یوهَنّا 5
5
ناجۆڑێن مردێئے دْرهبکشی
1چیزّے وهدا رند، یَهودیانی یکّ ائییدے اَت و ایسّا اورشَلیما شت. 2اورشَلیما، دَروازگێئے نزّیکّا که آییا پَسئے دروازگَ گوَشنت، هئوزے هست‌اِنت که آییئے چپّ و چاگردا پنچ ائیوان#5:2 ائیوان دْراجێن بَرانڈهے که دوێن نێمگان پادگی پِر. اَنت. اَرَمایی زبانا اے هئوزا بئیت‌هَسْدا گوَشنت. 3اۆدا بازێن آجز و نادْراهے وپتگ‌اَت که کۆر و لَنگ و مُنڈ اَتنت.#5:3 لهتێن نۆکترێن دَزنبشتا گێش کنگ بوتگ: اۆدا بازێن آجز و نادْراهے وپتگ‌اَت که کۆر و لَنگ و مُنڈ اَتنت و آپئے تچگئے اِنتزار و ودارا اَتنت. چێا که برے برے هُداوندئے پرێشتگے اے هئوزا آتک، آپیَ رُمبێنت و رئوانَ کرت. هر وهدا که آپَ تتک، هر نادْراها که پێسرا آپا مانَ دات، هر پئیمێن ناجۆڑیے که هست‌اَتی، دْراهَ بوت.
5اۆدا مردے هست‌اَت که آییئے ناجۆڑیا سی و هشت سال اَت. 6وهدے ایسّایا دیست که آ مرد اۆدا کپتگ و زانتی که کوَهنێن نادْراهے، گوَشتی: ”تئو لۆٹئے وشّ و دْراه ببئے؟“ 7آ نادْراها گوَشت: ”او واجه! وهدے آپَ رُمبیت و رئوانَ بیت، کَسے نێست که منا هئوزا دئور بدنت. تان من وتا برسێنان، دگرے پێسرا آپا مانَ دنت.“ 8ایسّایا گوَشت: ”پاد آ، وتی نِپادان بزور و برئو.“ 9آ مرد دْراه بوت، وتی نِپادی زرتنت و راه گپت.
اے رۆچ شَبَّتئے رۆچ#5:9 شَبَّتئے رۆچ هما شمبِه اِنت، بزان یَهودیانی کار نکنگئے رۆچ. اَت. 10پمێشکا یَهودیان گۆن دْراه بوتگێن مردا گوَشت: ”مرۆچی شَبَّتئے رۆچ اِنت، ترا وتی نپادانی چست کنگئے هَکّ نێست.“ 11گوَشتی: ”آ مردا که منا دْراه کرت، گوَشتی: ’وتی نپادان بزور و برئو.‘“ 12جُستِش کرت: ”آ مرد کئے اِنت که ترا گوَشتگی که وتی نپادان بزور و برئو؟“ 13بله دْراه بوتگێن مردا نزانت که آ کئے اَت. چێا که اۆدا مردم مُچّ اَتنت و ایسّا مُچّیئے تها شتگ‌اَت.
14رَندا ایسّایا اے مرد مزنێن پرستشگاها دیست، گوَشتی: ”بچار، نون که تئو دْراه بوتگئے، چه اِد و دێم گناه مکن. چُش مبیت که گَنترێن بلاهے تئیی سرا بکپیت.“ 15نون مرد شت و گۆن یَهودیان گوَشتی: ”آییا که منا دْراه و سلامت کرت، آ ایسّا اَت.“
16یَهودیان ایسّائے آزار دئیگ بِندات#5:16 بِندات، بزان بُنگێج، شُرو. کرت، چێا که آییا شَبَّتئے رۆچا چُشێن کارَ کرتنت. 17بله ایسّایا گۆن آیان گوَشت: ”منی پت اَنگت کارا اِنت، من هم کارَ کنان.“ 18چه اے هبران، یَهودیان په آییئے کُشگا گێشتر تچ و تاگَ کرت. چێا که شَبَّتئے هُکمئے پرۆشگا اَبێد، آییا هُدا هم وتی جندئے پت گوَشت و اے ڈئولا، وتا گۆن هُدایا برابری کرت.
هُدائے چُکّئے اِهتیار
19گڑا ایسّایا گوَشت: ”شمارا راستێنَ گوَشان، چُکّ وتسرا هچّ کارے کرتَ نکنت، پتئے کارانَ گندیت و آیانی رَندگیریا کنت. هر کارے که پتَ کنت، چُکّ هم هما کارا کنت. 20چێا که پت چُکّا دۆستَ داریت و هرچے که وتَ کنت، چُکّا هم سۆجَ دنت. چُکّا دگه مسترێن کار هم سۆجَ دنت تانکه شما هئیران و هبَکّه#5:20 هَبَکّه، بزان هئیران، اَجِکّه، اَبَکّه. ببێت. 21هما پئیما که پت مُردگان زندگَ کنت و آیان زِندَ بَکشیت، چُکّ هم هرکَسا که بلۆٹیت زندگَ کنت. 22پت هچکَسێئے سرا شئور و هُکمے نبُرّیت،#5:22 شئور و هُکم بُرّگ، بزان پئیسله کنگ. آییا وتی دادرسیئے سجّهێن اِهتیار چُکّئے دستا داتگ‌اَنت، 23تانکه سجّهێن مردم هما ڈئولا که پتا اِزَّتَ دئینت، چُکّا هم اِزَّت بدئینت. کَسے که چُکّا اِزّتَ ندنت، پتا هم اِزّتَ ندنت، چێا که چُکّئے دێم دئیۆک پت اِنت.
