Yowani 5
5
Yisu miibeeloso ikata hu idiinga hya Betsata
1Titswene, aba na mukungi mumosi wu Bayudaayo, na Yisu akumi hu Yeruselemi. 2Ŋa pedu ikotili hi musyenge mowuuna, hya nduhi a «Mandombo», hwaba na idiinga imosi hi bubaateele mu ndaha Bayudaayo: «Betsata». Hwaba na mapombo mataanu mamanene, ma maaba maadinga idiinga. 3Hutsina mapombo momaana, hwaba hwalambama koonge babeedu: binzimana, banga matsode, na ba baavolo binama. [Bo baakakeele ti mamba manyingama, 4mu toni ati, pofi a Pfumu akakulamana matangu makima na akanyingasa mamba ma idiinga. Watsomi mu babeedu mu usutaha mu mamba ma bamiinyingasa, akabeeloho, mu pasi bubeedu.]
5Hwaba ŋaana, na bahala limosi li laakabeele, umata bilima maku matatu na pwombo (38). 6Yisu amoni nde alaambama na ayabi ti nde aba mu iteesi mohiina umata beleve. Yisu aleeli nde: «We tondi ubeeloho?» 7Mubeedu ni ufutala nde: «Pfumu, me a handi na muutu wu ubwadiha me mu idiinga ŋa mamba mali mu unyingama ve. Mu tangu yi me tondi uyene huuna, mukima amiiteehele me.» 8Yisu aleeli nde: «Teleme, volo ikala hya we, na yene.» 9Mawasa-mawasa, bahala molinili laabeeluhi, lo laavoli ikala hya lo na laayeni. Maana maakavangama mu ilumbu hya saba.
10Bayudaayo ni uleele huli bahala li laabeeluhi: «Loloyi ti ilumbu hya saba, we a hali na muswa mu ubita ikala hya we ve#Yel 17.21.» 11Nde afutili bo: « Muutu wu beelusi me leeli me: “Volo ikala hya we na yene.”» 12Bo ni ufuula nde: «Na wuuna leeli we: “Volo ikala hya we na yene”?» 13Ka bahala li Yisu habeelusi a laakayaaba wu abeelusi nde ve. Mu toni ati, Yisu avyasuhi ŋa tso a konge a baatu ba baaba ŋaana.
14Humbisa, Yisu amoni bahala mo li nde habeelusi, mu litandala la nzo a Nzambi. Na aleeli lo buunuubu: «Mono! We miibeeloho. A habwesa masumu, mana dyambu li laafulala bunono a libwila we.» 15Bahala mo laayayabisa huli Bayudaayo ti muutu wu abeelusi nde aba Yisu. 16Bayudaayo baakabingasa Yisu, mu toni ati nde hakasa mavanga momaana mu ilumbu hya saba. 17Ka Yisu afutili bo: «Taata a me li mu usala tangu yoosi, na me kaka ndi mu utsala.» 18Bu Bayudaayo baayuhi buuna, piinga a bo yi uduba Yisu yaafulili. Bo baakasaha uduba nde, ndulu a bu nde hakavelekinza ilumbu hya saba ve, ka fula-fula, bu nde hakateele Nzambi Taata a nde na ubaamonehele we itsiitsa hya nde.
Lituma li Taata hava Mwana
19Yisu ni ufutala huli Bayudaayo: «Mu mbuli, mu mbuli me ndi mu undeele benu, Mwana utwala usa pasi isiha mu nde mwakulu ve. Ka Mwana ubaasa ndulu bi nde ubaamono Taata mu usa. Na byosi bi Taata ubaasa, Mwana kaka ubaakuhasa byo usa. 20Bu Taata hatondo Mwana, nde ubaamwese Mwana byosi bi nde ubaasa. Na nde umwese nde mavanga ma maalutala bunene na ma benu laateehili umono, mana benu likimuha. 21We bu Taata ubaasuula babaakwa na ubaava bo monyi, ni bumosi kaka Mwana ubaava monyi huli muutu wu nde atondi. 22Taata a hali mu utsuundasa pasi muutu ve, ka nde ava lituma li utsuundasa huli Mwana. 23Nde hasa buuna, mana boosi babaakiinza Mwana, we bu bo bali mu ukiinza Taata wu atsindaha nde. Mu toni ati, muutu wu avelekiinza Mwana, a hali mu ukiinza Taata ve.
