Kejadian Uram 28
28
Yakub mutuk si Padan-Aram binmou deyok
28:1-9
1Kuramnyi ani, Ishak biryi er mi Yakub bisi nabmou ba, tamuboka er nai dam binmou. Ura, kisal dakmouci, ato ebmou, “Kanda Kanaan mutuk nerabwe ara dona mem! 2Eda, nun mutuk kobdoba Padan-Aram mutuk, kan kwin er nai Betuel bisi binkwandum. Biminyi ura, kan kwin er malnyi, kan mam Laban nebnyi tentok asi bindoka dobdobkwandum. 3Ba, kan ner doaminyi dinyi asi Er Imtamnyi, Iya Mikibnyi biryi kisal dakoka mabwe ilinto odei-odei binkwandim. Ba, kanda ninyi yubwa ilinto nang sun nai kibkwandim. 4Ba, Er Imtamnyi biryi kan abwe Abraham biti kareamwe kisal dangna dinyi ara kan ab, kan deibdoba ab dam aryi kunubde binkwande. Ba, kanci sun yuk nang mutuk asi tingbindoka a kurum mutuk ara kan abwe biti Er Imtamnyi biryi eamwe aryi a mutuk ara kan dinyi kibkwankir,” ebmou. 5Ato eboka Ishak biryi er mi Yakub bisi bokdonokmou ba, mutuk si Padan-Aram mutuk binmou. A binmou ara Yakub er ab, er du Esau ab, sun kwin Ribka er nai Betuel ab, sun mam Laban ab asi binmou. A binmou mutuk ara Aram yala nang mutuk asi Yakub bokdonokmou ba, binmou.
6Ura, Esau kekenmou uca, er nai Ishak biryi Yakub bisi kisal dangmouci, “Kanaan mutuk nerabwe ara dona mem. Eda, Padan-Aram mutuk nerabwe asi dororbinkwandum,” eamwe. 7Ato eamwe to aryi, “Er kwin ab, er nai ab aryi arukmaring ba, bindobmar,” tenebmou. 8Ura, Esau kanyitam aryi ato tenebokmou, “Ni nai Ishak bira Kanaan nerabwe dona ara er teleb kum kurur,” tenebmou. 9Ura, Esau bira er abwe Abraham mi Ismael, Hagar biryi deiamwe mi bisi binmou ura, er nebnyi si Mahalat dobmou. A ner er malnyi si ara Nebayot kuramwe.
Yakub Betel dam bindoka mabmou deyok
28:10-22
10Ura, Yakub Bersyeba dam aryi anaboka Haran mutuk binmou. 11Yakub bisik banmou ani, inibmou ba, mutuk tentok da bindoka mabmou. Ura, bindoka keil tentok a bukamwe asi dobdobmouci, kisok erebdeiboka mabmou. 12Mabmou uca, lengdera aryi kweitata tentok tukwetam aryi ikoka cang welebmou ani, im si tobmou. Asi Er Imtamnyi uram eryuryangan nang ara a kweitata deici yuryan-welebin kimai asi asing eibmou. 13Ura, ton diramwe uca, Yakub er dam asi, Er Iya Erebdobnyi a tingyanmouci, ato ebmou, “Nira Iya Erebdobnyi, Nira kan abwe Abraham si weik eboka Moloranounyi, kan nai Ishak si weik eboka Molonururnyi yandoka tikman. Kan a mabmarim dikum ara Niryi kan ab, kan yaldakwandim nang ab ati, aminda karebkwansin. 14Kanci yaldakwandim ninyi ara me wininga ato kubkwande. Ani, kan yaldakminyi mabwe aryi eitam babyi, outam babyi, otam babyi, dina-dina nirya yaldakde binkwaming. Ba, kan ab kan yaldangna nang ab deici aryi tukwetam a kubde binkwaming ninyi nirya asi, Niryi kisal dangna dinyi karebnyi ba, dobdobkwaming. 15Niryi dib en uram aryi ebkun ara dantam yibanmaminya nirya, Niryi kansi tuba kalikoka milinkwankin. A kalikankinyi tok asi a mutuk dam tubto boboka tamuryankwankin. Niryi a uram talak ebkin dinyi ara ni luba kum kibkwan. Eda, iya dib kunubkwan dinyi kansi ebkin,” ebmou.
16Ura, Yakub bukokmouci, ato ebmou, “Nai e, Er Iya Erebdobnyi bira a dikum kobdob asi dib kurur, ni kum bikmonwe ake!” ebmou. 17Ura, er ilil mitik kum kubmou ba, ato ebmou, “A mutuk dam ara bikdob mutuk bukwe. A dikum ara Er Imtamnyi kurur ai dam a kunum. Er Imtamnyi ai bublan dam ara da yuk mutuk kuma, eda, a dikum a kunum kubwe atiba!” ebmou. 18Ura, Yakub mabmou ani, berekmou ura, belekuna kobdob ara er kisok a erebdeiboka mabmou keil dobtaleboka, aminda asing dina ati, a dikum asi keil dukoka tikeibmou. Ura, tong teleb me yung aryi a keil deici asi dikdeiboka lubmou. 19Ura, a dikum si minob ara, “Lus,” eramnyi bok, Yakub biryi, “Betel,” eboka si dobmou.
20Ura, Yakub biryi Er Iya Erebdobnyi bisi uram talak ato ebmou, “Sangkuna ni yibaranyi dikum tuba milinkwaniminyi ura, ni bisik yibaraniryi, yibde yibankwanyi kwaning ab, ni ongoboka yibankwanyi ongon aling ab karenkwanurum. 21Ba, ni bisik dam yuk-yuk mambul dinyi ni dam yangana kum uca, teleb akwe ni atei tubto tamuboka bindobniryi, Kan Iya Erebdobnyi bisi ni Nai kiboka, ni Molonanyi kibkwankin ati ebman. 22Ba, niryi keil a dikde welebmanci, tikeibne keil dam asi Er Imtamnyi ai kiboka moloryangankwaming. Ba, a keil si ara, ‘Er Imtamnyi Ai,’ eboka si dobne. Utotoa nirya nisi karebkwanirim dinyi ara meici kukoka olong takubaryi bok, tentok ara Kanti tamurkarenkwankin,” ebmou.
Kasalukuyang Napili:
Kejadian Uram 28: MTG
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
@LAI 2007 (New Testament), @LAI2022 (Old and New Testament)