LUKA 1
1
1Wa lokumu Teyofili, Bato baike babeki bakakomi makambo malekiki ontei ya biyo. 2Bakomiki makambo maeniki bato lokelama balokoleliki mpoya bango. Bato bana babeki wana ntango makambo manso mabandiki lokelama mbala ya yambo, mpe ntango ena babeki bakasololi mpoya makambo mana. 3Nga mpenza naasi-naasi o bodjindo makambo manso malekiki uto ebandela mpenza. Yango mei naboiki mokano engeli nakoma na bwele lolenge lamakambo malekiki mpoyau. 4Na adjingi oyeba 'te makambo bato babokoleliki mpoya Yezu malo yabwele.
LOBOTAMA MPE BO MWANA BWA YESU
Anzelu akoleli mbotama ya Yowane Mobatisi
5Ntango Elode abeki akakonzi engumba ya Yudeya, nganga Libanza wawi nkombo yande ebeki Zakaliya abeki akabiki wana. Abeki wa lisanga dja banganga Libanza dji libekamiki lisanga dja Abiya; Yo na mwali wande babeki bango babale bakitani banganga Libanza obo bwa Isalayele, Aroni. 6Zakaliya na Elizabeti babeki bango babale sembo obo bwa Libanza. Edjingi lokolo, babikiki lokokana na mibeko miso miya Libanza bakeliki bobe bito. 7Kasi bakobaka na bana bito mpo Elizabeti akobaka namakoki malozwa nzemi bito. Mpe bango babale babeki mpenza na mbula djike. 8Moko mokolo, Zakaliya abaka akakeli mosala mwande mwa banganga Libanza obo bwa Libanza, mpo ebeki lisanga djande liponomiki lokelela Libanza ontei ya tempelo. 9Ebeki mumesano mwa banganga Libanza lobwaka zeke mpoya lobo mokano nzai akakpela o tempelo ya Nkolo mpoya lotumba malasi ma ansa. Ebeki mosala mwa banganga Libanza mpo nkombo ya Zakaliya yango nde eponamiki. 10Tango Zakaliya abeki akatumbi ansa, bato babaike babeki olibanda dja ndako la tempelo babeki baka sambeli Libanza olibanda dja tempelo. 11Tango Zakaliya abeki ontei ya tempelo, Anzelu yo atomami na nkolo amobimeli ongambo la loboko la lele dja altar dja ansa. 12Tango eeni Zakaliya anzelu, amitungei nabokali mpe abeki akabangi. 13Kasi Anzelu amokoleli: Sobanga bito Zakaliya, mpo'te Libanza aoki losambela lau. We na Elizabeti mwali wau bokabo mwana wa lele. Boengeli lomobeka Yowane. 14Akabopa esengo be, mpe bato babaike baka sepela na botama yande. 15Mpo 'te yo akaba moto munene obo bwa Libanza. Yango ena aengeli amele manga bito, ma mauti na mbuma ya rezin ma makomi ngayi to vino. Akakonzama na molimo mosantu, uto olibumu dja Nyango wande. 16Onsuka, akakonza boike bwa bato ba Isalayele longwela nkolo Libanza wa bango. 17Akaba moto yo akaba na molimo mpe na nguya ya Nzeni Eliya. Yo akaya obo bwa Nkolo, akabongia mitema miya bato mpoya boyei bwande. Akaongia boyokani ontei ya ba Ango na bana babango, mpe akabongola milimo mia kanza loambola bwanya bwa Libanza. 18Zakaliya atuniki Anzelu, nakayeba ndenge ndei mpo ikoli we nde ikelami yabwele? Nabe ekoto mwali wanga mpe abei ekoto mpoya lobota bana. 19Anzelu amokoleli, nkombo yanga Gabriyele mpe natemi obo bwa Libanza, Libanza atomiki nga nabopa nsango elau mpoya mwana wau wa lele. 20Kasi oka nabolau. Nde okomi emimi oka djanga maloba kino mwana wau wa lele akabotama. Nde makelami mpo oboyei loambola makambo mabokoleli nga. Makambo manso makoleli nga nde makelami na ntango yayango. 21Olibanda dja Tempelo, Bato babeki bakadjili Zakaliya mpe babeki bakakamwei mpo alemiki ontei ya tempelo ngonga elayi boengeli. 22Ntango ebimiki Zakaliya o tempelo, aikokaka lokolo nabango bito. Ndenge eni bango baeni 'te eani emoniseli ya Libanza ontei ya Tempelo mpo abeki akalakeli tu na misai kasi alemiki emimi. 23Tango esili poso yande ya mosala ontei ya tempelo, aongoi ondako yande. 24Omokia mwa ntango eti mwali wa Zakaliya Elizabeti aingeli nzemi. Mpe adjaliki ondako esi na bato Sanza itano 25Akoliki, keka makambo nkolo akeleli mikolo mi. Andakeli mawa mande naloumola booni bwanga ontei ya bato banso ombula ye mpoya lompa makoki ma lobota mwana.
