زکریاہ 10
10
خُداوند مخلصی کا وعدہ کرتا ہے
1پِچھلی برسات کی بارِش کے لِئے خُداوند سے دُعا کرو۔ خُداوند سے جو بِجلی چمکاتا ہے۔ وہ بارِش بھیجے گا اور مَیدان میں سب کے لِئے گھاس اُگائے گا۔ 2کیونکہ تِرافِیم نے بطالت کی باتیں کہی ہیں اور غَیب بِینوں نے بطالت دیکھی اور جُھوٹے خواب بیان کِئے ہیں۔ اُن کی تسلّی بے حقِیقت ہے اِس لِئے وہ بھیڑوں کی مانِند بھٹک گئے۔ اُنہوں نے دُکھ پایا کیونکہ اُن کا کوئی چرواہا نہ تھا۔
3میرا غضب چرواہوں پر بھڑکا ہے اور مَیں پیشواؤں کو سزا دُوں گا تَو بھی ربُّ الافواج نے اپنے گلّہ یعنی بنی یہُوداؔہ پر نظر کی ہے اور اُن کو گویا اپنا خُوب صُورت جنگی گھوڑا بنائے گا۔ 4اُن ہی میں سے کونے کا پتھّر اور کُھونٹی اور جنگی کمان اور سب حاکِم نِکلیں گے۔ 5اور وہ پہلوانوں کی طرح لڑائی میں دُشمنوں کو گلیوں کی کِیچ کی مانِند لتاڑیں گے اور وہ لڑیں گے کیونکہ خُداوند اُن کے ساتھ ہے اور سوار سراسِیمہ ہو جائیں گے۔
6اور مَیں یہُوداؔہ کے گھرانے کی تقوِیّت کرُوں گا
اور یُوسفؔ کے گھرانے کو رہائی بخشُوں گا
اور اُن کو واپس لاؤُں گا
کیونکہ مَیں اُن پر رحم کرتا ہُوں
اور وہ اَیسے ہوں گے گویا مَیں نے اُن کو کبھی
ترک نہیں کِیا تھا
کیونکہ مَیں خُداوند اُن کا خُدا ہُوں اور اُن کی
سنُوں گا۔
7اور بنی اِفرائِیم پہلوانوں کی مانِند ہوں گے
اور اُن کے دِل گویا مَے سے مسرُور ہوں گے
بلکہ اُن کی اَولاد بھی دیکھے گی اور شادمانی
کرے گی۔
اُن کے دِل خُداوند سے خُوش ہوں گے۔
8مَیں سِیٹی بجا کر اُن کو فراہم کرُوں گا
کیونکہ مَیں نے اُن کا فِدیہ دِیا ہے
اور وہ بُہت ہو جائیں گے جَیسے پہلے تھے۔
9اگرچہ مَیں نے اُن کو قَوموں میں پراگندہ کِیا
تَو بھی وہ اُن دُور کے مُلکوں میں مُجھے یاد
کریں گے
اور اپنے بال بچّوں سمیت زِندہ رہیں گے
اور واپس آئیں گے۔
10مَیں اُن کو مُلکِ مِصرؔ سے واپس لاؤُں گا اور اؔسُور
سے جمع کرُوں گا
اور جِلعاد اور لُبنان کی سرزمِین میں پُہنچاؤُں گا۔
یہاں تک کہ اُن کے لِئے گُنجایش نہ ہو گی۔
11اور وہ مُصِیبت کے سمُندر سے گُذر جائے گا
اور اُس کی لہروں کو مارے گا
اور دریایِ نِیل تہ تک سُوکھ جائے گا
اور اؔسُور کا تکبُّر ٹُوٹ جائے گا
اور مِصرؔ کا عصا جاتا رہے گا۔
12اور مَیں اُن کو خُداوند میں تقوِیّت بخشُوں گا
اور وہ اُس کا نام لے کر اِدھر اُدھر چلیں گے
خُداوند فرماتا ہے۔
موجودہ انتخاب:
زکریاہ 10: URD
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Revised Urdu Holy Bible © Pakistan Bible Society, 1970, 2010.