Luke 13
13
La mal yɔŋ vɔɔndo mì la mangalan
1O telen kon, mí vanaa pum a kɔa o Yeesu lo, má dimul ndu aa: «Mí Pilate ndóò bingulan kooma Kalilea a sálàlá nda va solio lan.» 2Mí Yeesu ɲuna nda aa: «La co yiyanndo maa Kalilea nda diw kan-nda ndáà hiow vaa vanaa lahakia a Kalilea tɔ̀a ni, maa lelan nda sɔla piɔ́mndo ni? 3Ɛ-ɛ. Mì dimul niaa, te la mel yɔŋ vɔɔndo mì la mangalan te, lende koni niaa bɛɛ sɔlanin piɔ́mndo ni. 4N'van tɔ́ a vanaa ŋɔmaa cɛi coocoo vilɛiyo del coo Siloe, mó diw nda-a yɛ, la laalan maa nda yɔŋnun vanaa yɔŋ vɔɔnda hiovɔɔ vanaa tɔ̀a Yerusalɛm coo ni? 5Kɛì-kɛì bɛɛ! Mì dimul niaa, te la mel yɔŋ vɔɔndo mì la mangalan te, lende niaa bɛɛ sɔlanin piɔ́mndo ni.»
Tale voosu tum kum too
6O kon kɔɔli, mí Yeesu dimul nda vɛlɛ sandaa ho aa: «Vanndo pum ndóò nɔ voosu tumndo o tɔalaa o nakɔ ndɔ n'rɛsɛnndo nin. Mó hun vooson nuwviaa, kɛ o komal ɲɛ-ɲɛ le coo le. 7O kon, mó dimul vana va nakɔ n'rɛsɛn kon mandaa-o aa: ‹Tofa vɔ, vɔsilan tan yáá co hoo ni, i co hunɔɔ voosun koaman nuwviaa o vosoo ho coo, kɛ i co ɲɛ-ɲɛ komal te. Kiolu ndu. O bɛnda mò bii fondaa o lɛŋnden coo fúú le!› 8Kɛ mí vana mandaa nakɔ kon mulul ndu aa: ‹Vana bɛndoo, mal-lɔ ndu le vosio ho. I co soondo balɔɔ tovɔɔ sɔ́, mì dɔw puulu sállo. 9Te o kom pɛ vɔsi co hunɔɔ-o, o naŋ. Te o kum yɛ le, a kelu ndu.›»
Yeesu singi vuɛɛn namtanɔɔ o paale pɛngiaalen coo
10O paale pɛngiaalen lepum coo, Yeesu va pɛɛkoo o cɛi lekaando nin. 11Nduyɛ vuɛɛndo pum va lon, o ɲina vɔɔndo ndóò soli buue-o. Vɔsilan tɔ́ a laŋɔmaa, o va o sanga kon nin. Ndóò tiw lɛ ba simndan sakpo le. 12Mɛɛ Yeesu ce ndu, mó veelu ndu, mó dimul ndu aa: «Vuɛɛndo, namtale nɔmnden le cuu.» 13Mó handu ndu balan coo. Fɔ́ɔ́fɔ̀, mí vuɛɛndo sim sakpo, mó va Hala sangalaa. 14Kɛ mí vana lebol va o cɛi lekaando nin-ndo tambu kɔllo le singi Yeesu singi vuɛɛn kon o paale pɛngiaalen coo-o. Mí vana lebol kon dimul vannda aa: «Palɛi ndii ŋɔmpun i co le vallo ni, la hun mì la sɔla siongɔɔ o palɛi ken bɛngu, kɛ o co o paale pɛngiaalen coo le.» 15Mí Maalii mulul ndu aa: «Niaa vanaa muuluannda ha! Niaa a pilɛn-pilɛnnda, vɛ̀ɛ̀ la timbi navaa niaa a sofɛlɛa niaa nɛɛ niaa dow nda billo-a o paale pɛngiaalen coo le nda koesio le. 16Vuɛɛn fula yɛ hoo niko o polale Abraham-nden coo-o, o Setana ndóò yii o vɔsilan tɔ́ a laŋɔmaa bɛngu-o, bàà ndu ya kɛɛnin singi o paale pɛngiaalen coo ni?» 17Telen Yeesu va mulio ho yɔngoo-o, mí siɛmbulan la bii yaamɔaa ndɔa kpow. Kɛ nduyɛ, ɲaaloo va vannda taw le dɛnnda kɔndɔfilta o va tosaa lan.
