aLuka 23
23
A tseng be aYeso nufe aBilatus
(aMat 27.1-2, 11-14; aMar 15.1-5; aYoh 18.28-38)
1Ágwo̱m ame sok aYeso nong á tá tseng'e nasho̱o̱n aBilatus. 2Á tá fe̱ ye, “Yir tú se̱ yir a sen wo̱ro̱k ánerawe yir, ne a ku roon ba kukarang rigwo̱m itso̱m iben. Ne a sok rice wu ye wu ne a nye aKiristi, a ta nye agwo̱m.”
3Ayong aBilatus rip aYeso ye, “Wan ne i nye agwo̱m áner aYahuda a?”
aYeso fe̱ be wu ye, “Ei, wan ne i fe̱ anong.”
4Ne aBilatus fe̱ be ágbang átsi ne rigwo̱m ánerawe'me ye, “Mi se̱ aner na be rine̱n ike̱ng ikak baꞌ.”
5Amma ánerawe'me yiir'e kar kar ye, “Aye̱ ánerawe niben aYahuda cei n dorok naza be kubo̱so̱p wu. A san'e na aGalili yong a n be̱ ma aze.”
Á tseng be aYeso nufe aHiridus
6aBilatus tá fa fok anong ne a rip ye, “A nye aner aGalili a?” 7A tá fa fok ye aYeso se niben ife aHiridus tú ku nye rigwo̱m, yong a fe̱ ye a ra tseng be wu nufe aHiridus, a ta se na aUshalima nizen iyong gip.
8Nizen aHiridus tá di aYeso riye̱ wu kare̱p dide̱ng, kamok an shim ku ku di gbugbang. A shim ke a tú di kamok ike̱re̱ wu tá foos natoon wu, nong a tà nye ike̱re̱ ikak ife azhing. 9A yiir ku risim iriri ike̱re̱ dide̱ng, ka aYeso tú sak ko'me baꞌ. 10Ágbang átsi ne áfe kubo̱so̱p Itsi áya a tá se nunyeseng azong be̱s be rife̱ natoon wu. 11aHiridus be ásozha wu te̱n be wu fe̱re̱, ne á ku kok ko'me. Á tú te kukpiin ágwo̱m ta tes, á tá bun á tseng be wu nufe aBilatus. 12Katuk kayong ne aBilatus be aHiridus te aner be aferime̱, á tá tsang á nye aner be amudo̱n.
A te̱n aYeso amok riku
(aMat 27.15-26; aMar 15.6-15; aYoh 18.39)
13aBilatus yis ágbang átsi ne áfe rigwo̱m be ribir ánerawe cei, 14nong a tá fe̱ be ba ye, “Yin ti be̱e̱n yin aner na ye a tees ánerawe nong á ta ko̱n be rigwo̱m. Mi mu ku risim nasho̱o̱n yin mi tú se̱ be rine̱n ike̱ng ikak kyo̱ndi yin tá fe̱ yin baꞌ. 15Anong ne aHiridus gip, a tú se̱ be rine̱n baꞌ, iyong ne i sak a tú bun ko nufe yir. Yin di yin gip, ko a nye ike̱ng i ta tas ke a ku fe̱r baꞌ. 16Kamok anong mi tu ku whereng ne i ku won.” 17[Ni igo̱o̱n ba, koakye izen aPasova aBilatus ta tun aner akak nitso̱m.]
18Amma ánerawe cei ta kuto̱ ye, “A ku fe̱r, ne a ni tun yir aBarabas.” 19aBarabas nye aner a tú ku te nitso̱m kamok a tá sak ánerawe tá ko̱n be rigwo̱m iben kaye̱e̱r kuwo̱p ma a ti fe̱r aner akak.
20aBilatus shim ke a won aYeso yong a bun a fe̱ be ba gbak, 21amma ánerawe'me bun á yiir tang kuto̱ ye, “A ku tigak! A ku tigak!”
22Ayong aBilatus bun a fe̱ be ba kutak kufe ataar gbak ye, “Kamok akye̱ e̱? A nye rine̱n akye̱ e̱? Sang mi tú se̱ be rine̱n ri ta kyem a tú ku fe̱r baꞌ. Kamok anong mi tà sak a tu ku whereng nong a tu ku won.”
23Á yiir kutasak kar kar ye a ru ku tigak, kutasak ba sak ma a kuus rifuba. 24aBilatus tá di anong a tú nye ba ike̱ng iya ba tá shim. 25A tú won ba aner aya a tá tsang a ku te nitso̱m kamok kuren a ta sak ánerawe ta ko̱n be rigwo̱m iben ma á ti fe̱r aner akak, ayong a tú no̱o̱k ba aYeso nong á tin nye ike̱ng iya ba tá shim.
A tigak aYeso
(aMat 27.32-44; aMar 15.21-32; aYoh 19.17-27)
26Nizen á tá sen tseng be aYeso, á nyim be aner aSirin akak, a tú ku yis ye aSiman. A se be kutseng wu, a ta no̱ kaye̱e̱r aUshalima. Á tú sak ye ma a ra cer kukon a tanin tigak aYeso nong a tin kuus aYeso nama. 27Ánerawe whe̱re̱ ti kuus na aYeso'me. Ákak nye ányining áfe a tá nye riye̱ riwe, ne á tsang á tos. 28Ayong aYeso kirik a tá fe̱ be ba ye, “Ányining aUshalima, tu tos yin kamok'i baꞌ, tos yin kamok rice yin ne inoon yin. 29Kamok izen saase iya ánerawe tana fe̱ yin ye, ‘Áner riye̱ rikan ne á nyining áya sang tá kun tes baꞌ, áya a tá nye asang igon, ka áya a tá kun ngasa igon baꞌ.’ 30Nizen iyong,
“ ‘ánerawe tà fe̱ be nawhanang ye,
“Ni kpas yin natoon yir.”
