LUKA 3
3
MABONGISI MA MOSALA MA YEZU
Yowane mobatisi ntoma ya Libanza
(Mt. 3:1-10; Mk. 1:1-6)
1Ebeki antewa mobu mwa djomi nitano mwa moyangeli wa Tibelia Kaisala mokonzi wa Loma. Poso Pilato abeki mokonzi wa etuka ya Yudeya, Elode abeki mokonzi wa etuka ya Galileya mpe eboto yande Filipo abeki mokonzi wa bituka bia Itelia mpe wa Talakonite, mpe Lisania abeki mokonzi wa etuka ya Abilene. 2Anasi yo na Kayifa babeki banganga Libanza banene. Na ntango ye nsango yoko eutiki omboka Libanza eyeki omboka Yowane mwana wa Zakaliya, abeki akadjali obobe. 3Omokia Yowane adjati omokili mobimba djingadjinga na obodjiko bwa Yolodane mpe amasiki losakola omboka bato. Akoliki, oengeli loyambola mpe lozwa batisimo mpo Libanza akoka nalolimbisa masumu mau. 4Nzeni Izaya asakoliki mpoya Yowane ntango ekomiki yo nsango ye euti na Libanza ontei ya munkanda mwande, moko moto akangangi obobe: Nkolo akaya noki, bona boponga nzela mpo yande mpe boyembola nzela mpo adjata! 5Engeli botonza mabulu manso ngomba inso mpe ngomba inso iba patatalu. Engeli lokela nzela ye elo nsemba, mpe banzela ilo na mabulu ebongi ibasemba. 6Mpe bato banso nde baeni mobikisi atomami uta na Libanza 7Yango ena bato babaike bayeki omboka Yowane mpo abakundja batisimo abakoli: Bino bato ba bipo! Olo nabobe lokanisa 'te na lokula batisimo nde oloti lozwa etumbu ya Libanza mpoya masumu mau? 8Mpo nalolota loambiama ongeli nalodjala na bomoi balau mpe obongoli motema mwau omboka Libanza. Bokolo ontei ya bino bito, Libanza nde alopa etumbu bito mpo tobei bakitani ba Abalayama. Mpamba bito naka bokoleli Libanza akoki na lobongola mabanga ma makoma bana ba Abalayama mpo mazwa eyoma ya bino. 9Antewa, Libanza alo pene ya lopa etumbu na bato baibongola mitema bito. Abei bo moto yo akateyi Soka djande o nkanga ya mwete. Bo moto abei bo mwete mukobota mbuma elau bito, Libanza akapa moto mei etumbu. Moto mei akaba bo mwete bamoteni mpe bamotumbi. 10Bona bato basu ontei ya ebele batuniki Yowane: Libanza adjingi biyo tokela boyi? 11Yawone abaonginzeli, bo moto wawi ontei ya bino olo na simisi ibale apa yawi na moto odjangi. Bo alona bieka apa moto odjangi bieka. 12Bakongoli ba misolo miya leta bayei omboka Yowane lokula batisimo; Bamotuni: Nkolo, toengeli lokela makambo mandenge ndei? 13Yowane abaonginzeliki: Botika lobo mosolo mwa mpako djike omboka bato loleka ndenge bakonzi baekolo babotomi bokela! 14Unko bona basoda basu bamotuniki: Mpe toengeli lokela boi? Abaonginzeliki: Botonda na lifuti dja bino lobanga bato bito mpo abopa mosolo mwa bango mpe lofunda moto wawi bito na makambo mabipo. 15Bato banso babeki bakadjili 'te Masiya akayei noki-noki mpe babaka bakamanyi, mbalesu Yowane akoki loba Klisto. 16Yowane abaonginzeliki bango banso: Nakunzei Batisimo na mayi, kasi moto wawi akayei noki-noki andeki nga na bonene nalo bolau bito mpo na lutola bikoto yande bo mosali akakela. Akakulidja bato na elimo santu na mweya. 17Klisto alobo mosali mala apeli kinyongela, la leele. Alo pene ya lopetola mbuma yande ye itokomi mpe loanginya masangu ondako yande ya lobomba bikei kasi akatumba nkinga omweya mokozimanya. 18Mpe nalolenge lu, Yowane asangeliki bato nsango elau, mpe abapeiki toli na mateya maike mpoya loyambola.
