Nkunga mi Maniongo 3
3
Mutu widi mu phasi kasa vuvu mu Yave
1Ndidi mutu wumona ziphasi,
Kutsi nganzi zi Yave.
2Wundeti, wunzietisi,
Bika ku kiya vayi
Ku tombe.
3Minu kalembo monisanga
Phasi lumbu bibio.
4Wumbungidi tona ku
Ntu nate mu malu,
Wukeludi bivisi biami.
5Wukhengi ndambu ayi
Ndambu banga mu nloko,
Wunzingidi mu ziphasi ayi ndudi.
6Wumvuandisidi mu tombe,
Banga batu bafua thama.
7Wukhengi muingi
Nabika totuka,
Wukhengi zimbienga zi zitu.
8Ndibokidi mu phamba,
Wumengi wa lusambulu luami.
9Wukhambikidi nzila
Mu matadi
Manene, wukhotisidi
Mu nzila yimbi.
10Wubedi kudi minu banga
Bulu kinene kinganzi kilembo fiedi,
Banga khosi yisuemi ku tsi biti.
11Wuzimbikisi malu mami mu
Nzila, wukhakuni,
Wuthudidi kima kiphamba.
12Wulekidi mbasa andi ayi
Wuthudidi banga bulu kieka mbasulu.
13Wunduekidi nitu yiyo mu bitoto.
14Ndiyikidi kisekonono ki batu
Bami babo, lumbu bibio banyimbilanga
Minkunga mu kumvueza.
15Wundiukutisi mu ndudi,
Wunduikini ziphasi.
16Wuthebisi matadi mu meno,
Wumvindumuni mu fundu fundu.
17Wundozidi thama ayi yenge,
Nzimbakene mayangi.
18Ayi ndikembi: "Yimeni mu
Diambu diami, kilendi buevingila
Kima kudi Yave ko!
19Ndidi zungani ayi wuniafunu,
Miyindula diawu dieka
Yimbu kudi minu.
20Thangu zizio ndibambukila
Moyo ayi dikuphanganga
Kilendi zimbakana dio ko,
Ayi ndenzangene,
21Vayi tala diambu dithidi
Bambukila moyo, diawu
Ndintudilanga vuvu.
22Mambote ma Yave makadi manisa!
Zola kuandi kukadi suka!
23Mambote mandi mankitukanga
Mamona kadika nsuka.
Kikhuikizi kiaku kidi kinene, Yave!
24Khembi: «Yave widi
Kimvuama kiami.»
Diawu ndikuntudilanga vuvu.
25Yave widi wumbote kudi
Woso wukuntudilanga
Vuvu ayi kudi woso wukuntombanga.
26Didi dimbote mu vingila mu
Nasui phulusu yi Yave.
27Didi dimbote kudi mutu mu
Nata zitu mu kintuenia kiandi.
28Bika mutu kakala
Mu kinsona
Ayi kala nasui Yave bu
Kankomini dio.
29Kabuongama, nua
Va fundu fundu,
Nanga vuvu kikhidi!
30Bika katamba tama
Diandi kudi nionio
Zolele kumbeta#3.30 Dedikisa Mat 5.39.,
Bika kayukuta bifingu.
31Bila Yave ka niafunangandi
Mvimba mvimba ko.
32Ka diambu ko
Wumonisini ziphasi,
Beki zola kuphuele mu diambu
Di mbote andi yinene.
33Bila bika sia ti mu ntima
Wu luzolo kanyinimisanga
Ayi vanga batu phasi.
34Bu bandiatikisanga ku tsi
Bitambi babo
Badi mu nloko mu tsi,
35Bu bankambu vumina
Minsua mi mutu va
Ntuala Nzambi yi Zangama,
36Bu banzengilangamutu
Nkanu mu kambu ku lunungu,
Yave ka monangandi ko?
37Nani lenda tuma diambu#3.37 Tala Mkn 33.9. ayi
Divangamene ti Yave
Kakadi dio tuma?
38Bika sia ti mu nua wu
Nzambi yi Zangama mu
Vangiminanga ma phasi
Ayi ma kiese?
39Bila mbi mutu kafuiti
Samba bu kakhidi moyo?
Bika mutu kasamba mu
Diambu di masumu mandi.
40Tufionguninanu nzila
Zieto ayi tuvutukano kudi Yave.
41Tusambileno#3.41 Tala 2.19 ayi noti. mu ntima
Wuwo ayi tunonunanu mioko
Mieto kudi Nzambi yi zulu.
42Tuvodidi masumu,
Tuatinguni, ayi ngeyo
Wumengi kutulemvukila!
43Wukizingidi mu
Nganzi ziaku,
Wutu kukidi ayi wuvondidi
Mu kambu kiadi.
44Wukifukidi tuti muingi
Lusambulu lueto lu bika
Tula ku widi.
45Ngeyo wutu vangidi mambi
Banga tsobo, wutuvengi
Bima biphamba va khati
Batu bankaka.
46Minthatu mieto mimio
Mituzibudidi nua miawu
Mu kutusombula.
47Tsukulueto tsisi ayi nzieta#3.47 Diyenga. ,
Mbebolo yingolo.
48Meso mami mawedi mu
Matsuela mu diambu di
Mbungulu yi batu bami.
49Meso mami mandodisanga
Matsuela maphuele bila
Tukondolo luvundulu.
50Ndilembo vingila nate
Yave kanyinika zizi tona
Mu mazulu ayi tala ayi mona.
51Meso mami malembo
Mbonisi phasi mu
Diambu di malembo yizi
Kudi bana ba ndumba
Ba mbanza ami.
52Balembo kukhuki banga nuni,
Bawu bakundendanga mu
Kondo ku bila.
53Bakhangididi wu moyo
Mu bulu di nlangu ayi bafukidi ditadi#3.53 Mu mbambukulu zinkaka: banzuba matadi..
54Nlangu wufukidi ntu ami,
Ayi ndikikembi: «Mfuidi!»
55Mu dibulu di nlangu
Dimpinda, ndikutedidi, Yave.
56Wuwilu mbembo ami
Bu ndiyamikini:
«Kadi kanga makutu maku
Mu ziphumukunu ziami
Ayi mu zimbokolo ziami.»
57Bu ndikutela, wufikama kudi
Minu buna wukhamba:
«Kadi mona wonga!»
58Yave, ngeyo wunduanini,
Wutanini luzingu luami.
59Yave, wumueni mambi
Ma baphangidi,
Wuphangila lunungu.
60Wumueni ndinda awu
Wuwo ayi makani mawu
Mabakubikidi mu minu.
61Yave, wuwilu bifingu
Biawu ayi mamo mambi
Mabakubikidi mu diambu diami.
62Phova ayi mabanza ma
Minthatu miami midi mu
Mumbuesa phasi
Lumbu ka lumbu.
63Tala, baba batelama
Voti bakala,
Minu banyimbidilanga
Mu kumvueza.
64Yave, wubavutudila
Mabaphangidi.
65Badisa ntima miawu,
Yayi mayiba nsingulu
Aku kudi bawu.
66Wubazoma mu nganzi zaku
Ayi wubabunga va ntoto!
தற்சமயம் தேர்ந்தெடுக்கப்பட்டது:
Nkunga mi Maniongo 3: YOM-CD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2024 Seed Company in coordination with Forum Communautaire des Traducteurs de la Bible et Alphabétisation