Ne á fe̱ be agung ye,
“Ni kis yir.” ’
31“Ke i se ye ánerawe ta nye ike̱re̱ na be kakon ne ka ruresek kashirim, to̱ ane̱ ne á tà nye ke kakoor e̱?”
32Á tseng be áner ákak ba afa á tá nye rine̱n nong á tà su ku fe̱s ba mak be aYeso. 33Á tá fa be̱ naro̱ a ta yis ye Aho̱karo̱k Ace, ne á tigak aYeso'me azong mak be áfe rine̱n ame, azining nubo̱k riya, ne afe afa nubo̱k rimen. 34Ne aYeso fe̱ ye, “Ada, ku re̱ng ba'me, kamok á ren ike̱ng ba ta nye baꞌ.” Ne á kasap ares wu be ku ni barak ica ikiriwhe̱r.
35Ánerawe nyeseng nong á tu ku ye̱re̱k, ne áko̱k kasho̱o̱n'e ku kok'e, ne á fe̱ ye, “A shesh ákak, a ra shesh rice wu, ke wu ne a nye aKiristi afe Adakunom tá kasa.”
36áSozha gip á be̱ bubarak nong á tú ku kok'e, ne á ku no̱o̱k ashi anap aya a tá se kpukpak. 37Ne á fe̱ be wu ye, “Ke wan ne i nye agwo̱m aner aYahuda ne i shesh rice wan.”
38Izibir tuse nukon'e dim rice wu, i tá fe̱ ye, “AYUNA NE A NYE AGWO̱M ANER aYAHUDA.”
39Azining kaye̱e̱r aya a tú ku tigak ba mak, tú barak amaan rife̱ ye, “Wan ne i nye aKiristi aꞌa? Shesh rice wan ne i ni shesh yir.”
40Amma afe afa'me tú zhe̱e̱r a tá fe̱ ye, “Wan fok inyim Adakunom aꞌa? Wan di wan ta sen so̱ risam kuri rifu aꞌa? 41Risam a tin no̱o̱k yir se gye̱r, kamok kunye yir nye kumaan'e, aner na nye rine̱n ike̱ng ikak baꞌ.”
42Ayong a bun a fe̱ be aYeso ye, “Yiring be mi kaye̱e̱r rigwo̱m wan.”
43aYeso fe̱ be wu ye, “Won ta ka tak katsak'e, katuur wan tà se mak be na aParadis.” #23.43: aParadis: fa: Akanang Ike̱re̱ Ikak, kaye̱e̱r nafarap'e nakak.
Riku aYeso
(aMat 27.45-56; aMar 15.33-41; aYoh 19.28-30)
44Nabas itso̱m kuso̱k be afa nunom, karo̱ te whi koake̱ nazatse ma nabas itso̱m itaar nunom, 45kamok sang kunom tar baꞌ. Alaple #23.45: Alaple Kutu kuya Adakunom Iben: Ike̱ng iya a tin kabak Karo̱ Kuya Adakunom Iben. a tá se kaye̱e̱r agbang kutu kuya Adakunom iben sarak natite. 46aYeso tá kuto̱ naza a tá fe̱ ye, “Ada, nubo̱k wan, ne mi won kutser mi.” A tá fa fe̱ anong, ne a ko̱ro̱k isong wu ife igang'e.
47Izen iya aritek ásozha'me akak tá fa di anong yong a kerek Adakunom, ne a fe̱ ye, “Katsak'e aner na nye azhe̱l'e.” 48Áfe a tá be̱ nong á ta di kutigak aYeso, tá fa di ike̱re̱'ong, korok ibo̱k nuto̱ nong á tú ku burung. 49Amma cice̱r áfe a tá ren aYeso'me ne ányining á tá tsang á ku kuus kum na aGalili nyeseng gugo̱k nong á tá ye̱re̱k ike̱re̱'ong cei.
Kune̱r aYeso
(aMat 27.57-61; aMar 15.42-47; aYoh 19.38-42)
50Aner Arimatiya akak tuse riyerek wu tá nye aYusufu niben aYahuda, a nye azining kaye̱e̱r áko̱k kasho̱o̱n aner aYahuda. A nye aner atek, ne a se gye̱r nasho̱o̱n Adakunom. 51A shim ibo̱ro̱ng be ike̱ng iya ba tá nye baꞌ. A se be kutor kube̱ rigwo̱m Adakunom. 52A be nufe aBilatus a tá se fe̱ ye, a ra ku no̱o̱k kukom aYeso. 53A tiik'e a tá kunung be kures kukan a tá yis ye alilin a tá se ne̱r kaye̱e̱r kure̱k a tá ta nifang agudong kuya sang a tá kun ni ne̱r akak baꞌ. 54I se nawhe̱shirim, izen kunye kanye̱k kunom #23.54: kunom kanye̱k: fa: Akanang Ike̱re̱ Ikak, kaye̱e̱r nafarap'e nakak. Asabar.
55Ányining áya a tá kuus aYeso kum na aGalili ame tseng mak be aYusufu, nong á tá se di karo̱ kure̱k'e be karo̱ a tú ku sak kukom'e. 56Nama anong ányining'e tú bun kari, á ta se nye ike̱re̱ i ta be iko̱o̱n itek nong á tà sen te nukom'e. Á fan katuk Asabar kyo̱ndi Itsi Adakunom ta fe̱.
موجودہ انتخاب:
aLuka 23: izrNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc