Matayo 12
12
Yesu eli Mukota wa Busi bua Sabato.
Mk. 2:23-28; Lk. 6:1-5.
1Mu nkungu zezo Yesu atingile busi bua Sabato mu masoa ma mabela; nu beigisibua bakule na nzala balingile kukala mabela nu bamalile. 2Tondo baFalese, gababamonineko, bamubuide bune, Lola, beigisibua bobe bekukita butakulungana ku mulembe ku busi bua Sabato. 3Tondo ababuide bune, Ndi tamuasomine buakitile Davidi, gakuaga na nzala, we nu banyage? 4Bubo buengide mu numba za Kalaga, alile kampampa ka kayulo, katakulungana kulia ku mulembe, aba nu bango babezaga nage, tugu basankoga bobenyene? 5Ndi tamuasomine mu mulembe buno, mu busi bua Sabato basankoga aba mu numba nnene zakukumbamina babigizie busi bua Sabato nu tababede na katati.#Manganzo 28:9, 10. 6Tondo nkumubula bune, Umozi munene watinga numba nnene za kukumbamina, eli gano. 7Songo muizi buisulilua bua malagi mamano, nkutunda kiombo, nsikutunda kisansa, songo tamunabasungizie beteli na katati. 8Kubuno Muana wa muntu eli Mukota wa busi bua Sabato.
Yesu Akonia Muntu Wabezaga na Kuboko Koma Busi bua Sabato.
Mk. 3:1-6; Lk. 6:6-11.
9Atukile gago, nu eingide mu numba za musanganano wabo: 10nu muabezaga muntu woma kuboko. Nu babuzizie Yesu bune, Ndi buakulungana ku mulembe konia muntu ku busi bua Sabato? buno bamusongele. 11Nu ababuide bune, Nazi muntu wa mumuli uli na mukoko umozi, ndi wakoloka busi bua sabato mu muzinga, utanavuama kugukata nu kugutikia? 12Bukunza bua muntu buatinga bua mukoko mambizi manga! buakulungana ku mulembe kukita busoga busi bua Sabato. 13Nu Yesu amubuide bune, Lambia kuboko kuobe, nu akulambizie, nu kuabeide kugimagima anga kuko kungo. 14Tondo baFalese batukile, nu bamukitide luango buno bamuite.
Yesu Atendile Bantu Bitondo bia Wakalazi.
Mk. 3:7-12.
15Nu gamenyine Yesu bubo, atukile kuko: nu beingi bamuyangile; nu abonizie bansania, 16nu abakakizizie buno, tabasambale musagu wage: 17bubo lizindilile liatendagua na mulengania Yesaya bune,
18Unguililazi, mukambi wane unasombuede;
Ngoli zane zinatananinua nazo nnenyene:
Nabike Muuza wane gantata gage;
Nuwe akasambalila baBilongo lusungio.
19Ntakaluana, aba ntakalaluka;
Aba muntu ntakongua kuiyuki liage mu nzila.
20Lusolu luenyantilue ntakalunyanta,
Aba nsulu zikususa ntakazizimia,
Aba nu gakalusia lusungio luage lukakinda.
21Nu izina liage baBilongo bakalilemanina.#Yesaya 42:1-4; 41:9.
Yesu Atikizie Musumbu Mubi mu Muntu.
Mk. 3:22-30; Lk. 11:14-23.
22Bavule kueli na wabezaga na musumbu, abezaga kiuku nu kaluma: amonezie, bubo wozo kiuku u kaluma atendile nu amonine. 23Nu musanganano unsania wangamine, watendile bune, Ndi wono ta muana wa Davidi? 24Tondo gongule baFalese kuiyuki lilino, batendile bune, Muntu wono ntekutikia basumbu tugu mu magala ma Belezebula, mukota wa basumbu. 25Tondo Yesu amenyine bubakengelaga, ababuide bune, Bukota bunsania bukuidekanukia bukakua; nu muino unsania nu numba insania zikuidekanukia, nti zikakua: 26nu ndi Satana ekutikia Satana, nti ekuidekanukia; bukota buage bunasimba buni? 27Nu ndi nkutikia basumbu mu magala ma Belezebula, nti bana beinyu bakabatikia mu magala ma nazi? Kubuno ubabo bakaba ngatu zeinyu. 28Tondo ndi nne nkutikia basumbu mu Muuza wa Kalaga, kasi bukota bua Kalaga buse kumuli. 29Nazi muntu unavuama kuingila mu numba za wozo uli na magala, nu kubigia bikulo biage, ndi ntalinga kukanda wozo uli na magala? nu kusila nti abigie numba zage. 30Ndi muntu nteli nanne bumozi nti akuntuna; nu wozo utakukundamania nanne nti akubalangania. 31Ku bubuno nkumubula bune, Misako insania za buagi nu bilingano binsania bikasigililua, tondo babo bakalingaga Muuza Wasilililatabakasigililua. 32Muntu unsania ukatendaga bubi ku Muana wa muntu, akasigililua; tondo muntu unsania ukatendaga bubi ku Muuza Wasililila, ntakasigililua, mu nkiko zeno, aba mu nkiko zikavua.
