Zohan 10
10
Koi hi Berapū Sā Kā Ni
1“Taktaka kei na ril a ni u zei, tūkareng bera-rakul suokkhāra lūt luia, lampui atei tianga akala ālūt tak chu, marūsā lē mīsuom a ni. 2#Mk 6:34Tenchu tūkareng suokkhāra ālūt chu bera ngāi berapū a ni. 3Suokkhārpū'n a ranga a lei malongpē. Bera ngāiin a rōl a riat u. A bera ngāi chu a raming u chipa a pāi a, apanga a ruoi chachak. 4A bera ngāi a suok suole han, ama chu a matona a sē chachak. Bera ngāiin ama chu a zī u na, asik chu amānī'n a rōl a riat u na. 5Amānī'n mēlriatnōk zī u ngāi nō ni, tenchu a kōm u nātā rot u'n ti. Asik chu mēlriatnōk rōl chu riat u mak.” 6#Mk 9:32Isuo'n hiva ankhīna-chong hi a mang a. Tenchu amāni kōma hiva ei ril ngāi chu riatthei u mak.
7Hatuka Isuo'n amāni kōma a ti rēt a, “Ataktaka, kei na ril a ni u zei, koi hi bera ngāi suokkhār kā ni. 8#Zer 23:1-2; Izk 34:2Ka matona a lei āhong ngāi dōra chu marūsā lā mīsuom ngāi a ni u. Tenchu bera ngāiin a rōl rangāipē u mak. 9Koi hi suokkhār kā ni. Tūkareng koia ālūt chu zōk in ti. Ama chu lūt in tia, suokin ti, hanūk chu sūlsākna mun man in ti. 10#Sām 65:11; Rōm 5:17Marūsā chu ānru rang, mī that rang lē ānsiat rang duoia kēng ei hong. Koi chu damna ei manthei una ranga lē ātampā ei manthei una ranga āhong kā ni. 11#Isa 40:11; Izk 34:11-16, 23; Mt 2:6; Lk 12:32; Heb 13:20; 1Pe 2:25; 1Zn 3:16; Anl 7:17Koi hi berapū āsā kā ni. Berapū āsā'n bera ngāi ranga ei damna a pēk. 12#Zek 11:16-17Ānlōpū chu berapū ni mak, bera ngāi chu a tā ei ni nōk sika, ngelang ei hong a mū na, bera ngāi chu a māk a, a rot a. Hatuka ngelangin bera ngāi chu a hong chōm a, a manchēn rak a. 13Ama chu ānlōpū ei ni sika, bera ngāi poisakluia a rot chachak a. 14#Ant 33:12Koi hi berapū āsā kā ni. Ka bera ngāi chu ka riat, ka bera ngāiin um a na riat u. 15#Mt 11:27Pā'n ei na riat anga, koiin um Pā ka riat. Bera ngāi ranga kei damna kei phal a ni. 16#Isa 56:8; Izk 34:23; Kui 10:34-35; Efe 2:11-19Hiva bera-rakul sūnga ni lui bera atei ātampā ka lā dōn a. Hava ngāi um kei la hong ruoi ngēt rang a ni. Amānī'n ka rōl riat u'n tia, hatuka berapū khat adōn beraruol khat hong ni u'n ti. 17Kei damna hi kei lāk rēt theina ranga kei phal sika, ka Pā'n ei nā dit a ni. 18#Mt 26:53; Fil 2:8; Heb 5:8Tūtē'n hava chu ka kōm ātā ālāk thei rang om mak, ka ninga kei phal kēng. Āphal ranga ningneina ka dōn a, ālāk rēt rangā'm ningneina ka dōn a. Hiva chongpēk hi ka Pā kōma kei man a ni.” 19Hiva chong ngāi sika hin Zehudi ngāi kāra ansenna a hong a suok rēt a. 20#2Rē 9:11; Zer 29:26; Mk 3:21-22Mī tamtakin, “Raluoiin ei sūr a, āchāng kēng a ni zei. Hong sik mo ama chong nei rangāi u?” a ti u na. 21#Ant 4:11; Mt 4:24Atei ngāiin, “Hiva ngāi hi raluoiin ei sūr chongkam ni mak. Raluoiin mitchō mo a manvār thei?” a ti u na.
