Kejadian Uram 17
17
Er Iya Erebdobnyi ab Abram ab aryi, “Ukubdankwanim,” eboka uram talak ebdanmarei deyok
17:1-27
1Abram kuramwe ani, kwalina 99 baryi kwalibmou. A talak aryi Er Iya Erebdobnyi biryi Abram dam lak kibdanmouci, ato ebmou, “Nira Imtamnyi Iya Mikibnyi kunun. Ati, kan kunkwandim ara malyi dinyi kununa mem. Eda, ni uram ebdeianyi to telebto dinyi akwe kunuraminci, ni kanya teleb kimdeirinkwanurum. 2Ni ab kan ab, ‘Ukubdankwanim,’ eboka uram talak likeibdankwinim ara aminda kansi mabwe ilinto-ilinto karebkwankin,” ebmou. 3Ura, Abram biryi Er Iya Erebdobnyi bisi kisok luknubdongoboka kibdobmou. Ura, Er Imtamnyi biryi ato ebmou. 4“Niryi kuboka kanti uram talak ebkwinkin ara: Kanda aminda ninyi ilinto nang sun nai kibkwandim. 5Ati, kan si ara minob ara, ‘Abram,’ erankungwe. Bok, ukuryok si ara, ‘Abraham,’ ebkwanking. A si ara kanci yala ilinto nang sun nai kibkwandim ati a si dobkin. 6Niryi kansi mabwe ilinto odei-odei ban dinyi karebkinyi ba, yaldakde binkwaming. Ani, kan deibdoba aryi sien nang kibde binkwaming. 7Niryi kansi uram talak ebmakin dinyi ara iya kubkwande dinyi kibdeibmakin. Ba, Nira kan Nai molonkwanirimnyi kibkwankin. Ani, kan deibdoba ababyi Nisi, sun Nai kiboka molobde binkwaning. 8Ba, kan ab, kan deibdoba mabwe ab asi, kan tiya a mutuk Kanaan dam tingyandoka kunmarim mutuk nirya asi sunti iya karebkwansin. Karebsinyi ura, Nira sun Nai Imtamnyi kibkwansin,” ebmou.
9Ani, Er Iya Erebdobnyi biryi ton ato ebmou, “Kanci, Niti uram talak likeibkwanirim ara a ebdeibman dinyi asi iya talebnurubkwandum. Ani, kan deibdoba mabwe odei-odei binkwaming ababyi nirya talebnuruboka, kunubde binkwandarur. 10Niryi kan ab, kan deibdoba odei-odei binkwandum nang ab ati, uram talak ebdeiboka, ‘Ukubkwandarur,’ ebmasin dinyi ara iya talebnurubkwandarur. Ara, sal nirya ara den bam sekde bankwandarur. 11Ati, kanbabyi kan deibdoba babyi nirya odei-odei nirya sun den bam sekwanung. Sun den bam sekwandum dinyi ara ni ab kan ab aryi, ‘Ukubdankwanim,’ eboka uram talak likeibdanmanim dinyi teneirdenkwandum dinyi ati, den bam sengkwandum. 12Ati, sun mabwe odei-odei nirya sal deibmunyi ura, kunmamunyi ani, uki inbaryi kurbaci ura, a mi den bam sekwandarur. Ara, kan ai kobdob kuramingiryi, deiamingnyi nang mabwe babyi, yuk nang asi uang dekoka sun atei boyanamunyi nang babyi, uku talak aryok sal nirya den bam sekalibdarur. 13Ara, kan ai kobdob aryi deirin mabwe babyi, yuk nang asi uang aryi dekamunyi nang babyi ara den bam sekwandarur. Ba, den bam a sekamunyi deyok aryi sun nirya Ni uram talak ebdeibmasinci, ‘Aminda ukubkwansin,’ ebmasin dinyi sun nong deici a kuanci aryi teneirdenkwandarur. 14Sal yuk-yuk nirya ara den bam sengna kum kuamingnyi nang ara ni mabwe kimna kum kubkwandur. Den bam sengna kum kuamingnyi nang ara Niryi, ‘Ukubkwansin,’ ebdeianyi uram kununa kum kurandiryi,” ebmou.
