Kejadian Uram 27
27
Ishak biryi, du mabwe ati kisal dangna dinyi kareraming dinyi bok, Yakub biti karebmou deyok
27:1-40
1Ura, Ishak kuramwe ani, sirya wis danmou aryi asing oba lilibmou deyok aryi asing eibman kum kubmou. Ura, Yakub er mi Esau yumanyi bisi nabmouci, ato ebmou. “A mi a!” ebmou. Ba, Esau biryi ato ebmou, “Yo, nai,” ebmou. 2Ura, er nai biryi Esau bisi ato ebmou, “Ni kan nai sirya wisi danmanaryi, dora dibkwaman talak kubmar. 3Ati, ukuca kan yin ab mar ab doboka anabminci, bai bisam ton orbinurum! 4Oboka yaminyi ura, ni si kunkunumni yina telebto kuboka yubniminyi ura, boyandoka karebnurum. Ba, a yina yibnyi ura, kansi kisal dangna dinyi karebkiniryok, ni dibkwan,” ebmou.
5Uca, Ishak biryi er mi Esau biti a ebmou dinyi ara Ribka kekebmou. Ba, Esau bira anaboka er nai biti boyankwamou ati, bai bisam dorbinmou. 6A talak ara Ribka biryi er mi Yakub biti ato ebmou, “Ni kekenman uca, kan nai biryi kan du Esau bisi ato enmar asi kekebman. 7‘Ni kum diabnyi talak aryi kan bai bindoka bisam oboka yaminci, ni si kunkunumni asi telebto kuboka yubniminyi ura, kareryaniminyi ba, yibkwan. Yibnyi ura, Er Iya Erebdobnyi urasin dam aryi kansi kisal dakiniryi, dibkwan,’ ebmar. 8Ati, ami, ni uram a ebkuna kekebminci, niryi, ‘Ukubdum,’ ebnyi to kunubdum. 9Ara, nun kambing domba wininunum dikum biminyi ura, bindoka wiminyi ani, kambing mi bitinyi butuk-butuk ebde nenmaca akwe oboka boyarum. Ba, yuna teleb yubokabniryi, er si kunkunumni kibdeibnyi ura, kan nai bisi, er ebmar to bobindoka karebdum. 10Bobindoka karebminyi ba, yibdobci ura, er kum diabci talak aryi er ebmar to kansi kisal dangna dinyi karebkwankir,” ebmou.
11Ba, Yakub biryi er kwin Ribka bisi ato ebmou, “Ni du Esau bira er nong bol ara otong ibwe. Uca, ni nong bol ara otong kum ibnou aryok. 12Ni nai bisi bindoka karenyi ura, sangkuna talerlilirderanici uca, ni nong bol otong kum aanici ura, ‘Tola ati, si ablakmanir,’ tenebnici ura, nisi kisal dangna dinyi karena kum uca, subnicei,” ebmou. 13Uca, er kwin Ribka biryi ato ebmou, “Sangkuna submakici ababyi ni deici kubkwamar. Ati, ukura ni ebnyi to kunubdum. Ukuca, sakweteboka bisam kambing mikbaryi doboka boyarum,” ebmou. 14Ura, Yakub sakweteboka bisam kambing mikbaryi boyandoka er kwin bisi karebmou. Ba, er kwin Ribka biryi Ishak biryi, “Ukuboka yubniminyi ura, karebnurum,” ebmou to kunuboka yina kikiman yina er si kunkunumni kiboka yubmou. 15Ura, Ribka biryi er Esau ongon aling ai deiboka binmou asi dobmou ura, er mi weitnyi Yakub bisi, “Ongobdum,” ebmou ba, ongobmou. 16Ura, kambing kala aryi Yakub bira otong ana kum kuamwe bok, er taruk dina-dina ab er ngang ab asi kambing kala otong kibman aryi ongobdeibmou. 17Ura, er kwin Ribka biryi er mi Yakub bisi roti kiknibdeibmoua ab, kambing bisam tub yubdeibmoua ab karebmou.