24شمارا راستێنَ گوَشان، هرکَس که منی هبرا بِشکنت و منی دێم دئیۆکئے سرا ایمان بیاریت، اَبدمانێن زِندئے واهندَ بیت و هچبر مئیاریگ کنگَ نبیت، بزان آ چه مَرکا گوَستگ و زندا سر بوتگ. 25باور کنێت، یکّ وهدے کئیت و اے وهد انّون بُنگێج بوتگ که مُردگ هُدائے چُکّئے تئوارا اِشکننت و هرکَس که بِشکنت پدا زندگَ بیت. 26چێا که هما ڈئولا که پت زِندمانئے سَرچمّگ#5:26 سرچمّگ، بزان سَرچَشمه. اِنت، چُکّا هم اے واک#5:26 واک، بزان زۆر، تاکت. و توانی داتگ که زِندمانئے سَرچمّگ ببیت. 27پتا دادرسیئے اِهتیار هم چُکّئے دستا داتگ، چێا که آ انسانئے چُکّ اِنت. 28-29چه اِشیا هئیران و هَبَکّه مبێت، چێا که یکّ وهدے کئیت که سجّهێن مُردگ آییئے تئوارا اِشکننت و چه وتی کَبران درَ کایَنت. نێک‌کار دێم په اَبدمانێن زِندا رئونت و بدکار دێم په مئیاریگ بئیگا. 30من وتسرا کارے کرتَ نکنان، هر چیزّے که من اِشکتگ، هماییئے بُنیادا دادرسیَ کنان و منی دادرسی بَرهَکّ اِنت، پرچا که من وتی دلئے واهگانی سَرجم کنگئے پد و رندا نه‌آن، وتی دێم دئیۆکئے واهگانی سَرجم کنگئے پد و رَندا آن.
ایسّائے بارئوا گواهی
31اگن من وتی بارئوا وت گواهی بدئیان، منی گواهیا اِهتبار و اَرزشے نبیت. 32بله دگرے هست‌اِنت که منی بارئوا گواهیَ دنت و منَ زانان که منی بارئوا آییئے گواهی راست اِنت. 33شما وتی کاسِد یَهیائے کِرّا رئوان داتنت و منی بارئوا آییئے داتگێن گواهی هم راست اَت. 34من مردمانی گواهیا نَمنّان، په شمئے رَکّێنگا اے هبرانَ گوَشان. 35یَهیا رۆکێن چِراگے اَت و رُژنی تالانَ کرت و شما اِراده کرت که په کمّێن وهدێا آییئے نورئے تها گَل ببێت.
36بله منا چه یَهیایا مسترێن شاهد هست. همے کار که پتا منی دستا داتگ‌اَنت که سَرجمِش بکنان و من سَرجمِشَ کنان، همے کار منی شاهد اَنت که منا پتا رئوان داتگ. 37هما پتا که منا رئوان داتگ، آیا وت منی برئوا شاهدی داتگ. شما هچبر آییئے تئوار نه‌اِشکتگ و آ ندیستگ و 38آییئے هبر شمئے دلا نَنِندیت، چێا که شما آییئے رئوان داتگێنئے سرا ایمانَ نئیارێت. 39شما پاکێن کتابان پَٹّ و پۆلَ#5:39 پَٹّ و پۆل، بزان پَٹّ و لۆٹ، وانَگ و چارَگ، تَهکیک. کنێت و وانێت، چێا که شمئے هئیالا اِشانی تها شمارا اَبدمانێن زِندَ رسیت. همے پاکێن کتاب منی بارئوا گواهیَ دئینت، 40بله شما نلۆٹێت منی کِرّا بیاێت و شمارا اے زِند برسیت.
41من مردمانی داتگێن ستا و اِزّتا نزوران. 42شمارا جاهَ کاران و زانان که هُدائے مِهر شمئے دلا نێست‌اِنت. 43من وتی پتئے نامئے سرا آتکگان و شما منا نمَنّێت، بله اگن کَسے وتی جندئے ناما بیئیت، آییا مَنّێت. 44شما چه یکدگرا مزنی و اِزَّتَ زورێت، بله آ اِزَّت که چه هُدائے نێمگا کئیت، آییئے شۆهازا نه‌اێت. گڑا چۆن ایمان آورتَ کنێت؟
45گُمان مکنێت که من پتئے دێما شمارا مئیاریگَ کنان. اے موسّا اِنت که شمارا مئیاریگَ کنت، هما موسّا که شما آییئے سرا اُمێت بستگ. 46اگن شمارا موسّائے سرا ایمان بوتێن، شمارا منی سرا هم ایمان بوتگ‌اَت، چێا که آییا منی بارئوا نبشتگ. 47بله شما که آییئے نبشته کرتگێنان باوَرَ نکنێت، منی هبران چۆن باوَرَ کنێت؟“
ప్రస్తుతం ఎంపిక చేయబడింది:
یوهَنّا 5: HPKB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2016-22 Wycliffe Bible Translators, Inc.