SAN JUAN 15
15
Jesús, uva iɨ añetete vae
1Che ko jae uva iɨ añetete vae,#Is 5.1-7. jare cheRu ko jae uva iyangarekoa. 2Opaete jäka iambae oï cheré vae cheRu oyasɨata. Jare opaete jäka ia vae reta oitɨota, jeta ia vaerä. 3Pe reta peyetɨo ma ñee amombeu peve vae rupi. 4Peï avei cheré, che aï peré rami. Metei jäka oyeasɨa yave uva iɨ güi, ngaraa ipuere ia. Echa jäka jae aeño ipuereä ia. Jökoraita vi pe reta mbaetɨ yave peï cheré.
5Che ko jae uva iɨ, jare pe reta ko jae jäka reta. Jókuae oiko cheré vae jare che jese vae jetata ia. Echa mbaetɨ peï cheré yave, ngaraa etei mbae peyapo. 6Jókuae mbaetɨ oï cheré vae oyemombota metei jäka oyeasɨa oyemombo yɨpi vaerä vae rami. Jare yɨpigüe oyemboatɨ jare oyemombo oyeapɨ vaerä.
7Peï yave cheré, jare peyapo che jae peve vae yave, peiporu peipota vae jare oyeapota ko peve. 8CheRu oyemboeteuka ko jeta peia yave. Jare körai peikuaaukata pe reta ko cheremimboe reta. 9CheRu cheraɨu rami che poaɨu. Peï avei cheporoaɨu pe. 10Peyapo cheporookuai reta yave, peï aveita cheporoaɨu pe. Che ayapo cheRu iporookuai reta jare aï avei ipororaɨu pe rami.
11Körai chemiari ma peve peyerovia vaerä che rami, jökorai peyerovia yae vaerä. 12Kuae jae mborookuai amee peve vae: Peyoaɨu, che poaɨu rami.#Jn 13.34; 15.17; 1 Jn 3.23; 2 Jn 5. 13Mboroaɨu tuichagüe güɨnoi vae ko omee jekove ivɨa-ïru reta re. 14Pe reta ko jae chevɨa-ïru, che jae peve vae peyapo yave. 15Ngaraa ma tembiokuai reta jae peve, echa tembiokuai mbaetɨ oikuaa mbae ko iya oyapo vae. Ërei che jae ma peve pe reta ko jae chevɨa-ïru. Echa opaete cheRu omombeu cheve vae aikuaauka ma peve. 16Pe reta mbaetɨ ko cheparavo. Che ko poparavo. Jare poñono peo vaerä jeta peia jare jókuae peiagüe toiko avei. Oipotagüe mbae peiporu cheRu pe cheree re yave, jae omee vaerä peve. 17Kuae jae poyókuai vae: ¡Peyoaɨu!
Ɨvɨ pegua reta pemotareɨta
18Ɨvɨ pegua reta pemotareɨ yave, pemaendúa che räri ko chemotareɨ reta pegüi. 19Pe reta mona ɨvɨ pegua yave, ɨvɨ pegua reta peraɨuta tëi ko. Ërei che poparavo ma ɨvɨ pegua reta ipɨte güi ramo, jae reta pemotareɨ.#Jn 17.14-18. Echa pe reta ɨvɨ peguaä ma ko. 20Pemaendúa che jae peve vae re: “Metei tembiokuai mbaetɨ ko ma yae iya güi.”#Mt 10.24; Lc 6.40; Jn 13.16. Echa che chemotareɨ reta yave, pe reta pemotareɨta vi. Ërei oyapo reta che jae chupe vae yave, oyapota vi pe reta pere chupe reta vae. 21Ërei opaete kuae mbaembae oyapo retata peve cheré perovia ramo. Echa jae reta mbaetɨ oikuaa chembou vae.
22Mbaetɨ yave mona ayu chemiari vaerä chupe reta, ngaraa tëi teko güɨnoi reta. Jáeramo jei rapeä mbaetɨ ko oikuaa reta iyoa re vae. 23Chemotareɨ vae, omotareɨ ko cheRu. 24Mbaetɨ yave mona mbae ayapo ipɨte reta pe mbaetɨi kia oyapo vae, ngaraa tëi teko güɨnoi reta. Ërei jae reta oecha tëi reve chemotareɨ reta jare cheRu oremotareɨ vi. 25Kuae oyapo reta oyembopo vaerä mborookuai pe oyekuatía oï vae. Echa oyekuatía oï körai: “Chemotareɨ reta cherekombae reve.”#Sal 35.19; 69.4.
26Ërei ambou ma peve cheRu güi Oporombopɨakatuta vae jae ko Espíritu añete pegua, cheRu güi ou vae yave, jae imiarita peve cheregua. 27Jare pe reta vi pemiarita. Echa iyɨpɨ güive peiko che ndive.
ప్రస్తుతం ఎంపిక చేయబడింది:
SAN JUAN 15: GUABD
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Biblia DC Guaraní Bolivia © Bolivian Bible Society, 2001.