Zehudi ngāiin Isuo Iam u Mak
22Zerusalem-a Andarna Pāntā a om a. Hava ha nūdin a ni. 23#Kui 3:11Isuo chu tempula, Solomon a tuomāia a lei āchei a. 24#Lk 22:67Hatuka Zehudi ngāiin ā huol u na, a kōma, “Ituk ten mo malung songankhara nei na la siak rang? Khristā ha nā ni ten, anthiang vanga na ril ro,” a ti u na. 25Isuo'n a masang a, “Ka na ril u zei hale, iam u mak chē na. Ka Pā raminga ka sinthō ngāiin, ka ruia ānriatpū a ni. 26Tenchu iam u mak chē na, kei na ti u anga, asik chu nangni chu ka bera ngāi kāra mī ni u mak chē na. 27Ka bera ngāiin chu ka rōl a riat u na, amāni chu ka riat, amānī'n ka nūk a na zī u na. 28#Isa 66:22; Mt 25:46Amāni kōma tāituon damna ka pēk a. Amāni chu peianchang pial u lāi nō ni. Tūtē'n amāni chu ka kut ātā a nā'n pot thei rang om mak. 29Ka Pā, amāni anā pēkpū chu alompei nēka ālian a ni. Tūtē'n amāni chu ka Pā kut ātā anpot thei rang om mak. 30#Dān 6:4Pā lē koi chu angkhat kēng nā ni.”
31Hatuka Zehudi ngāiin ama dēngna rang lung a rūt rēt u na. 32Isuo'n a kōm u na, “Ka Pā kōm ātā sin āsa tamtak ka na manmū u na, hova sin ngāi sika mo nei na dēng u rang?” tīna a masang u na. 33#Lev 24:16; Mt 26:63-66Zehudi ngāiin a kōma, “Sin āsā sika nei na dēng rang ni mak. Tenchu Pathian nei ril siat sika lē miring nā ni uoma Pathiana nei ānsin sika kēng,” tīna a masang u na. 34#Rōm 3:19; 1Ko 14:21Isuo'n amāni kōma, “Na dānbū u na, ‘Koiin, “Nangni chu pathian ngāi nā ni u,” ka tī na,’ (Sām 82:6) tīna ānziak ni mak mo? 35#Mt 5:18; Heb 4:12Pathian chong ei hong tungna mi ngāi chu amā'n pathian ngāi a ti ten (Pathian chong chu siat thei mak a). 36#Zer 1:5Pā'n ei manthiang lē maniapūra ei hong tīr chu, ‘Pathian Nāipasal kā ni,’ kei ti sika, ‘Pathian siat a ril,’ nei ti u mo? 37Ka Pā sin kei thō nōk ni sela chu na iam u nō ro. 38Tenchu kei thō a ni ten, na na iam u nōkā'm, hā sin ngāi chu iam u ro. Pā chu koia a om, koi um Pāna kā om tī nei riata, nei iam una rang a ni,” tīna a masang a. 39#Lk 4:30Hasikhan ama chu āsūr ranga a val rēt u na, tenchu a kut u nātā a zōk viak a.
Zordan Varāla Mi ngāiin Isuo a Iam u
40Ama chu Zordan varāla, Zohan-in māna mi baptisma ei pēk chachakna muna a sē rēt a, hava han a om a. 41Hatuka a kōma mī tampā a hong u na, “Zohan-in sinsiana ītē thō mak a. Tenchu Zohan-in hiva mi ruia ei ril ngāi dōra chu ādik zit kēng,” a ti u na. 42Hava han mī tampā'n ama chu a iam u na.
தற்சமயம் தேர்ந்தெடுக்கப்பட்டது:
Zohan 10: RNL
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible in Ranglong, © Bibles International, the Bible society of Baptist Mid-Missions, 2024.