YOHANES 6
6
Yesus Kiog Caknak nu Lima Ribu Urag
(Mat 14:13-21; Mrk 6:30-44; Luk 9:10-17)
1Telas ajeh Yesus ru Ipengikot-pengikot naihuj perahu ru naiet nu englag Tasek Galilea de bigelar juga Tasek Tiberias. 2Bile nailei ku pajeh, jeoi mai jengoi naijoi Yesus kerana ya naineng tanda ajaib de Kibeh mase Kiperbor mai nyik. 3Yesus ru Ipengikot-pengikot naihuj nu kemil lod lalu naigei ku pajeh. 4Ku mase ajeh, Arik Raya Paskah mai Yahudi ya kaha-merek. 5Yesus Kineng nu Isekelileg ru Kibakek jeoi mai jengoi naihol nu Kek. Kerana ajeh, Yesus Kitanya nu Filipus, “Ku belok hiha-beli ruti hiha-bercak mai jengoi adeh?” 6(Yesus Kipanei ma de Kaha-beh tapi Kitanya begei ajeh kerana Kaha-uji iman Filipus.)
7Filipus kiberlag, “Gaji lebeh enam gencek pen pek cukop hiha-og caknak ha enai hamapen jap mai kikep gek.”
8Pengikot Yesus de kilek imuh Andreas menang Simon Petrus kiurok, 9“Ku padeh mong numom sanget keral de mong lima kebek ruti barli ru nar ikor kak. Tapi ma iguna ha mai jengoi adeh?”
10Yesus Kiurok nu Ipengikot-pengikot, “Orloh enai gei.” (Ku pajeh mong jeoi rumpot.) Mai jengoi pen naigei. Amen bikira keral taleh, mong kira-kira lima ribu urag keral. 11Yesus Kikot ruti ju sanget keral ajeh lalu Kiucap syukor nu Jenang. Telas ajeh Kiog ruti ajeh nu mai jengoi de naigei ku pajeh. Lalu Kiog kak nu enai. Dikdij mai pen naicak lei bakhek. 12Telas ajeh Yesus Kiurok nu Ipengikot-pengikot, “Catukloh lembeh caknak, wes agok pej.” 13Ju lima kebek ruti barli de bicak ya mai jengoi, mong 12 bakol lembeh caknak de naicatuk.
14Bile mai jengoi naineng tanda ajaib de bibeh ya Yesus, naiurok, “Sengoi adeh betol-betol Nabi de bijanji ya Jenang.” 15Yesus Kipanei mai jengoi doh naihol ru naipaksa Kek Kijadi raja. Kerana ajeh, Yesus Kiet Kihalei nu lod.
Yesus Kicip ku Kemil Teu
(Mat 14:22-33; Mrk 6:45-52)
16Bile iarik ya kaha-merek kelem, pengikot-pengikot Yesus naiceleh nu tasek, 17lalu naihuj perahu ru mula nailintas tasek ajeh naiha-et nu pekan Kapernaum. Iarik ya kelap tapi Yesus pekseg Kilei nu enai. 18Mase ajeh, pinoi kipoi kuat ru teu tasek mula kibeumbak. 19Telas Ipengikot-pengikot ya naikayoh kira-kira lima atao enam kilometer inyaknak, naibakek Yesus Kicekcip ku kemil teu ru Kiderleh nu perahu enai. Enai ihad naisengoh. 20Tapi Yesus Kiurok nu enai, “Agok sengoh, Eng Yesus!” 21Bile naicerngai Yesus Kibual begei ajeh, naisamut Kek muj nu kateh perahu. Ku sarik jijeh juga perahu enai ajeh kilei nu pekan Kapernaum.
Mai Jengoi Naikek Yesus
22Ku ihuper mai jengoi de bibercak ya Yesus lekat mong ku englag Tasek Galilea. Enai naisedar tentang hal adeh: Perahu de nek nanek taleh de mong ku pajeh kelemnek ya pek mong nij. Jadi, naiurok, “Yesus pek Kihuj perahu besama ru Ipengikot-pengikot de nailintas tasek ajeh. Jadi, ku belok Kek?” 23Telas ajeh mong memerip perahu ju pekan Tiberias naihol nu tempat enai ajeh ku belok Tuhan Yesus Kiucap syukor ru Kibercak lima ribu urag mai. 24Bile mai jengoi naipanei Yesus ru Ipengikot-pengikot ya walah ku pajeh, enai pen naihuj perahu-perahu de naihol ju pekan Tiberias ajeh ru naiet nu pekan Kapernaum naiha-kek Yesus.
