Rukasi 13 سے مشہور بائبلی آیات

شئیر

Aepo e'i remẽ, Jesu tetã rova ikwa'igà mã'ẽ rè tè ojimosã'ãga: – Õ'õ. Tetã rova ikwa'igà mã'ẽ rupi kõrijõ tè peo kuwa Janejare'e rena kyty ipi. Ajawyi pejimokasi ikenẽ a'e rupi tapeo, pejuve jẽ remeve, a'e pejẽ. Jane kõ mõa'ãrõwã kee e'i ipetà: “Ãmõ rupi tè taẽ aa Janejare'e rena kyty”, e'i epetà. Ajamã'ẽ noo'ãi sire'e kupa, a'e kyty.

Ãmẽ wãivĩ mõ rè omã'ẽ, itekorã mã'ẽ mõ rè. Ãjãg tè omotekorã mã'ẽ tè a'e. Opõ'ã tarepe ipi. Ajamã'ẽ awyje ojapepy kõrijõ tè iko. Ijaty kwaray tesõ itekorã iko. 18 kwaray rõmõ tesõ itekorã iko. Ãmẽ a'e rè Jesu omã'ẽ remẽ, kee e'i ijupe: – Wãivĩ, age'e amogwapatà netekorãnà newyi ky'y. Awyje nekatupatà ky'y, e'i ijupe.

Ãmẽ Jesu oo ikoty. Opo oinõ i'aryvo. Ameve ikatupa ky'y. Ojãrapo'ãma ky'y. Omoe'e ywete Janejare'e iko ãmẽ ky'y.

Ajawyi kee a'e. Ajawyi apykyre kytywarà ootà tenoneporà rõmõ. Ãmõ, joãkãmorà ootà apyky rupi ky'y, e'i Jesu poromo'e.

– Tetã rova jarà vo 'ejẽ Janejare'e. Kãramõ wetã rova oovapytà. Oovapy paire, ava jẽ rõwã oiketà ky'y. Napeike amãtejẽi remẽ, tetã ypy pè tè pekutà. Tetã jarà pemotãtã titetà. Kee pejẽ ipetà: “Jõvijã, eovapyjavo taike!” pejẽ ipetà ãmẽ ky'y. Noovapyjavo'ãi pejẽ ajamã'ẽ. Kee e'i kõrijõtà tè: “Pejisyry. Noporokuwai ije”, e'ità kõrijõ tè pejẽ.

Ãnĩ. Na'evoi, a'e pejẽ. Ajawyi kee a'e pejẽ. Pejẽ ve nivoi peiko ipi. Ajawyi tapejimosĩoka ikõ peaiwererà rè ky'y nẽ, a'e pejẽ. Tapejimome'u ikõ Janejare'e rovake peaiwererà reitypypyioka ijupe nẽ. Na'evoi sõ peiko remẽ, peopatà jimomorijaua kyty kãramõ, ivo kõ jẽ, e'i ijupe kõ Jesu.

Ajamã'ẽ kee e'ità pejẽ: “Ãnĩ. Noporokuwai, a'e pejẽ. Mã taa wãnà kõ põ pejẽ rõmõ? Nakuwai. Pejisyry awi peo, a'e pejẽ. Nivoi mãe kõ tè pejẽ. Pejipe'a awi ewyi”, e'ità.

E'i jẽ Jesu poromogeta: – Ãmõ tè mijẽ amome'utà peupe tapekuwa manyvotà Janejare'e ojikuwa Jõvijã wasu rõmõ remẽ. [Age'e pe'ĩpe'ĩ jane kõ omojõvijã ereko. Ajamã'ẽ kãramõ jane kõ mõa'ãrõwã omojõvijãtà o'arà kyty ky'y.] Jimitãa rè tè poromosã'ãgatà tapekuwa sa'u. Koo jarà yvyra rã'ãigwerà opyy itã okoo pè. A'e oẽ ajaire oryvay. Ajaate oẽme'e tè oo ky'y. Ãmẽ a'e rãkã rè wyra kõ uu ojiowaitynõ, e'i.