Moki Makutuka mu Kanua Meli Kitondo kia Magala.
33Mukubula buno muti uli musoga, nu biguma biago bisoga, aba mukubula buno muti uli mubi nu biguma biago bibi; kubuno muti ukumenyua ku biguma biago. 34Inyue kikanga kia mpoma, mukubezaga babi munatenda busoga bukizi? Kubuno bukukengela mutima nti ubukutenda kanua. 35Muntu musoga ekukanuna bikulo bisoga mu kikagi kiage kisoga: nu muntu mubi ekukanuna bikulo bibi mu kikagi kiage kibi. 36Nu nkumubula bune, Iyuki neiyuki likutenda bantu buliabulia bakasungibua kulio busi bua lusungio. 37Kubuno ku moki mobe ukabingibua nu ku moki mobe ukasungibua.
Bumenyinino bua Yona. Yesu Akutenda ku Lukuo Luage nu ku Kuyuka Kuage.
Lk. 11:29, 30.
38Nu bamozi ba basanzi nu baFalese bamuakuide bune, Musozi, tukutunda watukitila kalolesio. 39Tondo abakuide bune, Kibuti kibi nu kia butazi kikutunda kalolesio; tamukamona ku kango kalolesio gantata ga kalolesio ka mulengania Yona: 40kubuno bubo buabezaga Yona munda za kiena kinene; bindi bisatu musi nu kindi bubo Muana wa muntu akeikala mu kisi, bindi bisatu musi nu kindi. 41Bantu ba Ninewe bakemana mu kindi kia lusungio gamozi na bantu ba kibuti kikino, nubo bakakisungia: kubuno beiyanizie kukusambala kua Yona; nu gano geli watinga Yona. 42Mu busi bua lusungio, mukikulu eli mukota wa kunsi akeimana gamozi na bantu ba kibuti kikio, nuwe akakisungia; kubuno we atukile kunsi kua kisi buno amone ku menge ma Solomo; nu gano geli watinga Solomo.
Kugaluka kua Mutima Tugu kuli Buliabulia.
Lk. 11:24-26.
43Gatukile musumbu wa nsese mu muntu, endile ku kiziki kitabezaga mazi, alondaga gomunua, ntagamonine. 44Lingo, we atendile bune, Nasubie mu numba zane zinatukaga muzo; gavue, amonine mu numba tamukampa, zayagilua, zakungua. 45Lingo akavua na bango basumbu mutuba kamo bamutinga bubi, nu bekuingila nu bekuikala mumo: nu muntu wozo lukita luage luzinda nti luaba lubi kutinga lutangi, ububo bukaba kibuti kikio kibi.
Bantu Bakasuaga ku Kabamba ka Yesu.
Mk. 3:31-35; Lk. 8:19-21.
46Gabezaga ekutenda na musanganano, nina nu mibuto zage bemene kumbuga, batundaga kutenda nage. 47Nu muntu umozi amubuide bune, Nyoko nu mibuto zobe bemana kumbuga, bekutunda kutenda nobe. 48Tondo akuide wozo wamukengelezagia buno nazi mane? nu banazi mibuto zane? 49Alambizie kuboko kuage ku beigisibua bage, atendile bune, Lolazi, mane nu mibuto zane! 50Kubuno muntu unsania ukukita kusombola kua Tatane uli muigulu, we nti umuto wane nu mubitu wane nti umane.
موجودہ انتخاب:
Matayo 12: NTKI57
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Nouveau Testament en Kilega © Bible Society of the Democratic Republic of Congo, 1957.