Kejadian Uram 15
15
Er Iya Erebdobnyi biryi Abram bisi, “Kan deibdoba aryi mi yaldakoka, odei-odei binkwaming,” eboka uram talak ebdeibmou deyok
15:1-21
1Ura, Er Iya Erebdobnyi biryi Abram bisi kunumna deici aryi ato ebmou, “Ei, Abram, Nira kansi tingkiningninto kurankinanyi kunun ati kan ilil kukina mem. Ati, Niryi kansi aminda dengna ilinto karebkwankin,” ebmou. 2Uca, Abram biryi Er Iya Erebdobnyi bisi ato ebmou, “Yo Nai, nira sirya dibkwaman talak dam kubmar. Ni mi ton deiantinyi bok, ni mi ton kum deibkwan ati tenebman. Ati, ni bona talena er dinyi kibkwanda kuma. Eda, ni ai wa irmilinururnyi Eliezer bira Damsyik mutuknyi biryi ni bona ara er dinyi kibkwande. Ati, Nai Iya Erebdobnyi Kanci talyi dekniminyei.” 3Ani, Abram biryi tubto ton ato ebmou, “Kanci nisi mi ton kum karebnoumwe deyok aryi ni wa irmilinanyi biryi ni bona talena talebkwande ake!” ebmou. 4Uca, Er Iya Erebdobnyi biryi ato ebmou, “Kan wa irmilikinanyi biryi kan bona talebkwanda kuma, eda kan mi kobdoba aryi kan bona aminda talebkwande,” ebmou. 5Ura, Er Iya Erebdobnyi biryi Abram bisi ai umbura aryi iniboka baitam bobinmouci, ato ebmou, “Imtam dibwelebderum. Ba, imtam kurya nirya nuksekwamarim kum?” ebmou. Ura, tonda ato ebmou, “Imtam kurya ilinto asing eibmarim to akwe kan yaldangna mabwe ababyi, a kurya yubwa nukman kum kubmar to kubkwaming,” ebmou.#Rom. 4:18; Ibr. 11:12 6Ura, Abram biryi, “Er Iya Erebdobnyi uram ara dib uram ebmar,” tenebmouci, kunubmou. A deyok aryi Er Imtamnyi biryi Abram bisi, “Ni mi, Ni urasintam aryi teleb kunanyi kibdeibman,” tenen muna karebmou.#Rom. 4:3; Gal. 3:6; Yak. 2:23
7Ani, Er Iya Erebdobnyi biryi ato ebmou, “Nira kan Nai Iya Erebdobnyi kununyi biryi kansi mutuk Ur-Kasdim dam aryi boyakisiryi, a mutuk Kanaan dam asi kan mutuk kiboka kubkwamoumwe ati, boyandoka kaibkise,” ebmou. 8Ba, Abram biryi Er Iya Erebdobnyi bisi ato ebmou, “Nai Imtamnyi Iya Erebdobnyi, una kuboka, ‘A mutuk ara ni mutuk kibkwande,’ tenen minob bikwamatinyi do?” ebmou. 9Uca, Er Iya Erebdobnyi biryi ato ebmou, “Bisam sapi ner asi kwalina winiryi kianci dinyi ton, kambing ner asi kwalina winiryi kianci bisam ton, bisam domba yim asi kwalina winiryi kianci bisam ton, maka si tekukur ton maka emnanyi babou ton kuboka Niti karebnurum,” ebmou. 10Ura, Abram biryi kunuboka a ebmou dinyi nirya Er Iya Erebdobnyi biti boyanmouci, noutumang der sekoka bitinyi-bitinyi kibdeibokmou. Ura, kisok tam eitam deibmou ura, amwetam ara outam deibmou. Ura, noutumang ara bisik lobdeibokmou. Ba, emnanyi ab, tekukur ab ara der sengna kumkum ukubmaning dina-dina wanwanubdeibmou. 11Uca, anda sekoka minikmou bisam der sekdoba toto maka toto asi bai maka aryi yandoka amunmai ba, Abram biryi yangmou.
12Ani, kiting sirya wengdorbinmou ura, Abram wi dungkwe ba, mablukmou. A talak ara kunuk dakmiting eboka ilil dinyi kibsinibokmou. 13Ura, Er Iya Erebdobnyi biryi Abram bisi ato ebmou, “Kanda diboka bikandum. Aminda ara kan deibdoba aryi yuk nang mutuk tingbindoka kuramingnyi ba, sun mutuk dam nang aryi a nang asi kwalina yubwa 400 baryi nirya il arungnamingnyi ba, mambul weik il dobkwaming. Ati, a uram kan minob bikandum.#Kel. 1:1-14; Kis. 7:6 14Ucab, sun a mutuk nang kobdoba il dimnamingnyi nang ara Niryi sunsi ikin dinyi karebkwan. Ba, kan deibdoba aryi a mutuk tingbinamingnyi nang ara a mutuk bona-bona ilinto bobde yandobkwaming.#Kel. 12:40-41; Kis. 7:7 15Ba, kanda kam kubde baraminyi tok asi kwalina o kwali-o kwali kibde binaminyi ani, sirya wis daminci, teleb asa aryi wau loboka dibminyi ura, tukwe dongobkwanking. 16Ucab, kan deibdoba aryi odei-odei banmangnyi ani, dika dumbaryi deibingnyi ninyi ara yuk mutuk aryi kuboka a mutuk dam tubto tamuryankwaming. A mutuk dam ola kum tamuryankwaming. Eda, Amori nang sun yu dinyi weikto wengna kum kubmaci talak atikwe o kunmangnyi ani, sun yu weiktoto wekci talak ara Kanaan mutuk yankwaming. Ba, sun yu weiktoto wekanci dinyi ara ikin dinyi dobkwaming,” ebmou.
17Kiting sirya wekdobmou talak aryi Abram mabmou ani, bukoka dinmou uca, anda bisam toto maka toto dina-dina lelebminikmouci, noutumang lobdeibmou dikum asi Er Iya Erebdobnyi bira tulum silim-silim eboka uk buk lengkereng eryibinmou asi asing eibmou. 18A tum aryi Er Iya Erebdobnyi biryi Abram bisi, uram talak ebmou ara ato, “Kan deibdoba ati a mutuk nukin. A mutuk wiliba ara Mesir mutuk me aryi sekoka ani, ilila me si Efrat sekoka sun mutuk kibkwande. 19A mutuk ara Keni nang mutuk ab, Kenas nang mutuk ab, Kadmon nang mutuk ab, 20Het nang mutuk ab, Feris nang mutuk ab, Refaim nang mutuk ab, 21Amori nang mutuk ab, Kanaan nang mutuk ab, Girgasi nang mutuk ab, Yebus nang mutuk ab nirya ara sun mutuk akwe kibdobkwandum,” ebmou.
Kasalukuyang Napili:
Kejadian Uram 15: MTG
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
@LAI 2007 (New Testament), @LAI2022 (Old and New Testament)