YOHANES 7
7
Yesus ru Imemenang
1Telas ajeh Yesus Kiet nu bebegei tempat ku lengrik Galilea. Kek pek Kaha-et nu lengrik Yudea kerana pemimpen-pemimpen mai Yahudi ku pajeh naiha-perdat Kek.
2Ku mase Arik Raya Deg Pender#7:2 Arik Raya Deg Pender: Ku Arik Raya Deg Pender, mai Yahudi naigei ku kateh deg pender iluniu lapan arik. Enai naibesuka ru naikenang kesetiean Jenang nu jenang rak enai mase naigei ku kateh deg pender ku padag guron sebelom naimuj nu tik Kanaan. Neng rujukan ku Imamat 23:34 ru Ulangan 16:13. kaha-merek, 3memenang Yesus naiurok nu Kek, “Dekloh ju tempat adeh ru etloh nu lengrik Yudea supaye pengikot-pengikot Hek buleh naineng ha tanda ajaib Hek. 4Amen nenumom kaha-jadi tekenal, kek pek kibercep ibahneh. Jadi, amen Hek dapat Habeh tanda-tanda ajaib, pernengloh diri Hek nu dikdij mai.” 5(Memenang Yesus naiurok begei ajeh kerana enai pen pek naipecaya nu Kek.)
6Yesus Kiurok nu enai, “Engkek buleh engkeet bile-bile pen tapi pekseg lei imase Ngha-et nu kote Yerusalem. 7Mai dunia adeh pek naigetek ha engkek tapi naigetek ha Eng kerana selalo Ngpasal bahneh enai jehat. 8Etloh nu raya ajeh. Eng pek Nget kerana mase Eng pekseg kitiba.” 9Telas Yesus Kiurok begei ajeh, Kek lekat Kigei ku lengrik Galilea.
Yesus Kiet nu Arik Raya Deg Pender
10Tapi, telas Imemenang naiet nu raya ajeh, Yesus pen Kiet. Kek Kiet serakngek pek bipanei ya mai kilek. 11Ku mase raya ajeh, pemimpen-pemimpen mai Yahudi naikek ha Yesus ru naitanya, “Belok Kek?”
12Mai jengoi naibebisek tentang Kek. Memerip urag mai naiurok, “Kek ajeh mai bor!” Mai kilek naiurok, “Tok! Kek Kiperikroj mai!” 13Tapi pek mong numom pen de berani belwal bik kerana naisengoh ha pemimpen-pemimpen mai Yahudi.
14Telas memerip arik raya ajeh, Yesus Kimuj nu kateh laman Deg Jenang lalu mula Kibeajar. 15Cengang empag pemimpen-pemimpen mai Yahudi lalu naiurok, “Sengoi adeh pek biajar ya guru-guru Hukom Taurat. Begeiharok Kipanei ihad jeoi hal?”
16Yesus Kiberlag, “Ma de Ngajar adeh pek neajar LiEng sendiri tapi neajar ju Ilei de ngengngeng Eng. 17Sengoi de kaha-beh heknod Jenang doh kipanei same ade neajar Eng adeh kihol ju Jenang atao ju LiEng sendiri. 18Sengoi de kiajar neajar ilei sendiri kikek nehormat ha diri ilei sendiri. Tapi sengoi de kihod kihormat mai de kingeng kek, sengoi ajeh benar ru walah nelennon ku kek. 19Nabi Musa ya kiog Hukom Taurat nu engkek. Tapi pek mong numom pen ju engkek de kitaat nu Hukom Taurat ajeh. Ibukti, engkekerekwat engkeha-perdat Eng!”
20Mai jengoi ku pajeh naiberlag, “Hek Gila! Bok de ha perdat Hek?” 21-22Yesus Kiurok nu enai, “Nabi Musa ya kiog ernor besunat. (Sebenarnye, ernor besunat ajeh apeka ju kek tapi ju jenang rak engkek sebelom kek.) Ha kerana engkeha-taat nu ernor ajeh, ku arik Sabat pen engkesunat sanget. Engkek pen engkebeh kerjak ku arik Sabat! Tapi engkebelal kerana Ngbeh nanek tanda ajaib ku arik Sabat. 23Amen engkesunat sanget ku arik Sabat untok engketaat nu ernor Nabi Musa ajeh, pek sepatotnye engkebelal nu Eng bile Ngperbor mai ku arik Sabat. 24Agokloh engkenilei mai ju ma de engkeneng taleh tapi hodloh engkenilei secare adel.”
Betolka Yesus Peselamat?
25Memerip urag mai de gigei ku kote Yerusalem naiurok, “Kek adehloh iSengoi de bikek baha-perdatjeh! 26Nengloh, Kek Kibelwal ku ngar mai jengoi tapi pemimpen-pemimpen hik pek naibual ma-ma pen nu Kek. Enggamak ya naipanei Kek ajehloh Peselamat de bijanji ya Jenang? 27Bile Peselamat betol-betol Kihol, pek numom pen doh kipanei ju belok Iasal. Tapi Sengoi adeh apeka Peselamat de bijanji ya Jenang kerana hipanei ju belok Iasal.”
