Kejadian Uram 16
16
Hagar ab Ismael ab deyok
16:1-16
1Abram ner si Sarai bira mi ton deirina kum kuramwe. Ura, Sarai er kanyitam aryi ato tenebmou, “Nira sirya wisi danman ati, Abram er kabwa ton kum unubdeiyaniryok dibkwan,” tenebmou. Ura, Sarai bira Mesir ner tentok si Hagar er wa irmilin ner kibmou ba, akai kuramwe. 2Ba, uki tentok tum ara Sarai biryi Abram bisi ato ebmou, “Er Iya Erebdobnyi bira mi ton kum karebkwanir, karebmaninto talak kunmana kuma ati a bikdum. Ati, a ner ni wa irmilin ner ara ur dobdum. Ba, a ner aryi mi ton deibdeibkwanurura,” ebmou. Ba, er akenyi Abram biryi er ner Sarai ebmou uram kekebmou. 3Ato kuboka er ner Sarai biryi er akenyi Abram bisi aminda dortabangni ner Mesir mutuk ner si Hagar kabdeibmou. Abram bira Kanaan mutuk a kuramwe talak ara kwalina takubaryi kwaliamwe. 4Ba, Abram bira Hagar dobmou ura, kunmarei ani, a ner mundu bobmou. A ner Hagar mundu bobmoua ara er kanyitam sirya bikdanmou. Ura, er wingdan kanya bobmouci, Sarai bisi luknubdeiboka er amwetam kibdeibmou. 5Ura, Sarai biryi er akenyi Abram bisi ato ebmou, “Niryi kuboka ni wa irmilin ner asi kanti kabdeibkise ba, dobumwe deyok aryi kan ner er mundu bobmarci nisi luknubdob ner kibdeibmanirci, ersi dub ner kiboka erebdobmar. Ati, a ner ara talyi doramoumwe se! A deyok ara nibabyi kanbabyi, Er Iya Erebdobnyi biryi nunsi lilibkwansir,” ebmou. 6Ura, er akenyi Abram biryi Sarai bisi ato ebmou, “A ner ara kan wa irmilikin ner aca, yuma ner kan ebminyi tok, er kunubkwandur. Ati, kanci Hagar bisi, ‘Ukubdeibkun,’ tenebminyi to da ukuna teleb,” ebmou. Ba, Sarai biryi yu asa aryi il dimnamwe. Ba, a ner Hagar bira a kuramwa takloboka bindobmou.
7Ba, Hagar bira yini mutuk bindamwe. Uki tentok tum ara Er Iya Erebdobnyi uram eryuryangan nang sienyi si Malaikat Tuhan biryi Hagar bisi yini mutuk Syur mutuk ban bisik kuboka, me anamyangaramwe dam aryi ebdanmarei. 8Ura, Malaikat Tuhan biryi Hagar bisi ato eboka asibmou, “Ei, Hagar, Sarai ai me ilingna ner! Kanda dantam aryi yanganmarim do? Ani, dantam binkwamarim do?” ebmou. Uca, Hagar biryi ato ebmou, “Nira, ni kwin kiboka er wa irmilinun ner Sarai bira takloboka yangaronman,” ebmou. 9Bok, Malaikat Tuhan biryi ato ebmou, “Tamuboka kan kwin kiboka er wa irmilirum ner Sarai bisi tubto birum. Biminyi ura, yu asa il dimnankici bok, luknubdongoboka Sarai amwetam asi il dobde kunkwandim,” ebmou. 10Ura, Er Iya Erebdobnyi biryi Malaikat Tuhan liknibdongoboka ato ebmou, “Niryi kansi mabwe ilinto karebkinyi ba, yaldakwandim. A yaldakminyi mabwe yubwa ara ilinto aryi nuksekman kumto kubkwande,” ebmou. 11“Kan mundu bobmarim mi ara sal deibminyi ura, er si ara Ismael eboka si dobkwandum. Ara, kan engerum dinyi ara Er Iya Erebdobnyi biryi kekekurur ati ebman. 12Ucab, a deibkwandim mi ara bai bisam keledai kurande to kubkwande. Ani, erci yuk nang asi talyi kulabde yibinkwande. Ba, yuk nang aryi erbabyi kulabkwaming. Ani, a mi er kuranci dikum ara er du yabwe-er weit yabwe asi yaribdobkwande,” ebmou. 13Uca, Hagar er kanyatam aryi ato tenebmou, “Er Iya Erebdobnyi bira a kunum asing dinmanir asi, nibabyi Ersi asing eibman,” tenebmou. Ura, a ner aryi Er Iya Erebdobnyi biti ato ebmou, “Nai, El-Roi,” ebmou. 14Ato kubmou deyok aryi mutuk si Kadesh kan mutuk si Bered kan asi me lokamiryi me kweramnyi me si ara, “Er Iya Erebdobnyi biryi nisi dinurur,” ena ati sun uram aryi, “Lahai-Roi,” enung.
15Ba, Hagar mundu boamwe ara sal deibmou ura, Abram biryi a mi si ara, “Ismael,” eboka si dobmou. 16Abram er kam kuramwe talak kwalina ara 86 baryi kwalibmou bok, er ner Hagar biryi Ismael deibmou.
Kasalukuyang Napili:
Kejadian Uram 16: MTG
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
@LAI 2007 (New Testament), @LAI2022 (Old and New Testament)