Luke 24
24
Yeesu tendul fulaa vanvílɛ́iya tɛɛn
(Matie 28.1-10, Marke 16.1-8, Nsaŋ 20.1-10)
1O paale tasele lɔ́ɔ́ coo, mí vanlaandua kɔa o sɛiyo sondoo a cuɛima cun kɛndɛma ndáà toosiaa-an. 2Má komal pow va o sɛiyo sondoo-o o pimbulaa, o ve lɛ o sɛiyo ikɛi le. 3Má luɛi o sɛiyo nin, a komal kɔɔle Maalii Yeesu len ndon te. 4A lo kɔltan keeliaa, mí vanpiaandua nda ŋiɔn a cɔmnun nda o lepilɔɔ a volɔɔla ŋɛlɛŋi-ŋɛlɛŋilan lekɔɔ. 5Mí siòònde bii nda, má tundu hɔlla lɛŋ. Mí vanaa kan ɲuna nda aa: «Le yɛɛ nɛ niaa co yɛ vana co yoomuo nuwviaa vanvílɛ́iya tɛɛn? 6O co nanu le, o tendu fulaa vanvílɛ́iya tɛɛn. La loonun ɲɛ ndóò dimul niaa lɔ́ɔ́ o va Kalile-o aa: 7‹Mɛɛ mà mal Po vanacieo vanaa lahakia o ba, mà baŋ ndu o yɔm singafilaa coo, o paale yàándɔlen, o tendulnin fulaa vanvílɛ́iya tɛɛn.›»
8O kon, má yiyan a sɔɔn Yeesu ndóò dimi mun-ndon. 9Má faŋan o sɛiyo sondoo, má kɔ dɔwnun kaandeŋaa tɔ́ a ò pilɛa tɔ̀a sɔɔn mun kpow kona. 10Vanlaandua kan yɔŋnun haa ni: Mari fula Makdala-o, Nsaŋ a Mari kalaa Nsaki. Mí vanlaandua celeŋaa va lon-nda bɛɛ a kɔ tiiyal kiilaa kona pilɛ kon. 11Kɛ mí kiila kan ndáà yiyan maa diɔmndon daama vanlaandua kan va nda dimullo lende ni, a laalan nda le. 12Kɛ nduyɛ, mí Piɛr can, mó ɲaanun, mó kɔa o sɛiyo sondoo. Mó kɔ tundun, kɛ kolala ndáà simbulu kɔɔle Yeesu len nin-ndan daama o ce ni. O kon kɔɔli, mó muungu o ndu lo a kɔndɔfillo le dɛnnda o kɔ cɔ lan ndan.
Yeesu cɔɔmun kaandeŋaa ndɔa pum
(Marke 16.12-13)
13Paale pilɛle len, mí Yeesu cɔɔmun kaandeŋaa ndɔa nda ŋiɔn, a va kɔlan Emmais. Ciee kon va le kɔla vàà lɛɛlɛla tiɔn cɔnɔnndo Yerusalɛm. 14A va kɔlan a baltan o dɛnnda hiow lan coo. 15Telen nda va kon sɔɛi ma va suukanndo-o, mí Yeesu pila sɔɔnguu nda ikɛi, má bii nɛiyo le kɔlan nda ndaa. 16A va ndu cɔu, kɛ mí ɲɛ pum va nda kuuna ndu sinaa. 17Mí Yeesu ɲuna nda aa: «O sɔɛi yɛɛ coo niaa co yɛ kɔlan a suukanndo ho?» Má sim, mí mɔnɛi bii nda. 18Mí vana pilɛ o vanaa ŋiɔŋa kan tɛɛn, diolan Keleopas mulul ndu aa: «I ce maa o Yerusalɛmnda tɛɛn kpow, nɔm pilɛ kpé kɛɛ vɔ sina dɛnndan yɔŋnun o palɛi he bɛngu lan ni?» 19Mí Yeesu ɲuna nda aa: «Dɛnnda yɛɛ nɛ lan?» Má mulul ndu aa: «Ɲɛ yɔŋnun Yeesu fula Nasarɛt-o pɛɛn, o yɔŋnun Vana-tɛɛngaa-diom Hala kpaayaa-o, o cɔm kon o dɛnnda o tosa lan nin a sɔɔn o va dimi-on nin Hala o hɔl a vannda kpow o hɔl. 20Mí bolii vanaa-solia-lasálàà naa a simlacia naa mal ndu vannda o ba le ndu diyɔɔ, má baŋ ndu o yɔm singafilaa coo. 21Naa naa, n nɔ kɔlkɛsiaa maa ndu óò baŋanin Israɛlla ni. Handɔɔ o kon coo, kabi dɛnnda lan la hiow, paale yàándɔlen naa n co hau nuaa ni. 22Nduyɛ màá lekɛ́ndɛi, vanlaandua pum naa tɛɛn a dɔw naa kɔndɔfili taw. Diilɛn púŋ, má kɔa o sɛiyo sondoo, 23kɛ a komal kɔɔle ndɔlen ndon te. Má hun dimul naa maa mɛlɛkaa cɔmnun nda, má dimul nda maa o co yoomu. 24Mí vanaa pum naa tɛɛn kɔa o sɛiyo sondoo, má kɔ komal dɛnndan mɛɛ vanlaandua kan dimi yɛ kpafii, kɛ a ci ndu le.» 25O kon mí Yeesu dimul nda aa: «Niaa vanaa nɔ haa kɔlkalu le-a, kɔlta niaalan la yala sɔɔn vanaa-tɛɛngaa-diom Hala-a dimi-on biyɔɔ le! 26Mɛɛ mì Krista ndóò sanga o dɛnnda lan nin kpow lende lɔ́ɔ́ pá mì ndóò luɛi o biilu ndɔɔ nin.» 27O kon kɔɔli, mó tɛɛsial nda ɲɛ sɛvan kandɔɔ o sɛbɛla Moise lan nin-ndo, kɔlan a o sɛvan o sɛbɛla vanaa-tɛɛngaa-diom Hala-a nin a ndu o kɔɔ lan kpow.