28Mase Yesus Kibeajar ku laman Deg Jenang, Kek Kiurok ru suara kuat, “Engkek mimang engkepanei Eng adeh bok ru ju belok asal Eng. Eng Nghol pek ya heknod LiEng sendiri. Jenangloh de betol-betol Kingeng Eng. Engkek pek engkekenal ha Kek. 29Tapi Eng kenal Kek kerana Eng Nghol ju Kek ru Kekloh de Kingeng Eng.”
30Telas Yesus Kibual begei ajeh, pemimpen-pemimpen mai Yahudi naikerekwat naiha-cap Kek tapi walah numom pen de berani kerana imase pekseg lei untok Kek Kidat. 31Tapi jeoi mai ju engkap mai jengoi ajeh naipecaya nu Kek. Naiurok, “Yesus adeh ya Kibeh jeoi tanda ajaib, jadi tentu Kekloh Peselamat de bijanji ya Jenang.”
Pemimpen-pemimpen Mai Yahudi Naiha-cap Yesus
32Mai Farisi naicerngai beniseg mai jengoi tentang Yesus. Kerana ajeh, enai ru raknak-raknak imam agame Yahudi naior memerip urag pengawal Deg Jenang supaye naicap Yesus. 33Yesus Kiurok, “Had sekejap taleh Eng Ngbesama ru engkek, ru doh Nglos nu Ilei de Kingeng Eng. 34Engkek doh engkekek Eng tapi doh pek engkeburuk Eng kerana pek dapat engkeet nu tempat belok Eng mong.”
35Pemimpen-pemimpen mai Yahudi naibelwal ratak liknai, “Nu belok Kaha-et lei pek dapat hiburuk Kek? Enggamak Kaha-et nu mai Yahudi de naigei ku luar lengrik ku engkap mai Yunani, ru Kiajar mai Yunani ajeh. 36Maka imaksod bile Kiurok hik doh hikek Kek tapi doh pek hiburuk Kek? Ru maka imaksod hik pek dapat hiet nu tempat belok Kek mong?”
Teu de Kiog Sinui
37Ku Arik Raya Deg Pender, arik teaher ajehloh arik de paleng penteng. Ku arik ajeh, Yesus Kijinjeg lalu Kiurok ru suara de kuat, “Bok de kihaos, holloh nu Eng ru ngutloh. 38Begei de bicot ku kateh Alkitab, teu de kiog sinui de lei ditehjeh doh kihol ju kateh bok-bok de pecaya nu Eng. ” 39(Bile Yesus Kiurok begei ajeh, Yesus Kimaksod Kelog Santen de doh biog nu jap sengoi de pecaya nu Kek. Ku mase ajeh, Kelog Santen pekseg lagi biog nu mai de pecaya kerana Yesus pekseg bipemulie melalui Idanan, Ikisnos, ru Ineangket nu serga.)
Mai de Naibejawab
40Memerip sengoi de naicerngai engrok Yesus naiurok, “Sengoi adeh mesti Nabi de bijanji ya Jenang.”
41Mai kilek naiurok, “Kek ajeh Peselamat de bijanji ya Jenang.”
Tapi mai kilek naiurok, “Nyiknyuk, Peselamat de bijanji ya Jenang pek Kihol ju lengrik Galilea! 42Ku kateh Alkitab mong bicot begei adeh: Peselamat de bijanji ya Jenang doh Kihol ju kenon-cenok Raja Daud ru ju pekan Betlehem tempat asal Raja Daud.”#2 Sam 7:12; Mi 5:1 43Ipenyudah, naiceraklah kerana mong memaseg peniker tentang Yesus. 44Memerip urag sengoi naiha-cap Yesus tapi pek numom pen de berani naicap Kek.
Pemimpen-pemimpen Mai Yahudi de Pek Pecaya
45Bile pengawal-pengawal Deg Jenang naijog, raknak-raknak imam agame Yahudi ru mai Farisi naitanya nu enai, “Yama pek engkeen Yesus nu madeh?”
46Pengawal-pengawal ajeh naiberlag, “Pek pernah mong numom manusia pen de kibelwal begei ha Kek ajeh!”
47Mai Farisi naiberlag, “Kek Kiperikroj engkek jugaka? 48Pek mong numom pen pemimpen atao mai Farisi de pecaya nu Kek. 49Tapi, mai jengoi ajeh naipecaya nu Kek kerana pek naipanei ha Hukom Taurat. Celakaloh enai ajeh!”
50Ku pajeh mong numom mai Farisi imuh Nikodemus#7:50 Nikodemus: Cerite Nikodemus adeh mong ku bab 3. de entem pernah kiterbuk nu Yesus. Kek kiurok nu enai, 51“Amen hijoi Hukom Taurat, hik pek buleh hihukom mai sebelom ihal bicerngai ru ibahneh bisiasat.”
52Naiberlag, “Yama habele Kek? Hek pen sengoi Galilea jugaka? Nengloh ku kateh Alkitab. Pek mong numom nabi pen de kihol ju lengrik Galilea.”
ప్రస్తుతం ఎంపిక చేయబడింది:
YOHANES 7: AEH
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.