ข้อพระคัมภีร์ยอดนิยมจาก ลามูลา 6

แบ่งปัน

กะฆีเตอ_ ตูฮัด บือซัยํ เดะ อาตัซ เตอ_ ญา มือญือซัน_ นู ญา บือฌาดี อูมัจ ซือมียา เดะ ดือนียา กะฆีนี. ญา ฌาโวฮ ฮาตี ซูโงฮ_ เดะ ลาฆู อีนี.

ตูฮัด บือซัยํ เดะ อาตัซ เตอ_ ญา ลีฮัจ จะ_ ลาฆู ฌาฮัจ นะ อูมัจ ซือมียา_ อาดา บาญะ เดะ ดือนียา. ญา ลีฮัจ จะ_ ลาฆู อีงัจ เดะ ฮาตี ซือมูฮา นะ กูญา_ ฌาดี ซา ลาฆู นู ฌาฮัจ โตระ_ บีลัก วะตู.

ตาปี โนอา เตอ_ ฌาดี ซือมียา นู กือนา เดะ ฮาตี นะ ตูฮัด บือซัยํ เดะ อาตัซ เลอ.

ตะเดะ อีนี_ ฌาดี ซูรัจ ลาฆู บือแนฮ นะ โนอา. โนอา เลอ_ ญา ซืออูรัก นู บาฌิ ตือปัจ. ญา บาฌิ ซือมูฮา_ เดะ กาลา อีตู. ญา บือฌาลัด บือซามา ฌางัน ตูฮัด เดะ อาตัซ.

กะฆีเตอ_ ตูฮัด บือซัยํ เดะ อาตัซ มือเลา จะ_ “ลูมอฮ ซือมียา นู กู บือฌาดี ดัฮ_ กู นะ บูวัจ บรี ฌาฮานัม ฮาบิฮ_ เดะ ดือนียา. ลูมอฮ ซือมียา_ ลูมอฮ บือนาตัก ซูโรฮ บือกรือฌา_ ฌางัน ลูมอฮ บือนาตัก มือรากะ เตอ_ ลูมอฮ บูโรก เดะ ลาแงะ โปด_ นะ บูวัจ บรี ฮาบิฮ เดะ ดือนียา ซือมูฮา. กรานา กู มือญือซัน ฮาตี_ นู กู บือเลฮ บือฌาดี กูญา ดัฮ”_ ญา จะ.

ตานา อูมัจ ซือมียา บือตามัฮ บาญะ เดะ อาตัซ ตือปัจ ตานัฮ ดัฮ_ กูญา อาดา ลูมอฮ นานะ นีบีนี. โกะ นานะ กีลากี นะ ตูฮัด_ กูญา ลีฮัจ จะ_ โกะ นานะ นีบีนี อีตู บือฆาจะ_ อาเมด มาแรฮ ฌาดี บีนี นะ กูญา_ ตูโรจ บือกะ ฮาตี นะ กูญา ซูกา. กะฆีเตอ_ ตูฮัด บือซัยํ เดะ อาตัซ_ ญา มือเลา จะ_ “ซือมืองัจ นะ กู_ นะ เตด ดูโดะ บือซามา ฌางัน อูมัจ ซือมียา ปี ซือมาญัก รอจ ดัฮ_ ซาเบะ กูญา ฌาดี ซือมียา_ นู ฆาโดฮ มาตี. อูมอยํ นะ กูญา นะ เตด ลือเบฮ_ เดะ ซือราตุซ ดูวา ปูโลฮ (120) ตาโฮด” ตูฮัด ญา จะ. วะตู อีตู โปด_ เดะ โซะ บลากัก ฌูฆา_ อาดา ลูมอฮ ซือมียา ญาวา บือซัยํ_ ดูโดะ เดะ ดือนียา_ กาลา โกะ นานะ กีลากี นะ ตูฮัด_ มาโซะ มาแรฮ ซารี โกะ นานะ นีบีนี นะ อูมัจ ซือมียา. อาดา ลูมอฮ นานะ นะ กูญา_ นู ฌาดี ซือมียา ปานัย บือปรัก_ เดะ กาลา นูตู_ ฌาดี ลูมอฮ ซือมียา นู กือนา มือโอจ เลอ.

ตูฮัด เดะ อาตัซ_ ญา ปือซัด บรี โนอา บูวัจ กะฆีนี_ โนอา เตอ_ ญา บูวัจ ตูโรจ กะ ปือมือซัด นะ ตูฮัด_ ซือมูฮา.

กะฆีเตอ_ ตูฮัด ญา มือเลา กะ โนอา จะ_ “กู ตือตู ดัฮ_ นู นะ บรี ลูมอฮ ซือมียา ฌางัน ลูมอฮ บือนาตัก_ มาตี ฮาบิฮ ซือมูฮา_ กรานา ดือนียา ปือนอฮ ปี_ ฌางัน ลาฆู ซูมอก_ ลาฆู ฌาฮัจ_ นะ กูญา ดัฮ. กะฆีเตอ เลอ_ กู นะ บูวัจ บรี ลูมอฮ กูญา_ ฌางัน ดือนียา ซือมูฮา_ บือนาซา.

เกา เลอ_ อาเมด กายู รู โกเฟอ นู บาฌิ_ บูวัจ กาปัน บือซัยํ_ บรี อาดา รูวัก_ ตาแปะ ฌางัน ลาฆาลา โซะ ลูวัยํ_ ฌางัน โซะ ดาลับ.

กะฆีเตอ_ ตูฮัด ญา ตีญุง ลีฮัจ กะ ดือนียา จะ_ ญา ฮอย เตด ตือปากัย_ กรานา ซือมียา ซือมูฮา เดะ ดือนียา_ บูวัจ ลาฆู ตะอารัฮ_ นู ฮอย เตด บือฆูนา เลอ.

เกา กือนา อาเมด บือนาตัก ราตา นู ฮีโดะ_ อายา บาปา_ ซือมาจับ ซือฆู_ บรี มาโซะ กะ ดาลับ กาปัน_ บรี ฮีโดะ ลือปัซ เดะ มาตี_ บือซามา ฌางัน เกา.