Lukas 5
5
Yexus Hu Thawj Cov Thwjtim
(Mathais 4:18-22; Malakaus 1:16-20)
1Muaj ib hnub thaum Yexus sawv nram ntug Hiavtxwv Nkenexales,#5:1: Hiavtxwv Nkenexales los kuj yog Hiavtxwv Kalilais thiab. muaj neeg coob-coob sib txiv qev tuaj cuag Nws thiab mloog Vajtswv Txojlus. #Math 13:1-2; Malak 3:9-10; 4:1 2Nws pom ob lub nkoj nres ntawm ntug dej, cov neeg nrhiav ntses twb tawm hauv nkoj thiab mus ntxhua lawv tej vas lawm. 3Yexus nce mus rau hauv ib lub nkoj, lub ntawd yog Ximoos lub. Yexus thiaj hais kom Ximoos ib nyuag thawb lub nkoj kom nrug deb ntawm ntug dej mentsis, ces Nws txawm zaum hauv lub nkoj qhia cov neeg uas tuaj ntawd.
4Thaum Nws qhia tag lawm, Nws hais rau Ximoos hais tias, “Nquam lub nkoj mus kom deb zog rau tom qhov uas tob-tob, thiab muab nej cov vas tso rau hauv dej kom mag ntses.”
5Ximoos teb tias, “Tus Tswv, peb siv zog ntaus ib hmos nkaus yeej tsis tau dabtsi li, tiamsis yog Koj ho hais li ntawd los cia kuv mam tso cov vas mus rawsli Koj hais.” #Yauh 21:3 6Lawv txawm tso cov vas mus rau hauv dej thiab mag ntses ntau kawg li, ua rau lawv cov vas tshuav ntuag lawm xwb. #Yauh 21:6 7Lawv thiaj co tes kom lawv cov phoojywg uas caij lwm lub nkoj los pab lawv. Cov phoojywg thiaj los thiab lawv muab tau ntses puvnkaus ob lub nkoj, ua rau ob lub nkoj yuavluag tog. 8Thaum Ximoos Petus pom li ntawd, nws txhoscaug ntua ntawm Yexus xubntiag thiab hais tias, “Tus Tswv, thov Koj txav deb ntawm kuv mus, rauqhov kuv yog neeg txhaum!”
9Ximoos thiab cov neeg uas nrog nws nyob ntawd xav tsis thoob hais tias uacas lawv yuav tau ntses ntau ualuaj. 10Ob tug uas nrog Ximoos ntaus ntses uake yog Yakaunpaus thiab Yauhas, uas yog Xenpedais ob tug tub, los kuj xav tsis thoob ib yam nkaus thiab. Yexus hais rau Ximoos hais tias, “Koj tsis txhob ntshai; txij no mus koj yuav ua tus uas nrhiav neeg.”
11Thaum lawv sawvdaws rub ob lub nkoj los rau tim ntug lawm, ces lawv txawm tso txhua yam tseg thiab nrog Yexus mus.
Yexus Kho Tus Txivneej Mob Ruas
(Mathais 8:1-4; Malakaus 1:40-45)
12Muaj ib zaug Yexus nyob hauv ib lub nroog. Hauv lub nroog ntawd muaj ib tug txivneej uas mob ruas#5:12: mob ruas: lus Kilis siv lolus no rau ntau yam kab mob uas yog mob phem-phem rau ntawm daim tawv nqaij, kuj yuav tsis yog kiag mob ruas thiab. thoobplaws ibce. Thaum nws pom Yexus, nws txawm txhoscaug ntua rau hauv av thov Yexus hais tias, “Tus Tswv, yog Koj txaussiab tiag, Koj yeej muaj cuabkav kho tau kom kuv zoo!”#5:12: kom kuv zoo: Yam mob no lawv suav hais tias yog ib yam uas ua rau neeg tsis huv rawsli lawv tej kevcai.
13Yexus thiaj cev tes mus tuav nkaus tus txivneej ntawd thiab hais tias, “Kuv txaussiab pab koj, koj ciali zoo hlo!” Tamsim ntawd nws tej ruas txawm zoo tas huv tibsi lawm. 14Yexus hais tias, “Koj tsis txhob mus qhia zaj no rau leejtwg li, tiamsis koj ciali ncajnraim mus cuag tus povthawj hlob thiab kom nws tshuaj saib koj lub cev; thiab koj nqa khoom mus fij rau Vajtswv rawsli Mauxes tau qhia tseg, thiaj ua tau timkhawv rau sawvdaws paub tias koj twb zoo lawm.” #Levi 14:1-32
15Tiamsis Yexus lub moo hajyam nrov-ncha mus thoobplaws txhua qhov, thiab muaj neeg coob-coob tuaj mloog Yexus qhia thiab thov Yexus kho lawv tej mob. 16Tiamsis Yexus pheej mus rau tej qhov chaw uas ntsiagto thiab thov Vajtswv qhov ntawd.
Yexus Kho Tus Txivneej Uas Tuagtes Tuagtaw
(Mathais 9:1-8; Malakaus 2:1-12)
17Muaj ib hnub thaum Yexus tabtom qhia, muaj cov Falixais thiab cov xibhwb uas qhia Kevcai qeeleej tuaj nyob ntawd mloog thiab. Lawv tuaj hauv txhua lub zos uas nyob hauv lub xeev Kalilais, xeev Yudas, thiab lub nroog Yeluxalees tuaj. Tus Tswv lub hwjchim yeej nyob nrognraim Yexus kom Nws kho tau tej neeg uas muaj mob kom zoo.
