ଲୁକ 24
24
ଜିସୁଲା ଗୁଇ'ସେକ୍ ମାରି ବୁରଡେନ୍
(ମାତିଉ 28:1–10; ମାର୍କ 16:1–8; ଜଅନ୍ 20:1–10)
1ଉନ୍ତା ରଇବାର୍ଦିନ୍ ଇନ୍ଜୁର୍ ପୁରୁଂପୁରୁଂ ଗୁତୁନ୍ ସେଲାନେ ମା'ଏ ନିଜେ ବାସ୍ନାବାଇ' ଅ'ରଇଁୟ'କୁନୁଂ ଗୁଲାଇ ଆଜିସୁଲା ବୁଂଅଁ'କୁନୁଂ ରାଇ'ସାଂବକ୍ନା ଲାଗ୍ଲାଗ୍ବକ୍ ରିଂଅଁ' ଉଇଗା' । 2ରିଂଅଁ' ଉଇଗା'ସା' ଗୁତୁନ୍ ତୁମ' ଲାଗ୍ଲାଗ୍ବକ୍ ଅନ୍ତୁଡ'କୁନୁଂ ବୁରେ ଅ'କୁର'ସୁଂଅଁ'କୁନୁଂ ମା'ଏ ଜୁଲ' । 3ମାତର୍ ମା'ଏ ବିତ୍ରେ ଗାଇସେକ୍ ଜୁଲ'ସା' ପ୍ରବୁ ଜିସୁନା ମଟ୍ ଆତା ଆଡୁତା । 4ସା' ମା'ଏ ଗୁତୁନ୍ ଜୁଲ'ସେକ୍ କାବାକାବା ଡେଂକୁନୁଂବେଲା ତାର୍କି' ତାର୍କି'ବାଇ' ଇମ୍ପ' ଗଲି'କୁନୁଂ ଇମ୍ବାୟ ଇଂଗେରେ ମା'ଏନ୍ ଉନ୍ତୁ' ତଂକୁନୁଂ ଜୁଲ' । 5ସା' ଗୁତୁନ୍ ସେଲାନେ ଅବୁଦି ବୁତୁଂସେକ୍ ତୁବୁକ୍ବକ୍ ଅମିକ୍ଆର୍ଉଇଗା' । ସା' ଗୁତୁନ୍ ଦୁତପା ଇମ୍ବାୟ ଆମା'ଏ ସୁନ' “ପେ ମାସା' ବୁରକୁନୁଂରେମବକ୍ ଗୁଇ'କୁନୁଂ ରେମଲେନ୍ ବିତ୍ରେ ତୁର'ତୁପେ? 6-7#ମାତିଉ 16:21; 17:22,23; 20:18,19; ମାର୍କ 8:31; 9:31; 10:33,34; ଲୁକ 9:22; 18:31–33ମାଇ ଆକେ ଆଡୁତା, ମାଇ ବୁରଗୁତା! ‘ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ ନିଂ । ଆନିଂ ରେମଲେ ପାପ୍ବାଇ' ରେମଲେନ୍ ତିତିବକ୍ ଅସବ୍ତ ମାରି ମା'ଏ ଆନିଂ କୁର୍ସବକ୍ ତାଂଅଁ'ସେକ୍ ଅଗୁଇ'ତ ମାରି ତିନ୍ଦିନ୍ବକ୍ ନିଂ ବୁରତିଂ’ ଡ'ସେକ୍ ମାଇ ପେବୁରଂ ଗାଲିଲିବକ୍ ଡୁକୁନୁଂବେଲା ଆପେ ସୁନ'କୁନୁଂ ପେ ଏତ୍ ଆଡୁତୁପେ ଇ?” ଡ'ସେକ୍ ସୁନ' । 8ସା' ମା'ଏ ଜିସୁଲା ସୁନ'କୁନୁଂ ତୁମ' ଏତ୍ଗା' ।