24Mu mbuli, mu mbuli me ndi mu undeele benu, muutu wu li mu uyuha mambu ma me, na li mu usa imiinu mu wuuna wu atsindaha me, nde li na monyi wu bilima na bilima. Nde a hukoto mu tsuundusu ve, ka nde amiimata mu lipfu na uvyoho hu monyi. 25Mu mbuli mu mbuli me ndi mu undeele benu, ngunga yili mu uya, na yaamiito, yi babaakwa buyuha ndaha a Mwana a Nzambi. Ba buyuha yo, sa baba monyi. 26We bu Taata ali na monyi mu nde mwakulu, ni bumosi kaka nde hava Mwana muwsa mu ubaha monyi mu nde mwakulu. 27Bu nde ali Mwana a Muutu, Taata aviidi nde lituma li utsundasa baatu. 28A likimuha mu toni a maana ve. Ngunga yili mu uya, yi boosi ba bali mu mangila buuyuha ndaha a nde, 29na sa bapala mu mangila ma bo. Boosi ba baasiidi mamabwe sa basuuha mu ubaha monyi. Ka boosi ba baasiidi mamabi sa basuuha mu uyaka tsundusu a bo#Dan 12.2. 30Me utwala usa pasi isiha mu me mwakulu ve. Me ubaatsuundasa we bu Taata ubaatuma me, na tsuundusu a me yili ya tsiitsa. Mu toni ati, me a handi mu utsaha usa litondo la me mwakulu ve, ka mu ukuhasa litondo la Taata wu atsindaha me.»
Taata li mu utiila Yisu imbangi
31«Tso me ndi mbangi a me mwakulu, imbangi hya me a hili hi hyasungama ve. 32Ka, hu li na muutu mukima wu ubaatiila me imbangi, na me nzaabi ti imbangi hi nde ubaatiila me, hili hi hyasungama. 33Benu bakuutu ba Bayudaayo, benu laatsindihi bayihi ba benu huli Yowani, na nde atiidi imbangi mu imbuli hya me. 34Me a handi na nzala ati batiila me imbangi ve. Ka me ndi mu undeele maana, mana benu liyoboho. 35Yowani aba we mwinda wu bali mu ubaangisa, mana nde ayalusa baatu boosi. Mu mwana tangu hoole, benu laamoni kinya mu liyalala la nde.
36Ka me ndi na imbangi hi hyafulala hya Yowani bunene. Mu toni ati, mavanga ma Taata hava me mu ukuhasa, ni mavanga momaana me ndi mu utsa. Mo mali mu utiila me imbangi ti Taata ni wu atsindaha me. 37Na Taata wu atsindaha me, li mu utiila me kaka imbangi. Ka benu kini a laayuhi ndaha a nde ve, tso umono hiinzi hya nde. 38Na mukuma a nde a hali mu ukwilala mu benu ve. Mu toni ati, benu a lili mu usa imiinu mu wuuna wu nde hatsindaha ve.
39Bu benu libaatsima ubaha monyi wu bilima na bilima, benu lili mu ukengese bubwe-buwe Mabuuku ma Ngidi. Ka mo ni ma mali mu utiila me imbangi. 40Benu ti a lili mu utondo uya huli me mu uyaka monyi wa mbuli ve!
41Me a handi mu utsaha ubaha muyusu wu ubaamata huli baatu ve. 42Ka me nzaabi benu: Benu a lili na litondo mu Nzambi mu mitima mya benu ve. 43Me anza mu nduhi a Taata a me, na benu a laayaka me ve. Ka tso mukima yidi mu nduhi a nde mwakulu, benu sa liyaka nde. 44Buni benu luutwala usa imiinu mu me? Benu ba libaayusasana, na ba lavelesaha muyusu wu ubaamata huli Nzambi siha. 45A litsima ve ti me tsa kese benu huli Taata. Wu li mu ukese# benu Moose, wu benu laasuusala hiitu hya benu. 46Tso benu libasiila Moose imiinu, benu likiisiila me kaka imiinu, bu nde hasonehe mu toni a me#Pfu 18.15 . 47Ka benu livelesa imiinu mu maambu ma nde hasonehe, buni benu luutwala usa imiinu mu mambu ma me?»
ప్రస్తుతం ఎంపిక చేయబడింది:
Yowani 5: TSA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© (Active), Wycliffe Bible Translators, Inc. All rights reserved.