭsalèm, nè htè amèthĭ prò̆fèt, htè ab́è thodŏle ńò ò tòcò nu, ne hwĕ thĭ kî lo. Acab́ô̆ Scî̆mubwe hulagloi apho d́ŏ ad́elè̄ akhò̆ nu, ja thaè lè̄plo tèpwè no pho ni li tòcò nu bwīplagè, ḿî nè nu nè dè thaèni tò ògè gōnu ńò. 35Tcabò̄, ni hi na phă kò òdakò̆. Jò d́ò̆sa nè, na gā da tcahtîb́èkò̆ jè ńò htô̆ akhî kèb́è htè ńò kò d́ò, ‘Kib́ĭcè hôwî ḿî Cè htè ale d́ŏ B́ĭcè ami abu dèbwè nu!’” Cò d́ògè lōwa tòcò do.

தற்சமயம் தேர்ந்தெடுக்கப்பட்டது:

Lŭka 13: GRNT21

சிறப்புக்கூறு

பகிர்

நகல்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்

Geba Roman New Testament பற்றி மேலும் அறிக

Lŭka 13

Lŭka 13
இலிருந்து பிரபலமான வேதாகம வசனங்கள்

வேதாகமம்:

Karen, Geba

பதிப்பு: Geba Roman New Testament - GRNT21

Lŭka 13

Lŭka 13

Lŭka 13இலிருந்து பிரபலமான வேதாகம வசனங்கள்

வேதாகமம்:

Karen, Geba

பதிப்பு: Geba Roman New Testament - GRNT21

Lŭka 13

Lŭka 13
இலிருந்து பிரபலமான வேதாகம வசனங்கள்