Yowani 4
4
Yisu na mukasu wa Samariya
1Yisu ayaabi ti Bafarisi baayuhi ti nde akabaha, na utondehe bayihi ufulala Yowani. 2Imbuli ni ti, Yisu nde mwakulu a hakatondehe baatu ve. Ka ni bayihi ba nde baakatondehe. 3Titswene, nde asiisi tsi a Yude na afutihi hu Ngalili. 4Mu uyene hu tsi Ngalili, hwafwani huli nde mu ukese mu tsi a Samariya. 5Nde atoodi ŋa bula bumosi bu bwaba bebele na tsi a Samariya, bwa nduhi a Sikari. Bula mobuuna bwaba ŋa pedu a tsyehe yi Yakobi haviidi huli mwana a nde Yosefi#Mba 33.19; Yos 24.32. 6Huuna, hwaba na iyuna hya mamba hya Yakobi. Bu Yisu haba hamiikolo mu toni mudyenge, nde ayatsahala ŋa muvanga a iyuna mo. Aba bebele na mwangulu.
7Mutangu moyiina, mukaasu mumosi wa Samariya ayidi mu utehe mamba. Yisu ni uleele nde: «Va me mamba ma unywa.» 8Bayihi ba nde aba baamiiyene hu musyenge mu uyasuumba byudya. 9Mukaasu wa Samariya ni uleele nde: «Buni we wu li Muyudaayo, we uvondo mamba ma unywa huli me, me wu li musi Samariya?» Nde haleeli buuna, mu toni ati Bayudaayo a bubaayuhasana na bisu Samariya ve. 10Yisu ni ufutala nde: «Kini we ayaaba bungodu bwa Nzambi, na tso we kiyaaba na li mu uleele we: “Va me mamba ma unywa”, kini we ni wu kiivondo mamba ma unywa, na nde kiiva we mamba ma monyi.» 11Mukaasu ni ukaala: «Pfumu, we ti a hali na itehili ve, titswene iyuna hyadongo. Hwavele itehili, we mamba mo ma monyi ka buni kiibaha? 12We akulala kaaha a bisu Yakobi, wu aviidi bisu iyuna mohinihi? Ni iyuna hi Yakobi hanywidi mamba nde mwakulu na baana ba nde, na biboodi bya nde.» 13Yisu afutili nde: «Pasi nde wuuna wu unywa mamba mo maaniima, sa abwebaha peyu. 14Ka muutu wu unywa mamba ma me upa nde, a hubwebaha peyu ve. Mamba ma me upa nde, sa makituha mutswe a nzali mu nde. Ni mutswe a nzali wu ukaapalisa mamba na mifudi, te mu monyi wu bilima na bilima#Esa 12.3; Yel 2.13; 17.13.» 15Mukaasu ni uleele nde: «Pfumu, va me mamba momaana, mana me pelembwembaha peyu a mamba, na me pelembwenzatehe mamba ŋa.»
16Yisu ti: «Yene, yateele mulumi a we na we yaafutaha ŋa.» 17Mukaasu ni ufutala nde: «Me a handi na mulumi ve.» Yisu ti: «Ni mbuli, bu we miileele ti me a handi na mulumi ve. 18Mu toni ati, we abahi balumi bataanu, na wu we li na nde loloyi, a hali mulumi a we ve. Hiina ni imbuli we miileele.» 19Mukaasu mo afutili: «Pfumu, me ndi mu umono ti we mumbihuli a Nzambi we li. 20Bakaaha ba bisu baakuundi ŋa yulu isyelo mohinihi, ka benu Bayudaayo libaasitasa ti mbuha yi baafwana ukuunda, ni hu Yeruselemi#Mkg 122.1-4 .» 21Yisu aleeli nde: «Maama, siila me imiinu, tangu sa yito, yi benu lukaakunda Taata Nzambi pasi mbuha, tso hu Yeruselemi, tso ŋa yulu isyelo mohinihi. 22Benu bisu Samariya, benu a liyaabi na benu lili mu ukuunda ve. Ka bisu Bayudaayo, bisu liyaabi na bisu lili mu ukuunda. Mu toni ati, liyobolo ubaamata huli Bayudaayo#Esa 2.3 . 23Ka tangu sa yito, na yo yaamiito, yi bakuundi ba mbuli buukakuunda Taata mu mutima woosi na mu imbuli hyosi. Mu toni ati, ni bakuundi ba pila yiina Taata ali mu usaha. 24Nzambi ni Livupu, hufwani ti boosi ba buukuunda nde, babaakuunda nde mu mutima na mu imbuli.»
25Mukaasu ni uleele nde: «Me nzaabi ti Masiya wu bali mu uteele Kristo, mu uya ali. Ŋa nde huya, nde sa ayabisa bisu mambu moosi.» 26Yisu aleeli nde: «Me ni nde wuuna, me wu ndi mu utoyo na we.»