9ମାରି ମା'ଏ ଲାଗ୍ଲାଗ୍କୁରୁଂ ଆନ୍ଡେଇଁସେ'ଗା ଏଗାର୍ଲକ୍ ସିସ୍ୟଲେବକ୍ ମାରି ଆଗୁଲାଇରସା କେନ୍ ଡେଂକୁନୁଂ ଗୁଲାଇ ସୁନ' । 10ମା'ଏ ଜାଜା ଡ'ନା ମଗ୍ଦଲିନି ମରିୟମା, ଜଆନାଲା, ଜାକୁବ୍ନା ୟଂ ମରିୟମା ମାରି ମା'ଏବୁରଂ ଡୁକୁନୁଂ ଗୁତୁନ୍ ପାଲ୍ ସେଲାନେସା କେନ୍ ଗୁଲାଇ ଡେଂକୁନୁଂ ବିସୟ ଆପେରିତଲେ ସୁନ' । 11ସୁନ'ସା' ମା'ଏ ସୁନ'କୁନୁଂ ଗୁଲାଇ ମୁଇ ସରସୁଇ'ନା ଉ'ସୁରାମ୍ସୁଗ ଆପେରିତଲେ ଡେଂଗା'ସା' ଗୁତୁନ୍ ସେଲାନେ ସୁନ'କୁନୁଂ ତୁମ' ମା'ଏ ସତ୍ ଆଡିକ୍ତ। 12ମାତର୍ ପିତର୍ଲା ତକ୍ଡାକ୍ସେକ୍ ଲାଗ୍ଲାଗ୍ବକ୍ ଉର'ଉର' ଉଇଗା' । ଉଇସେକ୍ ଏରୁଂଅଁ' ଜୁଲ'ସା' ଇମ୍ପ'ଉ ଡୁକୁନୁଂ ଜୁଲ' । ସା' ମାଇ ଗୁତୁନ୍ ଜୁଲ'ସେକ୍ ମି କେନ୍ ଗୁଲାଇ ଡେଂଗା'ଲେଇ ଡ' କାବା ଡେଂସେକ୍ ଡିଂଅଁବକ୍ ଇ'ଗା' ।
ଇମ୍ମାଇଉ ଉଂଗମ୍ବକ୍ ଉଇଡେଂକୁନୁଂ ଇମ୍ବାୟ ସିସ୍ୟବୁରଂ ଜିସୁଲା ଅଇଁଡେନ୍
(ମାର୍କ 16:12–13)
13ଉନ୍ତାଉ ଆଜିସୁଲା ବିସ୍ବାସ୍ ଡେମ'କୁନୁଂ ଇମ୍ବାୟ ଜିରୁସାଲମ୍କୁରୁଂ ଉନାଅଦିକ୍ ଏଗାର କିଲିମିଟର୍ ସୁଲୁଂ ଡୁକୁନୁଂ ଇମ୍ମାଇଉ ଡ'କୁନୁଂ ମୁଇ ଉଂଗମ୍ବକ୍ ଉଇଡେଂକୁ । 14ମାଇପା ଉଇଡେଂକୁନୁଂବେଲା ଆତା ମାମା ଡେଂକୁଗା' ଗୁତୁନ୍ ଗୁଲାଇଉ ଅଇଁୟ' ଅଇଁୟ' ଉଇଡେଂକୁ । 15ମାଇପା ଅଇଁୟ' ଉଇଡେଂକୁନୁଂବେଲା ଜିସୁଲା ନିଜେ ମାଇପାନ୍ବକ୍ ସାକ୍ସେକ୍ ତିରେ ଉଇଡେଂକୁ । 16ମାତର୍ ମାପ୍ରୁ ମାଇପାନା ମ' ଡାଲୁଲ'କୁନୁଂସୁଗ ଡେମ'ବୁଂଅଁ'ସା' ମାଇ ଜା ଡ'ସେକ୍ ମାଇପା ସମ' ଆଗଂତା ।
17ମାଇ ଆମାଇପା “ପା ଇମ୍ବାୟ ଉରିଂଅଁ' ଉରିଂଅଁ'ସେକ୍ ଅଇଁୟ'କୁନୁଂ ମା ସାମ୍ ଞାଂ?” ଡ'ସେକ୍ ଅ'ଗଁସ୍ଲା'ଗା' ।
ସା' ମାଇପା ସିନ୍ତାଲ'ସେକ୍ ଜୁ'ଜା' ତଂବେଡ' । 18ମାରି ମାଇପାନ୍କୁରୁଂ କେଲେୟପା ଡ'ସେକ୍ ଇମି ଡୁକୁନୁଂଆଁ ଆଜିସୁଲା ସୁନ' “ଜିରୁସାଲମ୍ ମୁନା'ଉଂଗମ୍ବକ୍ ଆନ୍ଦିନ୍ଆନ୍କାଲ୍ ଡେଂକୁନୁଂ ବିସୟ ଗୁଲାଇ ଜୁଜୁ ସା'କୁନୁଂଏଁନ୍ ବିତ୍ରେ ନ ମୁଇନ୍ଡାଉ ମମୁନାକ୍ରେମ୍ବାଇ' ଡୁତୁନକି ମି?” ଡ'ସେକ୍ ସୁନ' ।
