BOTHUBO 2
2
1Ike atsutsu ayeghi ngo tile akeqo kumtsu mulaqhiluve. 2Eno tsala akutsuniu lo Alhou ye pano kiu mla akeno mlaqhiluveno atsala akutsunini pa kumla kumtsu mla taveno akulho qhie. 3Alhou no tsala akutsuniu kumghatsue, pano tipa tsala kutashi akimthe shitsue, kughengu hipani no Alhou no pulhosu kumla kumtsu shikhaveno akulho qhilu.
4Hipaqono atsutsu ngo ayeghi lhokelo ikoighi keqoe. AMPEU Alhou no ayeghi eno atsutsu mlakelo, 5atsunibo lakhimu eno alothi lakhimu ayeghilo lhoipeghi mono ae, kughengu AMPEU Alhou no ayeghi shou tsughu puku pemono ake eno timi lakhimu achhigha chimono ake. 6Ikemu ayeghi lono akimhi ipeghino ayeghiqha kumtsu azu piqi cheke. 7Tileno AMPEU Alhou no ayeghi muqo pesu timi lakhi lhoe eno pano pa nigipelo akuxupu tuthu shesu tsu eno timi huye akuxu akeu lhoxu shive.
Eden Ghutu
8Tile AMPEU Alhou no Eden kipelau aghutu lakhi qhitsue eno pano lhokeu timi hu tilehi qhie. 9AMPEU Alhou no ayeghi lono jukivi ithulu kepu subo ngo chulukepu subo kumtsu ipeghipe. Tile akuxupi subo aghutu mtalo ae, eno akivi ngo alhoksa ithilukepu subo ghi ae. 10Eden lono aghoki lakhi qowu ache tino aghutulo azu sawo chilu chepe. Eno aghutu heche ipekethiu tiye aghoki bidi shi shoba wove Atughiu jeno Pishon; 11tino Xavila chhighaqhalo qowu ache, tipaqhalo shuna ani. 12Eno tipa chhighalo wu shunaye aloke, tilehiye amekusho tsungquta, akughupu onik tu anie. 13Aghoki akiniu jeye Gihon, tino Kush Ethiopia chhighaqhalo qowu ani. 14Aghoki akuthuu jeno Taigris. Tino Asiriya yeghi kipelau qowu anie. Aghoki abidiu no Eufrati. 15Ike AMPEU Alhou no timi hu sawo Eden lo akeu ghutulo qhie, ti tuchomujo eno khepeni kehu. 16AMPEU Alhou no timi vilo ahza tsughi ishi pi, “Aghutulo akeu subo kumtsu xathi nono vejoi chulu nani, 17ikemu akivi eno alhoksa ithilupe chekeu subo xathi noye chukevilo. Kughengu tipau chukeu tsala nino noye thini putsae.”
18Tile AMPEU Alhou no pi, “Timi pelo pa likhi apekeu hiye aloni che moe. Pa sasu kumghulu kepu kukuphuu lakhi ino lhope tsuni.” 19AMPEU Alhou no ayeghi shipa lono tughashi, tikishi eno aghau kumtsu lhoe; Adam ye tipaqo je kiu kutsu nani kela junike Alhou no pa lau saghie. Ike Adam no akuxu akeu lhoxu pe kiu kutsu keno tino pututa je shive. 20Tileno Adam no tikishi, aghau eno tughashiqoje kumtsu kutsue; ikemu pa ghenguye kumghulu kepu kukuphuu kuhae.
21Ikehu AMPEU Alhou no Adam pelo zucheyivepe eno pano pa kuchughi lakhi ikhipheluve puzu tipau zaku jonhavetsue. 22AMPEU Alhou no Adam launo akuchughi khikhi ikhilu keno tipau pesu totimi lakhi lhophetsu eno pa lau sasu ighitsue. 23Tile Adam no pi,
“Hiye aghi ghi ighi ke,
eno ashighi ishike.
Totimi ipi kuniae,
kughengu hiye timi launo
ikhipeluke.”
24Tighenguno kiptimi lakhiye pa puaza qhiveno pa nipu sasu kughuna auve cheni eno pamaye ashi lakhi shive cheni.
25Pama akimi anipu kini kujo aphikumsae, ikemu kujokeu kuhae.
موجودہ انتخاب:
BOTHUBO 2: SUMIBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.