Hechos 5
5
Ananiaswan Safirawan
1Chantá Ananiaswan, warmin Safirawan ima jallp'ankuta vendellarqankutaj. 2Chay runataj warminwan yachachinakorqanku, vendesqankumanta wakin qolqeta pakaykunankupaj. Chantá Ananías wakillanta Jesuspa kuraj kachankunaman aparqa. 3Jinapi Pedro payta nerqa: Ananías, imaraykutaj Supay Satanasta sonqoykipi kasunki? Qanqa Santo Espirituta q'otiyayta munaspa vendesqayki qolqemanta wakinta pakaykorqanki. 4Manaraj vendeshajtiyki, chay jallp'a qanpata karqa. Vendejtiykipis, chay qolqe qanpallatataj karqa. Imaraykutaj sonqoykipi ajinata llullakuyta yuyarqanki? Qan mana runallamanchu llullakorqanki, aswanpis Diosman, nispa.
5Ananiasqa Pedroj nisqanta uyariytawan, pampaman wañusqa wijch'ukorqa. Chayta yachajkunataj maytapuni manchachikorqanku. 6Chaymanta waynakuna qayllaykuytawan, Ananiaspa ayanta mayt'uykorqanku, jawaman orqhospataj, p'ampamorqanku.
7Chaymanta mana unaymanchu Ananiaspa warmin Safira yaykumorqa, imachus qosanta qhatirisqanmanta mana yachaspa. 8Pedrotaj Safirata taporqa: Niway, kay chhika qolqepichu jallp'aykichejta venderqankichej? nispa. Paytaj kuticherqa: Arí, chay chhikapi venderqayku, nispa.
9Chantá Pedroqa Safirata nerqa: Imaraykutaj qosaykiwan yachachinakorqankichej Tukuyta Kamachej Jesuspa Espiritunman llullakunaykichejpajri? Kunitan kay punkuman chayamushanku qosaykita p'ampamojkuna, paykunataj qantapis p'ampaj apallasonqankutaj, nispa.
10Chaypachallataj Safiraqa Pedroj ñawpaqenpi wañusqa wijch'ukullarqataj. Chantá chay waynakuna yaykumuspa, Safirata wañusqataña tariparqanku. Ajinamanta paytapis apaspa, qosanpa qayllanman p'ampaykorqanku. 11Chantá tukuy iglesiawan, chaymanta tukuy uyarejkunawan ima maytapuni manchachikorqanku.
Jesuspa kuraj kachankunaqa onqosqakunata qhaliyachinku
12Jesuspa kuraj kachankunanejta Diosqa runakuna ukhupi runaj mana jayk'aj rikusqanta, may t'ukuna imakunata ima ruwarqa, ajinamanta yachayta qospa Diosmanta kasqankuta. Chaypachataj Jesucristota qhatejkuna uj sonqolla tantakoj kanku Salomonpa Corredornin nisqa cheqapi. 13Waj runakunataj mana paykunawan tantakuyta munarqankuchu. Chaywanpis paykuna Jesucristota qhatejkunata allin ñawiwan qhawaj kanku.#Hch 2.47. 14Chantá qharikuna jinallataj warmikunapis Tukuyta Kamachej Jesuspi atinikuspa, payman kutirikorqanku, ajinamantataj Jesusta qhatikojkuna astawan ashkhayasharqanku. 15Jinallataj runakunaqa onqosqakunatapis calleman orqhospa, chaypi suyachej kanku phullupi sirisqata chayrí kallapupi ima, Pedro chaynejta purishajtin, mayqellanmanpis llanthun chayaykunanpaj. 16Chantá qayllapi juch'uy llajtakunamantapis runakuna Jerusalenman jamullarqankutaj, onqosqakunata, supaykunaj ñak'arichisqan runakunatawan ima apamuspa. Jesuspa kuraj kachankunataj tukuyninkuta qhaliyacherqanku.
Jesuspa kuraj kachankunaj contranpi ch'ajwa
17Chantá kuraj kaj sacerdote, payman sayasqa saduceokuna ima Jesuspa kuraj kachankunawan maytapuni chhoqonakorqanku. 18Jinataj Jesuspa kuraj kachankunata jap'ichiytawan, carcelman wisq'aykucherqanku. 19Chay tutarí Diospa ujnin kaj angelnin cárcel punkuta kicharispa, Jesuspa kuraj kachankunata jawaman orqhorqa, paykunatataj nerqa: 20Temploman riychej, chaypitaj runakunaman kay mosoj kawsaymanta willaychej, nispa. 21Chayta uyariytawan, Jesuspa kuraj kachankuna q'ayantin sut'iyayta Temploj pationman yaykuspa, Jesusmanta yachachiyta qallarerqanku.
Chaykama kuraj sacerdote, paywan kajkuna ima tukuy israelitakunamanta kurajkunata wajyacherqanku Jatun Juntapi tantakunankupaj. Chantá carcelman soldadokunata kacharqanku Jesuspa kuraj kachankunata pusamunankupaj. 22Chay soldadokunarí carcelman chayaspa, Jesuspa kuraj kachankunata mana tarerqankuchu. Kutirimuspataj, maychus kasqanta kurajkunaman willarqanku. 23Nerqankutaj: Noqayku carcelpa punkunta sumaj wisq'asqata taripayku, qhawajkunapis kanankupipuni kasharqanku. Carcelpa punkuta kicharispatajrí, chaypi mana pitapis tarerqaykuchu, nispa.