19ସା' ମାଇ “ମାମା ଡେଂଗା' ଞାଂ” ଡ'ସେକ୍ ଅ'ଗଁସ୍ଲା'ଗା' ।
ସା' ମାଇପା ଆମାଇ ସୁନ' “ନାଜରିତ୍ ଉଂଗମ୍ନା ଜିସୁନା ବିସୟ । ମାଇ ଡ'ନା ମୁଇନ୍ଡା ବାବବାଦି ଡୁକୁ ମାରି ମାଇନା ଅଇଁସୁଁସୁବକ୍ସା କାମ୍ବକ୍ସା ମାପ୍ରୁ ଜୁଲ'ନାସା ରେମଲେ ଜୁଲ'ନାସା ଅବୁଦି ବପୁ ଡୁକୁ । 20ମାତର୍ ନେଇନା ମୁନା'ପୁଜାରିଲେ ମାରି ମୁନା'ରେମେ ଆମାଇ ଅଗୁଇ'ପୁଲେଇ ଡନ୍ଡ୍ ବେଡ'ସେକ୍ ରେମଲେନା ତିତିବକ୍ ଅସବ'ସା' ମା'ଏ ଆମାଇ କୁର୍ସବକ୍ ତାଂଅଁ'ସେକ୍ ଅଗୁୟ' । 21ମାଇଉ ଆନେନ୍ ଇସ୍ରାଏଲ୍ ରେମଲେ ଦାଇରେମ୍ନା ତିତିକୁରୁଂ ରକ୍ୟା ଡିନ୍ଡେମା ଡ'ସେକ୍ ନେଇ ଆସ୍କୁନେଇ । ଆଇ'ତୁନାଉ ଆରାକ୍, କେନ୍ ଗୁଲାଇ ଡେଂସେକ୍ ଆ'ନାବୁରଂ ତିନ୍ଦିନ୍ ଡେଂଗା' । 22ମାରି ନେଇବୁରଂ ଡୁକୁନୁଂ ସେଲାନେ ଏନ୍ତୁକ୍ର ସୁନ'କୁନୁଂ ଅଂଅଁ'ସେକ୍ ନେଇ କାବାଡେଂଉନେଇ । ମି ଡ'ନା ମା'ଏ ଞାଂ ଇନ୍ଜୁର୍ନୁକ୍ ଆଲାଗ୍ଲାଗ୍ ଉଇଆର୍କୁ । 23ମାତର୍ ମାଇନା ମଟ୍ ଆବାମ୍ତାସା' ମା'ଏ ସାକ୍ସେକ୍ ‘ନେଇ ଆମାପ୍ରୁନା ଦୁତପା ଜୁଲ'ନେଇ । ଗୁତୁନ୍ ଦୁତପା ଜିସୁଲା ବୁରଗୁତା ଡ'ସେକ୍ ଆନେଇ ସୁନ'’ ଡ' ମା'ଏ ବାର୍ସୁନ'। 24ସା' ନେମ୍ବାଇଲ'ଗେନ୍ ବିତ୍ରେ ଏନ୍ତୁକ୍ର ଲାଗ୍ଲାଗ୍ବକ୍ ଉଇସେକ୍ ସେଲାନେ ବାର୍ସୁନ'କୁନୁଂସୁଗ ଜୁଲ' । ମାତର୍ ମା'ଏ ଆଜିସୁଲା ଆଜୁତ ଡ'ତା” ଡ'ସେକ୍ ମାଇପା ଆଜିସୁଲା ସୁନ' ।
25ସା' ମାଇ ଆମାଇପା ସୁନ' “ଅ ବୁଦିଗିୟାନ୍ ଆରାକ୍ରେମ୍! ବାବବାଦିଲେ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ଗୁଲାଇ ବିସ୍ବାସ୍ ଡିନ୍ଡେମ୍ପୁଲେଇ ପାନ୍ ଜିବନ୍ବକ୍ ଅବୁଦି କସ୍ଟ ଡେଂଗୁତା । 26କିରିସ୍ଟଲା ମାପ୍ରୁନା ମଇମା ବୁମ୍ବାମ୍ ସିଁସେଇଁଉ ରେମଲେ ଆମାଇ ଡି'କେନ୍ କସ୍ଟ ବେ'ତ ଡ'ସେକ୍ ଲେକ୍ଲ' ଆଡୁତା ଇ?” ଡ'ସେକ୍ ସୁନ' । 27ଇନ୍ତେକନ୍ଡେକ୍ ମସାଲା ଲେକ୍ଲ'କୁନୁଂ ନିୟମ୍ବକ୍ ମାରି ବାବବାଦିଲେ ଲେକ୍ଲ'କୁନୁଂବକ୍ ମାରି ଗୁଲାଇ ମାପ୍ରୁନା ଉଲାକ୍ବକ୍ ମାଇନା ବିସୟ ଲେକ୍ଲ'କୁନୁଂ ଗୁଲାଇ ଜିସୁଲା ଆମାଇପା ଅମାଗ'ବେଡ' ।
