Zohan 11
11
Lazar ei Thina Rui
1 #
Mt 21:17; Lk 10:38 Mari lē a zuorpui Martha omna khuo Bethani-na han ādam nōk mī khat Lazar a om a. 2#Mk 14:3; Lk 7:38Hiva Mari hi Puma chu marimhui sariak a khuo lē a kē chu a sam le ā huipē chu a ni. Ama a chāpā Lazar ha ānā a ni. 3Hasikhan a sarnū ngāiin a kōma, “Puma, entā, nangin nei maditpū chu ānā,” tīna mī a tīr u na. 4Isuo'n hava ha a riat a, amā'n, “Hiva damnōkna hi thīna rang khopa ni mak. Tenchu Pathian ei ānlianna rang kēng. Hiva amanga Pathian Nāipasal chu ei ānlian theina ranga a ni,” a tī na.
5Martha, a zuorpuinū lē Lazar chu Isuo'n ei madit a ni. 6Isuo'n ama chu ei nā a riatā'm, ei omna muna nī anni a la omsā na. 7Hava suona amā'n a zolāi ngāi kōma, “Thota, Zudāi rama sē rēt u rei,” a tī na. 8#Mt 23:7A zolāi ngāiin a kōma, “Rabi, maton len han ro Zehudi ngāiin anā dēng ranga ei na val u, sovā son nei sē rēt rang mo?” a ti u na. 9Isuo'n, “Nikhat sūnga hin dārkār sōmleianni ni mak mo ā om? Tūkareng sūna kal a chōi chu anpal ngāi mak. Asik chu amā'n maniapūr raāng ei mū a ni. 10Tenchu tūkareng zāna kal a chōi chu anpal chachak, asik chu amāna raāng om mak a,” tīna a masang a. 11#Mt 9:24Amā'n hiva chong ngāi a ril suole han amāni kōma, “Koini na mal Lazar chu a in, tenchu ama ānthui ranga kā sē,” a tī na. 12Hatuka a zolāi ngāiin a kōma, “Puma, āin a ni ten hong har rēt bō ni do,” a ti u na. 13#Mt 9:24Tenchu Isuo'n Lazar ei thi rui kēng ei ril. Tenchu amānī'n ama chu pōngansāna āin rui mo ei ril tīna a mandon u na. 14Hatuka Isuo'n a kōm una anthiang vanga, “Lazar chu a thi zei. 15Tenchu nangnī'n nei iam thei una ranga, nangni ngāi sika hava han kei om nōk ha ka rāi asān. Hanum ni sela, a kōma sē u rei,” a tī na. 16#Mt 10:3; Kui 1:13Hatuka Thoma, mī'n Diduma#11:16 Diduma: Grik chong “Ānphīr” tīna a ni. ei ti u hā'n a zolāi changpui ngāi kōma, “Tho, koinī'm ama bila nei thina ranga sē u rei,” a tī na.
Koi hi Anthuirētna lē Damna Kā Ni
17Isuo a hong le chu Lazar chu thāna ni manlī a lei om suo a riat a. 18#Mt 21:17Bethani chu Zerusalem kōla mēl anni tāng alāna om a ni. 19#Zōb 2:11Zehudi tamtak chu Martha lē Mari kōma a chāpā u ruia lungngam asak ranga a hong u na. 20#Lk 10:38-42Martha'n Isuo ei hong ei riat le ama a vā'n tongpui a. Mari chu ina a lei ansut a. 21Martha'n Isuo kōma, “Puma, hiva hin nei om ni sela chu, ka chāpā chu thi nō ni ba. 22Tenchu atun ngal Pathian kōma nei zong tak chu, Pathianin na pēk in ti tī ka riat,” a tī na. 23Isuo'n a kōma, “Na chāpā chu anthuirēt in ti,” a tī na. 24#Dnl 12:2; Kui 24:15Martha'n a kōma, “Nikhuo hek tika anthuirētna nikhuo tika chu anthuirēt in ti tī ka riat,” a tī na. 25Isuo'n a kōma, “Koi hi anthuirētna lē damna kā ni. Tūkareng koi anā iam tak chu a thīnā'm ama chu dam in ti. 26#Mt 25:46Tūkareng ādamin, koi a na iam tak chu thi pial nō ni. Hiva hi na iam mo?” a tī na. 27#Mt 4:3; Lk 2:11Hankēng amā'n a kōma, “O Puma, nang chu Khristā, Pathian Nāipasal, maniapūra āhong ranga ha nā ni, tī ka iam,” a tī na.