Yesus Ajeh Ruti de Kiog Sinui
25Bile naibakek Yesus ku pekan Kapernaum, naitanya nu Kek, “Guru, bile Jenlei nu madeh?”
26Yesus Kiberlag, “Cerngailoh abor. Engkek engkekek Eng pek kerana engkeneng ru engkereti ha maksod tanda ajaib de Ngbeh. Engkek engkekek Eng kerana ya engkecak ruti lei engkebakhek. 27Agok kerekwat ha berkep caknak de buleh kibarik tapi kerekwatloh ha berkep caknak de tahan lei ditehjeh. Eng Kenon Manusia doh Ngog caknak ajeh nu engkek kerana Jenang Menek ya Kiog hak ajeh nu Eng.”
28Naitanya nu Kek, “Ma de patot jibeh supaye jibeh kerjak de bihod ya Jenang?”
29Yesus Kiberlag, “Adehloh de bihod ya Jenang: Pecayaloh nu Ilei de bingeng ya Jenang.”
30Naitanya nu Kek, “Tanda ajaib ma de dapat Jenbeh supaye buleh jineng ru jipecaya nu Jen? Maloh de dapat Jenbeh? 31Jenang rak jik naicak manna ku padag guron begei de bicot ku kateh Alkitab: ‘Kek Kiog ruti ju serga sebegei caknak enai.’ ”#Mzm 78:24; Neh 9:15; Kel 16:4
32Yesus Kiurok, “Cerngailoh abor. Apeka Nabi Musa de kiog ruti ju serga tapi Menek Eng de Kiog ruti de sebenar ju serga nu engkek. 33Ruti de biog ya Jenang ajehloh Ilei de Kiceleh ju serga ru Kiog sinui de lei ditehjeh nu manusia.”
34Naiurok, “Jen, ogloh ruti ajeh selalo nu jik.”
35Yesus Kiurok nu enai, “Engloh ruti de kiog sinui de lei ditehjeh. Bok de kihol nu Eng doh pek kicuag lei ditehjeh ru bok de kipecaya nu Eng doh pek kihaos lei ditehjeh.
36Tapi begei de ya pernah Ngpasal nu engkek, engkek ya engkebakek Eng tapi pek engkepecaya nu Eng. 37Jap-jap sengoi de biog nu Eng ya Menek doh naihol nu Eng. Eng doh pek Ngnyek bok-bok taleh de kihol nu Eng. 38Kerana, Ngceleh ju serga Ngha-beh heknod Menek de Kingeng Eng, apeka Ngha-beh heknod LiEng sendiri. 39Adehloh heknod Menek de Kingeng Eng: Ju engkap dikdij mai de Menek Kiog nu Eng, pek numom pen de nyep, tapi dikdij enai biberkos ku arik kiamat. 40Mimang adehloh heknod Menek Eng: Dikdij mai de naineng Eng IKenon ru naipecaya nu Eng naikep sinui de lei ditehjeh. Eng doh Ngberkos enai ku arik kiamat.”
41Mai Yahudi ku pajeh mula naibesungut-sungut tentang Yesus kerana Kiurok, “Engloh ruti de kiceleh ju serga.” 42Naiurok ratak liknai, “Kek ajeh Yesus Kenon Yusuf. Hik hikenal Iamek-apak. Yama Kibual Kek Kiceleh ju serga?”
43Yesus Kiurok nu enai, “Agokloh besungut-sungut. 44Pek mong numom pen de buleh kihol nu Eng amen kek pek bibetek ya Menek de ngengngeng Eng. Bok taleh de kihol nu Eng, Eng doh Ngberkos kek ajeh ku arik kiamat. 45Ku kateh kitab nabi-nabi mong bicot, ‘Dikdij mai doh biajar ya Jenang.’#Yes 54:13 Bok de kicerngai ru kibelajar ju Menek doh kihol nu Eng. 46Pek mong numom pen de pernah kineng Menek. Had Ilei de Kihol ju Jenang taleh ya Kineng Menek.