15Ani, Er Iya Erebdobnyi biryi Abraham bisi tubto ton ato ebmou, “Kan ner bisi si siboka, ‘Sarai,’ ena ara mem. Eda, arub a talak aryok deyok kouboka er si ara, ‘Sara,’ ebdum. 16Niryi kan ner asi kisal daknyi ba, kan ner Sara biryi mi mundu boboka sal deibkwande. A mi ara kanti karebkwamakin. Niryi Sara bisi kisal dangna dinyi karenkwan. Ba, Sara bira ninyi ilinto sun kwin kibkwande. Ba, Sara erci deibci mabwe aryi sien nang kibde binkwaming,” ebmou. 17Ba, Abraham biryi kisok luknubdongoboka kibdobmouci, er kanyatam aryi ato tenebmou. “Ninyi sal wis danandiryi kwalina 100 baryi kwaliandinyi bira mi ton deirinung do? Ani, ni ner Sara bibabyi kwalina 90 baryi kubwe bok mi mundu bobkwamote ara kikiman do?” tenebmou. 18Ura, Abraham biryi uram si angaboka Er Iya Erebdobnyi bisi ato ebmou, “Ato dinyi ara ukubmanto kum ati, Ismael bisi kanci uram talak eboka, ‘Ukubkwankin,’ ebmanirim dinyi ersi karebminyi ba, erci da kunubde binkwande!” ebmou. 19Ucab, Er Iya Erebdobnyi biryi Abraham bisi ato ebmou, “Kum! Kan ner Sara biryi mundu boboka sal deibkwamar. A deibci mi si ara Ishak eboka si dobkwandum. Ba, Niryi a deibci mi deici ab er deibdoba ab asi, ‘Ukubkwansin,’ ebdeibmasin uram ara tanglona kum uca iya erdeirinkwan. 20Bok, Ismael biti molorlikninmaminyi dinyi ababyi Ni kekeboka kunubdeibkwan. Ba, Ismael kisal dakoka er deibdoba ababyi ilinto kibdeibkwan. Ani, er deirin mabwe amolbaryi nang asi weik sien nang kibkwaming. Tonda, a mi aryi deibci mabwe aryi ninyi ilinto kubde binkwaming. 21Bok, Niryi, ‘Ukubkwansin,’ en uram kunubkwan ara kan ner Sara biryi deibkwamar mi Ishak deici asi karebkwan. A mi deibkwamar talak ara o kwalina a berekmar talak dikum kurbaci ura, kan ner Sara a mi deibkwamar,” ebmou. 22Er Iya Erebdobnyi biryi Abraham bisi ato ebmou ura, imtam welebindobmou.
23Ura, a tum aryok Abraham biryi Er Iya Erebdobnyi biryi ebmou to kuboka, er mi Ismael babyi, er ai umbura a kuramnyi nang babyi, uang aryi dekoka yangan nang babyi, ninyi wis babyi, mabwe babyi sal a kuramnyi nang nirya den bam sekmou. 24Ba, Abraham er nong kobdob ara kwalina yubwa 99 baryi kibmou talak aryi den bam sekmai. 25Ani, er mi Ismael bira kwalina 13 baryi kwalibmai bok, den bam sekmai. 26Abraham ab er mi Ismael ab neik tum aryi sun den bam sekmai. 27Ani, a tum aryok Abraham ai umbura a kuramnyi nang mabwe babyi, uang aryi dekoka yangan nang mabwe babyi nirya den bam sekmai.
Kasalukuyang Napili:
Kejadian Uram 17: MTG
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
@LAI 2007 (New Testament), @LAI2022 (Old and New Testament)