18Ura, Yakub bira a yina boboka er nai Ishak bukmoua dam bowengbinmou. Ura, bindoka ato ebmou, “Nai ou,” ebmou. Ba, er nai biryi, “E, ni mi, kanda unanyi do?” ebmou. 19Uca, er mi Yakub biryi ato ebmou, “Nai, nira Esau kan mi dunyi bitiba. Nai, kanci, nisi, ‘Ukubnurum,’ ebmanoumwe to kunuboka bai bisam orbinman ani, yuboka boyanmakin. Ati, bukokabminci, yibdobminyi ura, nisi kisal dangna dinyi karebnurum,” ebmou. 20Uca, Ishak biryi er mi asi ato ebmou, “A mi, ola nun oboka yanandim aryok se!” ebmou. Uca, er mi Yakub biryi ato eboka ablakmou, “Nai, Iya Erebdobnyi, kan molorumnyi biryi ni tenebmonwe to kunubdeibmanir ba, ola oboka yanman,” ebmou. 21Ura, er nai Ishak biryi Yakub bisi ato ebmou, “A mi, ni damtoto a yarum ni talebisibdenkwankin. Kanda Esau kuma do?” ebmou. 22Ba, Yakub er nai Ishak dam binmou ura, taleblilibdenmouci, ato ebmou, “Uram kekenmakin ara Yakub uram enmarim. Bok, taruk talerlilirdenmakin ara Esau bito kunmakir,” ebmou. 23Ara, er nai Ishak biryi Yakub bisi taruk talerlilirdenmou uca, Esau taruk otong aamwe ato kubmou aryi, “Ara, Yakub bica,” kum tenebmouci, “Esau bisi kisal dangna dinyi karebkun,” tenebmou. 24Uca, Ishak bira kanya kankana kubmou aryi tubto asibmou, “Kanda dib Esau do?” eboka asibmou. Uca, Yakub biryi, “Nai, dib nira Esau bica!” ebmou. 25Ura, Ishak biryi ato ebmou, “Ni mi kanci bai bisam obmarimci, yuboka boyanmanirim dinyi ni dam deiriryanurum. Ba, ni a yina yibdobnyi ura, niryi kansi kisal dangna dinyi karebkwinkin,” ebmou. Ura, Yakub biryi a yuboka yanmou yina er nai Ishak dam deirirbinmou. Ani, anggur me ababyi er nai dam deirirbinmou ba, yibdobmou. 26Ura, er nai Ishak biryi ato ebmou, “Ni mi, kan ni dam a yaminci, nisi u kunkunuboka kibdobnurum,” ebmou. 27Ba, Yakub er nai dam binmou ura, er nai bisi u kunkunuboka kibdobmou. Ani, er nai babyi er mi Yakub ongon aling asi tong yubmouci, ersi ato eboka kisal dakmou:
“Iya dib en uram aryi ebkun, ni mi kan ongon aling tong kekebne ara,
Er Iya Erebdobnyi biryi kisal dangnanci mutuk aryi tong bakam erande to kubde.
28Er Iya Erebdobnyi biryi kisal dangna dinyi ara imtam aryi mo cemnande to kuboka,
kan mutuk dam gandum ab, anggur ab kouroraminya asi sul dokoka lukluk eboka abkiriryi
du mouboka lubanbanabde yibinkwande.
29Ani, yuk-yuk mutuk nang nirya aryi kansi erebdobnyi kibdeiboka, kansi lamlamak ebkwanking.
Kan du yabwe ab, kan weit yabwe ab aryi sun nai kibkwanking.
Kan kwin er deibdoba nirya aryi kansi erebdeibkwanking.
Unanyi biryi kansi subkwankiranyi bira erbabyi sumna deyok aryi ikin dinyi dobdobkwande,
Unanyi biryi kansi kisal dakirinyi bira erbabyi kisal dangna dinyi dobdobkwande,” eboka kisal dakmou.
30Ato kuboka Ishak biryi er mi Yakub bisi kisal dakmou. Ura, ukuryok Yakub sakweteboka barou talak ara er du Esau bisam bai da dobde kunmou ani, atei yanmou. 31Ura, Esau yandoka a bisam er nai si kunkunumni kiboka yubmou ura, er nai Ishak bisi bobinmou. Ura, er nai bisi bindoka ato ebmou, “Nai, ni kan mi bisam orbinman ani, oboka boyanci, yuboka boyakin. Ati, bukoka yibdobminci, nisi kisal dangna dinyi karebnurum,” ebmou. 32Uca, er nai Ishak biryi ato ebmou, “Kanda unanyi yanmarim da?” eboka asibmou. Uca, Esau biryi ato ebmou, “Ni kan mi du mi Esau bitiba,” ebmou. 33Ba, Ishak iya lukdandobmouci, ato ebmou, “Kan kum yanabumwe talak aryi minob bisam oboka yubmarci, nisi boyanmaniranyi bira unanyi do? Anyi biryi nisi sirya boyanmanir ba, ni sirya a nirya yibdobmanci, anyi bisi kisal dangna dinyi sirya karebman. Ati, a kisal dakmananyi bira kisal dangna dinyi er dam iya kubkwande,” ebmou. 