Nkunga mi Maniongo 2
2
Yave, nthatu wu Yelusalemi
1Yave, mu nganzi ziandi,
Wufukidi mu matuti mandombe
Muana wunketo wu Sioni!
Tona ku zulu, wubuisidi
Nzitusu wu Isaeli. Nganzi
Andi bu yilema,
Wuzimbakana kuandi ti Sioni
Tudulu ki malu mandi#2.1 Tudulu ki malu mandi: Dedikisa Mkn.99.5, Mat 5.35..
2Yave, mu kondo ku kiadi,
Wufukisidi mavia mamo ma Yakobi,
Mu nganzi andi, wutuludi zinzo
Zizio zisiama zi Yuda,
Wulumbidi zio va tsi,
Wubuisidi bimfumu
Ayi mintinu, wumonisini mio tsoni.
3Mu nganzi yingolo, wubuisidi
Lulendo lulo lu Isaeli.
Wumengi nuanina Isaeli nthatu
Bu kayizidi. Vayi wulemisi
Mbazu yiyokidi bibio bikinzungidila.
4Banga nthatu, wulekidi mbasa andi,
Wutukuni koko kuandi ku lubakala
Ku kubama mu basula.
Wukimonikisi nthatu eto,
Bu kavondidi babo batunzolanga.
Banga mbazu, wudukudi nganzi andi
Mu kinlongo ki sioni.
5Yave wukivengi banga nthatu eto.
Wubungidi Isaeli ayi zinzo ziandi zizio,
Wubungidi fulu biandi bibio
Ayi nzo ziandi zizio zisiama
Ayi wudukudi kiadi
Ayi phasi va batu ba Yuda.
6Wutuludi mu kingolo luphangu
Lu lumbu#2.6 Kifuani ki kinlongo ayi luphangu luandi., wutuludi fulu kiandi ki
Mbuabununu. Mu Sioni,
Yave wuzimbikisi bilumbu bi nyengo
Ayi bi Saba. Mu khesi ziandi,
Wuvuezidi ntinu ayi banganga.
7Yave kakadi bue yangalala
Zikua diandi, wubikidi kinlongo kiandi.
Wuyekudi mu moko ma nthatu
Zinzo zi kitoko zi Sioni
Mu kinlongo biyoko biba
Bingolo banga kuandi lumbu bi nyengo.
8Yave wubaka lukanu mu tulula
Bibaka bintaninanga Sioni.
Wutitikidi nsinga mu teza,
Kasi kekama ko mu tulula.
Wutudidi mu mfuilu ntuala luphangu
Ayi mbata luphangu, bilembo bebi.
9Mielo mi Sioni mibuidi.
Yave wumeni bunga mavitu,
Wutoludi mawu.
Ntinu ayi bilandi biandi
Badi mu mioko mi ba nzenza.
Ku siedi ko Nsiku ayi mimbikudi
Miandi bakadi bue baka
Mansueki ma Yave.
10Bakulutu ba Sioni
Bakedi va ntoto ayi badi nasui,
Badukudi fundu fundu va ntu miawu,
Bavueti minlele mi mfuilu.
Ayi bandumba ba Yelusalemi
Bayinikini ntu miawu va ntoto.
11Meso mami mavongidi mu totula
Matsuela, ntima ami wulembo yami,
Khondolo vuvu va ntuala phasi
Zibuidi va batu bami, bila bantuena
Ayi bana banyema balembo fue
Mu nzala nlangu mu
Zinganda zi mbanza.
12Bana balembo yuvudi ngudi ziawu:
«Kue kuidi bidia ayi nlangu?»
Bu balembo bue
Banga batu baluala mu fulu
Bi mbanza ayi
Balembo tabuka vumunu mu mioko
Mi ngudi ziawu.
13Mbi ndilenda buela kukamba?
Kudi nani ndilenda
Kufuanikisa, Yelusalemi?
Kifuani mbi ndilenda
Bonga mu kubomba,
Mbanza sioni? Kiadi kiaku
Kidi tola banga
Nlangu wu mbu, nani lenda kuniakisa?
14Mimbikudi
Miaku bakusamunini nsamu
Mi luvunu ayi miphavala.
Bakadi kutumbudila mambi maku
Muingi phasi zibika kubuila,
Nsamu awu kudi ngeyo wubedi
Luvunu ayi fundu fundu mu meso.
15Babo bamviokila vava balembo
Siki tsaki mu diambu di mbuilu aku.
Balembo siki mviosi ayi
Balembo nikuni ntu#2.15 Diambu dimvuezolo, Mkn 22.8, 109.25.
Mu kuvueza, Yelusalemi:
«Yayi kuandi mbanza
Yibabetedilanga Kitoko
Kiduka ayi kiese
Ki ntoto wumvimba?»
16Minthatu miaku mimio banyasanga
Nua mu kithatu kudi ngeyo,
Bansikanga mviosi wu tsisi
Ayi bankuetanga meno, bankambanga:
«Tuaminini! Kiaki lumbu
Tube vingilanga, tutudidi kio,
Tumueni kio!»
17Yave wuvengi makakana,
Wutunguni phova andi, yina
Yikatuma tona mu tsi khulu:
Wufukisidi mu kambu kiadi,
Wukuvengi kiese ki nthatu aku,
Wubuedidi ngolo zi minthatu miaku.
18Ntima awu wunyamikinanga
Kudi Yave. Kibaka ki Sioni,
Bika matsuela maku
Makumba banga nlangu wu
Mbu phipa ayi muini!
Kadi vunda, kadi vonga mu dila.
19Telama, yamikina thangu
Zizio va builu.
Tengula ntima aku banga nlangu
Va ntuala Yave! Tukuna
Mioko miaku#2.19 Tukuna mioko miaku: diambu dinsonga lusambulu, tala Mkn 28.2. kudi yandi mu
Tanina bana baku beti fua
Mu nzala mu fulu bibio.
20Tala ayi mona, Yave,
Nani wuvangidi maphila yayi!
Bufueni ti bakheto badia bana
Bawu bababuta ayi
Babanzolanga ngolo? Bufueni ti
Banganga zi Nzambi ayi mimbikudi
Bavondo va fulu kinlongo?
21Zimvumbi zi bantuena
Ayi zi bakulutu zilekidi
Va ntoto mu zinzila, ndumba
Zami ayi matoko mami
Babuidi mu sabala, ngeyo
Wubavondidi mu lumbu
Ki nganzi ziaku,
Wubafukisidi mu kondo ku kiadi.
22Wutumisini mu tsi zizio babo
Bakumbonisanga tsisi,
Banga mu lumbu ki nyengo.
Mu lumbu ki nganzi zaku, Yave,
Kuisi ko wuvukidi. Babo
Ba ndiyundudi ayi bandi
Bedizolanga, nthatu wubamanisi.
தற்சமயம் தேர்ந்தெடுக்கப்பட்டது:
Nkunga mi Maniongo 2: YOM-CD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2024 Seed Company in coordination with Forum Communautaire des Traducteurs de la Bible et Alphabétisation