Piilimka 2
2
1Dila la Wen yaa nye jaab meena tɔgatɔga ale bo wenzukku ale tɛŋka la a nueri.
2Daa ŋayopɔiwa danni ale Wen nueri tuim ŋaai meena ate wa tom la kama, dila daa ŋayopɔiwa danni wa yaa vuusi. 3Wen yaa niak dai dila danni a basi ate di chim tuilum dai, dii nyiŋla da dila wa vuusi kama, wa an ŋman tom tuini.
4Dii meena ale magsi chaab ale wenzukku ale tɛŋka nyeka la ale la. Naawen dii ale ka Wen la ale nye tɛŋka ale wenzukku la 5tiisa ale wuuta an diem jam nyini ya, diila Naawen dii ale ka Wen la an basi ate ŋmoruk a ni ya, nuru mɛ abe karo a tom. 6Alege nyiam ale nyini tɛŋ jueli a yɔk tɛŋka ŋmazuk meena. 7Naawen dii ale ka Wen la yaa nye tantaŋa a mɛ nuru a yaa vuusi basi wa nyueŋa po ate wa chim nuru vuk.
8Yɔgyɔgla de Naawen dii ale ka Wen la yaa nye talim kpiem Eden po kori geŋka a yaa basi ate nuruwa ate wa nye la a bo du. 9Naawen dii ale ka Wen la a yaa basi ate tiisa tɔgatɔga a nyini. Sii ale nala nina po ale magsi dɛka. Talimu suŋsuŋ nyuvuri tiib ale jam za du. Nalim sebika ale biem sebika tiib ale maa za du.
10Beli ale jam bo Eden a chali a zaŋti talimu. Di jam poori ka beli naŋsa sinaansi. 11Dii ale dɛ niŋ la yuei ale Pison, di chali va ka Yavila tɛŋka po a taam. Ligmɔniŋ ale jam bo du la. 12Tɛŋ kala ligmɔniŋka jam nala kama. Tiisa ale jam boro ate si vaataŋa nyummu masa. Si chaab mɛ simmu nyummu a masa. Tintain ŋmiŋmirita ale jam maa boro. 13Beli dii ale jam nye ŋayewa la yuei ale Giyon, di chali va ka Kus tɛŋka po a taam. 14Beli dii ale jam nye ŋatawa la yuei ale Tigris, di jam chali va ka Assur kori geŋka a taam. Beli dii ale nye ŋanaansiwa la yuei jam le Yufiretis.
15Naawen dii ale ka Wen la yaa pai nuruwa a basi Eden Talimu po ayen wa a tom abe wa a nya bu zuk. 16Naawen dii ale ka Wen la yaa weeni nuruwa ayen fi ta suik a dɛ tiib buui yɔna kama, 17alege kan dɛ nalim ale biem sebika tiimu yɔnaŋa, diila fi dan dɛ fi sum a kpi kama.
18Naawen dii ale ka Wen la yaa ŋman weeni ayen, <<Ku an nala ayen nidoawa a boro wadek wa nyiini. M le nye ka maarɔ magsi a te wa.>>
19Yɔgyɔgla de Naawen dii ale ka Wen la a yaa pai tanta a nye duŋsaŋa ale wenzuk nuinsaŋa a nyini ka tɛŋka. Wa yaa ta ba jam nuruwa jigi ayen wa nya wa le wa te ba yue diila. Wa dan te jaab yuei, jaab bula yuei ale la dera. 20Dila nuruwa yaa te duŋ wuunsa yue ale te nuinsa meena mɛ yue ale duŋsa meena yue. Alege maarɔ a jam karo a magsi nuruwa.
21Dila Naawen dii ale ka Wen la yaa nye ate nidoawa a lo goom po nna yegayega. Wa ale a goa la, ate Wen yaa yeeri wa nyipik kobini dinyi alege lik kauk kula. 22Naawen dii ale ka Wen la yaa pai nidoawa nyipik kobini ate wa yeeri la a nye nipok a pai te nidoawa. 23Nidoawa yaa weeni ayen, <<Yɔgyɔgla de ka m dek kobi ale nna. Ka m dek nyiŋ lam ale nna, ba le wi wa ayen ka nipok, diila wa nyini ka mi jigi.>> 24Dila nyiŋla, ku a fɛ kama ate nidoa basi wa ko ale wa ma, abe wa gum chaab ale wa powa, ate bayewa a chim nyiŋ yeŋ. 25Nidoawa ale nipowa a jam ta ka chaboala alege kan chali chivie.
ప్రస్తుతం ఎంపిక చేయబడింది:
Piilimka 2: BWU
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Ghana Institute of Linguistics, Literacy and Bible Translation