Lukas 7
7
Yexus Kho Tus Thawj Tubrog Loos Tus Tubtxib
(Mathais 8:5-13)
1Thaum Yexus qhia tej ntawd rau sawvdaws mloog tas lawm, Nws txawm mus rau pem lub nroog Kapena-us. 2Nyob hauv lub nroog ntawd, muaj ib tug thawj tubrog pawg pua#7:2: Cov neeg Loos ib tug thawj tubrog twg yog kav txog li ntawm 100 tus tubrog. uas yog neeg Loos, nws muaj ib tug tubtxib uas nws hlub heev tau mob hnyav thiab twb yuav tuag. 3Tus thawj tubrog ntawd hnov txog Yexus, nws txawm txib Yudais cov txwjlaug qeeleej mus thov Yexus tuaj pab kho nws tus tubtxib. 4Thaum lawv mus txog ntawm Yexus, lawv thov tas zog hais tias, “Tus thawj tubrog no tsimnyog tau txais Koj txoj kev pab, 5rauqhov nws hlub peb haivneeg thiab nws ua tau ib lub tsev sablaj pub rau peb.”
6Ces Yexus txawm nrog lawv mus. Thaum Yexus mus yuavluag txog tus thawj tubrog lub tsev, tus thawj tubrog txawm txib nws ob-peb tug phoojywg mus hais rau Yexus tias, “Tus Tswv, nyobtsam tabkaum Koj, kuv yog ib tug uas tsis tsimnyog txais Koj mus rau hauv kuv lub tsev, 7thiab kuv suav hais tias kuv yog ib tug uas tsis tsimnyog yuav tuaj cuag Koj timntsej timmuag. Thov koj hais ib los xwb ces kuv tus tubqhe yeej yuav zoo. 8Kuv kuj yog ib tug neeg uas nyob hauvqab kev tswjhwm ntawm lwmtus thawjcoj, tiamsis kuj muaj ib co tubrog uas nyob hauvqab kev tswjhwm ntawm kuv thiab. Yog kuv hais rau tus no tias, ‘Mus!’ ces nws yeej mus. Yog kuv hais rau tus tod tias, ‘Los!’ ces nws yeej los. Thiab yog kuv hais rau kuv tus tubqhe tias, ‘Ua li no!’ ces nws yeej ua li ntawd.”
9Thaum Yexus hnov li ntawd, Nws xav tsis thoob li; Nws thiaj tig mus hais rau cov neeg coob-coob uas lawv Nws qab hais tias, “Kuv qhia rau nej hais tias, txawm yog hauv cov Yixalayees ntag los Kuv yeej tsis tau pom dua ib txoj kev ntseeg uas loj npaum li no!”
10Cov neeg uas tus thawj tubrog txib tuaj ntawd rov mus txog tom tsev thiab pom tias tus tubtxib twb zoo lawm.
Yexus Tsa Tus Pojntsuam Tus Tub
11Tomqab ntawd tsis ntev#7:11: Tomqab ntawd tsis ntev; tej phau ntawv qub uas xuas tes sau, muaj Hnub tomqab. Yexus mus rau hauv ib lub nroog hu ua Na-is; Nws cov thwjtim thiab ib cov neeg coob-coob nrog Nws mus thiab. 12Thaum Yexus mus txog ntawm lub roojvag uas mus rau hauv lub nroog, txawm muaj neeg kwv ib tug tuag tawm tuaj txog ntawd. Tus tuag ntawd yog ib tug pojntsuam tus tub; tus pojntsuam no tsuas muaj tibtug tub ntawd xwb. Muaj neeg coob-coob uas nyob hauv lub nroog ntawd nrog tus pojntsuam uake. 13Thaum tus Tswv pom tus pojntsuam, Nws hlub tus pojntsuam ntawd heev, Nws thiaj hais tias, “Txhob quaj.” 14Yexus txawm txav zog mus tuav nkaus lub hleb, ces cov neeg uas kwv lub hleb txawm nres. Yexus hais tias, “Tus hluas, Kuv hais rau koj tias, koj ciali sawv!” 15Tus tuag ntawd txawm sawv los zaum thiab nrog lawv tham, ces Yexus txawm muab nws cob rau nws niam.
16Cov neeg ntawd ntshai kawg li, lawv txawm qhuas Vajtswv hais tias, “Muaj ib tug xibhwb cev Vajtswv lus uas muaj hwjchim heev twb los tshwmsim rau hauv peb lawm!” thiab lawv hais ntxiv hais tias, “Vajtswv twb los cawm Nws haivneeg lawm!”
17Zaj uas Yexus ua no nrov-ncha moo lug thoobplaws hauv lub xeev Yudas thiab tej cheebtsam uas nyob ibncig ntawd.
