SAN JUAN 15
15
Jesusqa cheqa uva sach'a
1Noqa cheqa uva sach'a kani, Tataytaj llank'ajqa. 2Tukuy rama noqapi kashaspa, mana poqonmanchu chayqa, Dios Tata k'utonqa. Poqoyta apaj ramatataj llimphuchanqa, astawan poqoyta apanampaj. 3Qankunaqa llimphuchasqasña kankichej, parlarqaykichej chay palabrarayku. 4Noqapipuni kakuychej, imaynatachus noqapis qankunapi kakuni ajinata. Imaynatachus ramaqa sapanmanta mana poqoyta atinchu, mana uva sach'api kaspaqa; ajinallatataj qankunapi mana atinkichejchu, mana noqapi kawajchej chayqa.
5Noqa uva sach'a kani, qankunataj ramas kankichej; pillapis noqapi kakojqa, noqataj paypi, chaymá ashkha poqoytaqa apan. Mana noqawanqa, mana imatapis ruwayta atinkichejchu. 6Mana noqapi kakojqa, rama jina jawaman wijch'usqa kanqa, ch'akiponqataj. Chay ramasta tantaspataj ninaman enqhaykonqanku, q'olanqataj.
7Noqapichus kakuwajchej, palabrasniytaj qankunapi kanman chayqa, tukuy munasqaykichejta mañakuychej, jap'inkichejtaj. 8Qankuna ashkha poqoyta apajtiykichej, Tatayqa jatunchasqa kanqa; ajinamanta yachachisqasniy kankichej. 9Imaynatachus Dios Tata noqata munakuwan, ajinallatataj noqapis qankunata munakuykichej, munakuyniypitaj kakuychej. 10Kamachisqasniytachus waqaychankichej chayqa, munakuyniypi kakunkichej; imaynatachus noqapis Tataypa kamachisqasninta waqaychani, munakuynimpitaj kashani ajinata.
11Kay imasta niykichej, kusikuyniy qankunapi kanampaj, kusikuyniykichejtaj junt'akunampaj. 12Kaymin kamachiyneyqa: Qankuna purajmanta munanakuychej, imaynatachus noqa munakuykichej ajinata. 13Mana pipis astawan jatun munakuyniyoj kanchu, kausaqesninrayku kausayninta qojmanta nisqaqa. 14Qankunaqa kausaqesniy kankichej, kamachisqasniytachus ruwankichej chayqa. 15Mana kamachistachu sutichasqaykichej, imaraykuchus kamacheqa mana yachanchu patronnin imatachus ruwasqanta. Noqa kausaqesta sutichaykichej, imaraykuchus Tataypa tukuy ima niwasqanta rejsichiykichej. 16Mana qankunachu ajllawarqankichej, astawanqa noqa ajllarqaykichej; churarqaykichejtaj willaj rinaykichejpaj, poqoytataj apanaykichejpaj. Chay poqoyniykichejtaj kakunallampajpuni; tukuy imata sutiypi Dios Tatamanta mañakusqaykichejta taj, pay qosonqachej. 17Kayta kamachiykichej: Purajmanta munanakunaykichejta.
Mundo chejnisonqachej
18Mundo chejnisunkichej chayqa, yachaychej, noqataraj qankunamanta ñaupajta chejniwasqanta. 19Mundojtachus kawajchej chayqa, mundoqa paypata kajkunata munakunman. Kunantaj mana mundojtachu kankichej, astawanqa noqa mundopi kajkunamanta ajllarqaykichej. Chayrayku mundoqa chejnisunkichej. 20Yuyarikuychej palabrata qankunaman nisqayta: Kamacheqa patronninmanta mana aswan kurajchu. Noqatachus qhatiykachawarqanku chayqa, qankunatapis qhatiykachasonqachej. Palabraytachus waqaychanqanku chayrí, qankunajtapis waqaychallanqankutaj. 21Chay tukuy imasta ruwasonqachej sutiyrayku, imaraykuchus kachamuwajniyta mana rejsinkuchu.
22Noqachus mana jamuyman karqa, manataj paykunaman parlayman karqa chayqa, mana juchayoj kankuman; kunantaj juchankuta mana pakayta atinkuchu. 23Noqata chejniwajqa, Tataytapis chejnillantaj. 24Manachus paykuna ukhupi, ni pejpa ruwasqanta ruwaymanchu karqa chayqa, mana juchayojchu kankuman karqa. Kunanqa ruwasqasniyta rikunkuña; chaywampis noqata Tataytapis chejniwayku. 25Kayqa ajina, leyninkupi escribisqa kashan chay palabra junt'akunampaj: Mana kajmanta chejniwanku.
26Maypachachus sonqochaj jamonqa, pitachus noqa Tataymanta kachamusaj, chay cheqa Espiritoqa Dios Tatamanta jamun, paytaj noqamanta willanqa. 27Qankunapis noqamanta willankichej imaraykuchus qallariymantapacha noqawan karqankichej.
ప్రస్తుతం ఎంపిక చేయబడింది:
SAN JUAN 15: QCHSB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Qheshwa Biblia DC © Sociedades Bíblicas Unidas, 1986.