Dibandu 11
11
Kumfu mu mbembu
1Va temu eni batu botsu bamavosanga mbembu mosi na posulu tsimosi. 2Batu bamakumuga o yiari ayi wisi epalili na bamasupulila kumu jibulongu buMesopotamie na bamayetsana guna. 3Bamanengasana rie: Ruganu! Tudimbianu birika na tubigokianu! Bamasalisa birika nderi mamanyi, bamabinamiga na butamba. 4Bamamuevosa rie: Ruganu! Turungianu musiengi na ndagu jisakama ajiuduku te no julu, turoyisianu diina dietu yiri tugopansiga yiari na yiari bibutamba buotsu.
5Fumu amasunduga uyelaba musiengi na ndagu jisakama abi batu bamarunga. 6Fumu anojilaba amatasa rie: Laba ayi batu abavu dibuli dimosi na abevosi mbembu mosi borungula uvaga. Pa bebandi nana vagoba diambu adiubagubitsa udugusu ayi betasi usala. 7Ruganu, tusunduyianu nobarombisa kumfu mu mbembu ogu te na bagomuegulusunu. 8Avana Fumu amabapansila yiari na yiari te na bamadunda urunga musiengi eni. 9Bamaluga musiengi eni Babel mu mbari avana Fumu amarombisila bisi butamba kumfu mu mbembu ogu na avana amabapansila o biari biotsu bibutamba.
Bategula baSem te na baAbram
10Nyidu jinovioga, vamamuevioga bilima bibeji, vana yilima yieni Sem amaba na kama bilima na amabura Arpaxad. 11Sem anobura Arpaxad amabuela kama yiranu tsibilima, amaburanga baana bababaala na babagetu.
12Ava Arpaxad amabila magumarieru na bilima biranu akabura Chela. 13Arpaxad anobura Chela amabuela kama jina na bilima biriem; amamueburanga baana bababaala na babagetu.
14Ava Chela amabila magumarieru mabilima akabura Eber. 15Chela anobura Eber amabuela kama jina na bilima birieru; na amaburanga baana bababaala na babagetu.
16Ava Eberamabila magumarieru na bilima bina akabura Peleg. 17Eber anobura Peleg amabuela kama jina na magumarieru mabilima; na amaburanga baana bababaala na babagetu.
18Ava Peleg amabila magumarieru mabilima akabura Reou. 19Peleg anobura Reou amabuela kama beji na yifu yibilima; na amaburanga baana bababaala na babagetu.
20Ava Reou amabila magumarieru na bilima bibeji akabura Seroug. 21Reou anobura Seroug amabuela kama beji na yisambuali yibilima; na amaburanga baana bababaala na babagetu.
22Ava Seroug amabila magumarieru mabilima akabura Nahor. 23Seroug anobura Nahor amabuela kama beji tsibilima; na amaburanga baana bababaala na babagetu.
24Ava Nahor amabila magumabeji na yifu yibilima akabura Tera. 25Nahor anobura Tera amabuela kama na yigumi na yifu yibilima; na amaburanga baana bababaala na babagetu.
26Ava Tera amabila magumidusambuali mabilima akabura Abram na Nahor na Haran.
27Agugu la mukuta uTera na bategula bandi. Tera akabura Abram na Nahor na Haran. Haran akabura Lot. 28Haran amafuila va misu mataji andi Tera o bulongu abu amaburulu, diwendi rie: o Our o bulongu buBabylonie. 29Abram na Nahor bamawela bagatsi: mugatsi Abram diina diandi Sarai, mugatsi Nahor diina diandi Milka, agumaba muana mugetu uHaran, agumaba taji Iska wandi. 30Sarai asamaba na baana: amaba yinguma.
31Tera amayenabega Abram muana andi udibaala na Lot muana dibaala uHaran, diwendi rie: muana katsi andi na boji buandi Sarai, mugatsi Abram na jogu botsu bamarambuyila o Our o bulongu buBabylonie uwenda o bulongu buCanaan. Bamatola o Haran na bamayetsana. 32Yitsingu yiotsu yiTera yimaba kama beji na bilima biranu mbana amafuila o Haran.
Kasalukuyang Napili:
Dibandu 11: PUU1992
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
La sainte Bible en langue Yipunu © Alliance Biblique du Cameroun, 1992.