Yauhas Tus Uas Muab Neeg Ua Kevcai Rausdej Txib Nws Cov Thwjtim Mus Nug Yexus
(Mathais 11:2-19)
18Yauhas cov thwjtim qhia tej no huv tibsi rau Yauhas mloog. 19Yauhas thiaj hu nws ob tug thwjtim los thiab kom nkawd mus cuag tus Tswv thiab nug hais tias, “Koj puas yog tus uas nws hais tias yuav los, lossis peb tseem yuav tos dua lwmtus?”
20Thaum nkawd mus txog ntawm Yexus, nkawd nug hais tias, “Tus Yauhas uas muab neeg ua kevcai rausdej kom wb tuaj nug seb Koj puas yog tus uas nws hais tias yuav los lossis peb tseem yuav tos dua lwmtus?”
21Lub sijhawm ntawd Yexus tau kho ntau tus neeg uas muaj mob zoo tas huv tibsi, Nws ntiab ntau tus ntsujplig phem tawm, thiab kho cov neeg digmuag ntau leej rov pomkev. 22Nws teb ob tug uas Yauhas txib tuaj ntawd hais tias, “Neb ciali rov mus qhia tej uas neb pom thiab neb hnov rau Yauhas hais tias: cov neeg digmuag twb pomkev lawm, cov neeg tuag ceg twb mus taus, cov neeg mob ruas#7:22: mob ruas: lus Kilis siv lolus no rau ntau yam kab mob uas yog mob phem-phem rau ntawm daim tawv nqaij, kuj yuav tsis yog kiag mob ruas thiab. twb zoo lawm,#7:22: twb zoo lawm: Saib 5:12. #Yaxaya 35:5-6; Yaxaya 61:1cov neeg lagntseg twb hnov lus lawm, cov neeg tuag twb sawv rov los muaj txojsia, thiab Txoj Moo Zoo twb raug qhia rau cov neeg txomnyem lawm. 23Tus uas tsis ua xyemxyav txog Kuv, tus ntawd muaj kev zoosiab!”
24Thaum Yauhas ob tug thwjtim ntawd rovqab mus lawm, Yexus txawm qhia txog Yauhas rau cov neeg coob-coob ntawd mloog hais tias: “Thaum nej mus cuag Yauhas tom roob mojsab qhua, nej xav tias nej mus saib dabtsi? Nej mus saib tus lojkov uas cua ntsawj rawv mus rawv los lov? 25Nej mus saib dabtsi? Nej mus saib tus neeg uas hnav tej tsoostsho zoo-zoo no lov? Cov neeg uas hnav zoo-zoo thiab nyob zoo-zoo tsuas yog cov uas nyob hauv tej vajloog xwb! 26Nej qhia rau Kuv seb, nej mus saib dabtsi? Nej mus saib ib tug xibhwb cev Vajtswv lus puas yog? Yog lawm, tiamsis Kuv qhia rau nej hais tias, tus uas nej pom ntawd nws tseem muaj hwjchim loj dua ib tug xibhwb cev Vajtswv lus thiab. 27Tus Yauhas no yog tus uas Vajtswv Txojlus twb xub qhia tseg lawm hais tias, ‘Vajtswv hais tias, Kuv yuav txib Kuv tus tubtxib ua Koj ntej mus kho kev tos Koj.’ #Mlakis 3:1 28Kuv qhia rau nej hais tias, cov neeg uas yug ntawm pojniam los, tsis tau muaj dua ib tug uas loj tshaj Yauhas. Tiamsis tus uas yau kawg nkaus hauv Vajtswv lub Tebchaws tseem loj tshaj Yauhas thiab.”
29Tagnrho cov neeg uas hnov Yauhas qhia; tsuas yog cov pejxeem thiab cov sau se thiaj lees yuav Vajtswv txoj kev ncajncees xwb, rauqhov lawv txaussiab cia Yauhas muab lawv ua kevcai rausdej. #Math 21:32; Lukas 3:12 30Tiamsis cov Falixais thiab cov xibhwb uas qhia Kevcai tsis kam ua rawsli Vajtswv lub homphiaj, lawv thiaj tsis kam cia Yauhas muab lawv ua kevcai rausdej.