Sandaa a kulii n'pendei o kɔɔ
(Matie 13.31-32, Marke 4.30-32)
18O kon kɔɔli, mí Yeesu dimi aa: «A yɛɛ nɛ masale Hala len le velan yɛ? A yɛɛ nɛ ya tuu yɛ len? 19Maa kulii mutarde le co ni, i vanndo pum cua mó mal o nakɔ ndɔɔ nin-nde. Ndíì vulɔɔ, mí i siŋnun yɔmndo. Mí yowva hun tangul o lɛvun ndɔn.»
Sandaa a lɛvɛnndo o kɔɔ
(Matie 13.33)
20Mí Yeesu ɲuna vɛlɛ aa: «A yɛɛ nɛ ya tuu yɛnin masale Hala len? 21Le co ko kpen a lɛvɛnndo, o vanalanɔɔ pum cua, mó vow o kpeyan pani leyàá-o nin-ndo. Mí lɛvɛn kon tosa, mí kpeyan kon kpow hel helɔɔ pila.»
Dio sɔɔkɛɲɔɔ
(Matie 7.13-14,21-23)
22O kɔla Yeesu va Yerusalɛm ndan, mó kei vannda pɛɛkoo o kobilan a o sɔndɔkɔltan nin. 23Mí vanndo ɲuna ndu aa: «Vana bɛndoo, mò va maa vannda ɲɛ-pɔmbɔ koni a sɔlanin cindaa ni?» Mí Yeesu mulul ndu aa: 24«La kindin le luɛyɔɔ o dio sɔɔkɛɲɛɛo, kani mì dimul niaa, vanaa bɔɔ-bɔɔ a kindikindinnin le luɛyɔɔ, kɛ a tiwnin ba le.
25Telen vana cɛiyo cannin mò kinda dioo-o, la lonin o bɛ́ɛ̀. La kandunin dioo lɔɔ a dimio aa: ‹Maalii! Kumbil naa dioo.› Kɛ mò mulul niaa aa: ‹I sina nɛɛ niaa fula le.› 26O kon la dimulnin ndu aa: ‹N de mí kol naa niaa, má pɛɛku vannda o nɛila kobila naalan coo.› 27Kɛ o mululnin niaa vɛlɛ aa: ‹I sina nɛɛ niaa fula le. La faŋan ya, niaa vanaa yɔŋ vɔɔnda ha!› 28O kon la caŋnin mì la sɔm ciŋndon, telen niaa canin Abraham, Isaak, Yakɔb a vanaa-tɛɛngaa-diom Hala-a kpow o Masale Hala len nin, mà viow niaa o dio-o pɛɛn. 29Vannda hunnin fulaa a ba paalen le can-ndo, ba le del-lo, a maluaŋ a á ba too, mà cal le dioo o fondala ndalan o Masale Hala len nin. 30O kon, vanaa mɛɛlaa a pum a vanin vanaa tasea, mì a tasea siŋnun vanaa mɛɛlaa.»
Mɔnɛi bii Yeesu a Yerusalɛm o kɔɔ
(Matie 23.37-39)
31O telen pilɛ kon, mí Faliisia pum a hun o Yeesu lo, má dimul ndu aa: «Faŋan nanu mà kɔɛ nɛɛ celen, kani Herɔde yeema mò vem vannda le nɔm diyɔɔ.» 32Mó mulul nda aa: «La kɔ dimul kàà kon#13.32 kàà kon: Le tùú Herɔde va masa kɔlvesɛiyo a vana kɔlkalu vɔɔndo-o Yeesu veelu ndu ni aa kàá. Kàá yɛ, visi vɔɔndo pum o co ni. maa hau a siɔdii, i co ɲinaa vɔɔnda tovɔɔ vannda kɔɔli mì va nda singio, o paale yàándɔlen i co cii. 33Kɛ mɛɛ mì hiow hau laci, siɔdii a diɛŋ bɛɛ, kani o bɛnda mì vana-tɛɛngaa-diom Hala-o vi nɛɛ celen te, fɔ Yerusalɛm.»
34Mí Yeesu dimi aa: «Kpòkóó Yerusalɛm! Yerusalɛm, nɔm diw hoo vanaa-tɛɛngaa-diom Hala-a, má vii vanaa nda vim nɔm-nda a powtan-ndo! I kindin o nɛi oo nɛi coo le cuavaa nɔmnda mɔɔsiaa mɛɛ sɔɔ komsaa mɔɔsiaa cuavaa ndɔa o kumbanndan bɛngu nuaa yɛ, kɛ à cɛl te. 35Lelan, cɛi niaa lonin fondo fúú. I co niaa dimul, la ci lɛnin ya le, háá telen niaa diminin-ndo aa: ‹Biiloo co hunɔɔ o diola Mɛlɛka lan-ndo!›»
موجودہ انتخاب:
Luke 13: BKG
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Alliance Biblique en Guinée