47Cerngailoh abor. Sengoi de kipecaya nu Eng mong sinui de lei ditehjeh. 48Engloh ruti de kiog sinui. 49Jenang rak engkek naicak manna ku padag guron tapi naidat juga. 50Tapi ku padeh mong ruti de kiceleh ju serga. Sengoi de kicak ruti ajeh doh pek kidat. 51Engloh ruti sui de kiceleh ju serga ajeh. Sengoi de kicak ruti ajeh doh kisui lei ditehjeh. Ruti ajeh berog Eng de Ngog supaye manusia buleh naikep sinui de lei ditehjeh.”
52Mai Yahudi mula naibekelahi ratak liknai bile naicerngai ha engrok Yesus ajeh. Naiurok, “Begeiharok Sengoi adeh dapat Kiog Iberog sebegei caknak?”
53Yesus Kiurok nu enai, “Cerngailoh abor. Amen pek engkecak berog Eng Kenon Manusia ru engkengut behip Eng, engkek pek dapat engkekep sinui de lei ditehjeh. 54Bok de kiterima berog ru behip Eng, kek kikep sinui de lei ditehjeh lalu Ngberkos kek doh ku arik kiamat. 55Berog ru behip Eng adehloh betol-betol caknak ru ngeknut de kiog sinui de lei ditehjeh. 56Bok de kicak berog Eng ru kingut behip Eng, kek kisui ku kateh Eng ru Eng Ngsui ku kateh kek. 57Menek de sui Kingeng Eng. Eng Ngsui kerana Menek Kiog sinui nu Eng. Begei ajeh juga sengoi de kicak berog Eng doh kisui kerana Eng doh Ngog sinui nu kek. 58Engloh ruti de kiceleh ju serga. Jenang rak engkek naicak manna ku padag guron tapi naidat juga. Tapi sengoi de kicak ruti adeh doh kisui lei ditehjeh.”
59Yesus Kiurok dikdij ajeh mase Kek Kibeajar ku deg sembahyang ku pekan Kapernaum.
Engrok de Kiog Sinui de Lei Ditehjeh
60Jeoi Ipengikot naicerngai Iengrok ajeh lalu naiurok, “Ineajar ajeh ihad susah biha-terima ya bok-bok pen!”
61Yesus Kipanei Ipengikot-pengikot naibesungut-sungut tentang hal ajeh. Kerana ajeh, Kek Kiurok nu enai, “Hal ajeh kibeh engkek tesinggongka? 62Amen engkeneng Eng Kenon Manusia Nghuj nu serga tempat asal Eng, doh engkesedar engrok Eng betol. 63Kelog Santen Kiog sinui de lei ditehjeh. Dikdij ma de bikerekwat ya manusia pek dapat kiog sinui ajeh. Engrok de Ngbual nu engkek ajeh kihol ju Kelog Santen de Kiog sinui de lei ditehjeh. 64Tapi mong juga memerip urag ju engkek adeh de pek engkepecaya.” (Yesus Kipanei ju imula bok de pek pecaya nu Ilei ru bok de kikianat ha Ilei doh.) 65Kek Kiurok nij, “Kerana ajeh, Eng ya Ngpasal hal adeh nu engkek: Pek mong numom pen de buleh kihol nu Eng amen Menek pek Kiog.”
66Telas ajeh jeoi pengikot Yesus naidek ru pek naijoi Kek nij. 67Kerana ajeh, Yesus Kitanya nu 12 urag Ipengikot, “Engkek pen engkeha-dek Eng jugaka?”
68Simon Petrus kiurok nu Kek, “Tuhan, nu bok jiha-et? Ku Jen mong engrok de kiog sinui de lei ditehjeh. 69Jipecaya ru jipanei Jenloh Mai Suci de bingeng ya Jenang.”
70Yesus Kiberlag, “Eng de bepileh engkek 12 urag adeh. Tapi numom ju engkek adeh bisangrog ya Ibles.” 71Yesus Kiurok tentang Yudas kenon Simon Iskariot. Hamapen Yudas numom ju 12 urag pengikot Yesus, kek doh kikianat Yesus.
ప్రస్తుతం ఎంపిక చేయబడింది:
YOHANES 6: AEH
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.