ยอห์น 1 నుండి ప్రసిద్ధ బైబిల్ శ్లోకాలు

షేర్ చేయి

หม่าแน๊เรอ แกแย เด๊อ อา เอ๊ฉื่อ ลู เต๊เห่ เร๊อ อา หยื่อเอ่แหน่ ลู เต๊เห่เนอ, อา เด๊อะทวาแถ่ เหย่ซี เร๊อ จอแปแหร่ อา พู๊เหมาะ พู๊คู เต๊เห่.

เด๊อ จอแปแหร่ แบ๊แล แต่ล๋าย เห่ขุ โต่ เบ๊อะเนอปาเนอ, อู เอ๊ ลู เร๊อ เตลาเตโหง่ เออเตเพรเนอ, อา โอ่โทดื่อ เฮ๊อ. เตลาเตโหง่ เออเนอ อา โอ่ เกอ เร๊อ จอแปแหร่ เร๊อ เตลาเตโหง่ เออเนอหมา หม่าเฮ๊อ จอแปแหร่ เฮ๊อ.

อา หม่า อาแซ่เน๊อ เตลี เร๊อ อา ลีเตเค เด๊อ เตคี๊ อาเกล เร๊อ เตคี๊ เมเป่แก แจ่ ลู โต่.

แกแย เด๊อ อู เอ๊ อา เร๊อ เตลาเตโหง่ เออเตเพรเนอ, อา แฮทวา ฮู๊ แกแย เนอ เร๊อ อา แฮ โอ่เซอเพร เฮ๊อ เด๊อ เปเกล. เป แม๊เถอะเฮ๊อ อา เตเตอเรอดุ เตอเรอทู. จอแปแหร่ อาพู๊คู ย๊อโอ่ตื้อ เตเพรแพ๊ อาขว่าอาคยา, อา พย๊าหนิ ลอปลี เจ๊อ เตเตอเรอดุ เตอเรอทู เออ เด๊อ อาเพโอ่ เจ๊อ. อา หม่า แกแย เด๊อ อา เล๊อบา เร๊อ เตบุ๊ยเตเตอเรอ เร๊อ เตหมะเตจ๊อ เตเพร.

จอแปแหร่ นอแบ๊แลโดโต่ แฮเง ลู ปว๊าเต๊อเจ่อ. เต เด๊อ อา แบ๊แล โต่ เนอ อา โอ่ เตอเจ๋อ โต่. อา หม่า เตเซอเพร อา แก่ช๊าแก่แร เร๊อ เตเซอเพร เออเนอ อา เด๊อะ เตลี เด๊อ อู ปว๋า เตเพร อาเง.

เด๊อคยา เตอเนอเนอ, คูยอห์น แม๊เถอะ เหย่ซู่ แฮ เด๊อ อา โอ่ เร๊อ อา เฮ๊ เน๊อ, “แม๊มอ, จอแปแหร่ อาซิหมิพู๊ เด๊อ อา พย๊าวีแกแก แกแย เห่ขุพู๊ อา เตซื๊อเตโอ่หร่า เต๊เห่ เออเนอ เตเพร.

อา แฮ โอ่เซอเพร โทเฮ๊อ เด๊อ เห่ขุเออ เฮ๊อ. เร๊อ อา แบ๊แล เร๊อดื่อ เจ๊อ เห่ขุเออ ตื๊อดื่อเร๊อ อา หม่า แกแย ฮู๊เต เตเพรเนอ เห่ขุพู๊ ซิเงโปล ลู โต่. อา แฮ เด๊อ อา แกแย เร๊อดื่อ เออเต๊เห่ อา โอ่ ตื๊อดื่อเร๊อ อาแกแย เร๊อดื่อ เต๊เห่ เอ๊ฉื่อ ลู โต่.

เตลี หม่าแหน่ เออเนอ, อา เตเร แฮโน เฮ๊อ เด๊อ เห่ขุเออ เฮ๊อ, เร๊อ อา เก่ ลีเตเค แถ่โล เป่ อู ปว๋า เตเพร.

จอแปแหร่ เด๊อะตา เตซว๊าเตแส่ เร๊อ คูโมเสส เร๊อ คูโมเสส เด๊อะตา แฮเง เน๊อ เป, ตื๊อดื่อเร๊อ เหย่ซู่ครี๊ หม่า หม่าเฮ๊อ แกแย เด๊อ อา เด๊อะตา เป่ เป เตบุ๊ยเตเตอเรอ เร๊อ เตหมะเตจ๊อ.