Piilimka 3
3
1Duŋsaŋa meena ate Naawen dii ale ka Wen la jam nye la po, waamu ale jam seba a gaam si meena. Bu yaa weeni nipowa ayen, <<Wen sum weeni kama ayen, <Ni kan dɛ tiisaŋa ale bo talimu po la yɔnaŋa?> >>
2Nipowa yaa weeni waamu ayen, <<Ti baga a dɛ tiisaŋa yɔnaŋa kama, 3alege Wen weeni kama ayen ti kan dɛ buui ale za talimu suŋsuŋ la yaase ti tiri bu. Ti dan nye dila, ti le kpi.>>
4Waamu yaa weeni nipowa ayen, <<Ni kan kpi. 5Wen sebi kama ayen ni dan dɛ ni ninaŋa ale lagri ate ni a nye ase Wen la, a yaa seba nalim ale biem.>>
6Nipowa yaa nya ayen yɔnni a nala nina po a magsi dɛka. Ku be ŋman magsi mɛ ayen wa ta yam. Wa yaa gbesi yɔnni dɛ alege te wa chorɔwa le bo ale wa la ate wa mɛ dɛ. 7Ba nɔi bayewa nina deri lagri ate ba deri miŋ ayen ba ta ka chaboala. Ate ba ya yaali kiŋkaŋ vaata a baali tom chaab a lik badek.
8Dai dila danni dek junɔi ate ku yɔk nna chorototo la, nidoawa ale wa powa yaa wom Naawen dii ale ka Wen la a cheŋ talimu po, ba yaa suk tiisaŋa po.
9Naawen dii ale ka Wen la yaa wi nidoawa ayen, <<Fi bo ka bɛ?>>
10Nidoawa yaa tulisi ayen, <<Mi wom ka fi le a tabi la yaa chali yɔgsum, a yaa suk, diila mi ta ka chaboala.>>
11Naawen yaa bek ayen, <<Ka wana ale weeni fu ayen fi ta chaboala? Fi dɛ tiib buui ate mi a weeni ayen fi kan dɛ bu yɔnni la kama?>>
12Nidoawa yaa tulisi ayen, <<Nipowa ate fi pai te mu la, ale pai tiimu yɔnni a te mi ate mi dɛ.>>
13Naawen dii ale ka Wen la yaa bek nipowa ayen, <<Ka boa ale la ate fi nye?>>
Nipowa yaa tulisi ayen, <<Waamu ale paasi mi ate mi dɛ yɔnni.>>
14Dila Naawen dii ale ka Wen la yaa weeni waamu, <<Fi ale nye nnala la nyiŋ, m yeeri fu kama yeri duŋsa ale gɔi duŋsa po a ka a te fu. Fi ale kasim a vuuri ka fi lɔgni zuk a cheŋ abe fi a dɛ tanta fi boka meena po. 15Abe m basi ate dachaani a bo fi ale nipowa suŋsuŋ abe di bo fi buuni ale nipowa buuni suŋsuŋ. Fi ale dom wa nankpanni ate wa mɛ tabi fi zukku a ŋɔriŋ.>>
16Alege weeni nipowa ayen, <<Fi dan boro a biak biik fi nyiŋdommaŋa ale zuak nna yegayega. Fi le kasim a biak bisa ale ka nyiŋdomma. Fi le kasim a yaali fi chorɔwa abe wa a nya fi zuk.>>
17Alege a weeni nidoawa ayen, <<Fi le wom fi powa nɔi a siak dɛ tiimu ate m weeni ayen fi kan dɛ bu yɔnni la, fi nyiŋ m ka basi tɛŋka zuk. Fi le kasim a cheri ka wulum abe fi nya ŋandiinta a dɛ fi boka meena po. 18M le basi ate tɛŋka a ta wuuk ale munsa ate fi nam a nya ŋanta a dɛ. 19Wulum ale fi za fi cheri a nya ŋandiinta a dɛ ate fi pilim ŋman siŋ tɛŋ, fi le tɔlim nyini ka tanta po la. Fi ka tanta, fi be le ŋman cheŋ ka tantaŋa po.>>
20Nidoawa yuei jam ale Adam ate wa yaa te wa powa yuei ayen Iiv,#3:20 Iiv kiri ale vum dii nyiŋla wa za wa chim ka saalɔ meena ma.
21Naawen dii ale ka Wen la a yaa pai duŋsa gbaŋsa a nye gatta a te Adam ale Iiv ate ba lik badek.
22Naawen dii ale ka Wen la yaa weeni ayen, <<Nuruwa yaa nye se ka tama la, a yaa seba nalim ale biem. Wa kan ŋman laari nisa a gbesi nyuvuri tiimu yɔnni a dɛ ate wa kan kpi.>> 23Dila Naawen dii ale ka Wen la yaa yiak wa Eden Talimu po ayen wa nyini ga a kpa tɛŋ kaai ate Wen nye tantaŋa a nye wa la. 24Wa le yiak wa nueri la, wa yaa basi ate ŋanvuta#3:24 Ezekiel 10:1-19 a za Eden Talimu kori geŋ ale gebi kpieŋ a yuk ayen suik kan boro a taam nyuvuri tiimu jigini.
ప్రస్తుతం ఎంపిక చేయబడింది:
Piilimka 3: BWU
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Ghana Institute of Linguistics, Literacy and Bible Translation