27Ŋa mbisa, bayihi ba nde baayafutaha. Bo baakimuhi bu nde hakatoyo na mukaasu mumosi. Ka tso mumosi mu bo a hafuuli nde ve ti: «We na nde hima?» Buve: « Mu hima we li mu utoyo na nde?» 28Na bu mukaasu hasiisi lisanga la nde, nde ayeni hu musyenge na ayayabisa huli baatu: 29«Yamonwani bahala li limiiyaabisa me moosi ma me apaanga. Peleve nde ni Kristo hwande!» 30Bo baapali hutso musyenge na baayabwana Yisu.
31Mu tangu moyiina, bayihi baakaleele nde: «Rabi, we afwana udya!» 32Ka nde afutili bo: «Me na byudya bi benu laaveleyaaba.» 33Bayihi baakalelesene: «Aa! Kahu na muutu wu behili nde byudya?» 34Yisu afutili bo: «Bya me byudya ni mu ukuhasa litondo la Taata wu atsindaha me, na umana isalu hi nde hava me.»
35«Benu a lili mu uleele ve ti: “Batsungi bamiisaala bana, na sa bakukaha muhunu”? Ka me, me ndeele benu: syenolwaani miisu, na kengesaani matsyehe bubwe. Mbutu yimiyele na tangu yimiito yi ukoolo yo! 36Wu li mu ukuukaha muhunu ubaabaha pfuta a nde, na nde ubaakoolo mbutu, ni baatu ba buubaha monyi wu bilima na bilima. Buuna, wu li mu ukuna na wu li mu ukuukaha, bali mu kinya bo baboole. 37Ni mu toni moyiina, mbuli kuma yili mu uleele: “Mumosi ubaakuna, na mukima ubaakukaha.” 38Me atsindaha benu mu uyakuukaha hutso a tsyehe yi benu laavelesala. Ni tsyehe yi bakima baasala, ka benu laabaha kaluha mu isalu hya bo.»
39Bisu Samariya babalahi ba bula mo mobuuna, baasiidi imiinu mu Yisu mu toni imbangi hi mukaasu hatiidi: «Nde miiyaabisa me moosi ma me apaanga.» 40Ni mubuuna, bisu Samariya baayidi huli nde, bo baayayiini nde mu utsahala na bo. Na nde atsahili huuna bilumbu byole. 41Litangu la baatu ba baasiidi imiinu mu mikuma mi Yisu hakaleele, laafulili bulahi. 42Na bo baakaleele huli mukaasu: «A hisaali ndulu mu toni imbangi hya we bisu limiisa imiinu ve. Ka bisu mwakulu limiiyuha nde, na bisu limiiyaaba ti mbuli, nde ni Muyobili a tsi.»
Yisu miibeeloso mwana a mukuutu hu Ngalili
43Humbisa bilumbu mo byole biina, Yisu apali mu bula mobuuna, mu uyene hu Ngalili. 44Ni mbuli, nde aleeli mu nde mwakulu ti: «Mumbihuli a hubaayaka likinzu mu tsi a nde mwakulu ve.» 45Ka ŋa nde hatoodi hu Ngalili, bisu Ngalili baayaki nde bubwe, mu toni ati bo kaka baayeni hu mukungi a Paake, hu Yeruselemi. Bo baamoni moosi ma nde havangi hu mukungi mowuuna. 46Nde afutihi hu musyenge a Kana hu itanzi hya Ngalili, hu nde hakitusi mamba mu malamu.
Hwaba hu Kapernahumi, mukuutu masadaadu, wu akasala na pfumu, wu mwana a nde haba na ubeele. 47Mukuutu masadaadu ayuhi ti Yisu miimata hu itanzi hya Yude, mu uyene hu Ngalili. Nde ayamono nde na ayayini nde, mu uyabeeloso mwana a nde wu aba aka ŋa pedu lipfu, hu Kapernahumi. 48Yisu aleeli nde: « Tangu yoosi, benu ubaasaha umamono biliimbu bya kimuhili na bipadi, mu usiila me imiinu.» 49Mukuutu masadaadu aleeli nde: «Pfumu, yanga mawasa huli me, teehele mwana a me akwa.» 50Yisu afutili: «Yene, mwana a we uba monyi.» Na bahala mo laasiidi imiinu mu ma Yisu haleeli nde, na nde ayeni. 51Bu nde haba mu ufutaha, basalili ba nde baayabwana nde mu nzila na baayabisi nde: «Mwana a we monyi a li.» 52Nde afuuli bo mu ki ngunga mwana a nde amoni nyutu bubwe. Na bo baaleeli nde: «Matsiha, mu ngunga ya tsomi ya humbisa a mwangulu, baahu laamata mu nde.» 53Taata ayibwili ti, ni mu ngunga moyiina Yisu haleeli nde: «Mwana a we uba monyi.» Mu tangu moyiina, nde asiidi imiinu mu Yisu, nde na nzo a nde yoosi. 54Hiina aba ni iliimbu hya byole hi Yisu hasiidi hu Ngalili. Nde hasiidi hyo, ŋa nde hamati hu itanzi hya Yude.
ప్రస్తుతం ఎంపిక చేయబడింది:
Yowani 4: TSA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© (Active), Wycliffe Bible Translators, Inc. All rights reserved.