URA TIN AYRA 2
2
1Tlesuu kolo huulona, ndaŋgara u tlesuu kaɗna halaŋ li ay ni na. 2Lona daɓ sun mamba ki hu buu ma karkiyana, hu buu ma kiɗisiyana ni nam koɗ tam kay sun mamba nam laɗta halaŋ.#Heb. 4.4,10#Kal. 20.11
3Buu ma kiɗisiyana Lona paɗ vunum ki kamu, buu namma nam hinim ki a koɗ tam kay tlesuu nam lasina halaŋ. 4Ni huulona u ndaŋgara Lona lasi ay ni na.
Sene Edenna
Hu li ma Yawe Lona li ndaŋgara u kolora ni, 5va ka day kay ndaŋgara tuɗi, ii usu ka day tuɗi lay, kay Yawe Lona bay si yoom ay kay ndaŋgara tuwa. Kay sa ma horok yam ndaŋgara ka tuɗi. 6Yona ɓaɗ ay ki kolo kay ndaŋgara ko mbaɗagira na, gi kay ndaŋgara loɗoɗ yaɗ ni nam hol. 7Yawe Lona yow ndaŋgara kom yowni min sana u ndaɗu. Nam hin foom musukka iirira cinimu. Sana hin mbuɗ ki iiriya.#1 Kor. 15.45 8Yawe Lona hin tin senena hu mbassa Edenna u maɗiina kay a tin sa ma nam minimma huwa. 9Nam day guguni suu jivi suu tira u suu gol jivina u njafasi zeɗ zeɗ huwa. Nam pi gu may ma ɦal iirira hu duk gayra hu senena Edenna u gu may ma wi yal jivira u cora.#Wira 2.7; 22.2,14
10Lumma col ay hu mbassa Edenna kay a li yona u gugunina, lum namma kom ɓorow ki fiɗi. 11Ma jewna yam ana Pikon, nammi ma ŋguy hu mbassa Havilana. Asi fi lorra ay ni hurumu, 12lor ta jivi cocora, u mbii gu ma his jivina, u ɦini mayra gus loɓ cocora yaɗ ana oniks. 13Sem lum ma mbana ana Gihon. Ni ma ŋguy hu mbassa Kussa. 14Ma hindina yam ana Tigre, ni may ma ɓaɗ irim u maɗiina keŋ mbassa Asirira. Ma fiɗina yam ana Efratna.
15Yawe Lona tin sana hu senena Edenna a nam horokomu, juɓum um may. 16Yawe Lona gaɗ sana ana, «Aŋ ti vuɗ guguni suu hu senena halaŋ. 17Na may gu may ma wi yal jivira u cora aŋ tambi, falira aŋ tamwani aŋ hin miɗa.»
18Yawe Lona ɓak tam ana, «A sana kak vaydegem dew ni ka jiviɗi. An lam sa ma njun um egemu.» 19Yawe Lona li njaf mburina zeɗ zeɗ hu ndaŋgara, u layagina zeɗ zeɗ may, nam hin ɦasi maŋ sana a nam tinisi sesiya. Njaf tlena bel sana tinisi sesi ki kasi dew dew bel. 20Sana tin sem yoorina ki kasi dew dew halaŋ lay, layagi suu kolo huulona u mburi suu bagina lay. Duk tle asina halaŋ nam fi va ma njunum ko nam na kaɗi. 21Kay ndaɗta Yawe Lona hin sana buu sen ma ŋgolna sini, nam paɗam sok payam paɗni, hin hoŋ nereɗ tliwna balamamu. 22Yawe Lona min cara u sok pay namma, hin ɦaɗ maŋ sana. 23Sana wi ca ndaɗta na ni di ana, «Ҥaa ɦaa, gola, ni irinda mbara, ndaɗ ni mbalatanu, suuna hin yaɗ ana cara, kay ndaɗ col ay ni eg tliw#2.23 tliw U vun hebre sem «cara» tli taɗ u tliwna. sana.»
24Kay ndaɗta sana hin bum u sum kiyo, taɓ u caamba kay asi mbuɗ ni tliw ma dewna.#Mat. 19.5; Mark 10.7-8; 1 Kor. 6.16; Efes. 5.31 25Sana u caamba ay kini siili jak, zolona ka kasiɗi.
موجودہ انتخاب:
URA TIN AYRA 2: BMS
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Moussey © Bible Society of Chad, 2002.