LEVIMAI LARÜBVÜ 8
8
Aaron ae Puh Nahpoutu Maitaoye Theadzü Napeiyu
(Tap 29.1-37)
1 Mapao nou Moses hi paoe, 2“Aaron ae puh nahpoutu maitaoye saloua Enou buyu Sahpao vei bomü hisü sakoulo, alia napao maivei sabanü, theadzü, mah vei posheela peiyu chode ali, zhaotu ahai, ae kheih thoumoa soukhai touyu raokhao sülai ali tea nou polo. 3Süthaisü mai hrülaiye buh haihi kuve jülo.”
4 Mapao nou kharochi peikhai touyu büa Moses nou souloure, ae maisou nou vejüa buyu hinou, 5Moses nou puletao hi paoe, “Chu Enou soure vah haina hai Mapao nou kharochi peikhai toue.”
6Moses nou Aaron ae puh nahpoutu maitaoye nghoujülo sapo kouloua naanou soure vei dzükhülo tea paopeie. 7Puhnou Aaron ye naazao hai noupeie, ae nave hai puhvei khya hisü khopeie. Puhnou puhye ephod hai thoupeie, ae zhai veisho-a soukhai touyu khyakho sünou puh khya hi khopa peie. 8Puhnou khaokhayu na hai puh hi thoupeie, ae sühi Urim ae Thummim hai thoupeie. 9Puhnou Aaron pei hisü peizüsah phupeie, ae süna vei pah hi hai sana nou souyu zhusana hai peithouyu vei shee soua thoupeie. Mapao nou puh hi kharochi peikhai touyu bütoua puhnou soupeie.
10Süthaisü Moses nou nare theadzü sü poloua Mapao nou buyu Sahpao ae sühinou buyu na veishi hai noupeie, ae sütao hai soushee peie. 11Puhnou theadzü daotu poloua posheelabu sü bakha anai hai kavu peie ae sühi buyu natao, raikhao ae pokhaiyu buh khesü soushee loua Mapao vei bah hi thoupeie. 12Puhnou nayu theadzü sü poloua Aaron pei hi lazü peie, ae puhye soushee peia Mapao bah hi peithou peie. 13Süthai hai Moses nou Aaron vei nahpoutu maitaoye sakou loua Mapao nou kharochi peikhai touyu thaifüa puletaoye naazao hai noupeie, nave hai khya hi khopeie, ae puletaoye peirü rüpeie.
14Süthaisü Moses nou mah vei posheela peiyu chode nahai pokou loure, ae Aaron alia puhvei nahpoutu maitaoye panou cho pei hisü bah deiloure. 15Moses nou chode nasü datha loure ae souzhe hai poloua posheelabu kainghou adai hisü lazü peiwure. 16Moses nou lena hi buyu southea veishi, sousü veikayutao, chithou ahai ae sütao teitei poloua posheelabu hinou meidei peie. 17Mapao nou Moses hi chikha peikhai touyu büa puhnou sou kukhetao hai, süsü souhee, souke, ae lesou teitei hai fühao hinou vakou popaloua mei deilaiwure.
18Süthai hai Moses nou meidei-a posheelare donou zhaotu ali hai pokou loure, ae Aaron alia puh nahpoutu maitao nou süna pei hisü bah deiloure. 19Moses nou zhaotu sü datha loure, ae souzhe hai poloua posheelabu vei kainghou adai hisü lazü peie. 20-21Puhnou zhaotu nasü daode sasa loure, lesoutao ae phi ahai hai dzüthea loure, alia pei, theatao, ae sou teitei hai Mapao nou puh hi chikha peiyu büa posheelabu hinou meidei peie. Meidei-a posheela peiyu haina hai thoudzü vei posheela peiyu nasüe, ae haibüa meidei peiyu hai Mapao nou jüpa-e.
22Süthai hai Moses nou sheeyu vah donou pokupa peiyu posheela soure donou zhaotu kukhe nasü pokou loure, ae Aaron alia puhvei nahpoutu maitao nou zhaotu pei hisü bah deiloure, 23ae Moses nou zhaotu sü datha loua souzhe hai poloua Aaron vei noubei zhoulo pha hi, bahke zhoulo ae phike zhoulo hi napeie. 24Süthaisü puhnou Aaron vei nahpoutu maitao hai sakou loure, ae souzhe sü poloua puletao vei noubei pha zhoulo, puletao vei bahkü zhoulo, ae phikü zhoulo shaohpeie; ae lia buyu souzhetao hai posheelabu pehao teitei hi lazü peie. 25Puhnou southeatao, mi hi taoyu theatao, lesou hi buyu southea teitei, sousü veikayutao, chithou ae sühi taoyu theatao, ae phikao zhoulova hai poloure. 26Süthaisü Mapao hi peithou khaitouyu kheih thoumoa soukhai touyu raokhao sülai ali hinou raokhao ali, theadzü nou soukhai touyu raokhao ali, ae raokhaoki ali hai puhnou poloua southeatao ae phi zhoulo phao hisü khailoure. 27Puhnou haitao hai Aaron ae puh nahpoutu maitao bah hi thoupeie, ae puletao nou haina hai Mapao hi posheela peie. 28Süthaisü Moses nou sütao hai puletao bah hinou poloua meidei-a posheela peiyu noupu sütao hai posheelabu phao nou meidei-a posheela peiwure, haisü sheeyu vah soure donou pokupa peiyu posheela nasüe. Meidei-a posheela peiyu hai Mapao nou jüpa-e. 29Süthaisü Moses nou khaorao nasü poloua Mapao hi veisho-a sapeina soua posheela peie. Sheeyu vah soure donou pokupa peia posheela peiyu hi hainasü Moses vei zha-e. Mapao nou chikha peiyu teitei hai Moses nou souche peie.
30Moses nou nare theadzü daotu ae posheelabu hinou souzhe hai poloua Aaron ae puhvei nahpoutu maitaoye kavu peie, ae puletao vei sabanü hia kavu peie. Haibüa puhnou puletaoye alia puletao vei sabanü hai soushee loua Mapao hi peithou peie.
31Moses nou Aaron alia puhvei nahpoutu maitao hi paoe, “Mapao nou kharochi peikhai touyu büa sou sü poloua Mapao nou buyu Sahpao vei bomü hinou kholo, ae sheeyu vah panou soure donou posheela peikhai touyu raokhao sülai hinou raokhao poloua toukhaio. 32Sou ae raokhao lia buyu veishi sü mei deilai-o. 33Neletao nou teithe anai koute hai Sahpao vei bomü hinou tapalai moe, daiolouzü neletaoye panou sheeyu vah soure donou naanou soure hai teithe anai loulai. 34Etao nou zhou soua buyu vah haina hai, neletao vei mahmo soushee loure donou soulo tea Mapao nou chikha peikhai toue. 35Neletao hai Mapao nou chikha peikhai touyu thaifüa hea-khei anai hai Sahpao vei bomü hinou bulai. Neletao nou sübüa souloumo louzü, neletao hai thai-a bailai. Haibüa soulo tea Mapao nou ahi chikha peikhai toue.” 36Mapao nou Moses hi chikha peikhai touyu teitei hai Aaron ae puh nahpoutu maitao nou soukhai toupeie.
موجودہ انتخاب:
LEVIMAI LARÜBVÜ 8: POUMBSI
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.