28ମାରି ମାଇପା ଉଇଡେଂକୁନୁଂ ଉଂଗମ୍ ଉନ୍ତୁ' ସା'ଗା'ସା' ଜିସୁଲା ମାରି ଡଗ୍ରି'ତା ଉଇଡେଂକୁନୁଂସୁଗ ଅସୁୟ' । 29ସା' ମାଇପା ଆମାଇ ସୁନ' “ଜୁ, ଅବୁଦି ଡେରି ଡେଂଗା'ବେ । ମାରି ମୁନ୍ଡିପ୍ ଡେନ୍ତା, ଲ ଆ'ନା ନାଂବକ୍ ବାସାଲାବେ” ଡ'ସେକ୍ ଆମାଇ ସୁତ୍ରାୟସେକ୍ ସୁନ' । ସା' ମାଇ ମାଇପାବୁରଂ ବାସାପୁଲେଇ ଉଇଗା' ।
30ମାରି ମାଇ ମାଇପାବୁରଂ ସୁସୁମ୍ପୁଲେଇ ଲେଇ'ସେକ୍ ମାଇ ରୁଟି ଜୁଗ' ଆମାପ୍ରୁ ସୁନ୍ଡ୍ରକ୍ସେକ୍ ଆମାଇପା ସେତୁଗ'ସେକ୍ ବେଡ' । 31ସା' ଆଇ'ତୁନ୍ବେଲା ମାଇପାନା ମ' ଡାଲୁଲ'କୁନୁଂସୁଗ ଡେଂକୁନୁଂ ତଗ୍ଡାକ୍ ଉଇଗା'ସା' ମାଇପା ଆମାଇ ସମଡ' । ମାତର୍ ମାଇ ମାଇପାନା ସାର୍ମ'କୁରୁଂ ଆଇ'କୁ ବୁକ୍ଉଇଗା' । 32ସା' ମାଇପା ଇମ୍ବାୟ ମାଇପାନ୍ ବିତ୍ରେଉ ଅସୁନୁଗା' “ଜୁ, କୁରୁଂବକ୍ ମାଇ ନାଂବୁରଂ ଅଇଁୟ'କୁନୁଂବେଲା ମାରି ଆନାଂ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ତୁମ' ଅମାକ୍ବେଲା, ମା ନାଂନା ଜିବନ୍ ସାର୍ଦାକ୍ସେକ୍ ଅବୁଦି ତୁର୍ଉଇଡେଂକୁନୁଂସୁଗ ଡେଂକୁ କି ଆରାକ୍?” ଡ'ସେକ୍ ମାଇପା ଅଇଁୟ' ।
33ମାରି ମାଇପା ଆଇ'ତୁନ୍ବେଲା ଆଇ'କୁ ତକ୍ଡାକ୍ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ଆନ୍ଡେଇଁଗା' । ମାରି ଆତା ଏଗାର୍ଲକ୍ ସିସ୍ୟଲେ ମାରି ମା'ଏବୁରଂ ଡୁକୁନୁଂଏଁ ଗୁଲାଇର ରୁନ୍ସେକ୍, 34ପ୍ରବୁ ସତଇସା ବୁରଗୁତା ମାରି ଆସିମନ୍ଲା ଅ'ତୁନାଗୁତା ଡ'ସେକ୍ ମା'ଏ ଅଇଁଡେଂକୁନୁଂ ମାଇପା ଜୁଲ' । 35ମାରି କୁରୁଂବକ୍ ଡେଂକୁନୁଂ ଗୁଲାଇ ମାରି ଜିସୁଲା ରୁଟି ସେତୁଗ'ସେକ୍ ଆମାଇପା ବିବେ'ବେଲା ମି ଆମାଇପା ମାଇ ଅ'ସମ'ଗା' ଡ'ସେକ୍ ଗୁଲାଇ ମାଇପା ଆମା'ଏ ସୁନ' ।