Anzelu akoleli mbotama ya Yezu
26Osanza ya motoba ya nzemi dja Elizabeti, Libanza atomiki koba Anzelu Gabriyele na mwana mwali yo abeki akadjali o engumba ebekami Nazaleta, o Etuka ya Galileya. 27Akeiki Omboka ngondo, moko nkombo yande Maliya. Maliya abeki molongani wa mwana wa lele moko nkombo yande Yozefu, yo abeki mokitani wa mokonzi Davidi. 28Anzelu ayeki ombokande mpe amokoliki: Mbote nau, Maliya. Libanza abopamboli we mpenza. Alonau. Abopamboli loleka bantaka banso! 29Sango ya Anzelu etungisi Maliya mpe amituniki, tinandei apa mbote ya lolenge lu?. 30Nabona Anzelu amokoleli: Libanza akaniki abopambola, Maliya, nabona lobanga bito. 31Oka likambo dji. Okazwa nzemi mpe okabota mwana wa lele. Okamopa nkombo Yezu. 32Yo akaba moto monene mpe bato nde bamobeki mwana wa lele wa tata yo alolikolo dja binso. Libanza nkolo akamokomisa mokonzi likolo dja bato bande, bo ndenge nkoko wande Davidi abaka. 33Akaba Mokonzi wa bakitani ba Yakobo mpoya seko mpe bokonzi bwande nde boiba na nsuka bito! 34Nabona Maliya atuniki Anzelu, ndenge ndei nakoki lozwa mwana nabei nano ngondo? 35Anzelu Gabiyele akoliki nande, molimo mosantu mukaya likolo djau. Yango nde nguya ya Libanza eleki likolo nde ebolati mobimba mwau bo elilingi. Nabona mwana wau akaba moto wa ntina mpenza omboka Libanza. Akaba molau mpenza. Akabekama mwana wa Libanza. 36Tika nabokolela likambo djoko: Eboto yau wa muntaka Elizabeti mpe akabota mwana wa lele antako abe ekoto. Bato babeki bakakoli nde aibota bana bito, kasi abei na nzemi dja sanza motoba. 37Mpo elo, na likambo djoko lileka Libanza nabokali bito. 38Mpe Maliya akoliki, leme inso ikokisama ombokanga lokokana na liloba djau bo elonga mosaleli wa nkolo. Mpe anzelu amotikiki.
Maliya akei lokakeka Elizabeti
39Omokia mwa yango, Maliya amipongiki noki- noki mpe akeiki omboka ya mangomba ma Yudeya, eyoma ebeki Zakaliya akadjala. 40Tango ekomiki yo ondako ya Zakaliya, apei Elizabeti mbote. 41Ntango eyoki Elizabete mbote ya Maliya, na mbala yawi mwana anyikani nansai ontei ya libumu dja Elizabeti. Nabona Elizabeti atondjamiki na elimo santu. 42Angangeliki Maliya nabokali mpe amokoli: Maliya, Libanza abolakeli bolingo bonene epai yau loleka bantaka banso, mpe Libanza apamboliki mwana oka botawe! 43We yo olo moboti wa nkolo wanga oyeki lokakeka naibongo na lokumu lonene lu bito. 44Nabokoleli ntango eyokikinga mbote yau mwana ontei yanga asepeli nabokali tee anyikani. 45Ozwi ngolu mpo oamboliki ma nkolo akoliki nau adjingiki lokokisama! 46Nabona Maliya akoli, natondi Libanza wanga. 47Nasepeli na Libanza mobikei wanga, 48Mpo 'te Libanza andakeli mawa mande ombokanga bo mosaleli wande. Banda antewa bato nde bakoli Libanza ampamboli mpo andakeli ngolu yande ombokanga. 49Mpo Libanza wa makoki manso akeliki makambo malokamwa mpo yanga. Nkombo yande elo esantu. 50Alona mawa mpoya ekeke ye ekamotosi ontei ya longonya. 51Akeliki makambo ma manene na nguya yande. Akitidja bato balofundo mpe ba bakamanyi 'te balo bato ba banene. 52Aumoli nabokali bakambi obiyoma bia bango bianguya, kasi atomboli bato ba lomikitidja. 53Libanza atonzei bato bawei nanzala nabieka bia bilau abenginyi bato ba misolo mpe abapeiki ekei bito. 54Asungi mosali wande Isalayele, amanyi lolakela mawa mande 55Na Abalayama mpe nabakitani bande banso mpoya bobele. Nalolenge luna akokeki bilako biapaka yo bankoko babiyo. 56Mokia mwa yango, Maliya adjaliki omboka Elizabeti pene na sanza yato mpe aongoiki ondako yande.