31Yexus hais ntxiv tias, “Kuv yuav muab cov neeg tiam no piv rau dabtsi? Lawv zoo licas? 32Lawv zoo ib yam li tej menyuam yaus uas zaum hauv tej kiab. Pab no hu rau pab tod tias, ‘Peb twb tshuab raj noj tshoob lawm, los nej yeej tsis seevcev li! Peb twb hu tej nkauj tuag, los nej yeej tsis quaj li!’ 33Yauhas tus uas muab neeg ua kevcai rausdej, nws los, nws ua kevcai yoo mov thiab nws tsis haus cawv txivhmab, los nej hais tias, ‘Nws raug ib tug dab lawm!’ 34Neeg Leejtub los, Nws noj thiab haus, los nej ho hais tias, ‘Nej saib seb, tus neeg no noj loj haus ntau, Nws nrog cov neeg sau se thiab cov neeg txhaum ua phoojywg!’ 35Tiamsis Vajtswv lub tswvyim ntawd yeej muaj tseeb nyob rau hauv txhua tus uas lees txais yuav.”
Yexus Mus Hauv Ximoos Uas Yog Ib Tug Falixais Lub Tsev
36Muaj ib tug Falixais tau caw Yexus mus nrog nws noj hmo, Yexus txawm mus rau hauv nws tsev thiab zaum noj mov. 37Nyob hauv lub nroog ntawd, muaj ib tug pojniam uas tau ua ntau yam kev txhaum yav tas los. Nws hnov tias Yexus tabtom noj mov hauv tus Falixais tsev, ces nws txawm nqa ib lub hwj tshuaj tswqab alanpaxataws tuaj. #Math 26:7; Malak 14:3; Yauh 12:3 38Nws los sawv tom Yexus qab ncaj ntawm Yexus kotaw, nws quaj kuamuag poob los ua rau Yexus ob txhais kotaw ntub tas. Ces nws txawm muab nws cov plaubhau los so, nws nwj Yexus kotaw thiab muab cov tshuaj tswqab los hliv ywg Yexus kotaw. 39Thaum tus Falixais uas caw Yexus los noj mov pom li ntawd, nws xav tias, “Yog tus no yog ib tug xibhwb cev Vajtswv lus tiag, Nws yeej yuav paub tias tus pojniam uas kov Nws ntawd yog ib tug neeg muaj txim!”
40Yexus hais rau tus Falixais ntawd tias, “Ximoos, Kuv muaj ib lolus xav hais rau koj.”
Ximoos teb tias, “Hais tau los mas Xibhwb, Koj ciali hais.”
41Yexus thiaj hais tias, “Muaj ob tug txivneej tshuav ib tug yawg nqi. Ib tug tshuav 500 denalis,#7:41: Denalis yog ib npib nyiaj uas raug nqi li ib hnub nqizog. thiab ib tug tshuav 50 denalis. 42Nkawd puavleej tsis muaj nyiaj them rovqab rau tus yawg ntawd, ces tus yawg ntawd txawm zam nqi rau nkawd huv tibsi. Yogli, ob tug ntawd, tus twg yog tus uas yuav hlub tus yawg ntawd heev dua?”
43Ximoos teb tias, “Kuv xav tias yuavtsum yog tus uas raug zam nujnqis ntau dua xwb lau.”
Yexus teb tias, “Koj hais yog lawm.” 44Ces Yexus txawm tig mus ntsia tus pojniam thiab hais rau Ximoos tias, “Koj puas pom tus pojniam no? Kuv tuaj txog hauv koj tsev, koj twb tsis muab dej ntxuav Kuv kotaw, tiamsis tus pojniam no tau muab nws cov kuamuag los ntxuav Kuv kotaw thiab muab nws cov plaubhau los so. 45Kuv tuaj txog los koj tsis tau nwj tostxais Kuv, tiamsis tus pojniam no, txij thaum Kuv tuaj txog hauv koj tsev, nws yeej nwj Kuv txhais kotaw tsis tseg li. 46Koj twb tsis muab tshuaj tswqab los pleev Kuv taubhau, tiamsis tus pojniam no tseem muab tshuaj tswqab los hliv ywg Kuv ob txhais kotaw. 47Kuv qhia rau koj hais tias, qhov uas tus pojniam no muaj kev hlub loj li no, vim ntau yam kev txhaum uas nws tau ua los, Vajtswv twb zam huv tibsi lawm. Tiamsis tus uas tau txais kev zamtxim tsawg, tus ntawd yeej hlub Vajtswv tsawg dua.”
48Yexus txawm hais rau tus pojniam ntawd tias, “Koj lub txim twb raug zam lawm.”
49Cov neeg uas nrog Yexus koom tsum uake ntawd txawm xav tias, “Tus no yog leejtwg, es ho muaj cuabkav zam tau txim thiab?”
50Yexus hais rau tus pojniam ntawd tias, “Koj txoj kev ntseeg twb cawm tau koj dim lawm; koj ciali mus kajsiab lug.”
ప్రస్తుతం ఎంపిక చేయబడింది:
Lukas 7: MWW2022
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022 United Bible Societies. All rights reserved.