ଜିସୁଲା ଆମାଇନା ସିସ୍ୟଲେ ଅ'ତୁନାଡେନ୍
(ମାତିଉ 28:16–20; ମାର୍କ 16:14–18; ଜଅନ୍ 20:19–23; ପେରିତ 1:6–8)
36ମାରି ମା'ଏ କେନ୍ ଗୁଲାଇ ଅଇଁୟ'କୁନୁଂବେଲା ଜିସୁଲା ନିଜେ ମା'ଏନ୍ ମନ୍ଜା ସାକ୍ସେକ୍ ଆମା'ଏ ସୁନ' “ଆପେ ସାନ୍ତିସାର୍ଦା ବାମେଇ'” ଡ'ସେକ୍ ସୁନ' ।
37ମାତର୍ ମା'ଏ ନେଇ ଆମୁଇ ସା'ଏରେମ୍ ଜୁଲ'ତୁନେଇ ଡ' ଏତ୍ସେକ୍ ଅବୁଦି ବୁତୁଂଆର୍ଗା' । 38ସା' ଜିସୁଲା ଆମା'ଏ ସୁନ' “ମାସା' ଆଇ'କେନ୍ ବୁତୁଂଗୁତୁପେ? କେନ୍ ନିଂ କି ଆରାକ୍ ଡ'ସେକ୍ ପେନ୍ ଜିବନ୍ ବିତ୍ରେ ମାସା' ଏତ୍ଗୁତୁପେ? 39କେନ୍ ନିଂଉ । ନିଂନା ତିତି ତିକ୍ସୁଂ ଜୁ । ଆରାକ୍ ଡ'ନା ଆନିଂ ତୁରାମ'ସେକ୍ସା ଜୁ । ଆନିଂ ସେଲି ମାରି ସିକ୍ସାଂ ଡୁକୁନୁଂସୁଗ ଆବୁତ୍ଲେ ଆଡୁତା” ଡ'ସେକ୍ ସୁନ' ।
40ଡି'କେନ୍ ସୁନ'ସେକ୍ ଆମା'ଏ ମାଇନା ତିତି ତିକ୍ସୁଂ ଅସୁୟ' । 41ଡୁ'ତୁନ୍ ଅସୁୟ'ସା'ଏସା ମା'ଏ ଗୁତୁନ୍ ବିସ୍ବାସ୍ ମଡିନେମ୍ ଅବୁଦି ସାର୍ଦା ଡେଂସେକ୍ କାବା ଡିନ୍ଡେଂ ଆର୍କୁ । ସା' ଜିସୁଲା ଆମା'ଏ “ପେନ୍ବକ୍ ଆକେ ମାଏସା ସୁସୁମ୍ନା ଡୁତା କି” ଡ'ସେକ୍ ଅ'ଗଁସ୍ଲା'ଗା' । 42ସା' ମା'ଏ ଆମାଇ ଗାୟ'କୁନୁଂ ଇ'କି ଆ'ଡଂ ବେଡ' । 43ସା' ମାଇ ଗୁତୁନ୍ ସବ'ସେକ୍ ମା'ଏ ଜୁଲ'କୁନୁଂବକ୍ଉ ସୁମ' ।
44ମାରି ମାଇ ଆମା'ଏ ସୁନ' “ମସାଲା ଲେକ୍ଲ'କୁନୁଂ ନିୟମ୍ବକ୍ ମାରି ବାବବାଦିଲେ ଲେକ୍ଲ'କୁନୁଂବକ୍ ମାରି ଗିତସଂଗିତାବକ୍ ନିଂନା ବିସୟରେ ମା ଲେକା ଡୁତା ଗୁତୁନ୍ ଗୁଲାଇ ସତ୍ ଡିନ୍ଡେମ୍ ଡୁତା ଡ'ସେକ୍ ନିଂ ପେବୁରଂ ଡୁକୁନୁଂବେଲା ଆପେ ସୁନ'ବୁଂଅଁ'ନିଂ” ଡ'ସେକ୍ ସୁନ' ।
