Dadatika Maxaafa 4
4
Qayeeniinnaa Abeelii'i
1Addaami are ifixxe Heewaninni welti diiphe'naa isenna sila'witeexxi Qayeenii'i#4:1Qayeeni Hiyyaki summi Iyyedaga Yookaan Alfate Hitaaxxa tika afeeke Ibritotike laagadinni welti weli fakkataake ye'injo afe'een ilde: Isenna, «Duuchchi Woddike Goottike gargaarsinni labbaka belto alfenne» hite. 2Langaba isika dayyo Abeeli'i ilde. Abeelinna gedhebo allalaake kade; Qayeeni kinni wiisalloke kade. 3Heddo barra uduma Qayeeni wiiseexxe midhanaa'n Magenokee uwwa iyyedage. 4Abeelinna mitte edise ilemeeka gedhebiinka beltanjo gedhebi giddii'n aadhe duuleexxi ha'yokannaa elo eloka maala Magenoke uwwa iyyedage; Duuchchi Woddik Goottinna Abeeli'ninnaa Abeeli iyyedageexxe uwwa'n gammade. 5Qayeeni'ninna Qayeeni shiqisheeke tolcha'ni kinni gammadebaan; tennexxee Qayeeni lumoshsha aare alba guduunfe. 6Ookkoneechchi uduma Duuchchi Woddik Gootti Qayeenii'i «Aaret alba atika guduunfiteettechchi maye'aate? 7Eloxxa assiteettechcho kaddeele albi atik silaanni ifammabaa? Eloxxa assa gophphottole kinni cubbo atixxe hula'ni hexxe gaaddaan; isixxi halcha ate'n mooto'aten; yaane kinni ati isee injifat» hiyye. 8Ookkoneechchinni uduma Qayeeni dayyo ifika Abeeli'i, «Ke'i badda'a giddi'a me'ino» hiyye. Lamiing me'ine ookko gennee wodda Qayeeni dayyo ifike Abeeli'ni ke'e shiye.#Mat. 23:35; Luq. 11:51; 1 Yoh. 3:12; 4:10; Ibr. 12:24.
9Ookkoneechchi uduma Duuchchi Woddik Goottinna Qayeeni'i, «Dayyi atiki Abeeli haba hedhe?» Hiyye qore. Qayeeninna «Hedheeba afeebe'nonni; ani anke dayyike heqqanjota?» Hiyyeexxi hiisse.
10Duuchchi Woddik Goottinna Qayeeni'i, «Maa assitette? Laqi; atike dayyixxi munde buttii'ni anibaa raarete'n hexxeen. 11Yoona atike dayyixxa munde atixxe anganaa'n adhdhatee ofo'o haanni hiyyeeke buttina'n ati badinedeetteken. 12Buttina hujjottolenna mitte gummichcho ati'a uwwabaani. Bogii'ni boga fulda'ni buttate'n doonsakiyya hitattoke kaddatton» hiyye.
13Qayeeninna Mageno «Ane'n ibissettexxi mura ha'urteexxen. 14Kunnise telcho ati ane'e konne boganaa'ni shorriteetten; yoona ati edii'ni sho'omannon; bogii'ni boga fula'ni doonsakiyya hiyya'ni hedhannokenna kadannon; aninni futtiyyeeke duuchchi anee shiyaan.» 15Duuchchi Woddik Gootti kinni isoo hiyyee qici: «Ayyinna Qayenii'i shiyoole torbaane anga caala halo fulatik xixichchi iso'n geyaan» hiyye. Tennexxee ayyinna isinni futti hiyyeeki duuchchi isoo shiyabaashsha Duuchchi Woddik Gootti Qaayeeni'n beesisa ugge. 16Tennexxee Qayeeni Duuchchi Woddike Gootti edii'ni bayyate me'eexxi Edeenii'ni boroti darre'n hedheke Noodi#4:16: Noodi: Ibritotike laagadinni Nood hiyya «doonssakiyya» hiyyaten. hiyyeemmake boga'ni ofo'le.
17Qayeeni are ifixxe'n welti diiphee'naa isenna siila'wite Heenooki ilde; Qayeeninna qachcha ijaareexxi summa beltiinke summinni «Heenoohi» hiyye. 18Heenooki Iraadi i'le; Iraadi Mehuyya'eeli i'le; Mehuyya'eelinna Maatusa'eeli i'le; Maatusa'eeli Lameehi i'le. 19Lameehinna lame melaalle aadhe; Taakkaxxik summi Aada; Langaxxik Tsiilatemman. 20Aadannaa Yabaali'i ilde; isinna dunkaani giddo gala'ni ifike horinni godaana'n me'aammake manni'a hundaayyetike annamman. 21Isike dayyik summinna Yubaalitemman; isinna suusu'le ufuufammakennaa kiraara ganammake manni'a hundaayyetike annamman. 22Tsiilanna Tubalqayi hiyyemeeka belto ilde; isinna sageettotannaa siblo tuma'n gargar gargar hedheeka miya giissa'emmakemman. Tubalqayixxi dayyonna Na'iimatemman.
23Laamehinna lamiinxa ifixxa are Aadannaa Seelaa hiyyee qici,
«Aadannaa Tsiila ha'noo hiyyannexxa laqqe
Tee Laahemixxe lamixxe are caqasse.
Mitti manji anee madeessammale,
mitti qee'lichchi anee gane miidhammale
isoo shiyennen.
24Qayeeli shiyeeke torbaanele xixichcho adhdhoole,
Laameh shiyeki kinni torbaane tamme torbaanele xixichcho adhdhaan.» hiyye.#Mat. 18:22.
25Addaami higgeen are ifixxen welti diiphee'naa siila'wite labbaka belto ilde; «Isenna Qayeeni shiyemmake Abeelixxe bakka'ni Mageni labbaka belto ani'a uwween» hita'ni summa isika «Seet»#4:25: Seet: Ibritotike laagadinni Seet hiyya «Uwween» hiyyaten hite fulchite. 26Seetinna labbaka belto i'le; summa isikanna «Heenoosi» hiyye fulche; eettene yanna'n manni Duuchchi Woddike Goottika summa ye'a safe.
Kasalukuyang Napili:
Dadatika Maxaafa 4: gdo
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
The Word for the World International, The Word for the World Ethiopia