18Muaj ib co txivneej txawm muab ib daim lev kwv ib tug txivneej tuagtes tuagtaw tuaj, lawv yuav kwv mus rau hauv lub tsev thiab muab tso rau ntawm Yexus xubntiag. 19Tiamsis vim muaj neeg coob heev, lawv tsis tau kev kwv mus rau hauv, yogli ntawd, lawv thiaj kwv nws nce mus rau saum rutsev, txheej tsev lastshav, lawv yaws cov vuas ib qho thiab muab nws tso dauv nrog daim lev los rau hauv plawv ntawm cov neeg sawvdaws, uas ncaj nkaus ntawm Yexus xubntiag. 20Thaum Yexus pom tias lawv muaj kev ntseeg heev, Nws txawm hais rau tus txivneej ntawd hais tias, “Tus phoojywg 'e, koj lub txim twb raug zam lawm.”
21Cov xibhwb uas qhia Kevcai thiab cov Falixais txawm xav hauv lub siab hais tias, “Tus neeg no yog leejtwg, es Nws haislus saib tsis taus Vajtswv li! Tsis muaj leejtwg yuav zam tau neeg lub txim, tsuas yog Vajtswv tibleeg xwb thiaj zam tau!”
22Yexus twb paub tej uas lawv xav ntawd lawm, Nws thiaj hais rau lawv tias, “Uacas nej lub siab yuav xav li ntawd? 23Lolus uas hais tias, ‘Koj lub txim twb raug zam lawm’ lossis lo uas hais tias, ‘Ciali sawvtsees thiab mus kev!’ 24Ob lolus no lo twg yuav yoojyim hais dua? Kuv yuav ua li no qhia rau nej paub tias Neeg Leejtub muaj hwjchim nyob hauv ntiajteb zam tau neeg lub txim.” Yexus thiaj hais rau tus txivneej tuagtes tuagtaw tias, “Kuv hais rau koj hais tias, koj ciali sawvtsees, nqa koj daim lev thiab mus tsev!”
25Tamsim ntawd nws txawm sawvtsees tabmeeg sawvdaws, nqa hlo nws daim lev mus tsev thiab ua Vajtswv tsaug. 26Cov neeg coob-coob ntawd ciali xav tsis thoob li, lawv ntshai, thiab lawv qhuas Vajtswv hais tias, “Hnubno peb tau pom tej yam uas tsis tau pom dua li!”
Yexus Hu Levis
(Mathais 9:9-13; Malakaus 2:13-17)
27Tomqab ntawd, Yexus txawm tawm mus thiab Nws pom ib tug txivneej sau se hu ua Levis zaum ntawm lub rooj sau se. Yexus hais rau nws tias, “Koj ciali nrog Kuv mus.” 28Levis txawm sawvtsees, tso txhua yam tseg thiab nrog Nws mus.
29Levis npaj tau ib rooj mov uas loj kawg li nyob hauv nws tsev rau Yexus noj. Muaj coob leej uas yog cov neeg sau se thiab lwmtus kuj nrog lawv koom tsum noj mov uake thiab. 30Cov Falixais thiab cov xibhwb uas qhia Kevcai uas yog cov Falixais pab, yws rau Yexus cov thwjtim hais tias, “Uacas nej nrog cov neeg sau se thiab cov neeg muaj txim noj mov uake?” #Lukas 15:1-2
31Yexus teb lawv hais tias, “Cov neeg tsis muaj mob yeej tsis cheemtsum kws-khomob, tsuas yog cov muaj mob thiaj cheemtsum xwb. 32Kuv tsis yog los hu cov neeg ncajncees, tiamsis yog los hu cov neeg muaj txim kom lawv tso lawv tej kev txhaum tseg.”
Nug Txog Kevcai Yoo Mov
(Mathais 9:14-17; Malakaus 2:18-22)
33Muaj qeeleej hais rau Yexus tias, “Yauhas cov thwjtim pheej nquag ua kevcai yoo mov thiab thov Vajtswv, cov Falixais cov thwjtim los ua ib yam nkaus li ntawd thiab, tiamsis uacas Koj cov thwjtim ho tseem noj thiab haus?”
34Yexus teb lawv hais tias, “Nej xav tias thaum tus nraugvauv tseem nrog nws cov phoojywg noj tshoob uake, lawv yuav yoo mov no lov? Lawv yeej yuav tsis yoo li! 35Tiamsis yuav muaj ib lub sijhawm uas luag tuaj coj tus nraugvauv tawm ntawm lawv mus, thaum ntawd lawv mam yoo mov.”
36Yexus hais ib zaj lus pivtxwv rau lawv tias, “Tsis muaj leejtwg yuav muab lub tsho tshiab dua ib daig coj mus ntxiv rau lub tsho qub. Yog nws ua li ntawd, kuj yog nws dua kom lub tsho tshiab ntuag xwb, thiab daim ntaub tshiab ntawd yeej tsis phim lub tsho qub li. 37Lossis tsis muaj leejtwg yuav muab cov cawv txivhmab tshiab ntim rau hauv lub hnabtawv qub, rauqhov cov cawv txivhmab tshiab yuav ua rau lub hnabtawv qub tawg, cov cawv txivhmab yuav xau tag, thiab lub hnabtawv qub yuav ntuag tas. 38Cov cawv txivhmab tshiab yuavtsum muab ntim rau hauv lub hnabtawv tshiab. 39Yog leejtwg tau haus cov cawv txivhmab qub lawm, nws yeej tsis xav haus cov tshiab, rauqhov nws hais tias, ‘cov qub qab dua.’ ”
ప్రస్తుతం ఎంపిక చేయబడింది:
Lukas 5: MWW2022
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022 United Bible Societies. All rights reserved.