Lobotama la Yowane Mobatisi
57Ekomi ngonga ya lobota, Elizabeti aboti mwane wande mpe aboti mwana wa lele. 58Ntango ba babeki bakadjali nande eyoma yawi na biboto balibota djande baeniki ndenge Libanza alakiki mawa mande, nalomopa mwana wa lele banganiki nande. 59Ntango mwana akokeiki mikolo mwambi, bebi na biboto biande banganiki mpoya losepela elongo mpo lotena ngenga ya mwana wa Zakaliya. Bamanyeiki nkombo yande ndebei Zakaliya mpo yango nde elo nkombo ya Ango wande. 60Nyango wande akoliki bito nkombo yande Yowane. 61Bamokoleli, moto wawi olibota djau alona nkombo ena bito. 62Bakeliki bilembo omaboko mabango mpoya lotuna Zakaliya, Ongo wa mwana ndenge ndei adjingi abeka mwana. 63Zakaliya aongi etanda akoma olikolo dja yango, mpe akomiki maloba ma olikolo dja yango: Nkombo yande Yowane. Bato banso bakamoiki na makambo makomiki yo. 64Na mbala yawi, Zakaliya akomi akakoli koba mpe amasiki lokumia Libanza. 65Bato banso ba djongadjonga nabango bakamoi nabokali mpe lobanga. Moto munso omamboka mangomba ya Yudeya babeki bakakoli manso malekiki. 66Yo munso ayokiki ntina ya makambo mana abeki akamanyi na lokamwa nabokali. Bakoliki, yabwele mwana yo akakoli mpoya lokoma moto moko wa motuya nabokali. Bakoliki bo abei polele mpo Nkolo abeki nande. 67Mpe Zakaliya atondisamiki nelimo santu, mpe apeiki nsango louta na Libanza. Akoli 68Tika ete tokumia nkolo yo alo Libanza wa Isalayele, mpo ayei loka losunga bato bande mpe akabikia bato bande. 69Alopei mobikisi wa nguya mpoya biyo libota dja Davidi mosali wande. 70Ye elo mpenza makambo Libanza alakiki 'te akakela lolekela banzeni bande basantu ba babaka ontango ya kala. 71Apei mobikisi mpoya lolobikia obanguna babiyo mpe obato banso baka loini. 72Akeliki bona mpoya lolakela bolingo bwande oba nkoko babiyo mpe lokanisa Bondeko bwande bukelikiyo nabango. 73Ye elo Bondeko bukelikiyo na nkoko wabiyo Abalayama. Akoliki Naka bobikea obanguna babino nanti 'te bokoka longumbamela na lotika lobanga alodjingiki toba baengebeni mpe totosa mibeko mwande ntango inso tolo na bomoi. 74Alumoli omaboko ma banguna, mpo tomosalela nabobanngi bito. 75Mpo toba omiyo mande basantu, mpe toba na bosembo mikolo minso obomoyi bwa biyo. 76Mpe we mwana wanga wa moti, bato bakaeba 'te olo Nzeni wa mwana wa Libanza wa nguya yo alolikolo dja binso okabongia bato mpoya loya la nkolo nantina 'te baba nabonkengi ntango ekaya nkolo. 77Okabasunga bato bande loeba 'te Nkolo akayei loka babikia onzela ya lolimbisa masumu mabango. 78Libanza adjingi alobikia mpo akaloyokeli mawa mpe mpo antonda mawa keka ntina akatomi mobikisi yo louta lola mpoya loya loka losunga. 79Akapambola ba bakabiki ontei ya djombi mpe o mawa mpe ba bakabangi ntango bakamanyi mpoya liwa nantina 'te bakoka lobika nakimia ya Libanza. 80Mwana wa lele akoliki mpe akomiki mokolu akoliki na bopikiliki bwa nzoto mpe Bizaleli abeki akabiki obobe kino ekoliki yo mpe ntango ekokiki mpe amasiki loteya bato O Isalayele.
ప్రస్తుతం ఎంపిక చేయబడింది:
LUKA 1: NDW
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Ndobo Bible by Beyond Translation is licensed under Creative Commons Attribution-ShareAlike 4.0 License.