(Mt. 14:3-4; Mk. 6:17-18)
19Ontango yoko bo, Yowane apameliki Mokonzi Elode mpo alongaka mwali wa eboto yande wa lele, yo nkombo yande Erodiada, Yowane akoliki mpe bobe mpoya Elode mpoya bobe bosu bunso bu bukelikiyo. 20Mokia Elode akeliki likambo djoko dja libe loleka lolenge aingidjiki Yowane oboloko.
Yezu azwiki libatisi
(Mt. 3:13-17; Mk. 1:9-11)
21Ntango Yowane abeki akapei bato banso batisimo babeki bakayei ombokande, akudjei mpe Yezu.Omokia mwa yango Yezu abeki akasambeli likolo lidjimbwami. 22Mpe Elimo Santu ekiteli likolo djande lolenge dja ebenga. Libanza akoliki uto lola lokolo, «Olo mwana wanga wawi wa bolingo mpe nasepeli be nau».
Bankoko ba Yezu
23Ntango Yezu abeki na mbula nsoki ntuku yato amasiki mosala mwa loteya bato banso. Yezu aebaniki bo mwana wa Yozefu, Yozefu abeki mwana wa Eli. 24Eli abeki Mwana wa Mata. Matate alo mwana wa Levi. Levi abeki mwana wa Meleki. Meleki abeki mwana wa Yanai. Yanai abeki mwana wa Yozefu. 25Yozefu mwana wa Matia. Matia mwana wa Amosi. Amosi mwana wa Naume. Naume mwana wa Esli. Esli mwana wa Nagai. 26Nagai mwana wa Maate. Maate mwana wa Matatiasi. Matatiasi mwana wa Semeyini. Semeyini mwana wa Yozeki. Yozeki mwana wa Yuda. 27Yuda abeki mwana wa Yowana. Yowana abeki mwana wa Lesa. Lesa abeki mwa wa Zolobabele. Zolobabele abeki mwa wa Selatile abeki mwana wa Neli. 28Neli mwana wa Meleki. Meleki mwana wa Adi. Adi mwana wa Kosame. Kosame mwana wa Elemadame. Elemadame mwana wa Er. 29Er mwana wa Yosuwa. Yosuwa mwana wa Eliezele. Eliezele mwana wa Yolime. Yolime mwana wa Matate. Matate mwana wa Levi. 30Levi mwana wa Simeona. Simeona mwana wa Yuda. Yuda mwana wa Yozefu. Yozefu mwana wa Yoname. Yoname mwana wa Eliakime. 31Eliakime Mwana wa Melea. Melea mwana wa Mena. Mena mwana wa Matata. Matata mwana wa Natane. Natane mwana wa Davidi. 32Davidi mwana wa Isayi. Isayi mwana wa Obedi. Obedi mwana wa Bowazi. Bowazi mwana wa Salomo. Salomo mwana wa Nasone. 33Nasone mwana wa Aminadab. Aminadab mwana wa Ademine. Ademine mwana wa Arni. Arni mwana wa Ezelone. Ezelone mwana wa Pelezi. Pelezi mwana wa Yuda. 34Yuda mwana wa Yakobo. Yakobo mwana wa Isaka. Isaka mwana wa Abalayama. Abalayama mwana wa Tela. Tela mwana wa Nakor. 35Nakor mwana wa Seluku. Seluku mwana wa Ragou. Ragou mwana wa Faleki. Faleki mwana wa Eber. Eber mwana wa Sala. 36Sala mwana wa Kainame. Kainame mwana wa Arfazadi. Arfazadi mwana wa Semi. Semi mwana wa Nowa. Nowa mwana wa Lemeki. 37Lemeki mwana wa Matusala. Matusala mwana wa Enoki. Enoki mwana wa zaredi. Zared mwana wa Malele. Malele mwana wa Kainame, 38Kainame mwana wa Enoka. Enoka abeki mwana wa Sete. Sete abeki mwa wa adama. Adama akelamaka na Libanza. #3:38 Adama akelamaka na Libanza. «Yango Adama abeki mwana wa Libanza nandimbola ye, emokeliki Libanza mbala yawi. Libanza akobotaka adama bito. Te yango eiyokana nabolau nya omunoko mwau, akelela maloba ma mabongi bo Libanza akeliki adama».
ప్రస్తుతం ఎంపిక చేయబడింది:
LUKA 3: NDW
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Ndobo Bible by Beyond Translation is licensed under Creative Commons Attribution-ShareAlike 4.0 License.