28Mɛɛ nda kandu tiiya o ciee nda va kɔlan-ndo ikɛi, mí Yeesu hiawnun. 29Kɛ má dimul ndu aa: «N lonnun nanu naa niaa. Paalen le co nihau kɔlan delɔɔ nuaa ni, mì ɲumndan ma tol.» O kon, mó luɛi, mó lo lon nda ndaa. 30Telen Yeesu cal le dioo nda ndaa-o, mó cua buloo, mó dɔaw duaa, mó yimiyimi ndu, mó yɔngu nda. 31O kon mí hɔlta ndalan la kumbin, má sina ndu. Kɛ mó lo nda o hɔl le pilɛ kpé. 32Má muungu dimulanndo vellaa-velle aa: «Sɔɔn ndɔn n va naa kɔltan pilanndo telen o va sɔɛi o naa lo nɛi-tɛɛn, mó va naa mun kɔlɔlan tɛɛsiallo o Sɛbɛ Hala-o nin-ndo.»
33Fɔ́ɔ́fɔ̀, má can, má muungu Yerusalɛm. Ndáà tiiyaa ciee, má komal kaandeŋaa tɔ́ a ò pilɛa a vanaa va nda kɔɔli-a nɛɛ pilɛ. 34Mí nda kpow a dimul kaandeŋaa ŋiɔŋaa kan aa: «Toɲaa ni, Maalii tendul fulaa vanvílɛ́iya tɛɛn! O cɔmnun Simɔn!» 35Mí vanaa ŋiɔŋa kan bɛɛ cɔm ɲɛ kei nda tosalan nɛi-tɛɛn-ndo, a mɛɛ nda sina Yeesu telen o yimiyimi buloo-o yɛ.
Yeesu cɔmnun kaandeŋaa tɔ́ a ò pilɛ-a
(Matie 28.16-20, Marke 16.14-18, Nsaŋ 20.19-23, Dɛnnda kiilaa 1.6-8)
36A lo sɔɛi ken, mí Yeesu pila fula nda tɛɛn, mó dimul nda aa: «Màá la sɔla kɔlɲuloo!»
37Mí siòònde bii nda, má ɲiiya, má yiyan maa ɲinaa nda va cɔ kon lende ni. 38Kɛ mí Yeesu ɲuna nda aa: «Le yɛɛ niaa co yɛ buulanndo? Le yɛɛ niaa co yɛ sikaa o kɔlta niaalan nin? 39La tofa vɔ ya balan a pelon, ya kpeekpei ni! La pilan ya mì la ce, kani ɲinaa ndu nɔ n'dial te, o nɔ lapaa le, kɛ ya yɛ, i nɔ.» 40Mɛɛ Yeesu va sɔɔn mun dimio, mó cɔm nda balan a pelon. 41Kaandennda ndáà laalan-ndɔ le, kani a va a ɲaaloo, kɔndɔfillo va nda vɛlɛ taw, kɛ mí Yeesu ɲuna nda aa: «Vɛ̀ɛ̀ la nɔ ɲɛ pum nanu le dioo?» 42Má yɔngu ndu bungɛi suw toaŋaa ipilɛ. 43Mó bii, mó dia nda o hɔl.
44O kon kɔɔli, mó dimul nda aa: «Telen naa n va vɔ naa niaa latulu-o, mí dimul niaa maa fɔ mì ɲɛ-ɲɛ co o sɛvaa a ya o kɔɔ o sɛbɛ tɔŋ Moise-o nin, o sɛbɛla vanaa-tɛɛngaa-diom Hala-a nin, a o sɛbɛ condii lisai nin kpow-vo ndóò peelun.» 45O kon, mó kumbi kɔlta ndalan le Sɛbɛ Hala-o sinaa. 46Mó dimul nda aa: «Ɲɛ co o sɛvaa lenin-ndo co hoo ni aa: Krista co hunɔɔ sanga, mò tendul fulaa vanvílɛ́iya tɛɛn o paale yàándɔlen, 47mì vannda balu vanaa-mangalaa-isɔɔ kpow dimullo, kandɔɔ Yerusalɛm maa a mal yɔŋ vɔɔndo, mà mangalan, mà sɔla hakilan malɔɔ. 48Niaa co seiya le dɛnndan ndan kpow ni. 49Ya ya, i yɔŋnin niaa o Fuɲa nuu dimi-o, kɛ la lo ciee nanu háá mì Kpaayaa fula o halataala, mò tol niaa coo.»
Yeesu hel o halataala
(Marke 16.19-20, Dɛnnda kiilaa 1.9-11)
50O kon kɔɔli, mí Yeesu kɔa a nda ba Betani-o, mó heelu balan, mó dɔaw nda duaa. 51O lo o nda duaa dɔvɔɔ, mó sɛyan a nda, mó helnun o halataala. 52Telen nda cii Yeesu biilu-o, má muungu Yerusalɛm a ɲaale bɛndoo. 53A va Hala candɔɔ lɔ́ɔ́-lɔ́ɔ̀ o Cɛi-Hala-o nin.
موجودہ انتخاب:
Luke 24: BKG
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Alliance Biblique en Guinée