28 #
Mt 26:18
Hiva ngāi a ril suole han Mantha chu a sē na, a zuorpuinū Mari chu maruka a va pāi a, “Mīnchūpū a hong a, amā'n a na pāi,” a tī na. 29Amā'n hava ha ei riat le, anrapa anthui a, a kōma a hong a. 30Isuo chu khuona la hong lūt mak a, tenchu Martha'n ei āntongpuina muna a lei om a. 31Zehudi ngāi ama bila ina alei om ngāi, ama lungngam asak ngāiin, Mari chu anrapa ei ānthuia ei suok a mū u na, a nūk a va zī u na. Amānī'n, “Ama chu thāna avā chap ranga a sē,” a ti u na. 32Mari chu Isuo ei omnāna a hong a, ama chu a mū na, a kekunga anbok a, “Puma, hiva hin nei om ni sela chu, ka chāpā chu thi nō ni ba,” a tī na. 33Hasikhan Isuo'n ama ei chap lē ama bila āhong Zehudi ngāi ei chap a mū na, ama chu anuk aliam a, a malung anpōn a. 34Isuo'n, “Ama chu hon mo nei manzāl u?” a tī na. Amānī'n a kōma, “Puma, hong tānla, hong en ro,” a ti u na. 35#Lk 19:41Isuo a chap a. 36Zehudi ngāiin, “Entā, ama chu hotuk mo ei ādit so!” a ti u na. 37Tenchu mī senkhatin, “Hiva mī'n mitchō a manvār a, hiva mī hī'm ei thi rang ātā san thei mak mo?” a ti u na.
Isuo'n Lazar Āthī nātā ei Mathuina
38 #
Mt 27:60; Lk 24:2 Isuo chu anuk aliam rēt a, thāna a hong a. Thān chu pūkkhur a ni. Thān chu lung le ānkhār a ni. 39Isuo'n, “Lung chu khāi u ro,” a tī na. Āthipū sarnū Martha'n, “Puma, atun ang tena chu a marim se zei ni, asik chu ei thina hi ni manlī a ni zei,” a tī na. 40Isuo'n a kōma, “Na iam anten Pathian ei ānlianna mu na ti kei na tī ni mak mo?” a tī na. 41#Mt 11:25Hatuka amānī'n āthipū ei zālna muna lung chu a khāi u na. Isuo chu chung tiang a tang a, “Ka Pā, ka chong nei rangāi sika rāisānna ka na mantung. 42Ka chong nei na rangāipē babang tī ka riat. Tenchu nangin nei na tīr tī ei riatthei una rang, ka ravēla mipui ānding ngāi sika kei tī a ni,” a tī na. 43#Lk 7:14Hiva ngāi a ti suona, anringa ankhēk a, “Lazar, hong suok ro!” a tī na. 44Āthipū chu thān raliang le a kut lē a kē anthuoma, hanūk chu a māi chu puontuidui le anthuoma a hong āsuok a. Isuo'n a kōm u na, “Sūtpē u tānla, mansē u ro,” a tī na.
Isuo Athatna a Val u
Mt 26:1-5; Mk 14:1-6; Lk 22:1-2
45 #
Ant 14:31
Hatuka Mari kōma Zehudi tamtak āhong ngāiin, Isuo a sinthō a mū u na, ama chu a iam u a na. 46Tenchu amāni bila mī senkhat chu Farisāi ngāi kōma a sē u na, Isuo ei thō ngāi chu amāni kōma a va ril u na. 47#Mt 5:22; 26:3Chāizūng ulian ngāi lē Farisāi ngāiin ruirilpū ngāi a manchun u na. Amānī'n, “Hong mo nei thō rang a ni zei? Asik chu hiva mī'n sinsiana tamtak a thō zei hile! 48Hivan tin hin ama chu na manthō bang ten, mī dōrā'n ama chu iam u'n ti. Rōm mi ngāi chu hong u'n tia, na mun lē na nam chu na lākpē kiar u'n ti,” a ti u na. 49#Mt 26:3Amāni bila angkhat Kaiafa, hava kuma chāizūng ulian khītin a kōm u na, “Nangnī'n ītē nei riat u om mak. 50Nam pumpui anpei nēk ten mipui ranga mī khat ei thī chu koini ranga āsa tī hi mandon u mak chē,” a tī na. 51Hava ha ama a ningneina nātā ei ti ni mak. Tenchu hava kuma chāizūng ulian khīt ei ni sika, hava nam ranga Isuo ei thi rang ruia dēchong ei ril a ni. 52#Isa 49:6Hava nam rang ronga ni mak, tenchu Pathian nāi ngāi mun tina anthek raka om ngāi munkhata ei mankhōmna rang a ni. 53#Mt 12:14Hatuka hava nikhuo nātā ama that ranga a val u na.
54Hasikhan Isuo chu Zehudi ngāi bila anlangpuma lēng lāi mak a. Tenchu hava nātā mibuiram kōla rama, Efraim ei ti u khopuia han a sē na. Hava han a zolāi ngāi le han a vā om a.
55 #
Ant 12:13; 2Kh 30:17-18; Mt 26:1-2; Mk 14:1 Zehudi ngāi Kallēn Pāntā chu a hong ānāi zei a. Mī tamtak chu Kallēn Pāntā phāmān a ninga ānthiang ranga khuo tetei ātā Zerusalem-a a sē u na. 56Amānī'n Isuo chu a ravān u na, tempula ei ānding balam u na, a chong u na, “Hong mo nei mandon u? Pāntāna ama chu hong nō ni mo?” a ti u na. 57Chāizūng ulian ngāi lē Farisāi ngāiin ama ei sūr thei una ranga, tūkareng ama ei omna āriat tak chu, amā'n ei hong ril rang, tīna chong a pēk u na.
தற்சமயம் தேர்ந்தெடுக்கப்பட்டது:
Zohan 11: RNL
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible in Ranglong, © Bibles International, the Bible society of Baptist Mid-Missions, 2024.