24Chayta uyarispa, Templota qhawajkunaj kamachejnin, kuraj sacerdotekuna ima mana yachayta atisharqankuchu imapichus chay tukukunanta. 25Jinallapi uj runa jamuspa, paykunaman willarqa: Pikunatachus carcelman wisq'acherqankichej, chaykuna kunitan Temploj pationpi runakunaman yachachishanku, nispa.
26Chantá soldadokunata kamachejqa soldadonkunawan rispa, Jesuspa kuraj kachankunata allillamanta pusarimorqanku. Chayta ruwarqanku imaraykuchus manchachikorqanku runakuna phiñakuspa paykunata rumiwan ch'anqaykunankuta. 27Chantá paykunata Jatun Juntaman pusaykamojtinku, kuraj kaj sacerdoteqa Jesuspa kuraj kachankunata tapuyta qallarerqa: 28Manachu qankunata sinch'ita kamacherqayku amapuni chay Jesuspa sutinpi yachachinaykichejta? Kunantajrí paymanta yachachisqaykichejwan tukuy Jerusalén llajtamanña junt'aykuchinkichej. Qankunataj chay runaj wañusqanmanta noqaykutapuni juchachayta munashawayku, nispa.
29Chantá Pedrowan, Jesuspa chay waj kuraj kachankunawan ima kuticherqanku: Diostapuni astawanqa kasunayku tiyan, runakunata kasunaykumantaqa. 30Ñawpa tatanchejkunaj Diosnenqa Jesusta wañusqamanta kawsarichimorqa, pitachus qankuna cruzman#5.30 Cruz: Griego rimaypeqa niyta munan “uj k'ullu” chayrí “uj sach'a”. Kay qhelqapi Hch 10.39; 13.29; 1 P 2.24, kikin qhelqasqa kashan Dt 21.22-23, chay niyta munan ñawpajta willasqaña karqa, junt'akuntaj. chakataspa wañucherqankichej, chayta. 31Diostaj atiyninwan Jesusta aswan pataman oqharerqa Tukuyta Kamachej chantá runata Qhespichej kananpaj. Dios munallantaj noqanchej israelitakuna payman kutirikunanchejta, tukuy juchanchej pampachasqa kananpaj. 32Noqaykutaj chaymanta testigo kayku, ajinallatataj Santo Espiritupis, pitachus Dios payta kasojkunaman qon, chay, nispa.
33Chayta uyariytawan, kurajkuna mayta phiñarikuspa, Jesuspa kuraj kachankunata wañuchiyta munarqanku. 34Jinallapi Diospa kamachisqanmanta yachachej Gamaliel sutiyoj uj fariseo sayarerqa. Payqa tukuy runapaj respetasqa karqa. Jinataj Jesuspa kuraj kachankunata jawaman orqhonankuta nerqa.
35Chantá juntapi kajkunata nerqa: Israelitakuna, sumajta unanchariychej imatachus kay runakunawan ruwanaykichejmanta. 36Yuyarikuychej imaynatachus unay Teudas sutiyoj runa rikhurimusqanta. Pay may kasqanta yuyakuspa, Romaj contranta oqharikusqa. Payta kasuspataj, 400 runakuna qhatisqanku. Wakinkuna Teudasta wañuchejtinkurí, payta tukuy qhatejkuna ch'eqerasqanku, paypa ruwasqantaj manakajman tukuporqa.
37Chay qhepaman, Galileamanta Judasñataj rikhurimorqa, runa yupay kashajtin. Paytapis ashkha runakuna qhatillarqankutaj. Chaywanpis payta wañuchisqankutawan, qhatejninkunapis kikillantataj ch'eqerarqanku. 38Kunanqa kayta niykichej: Ama imanaspalla, kay runakunata kacharipuychej. Sichus yachachisqanku, ruwasqanku ima runallamanta kanman chayqa, manakajman tukuponqa. 39Diosmanta kanman chayrí, chayta manapuni chinkachiyta atiwajchejchu. Pajtataj Diospa contranpi maqanakushawajchej, nispa.
40Chantá tukuyninku Gamalielta kasorqanku. Jinataj Jesuspa kuraj kachankunata wajyaspa, jasut'icherqanku, paykunatataj kamacherqanku Jesuspa sutinpi amaña parlanankuta. Chaymantataj paykunata kachariporqanku. 41Chaywanpis Jesuspa kuraj kachankuna chay juntamanta llojsispa, mayta kusikorqanku Jesuspa sutinrayku ñak'arichisqa kasqankumanta. 42Paykunataj sapa p'unchay mana sayk'uspa Cristo Jesusmanta sumaj willayta willararqanku Temploj pationpi, jinallataj wasimanta wasi purispa ima.
ప్రస్తుతం ఎంపిక చేయబడింది:
Hechos 5: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.