SAN JUAN 13
13
Jesús mayllan yachachisqasnimpa chakisninta
1Pascuaman qayllaña kashajtin, Jesús yacharqa horan chayamusqantaña, kay mundomanta Dios Tataman ripunampaj. Imaynatachus kay mundopi paypata kajkunata munakorqa, ajinata paykunataqa tukukuykama munakorqa.
2Cenata mikhushajtinku, Simompa churin Judas Iscariotej sonqonman supay yuyaycharqa Jesusta jap'ichinampaj. 3Jesustaj yacharqa Dios Tatamanta jamusqanta, Diosmantaj kutipushasqanta. Yachallarqataj Dios tukuy atiyta payman qosqanta. 4Chayrayku cenapi kashaspa sayarerqa, pata p'achanta orqhokuspa, uj toallata cinturanman warkhuykukorqa. 5Uj ch'illamipi yakuta jich'arqospataj, yachachisqasnimpa chakisninta mayllayta qallarerqa. Cinturampi karqa chay toallawantaj chakisninkuta ch'akicherqa.
6Simón Pedroman qayllaykojtintaj, Pedro nerqa: Señor, qanchu chakisniyta mayllawanki?
7Jesús payman kuticherqa: Kay ruwasqayta mana yachankirajchu, qhepamanraj entiendenki.
8Pedrotaj nerqa: Mana jayk'ajpis chakisniyta mayllawankichu.
Jesustaj kuticherqa: Manachus mayllasqayki chayqa, mana noqawan chayaqeyojchu kanki, nispa.
9Simón Pedro nerqa: Jina kajtenqa, ama chakisnillaytachu; makisniyta, umaytawan mayllaway.
10Jesús payman nerqa: Pichus mayllasqa kashan chayqa, tukuy ukhun llimphuña, chakisnillanta mayllana tiyan. Qankunaqa llimphuña kankichej, manapis tukuyniykichejchu.
11Jesús yacharqa mayqenchus Payta jap'ichinan karqa chayta; chayrayku nerqa: Manapis tukuyniykichejchu llimphu kankichej.
12Chakisninkuta mayllayta tukuytawantaj, Jesús churaykukorqa p'achanta. Chantá ujtawan mesaman tiyaykukuspataj nerqa: Yachankichejchu imapajchus chakisniykichejta mayllasqayta? 13Qankuna noqata sutichawankichej Maestro, Señor nispa; walejta niwankichej, imaraykuchus chay noqa kani. 14Noqachus Maestro, Señortaj kaspa, chakisniykichejta mayllarqaykichej chayqa, kikillantataj qankunapis chakisniykichejta mayllanakuychej. 15Chayta noqa ruwani, qankunapis noqa jina ruwanaykichejpaj. 16Cheqamanta, cheqamanta niykichej: Kamacheqa patronninmanta mana aswanchu, nitaj kachasqapis kachajninmanta aswan kurajchu. 17Chay imastachus entiendespa ruwayta yachankichej chayqa, kusikuyniyoj kankichej.
18Mana tukuyniykichejmantachu kayta nini; noqa yachani pikunatachus ajllasqayta. Chaywampis Escritura junt'akunan tiyan: Noqawan t'antata mikhojqa contray rikhurin. 19Kunanmantapacha niykichej, chay imas manaraj junt'akushajtinku, junt'akojtin creenaykichejpaj noqa kasqayta. 20Cheqamanta, cheqamanta niykichej: Kachasqayta wajyarejqa, noqata wajyariwan; noqata wajyariwajtaj, kachamuwajniyta wajyarin.
Jesús nin Judas payta jap'ichinanta
[Mt 26.20-25; Mr 14.17-21; Lc 22.21-23]
21Chay imasta niytawan, Jesús sonqonta nanachikorqa, sut'inchaspataj nerqa: Cheqamanta, cheqamanta niykichej; qankunamanta ujniykichej jap'ichiwankichej.
22Yachachisqasnintaj qhawanakorqanku, yachayta munaspa pimantachus chayta nisqanta. 23Yachachisqasninmanta ujnin kaj, pitachus Jesús munakoj, chay qayllampi kasharqa. 24Simón Pedrotaj señaswan payman nerqa: Tapuriy pimantachus parlashan chayta. 25Paytaj Jesuspa qayllampi kaspa taporqa: Señor, pitaj chayri? nispa.
26Jesús kuticherqa: Pimanchus t'antata chhapuspa jaywasaj, chay kanqa.
Chantá Jesús jaywarqa Judas Iscarioteman, Simompa churinman, t'antata chhapuspa. 27Judas Iscariotej sonqonman, Satanás yaykorqa t'antata mikhuykusqantawan. Chaypachataj payman Jesús nerqa: Ruwanayashanki chaytaqa usqhayta ruway, nispa.
28Mikhusharqanku chaykunaqa mana unanchayta aterqankuchu imaraykutaj Jesús jinata nisqanmanta. 29Wakin yuyasharqanku Judas Iscariote qolqe wayaqata jap'isqanrayku payman Jesús nisqanta: Rantimuy imachus qhochukupaj mana kanchu chayta, chayrí wajchasman imallatapis qomuy, nispa.
30Judastaj mikhuyta tukuytawan llojsiporqa; tutañataj karqa.
Mosoj kamachiy
31Judas llojsejtintaj Jesús nerqa: Kunanqa Runaj Churin jatunchasqaña, Diospis jatunchasqallataj paynejta. 32Sichus Dios Churipi jatunchasqa chayqa, Diospis pay kikimpi Churita jatunchallanqataj. Kikimpachataj chayta ruwanqa. 33Wawitasníy, pisillantaña qankunawan kasaj, mask'awankichejtaj. Judiosman nerqani ajinallatataj qankunamanqa niykichej: Maymanchus noqa rishani, chayman riyta mana atinkichejchu. 34Uj mosoj kamachiyta qoykichej: Purajmanta munanakunaykichejta. Imaynatachus noqa munakorqaykichej, ajinallatataj qankunapis purajmanta munanakuychej. 35Qankunachus munanakunkichej chayqa, tukuy runas yachanqanku yachachisqasniy kasqaykichejta.
Jesús willan Pedro qhesachananta
[Mt 26.31-35; Mr 14.27-31; Lc 22.31-34]
36Simón Pedro Jesusta taporqa: Señor, maymantaj rishanki? Jesustaj payman kuticherqa: Maymanchus rishani chaymanqa, kunan mana qhatiwayta atiwajchu; qhepamanraj qhatiwanki. 37Pedrotaj nerqa: Señor, imaraykutaj kunan mana qanwan riyta atiymanchu? Kausayniyta churasaj qanrayku. 38Jesús payman nerqa: Churawajchu kausayniykita noqarayku? Cheqamanta, cheqamanta niyki: Manaraj gallo waqashajtin, qanqa kinsa kutikama, noqata mana rejsiwasqaykita ninki.
ప్రస్తుతం ఎంపిక చేయబడింది:
SAN JUAN 13: QCHSB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Qheshwa Biblia DC © Sociedades Bíblicas Unidas, 1986.