45ସୁନ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ତୁମ' ଗୁଲାଇ ମୁମାକ୍ପୁଲେଇ ମାଇ ଆମା'ଏ ବଲ୍ବାଇ' ବୁଦିଗିୟାନ୍ ବେଡ' । 46ମାରି ମାଇ ଆମା'ଏ ସୁନ' “ମାପ୍ରୁନା ଉଲାକ୍ବକ୍ ଡି'କେନ୍ସା ଲେକା ଡୁତା, କିରିସ୍ଟ ଦୁକକସ୍ଟ ବାଂସେକ୍ ଗୁଇ'ତା ମାରି ଗୁଇ'କୁନୁଂଏନ୍କୁରୁଂ ତିନ୍ଦିନ୍ବକ୍ ବୁରତା । 47ମାରି ଜାଜା ମା'ଏ ଡେମ'କୁନୁଂ ପାପ୍କାମ୍ ତର୍ମୁଲୁଇ'ଉ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁତା ଡ'ନା ମା'ଏନା ପାପ୍ ମାପ୍ରୁ କେମା ଡେମ୍ତ ଡ'ସେକ୍ ଜିରୁସାଲମ୍ ମୁନା'ଉଂଗମ୍କୁରୁଂ ମୁଲାୟ'ସେକ୍ ଗୁଲାଇ ଜାତିନ୍ ରେମଲେନ୍ବକ୍ ଉଇସେକ୍ ସୁଁସୁପୁଲେଇ ନିଂ ଆପେ ବେନ୍ଟାଇତିଂ ଡ'ସେକ୍ସା ଲେକ୍ଲ'ତା । 48ପେ ଗୁଲାଇର କେନ୍ ଗୁଲାଇ ବିସୟନା ସାକି ଡୁତୁପେ । 49#ପେରିତ 1:4ମାରି ନିଂନା ବା ମା ବେ'ତିଂ ଡ'ସେକ୍ ପର୍ମାନ୍ ସବ'ତା ଗୁତୁନା ନିଂ ନିଜେ ପେନ୍ବକ୍ ବେନ୍ଟାଇତିଂ । ମାତର୍ କି'ତୁଂକୁରୁଂ ମାପ୍ରୁନା ବପୁ ବୁମ୍ବାମ୍ପନ୍ତେ'କା ପେ ଆକେନ୍ ଉଂଗମ୍ଉ ଡୁକୁଲା ।”
ଜିସୁଲା ସରଗ୍ବକ୍ ଡୁଡାଇ'ଡେନ୍
(ମାର୍କ 16:19–20; ପେରିତ 1:9–11)
50 #
ପେରିତ 1:9–11
ତିର୍ଗି' ଜିସୁଲା ଆମା'ଏ ବେତନିଆ ଉଂଗମ୍ କନ୍ଡେକ୍ ୱାୟ' ଉଇଗା' । ମାରି ମାଇ ନିଜର୍ନା ତିତି ଲେନ'ସେକ୍ ମାପ୍ରୁ ଆପେ ଆସିର୍ବାଦ୍ ଡେମେଇ' ଡ'ସେକ୍ ସୁନ' । 51ମାରି ମାଇ ମାପ୍ରୁ ଆପେ ଆସିର୍ବାଦ୍ ଡେମେଇ' ଡ'ସେକ୍ ଆମା'ଏ ସୁଁସୁ ବେଲାଉ ମା'ଏନ୍କୁରୁଂ ମାଇ ପାଲ୍ ଡେଂଗା' ମାରି ମାପ୍ରୁ ଆମାଇ ସରଗ୍ବକ୍ ରିଂଅଁ' ଡାଇ'ଗା' । 52ମାରି ମା'ଏ ଆମାଇ ଏନ୍ଡିକ୍ସେକ୍ ସୁନ୍ଡ୍ରଗା' ମାରି ଅବୁଦି ସାର୍ଦା ଡେଂସେକ୍ ଜିରୁସାଲମ୍ ମୁନା'ଉଂଗମ୍ବକ୍ ଆନ୍ଡେଇଁଗା' । 53ଆନ୍ଡେଇଁସେକ୍ ଇସାଉ ମନ୍ଦିର୍ବକ୍ ଡୁକୁକ୍ସେକ୍ ଆମାପ୍ରୁ ସୁନ୍ଡ୍ରକୁ ।
தற்சமயம் தேர்ந்தெடுக்கப்பட்டது:
ଲୁକ 24: BFW
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
CC BY-NC-ND 4.0