34Ato ebmou ba, Esau er kanyi sukmou aryi engena weik engeboka, er nai bisi ato eboka tatabdenmou, “Nai se, nibabyi kisal daknurum se!” eboka engeboka molobmou. 35Uca, er nai biryi ato ebmou, “Kan weit aryi kan dobdobmanto dinyi asi tola ati kansi si ablakmakirci, ukula dobdobmar,” ebmou. 36Uca, er mi Esau biryi ato ebmou, “Yakub eboka si dobya ara wanoka! Minob ton ato akwe tola ati, ninyi wis aryi yuma mabwe ati kareraming dinyi dobdanou ani, arub ababyi inina dokoka niti kisal dangni dinyi dobdobmanira se! Nai, kisal dangna dinyi asi yuk dinyi ton niti tenen ton da kum kiknibdeianoumwe darib?” ebmou. 37Uca, er nai Ishak biryi er mi Esau biti ato ebmou, “Dib uram aryi ebkun ara kan weit asi erebdobnyi kibci ba, kanda er amwetamnyi kibkwandim. Ani, er weit yabwe nirya ababyi Yakub bisi erebdobnyi kibci ura, yuk nang ara amwetam nang kibkwaming. Ani, koubdoba gandum babyi anggur babyi ara erci koubci dinyi asi du ilinto kubkwande dinyi karebman. Ati, a mi kansi karebkwamakin dinyi ara una dinyi asi karebkitinyi do?” ebmou. 38Uca, Esau biryi er nai bisi ato ebmou, “Nai a, kisal dangna dinyi ara Yakub karebmarim dinyi tentok a kunum kan dam kuamwe do? Nai se, nibabyi ton kisal dangna dinyi karebnurum se!” eboka Esau ilinto engebmou. 39Ba, er nai Ishak biryi ato ebmou,
“Dib en uram aryi kansi ebkwinkin ara kan kubde binkwandim mutuk ara tukwe sul kuboka mutuk otong lukluk eranci mutuk dam ara kan kum kubkwandim.
Ani, kisal dangna dinyi ara imtam aryi mo cemnande to kuboka mutuk otong sul dongnanci mutuk ara kan kum kubkwandim.
40Kan kubde binkwandim ara mar ordana deici akwe kubde binkwandim.
Ani, kan weit Yakub amwetam kubminci, ersi kan nai kibkwandim.
Ucab, aminda da berekwande talak ara busul asa aryi il dobdobminyi ura,
ikin boraminyi dinyi sibkabokwandim,” ebmou.
Yakub bira cukoka bindobmou deyok
27:41-46
41Ara, Ishak biryi Esau biti kisal dangna dinyi karebkwamou dinyi asi Yakub biryi tola ati si ablakmou ba, Yakub biti karebmou. A deyok aryi er du Esau biryi er weit Yakub bisi yu bobmouci, er kanyatam aryi ato eboka ining yibdobmou. “Ni nai dibkwamar dam sirya kubmar. Ni nai dibmaci tum bita bunmabyi talak sirya bisibmaci ura, Yakub bisi obkwan,” eboka ining yibdobmou. 42Uca, Esau a enmou uram boboka Ribka dam bindoka ebmai. Ura, Ribka biryi er mi weitnyi Yakub bisi, “Nambindarur,” eboka arukmou ba, nambinmai. Ani, sirya naboka yanmai ura, Yakub bisi ato ebmou, “Kan du Esau bira yu bobkouci, ‘Obkwan,’ eboka ining yinmakir. 43Ati, ami, ukuca anarorum. Anabdobminyi ura, cukoka ni malnyi Laban bisi Haran mutuk bindobdum. 44Bindoka uki ukunengkwe kunmaminyi ba, kan du Esau er yu wekwe dinyi ab, 45kansi, ‘Obkwan,’ tenebmakir dinyi ab, kanci ersi si ablakoka er dobmanto dinyi asi dobumwe dinyi ab luba kibci ura, niryi kansi nabkwankin. Ato kuboka luba kibci talak ara niryi ninyi ton bokdonoknyi ba, a kuraminyi mutuk iniryankwanking. Ni mabwe bitinyi nirya neik talak aryok waningna ara ni kanya suknicei,” ebmou.
46Ura, Ribka biryi er akenyi Ishak bisi ato ebmou, “Kan mi Esau bira yuk yala nerabwe dobwe#27:46 Esau biryi Ismael deibdobanyi Het yala nerabwe dobmou. Ba, Esau er kwin Ribka kanyi malyi kubmou. ara ni asing dina li kunurur. Ani, Yakub babyi Het mutuk nerabwe doranci ura, wanok ni kanyi malyi kubkwanir. Ato akwe kurandingnyi ura, ka yabwe se, ni dibkwan e,” ebmou.
Kasalukuyang Napili:
Kejadian Uram 27: MTG
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
@LAI 2007 (New Testament), @LAI2022 (Old and New Testament)