aLuka 24
24
Kudorok aYeso nure̱k
(aMat 28.1-10; aMar 16.1-8; aYoh 20.1-10)
1Bop nadiding katuk ime̱se̱ng'e na asate, ányining ame sok ike̱re̱ iko̱o̱n itek ame nong á tá tseng nure̱k'e. 2Á se se̱ an biring kuta ku ta se nanu kure̱k'e. 3Izen iya ba tá no̱, á se̱ kukom Agwo̱m Ágwo̱m yir aYeso baꞌ. 4Kum ne ba ru to̱ natoon'e, ne áner ákak ba afa be ares akan á tá gye̱se̱m ti wuruk nukim ba. 5Ányining'e te cing be ace kaben kamok inyim, ne áner ame fe̱ be ba ye, “Akye̱ sak yin tse̱r yin aner atser kaye̱e̱r áfe a tan kus e̱? 6A kuse baꞌ, an dorok. Yiring yin ike̱ng iya a tá ka tak yin, nizen a tá rusek be yin na aGalili. 7A tá fe̱ ye, ‘Ma a ta sok Igon Anerawe a ta no̱o̱k nubo̱k áfe rine̱n, a tu ku tigak, ne a bun a dorok nure̱k katuk ife ataar.’ ” 8Iyong ányining ame yiring'e be rife̱ aYeso tú ku tak ba.
9Nizen á tá ne nure̱k'e á be̱, á taas álimazhiri kuso̱k be azining be ribir ánerawe ike̱re̱'me cei. 10Ányining á tá tak ámanzo ike̱re̱'me nye aMarya abafe aMagadaliya be aZhuwana ne aMarya anyining aYakub be ákak á tá se mak be ba. 11Ka á ti no̱o̱k katsak rife̱ ányining'e baꞌ, kamok rife̱'me tú sor ba kyo̱ndi iwhas. 12aBitrus dorok be itsi, a tá be nure̱k'e. A tá fa tiguum ne a di awan ares a tú ku kunung mo, yong a tú bun ne a tsang a to̱ ka akye̱ ne i nye e̱?
Niren a ta be na Imawus
(aMar 16.12-13)
13Kunom kuyong'e áner afa kaye̱e̱r áya a tá kuus aYeso tseng á be nabuwo̱p kukak á ta yis ye Imawus. Atsik'e be aUshalima ta se kyo̱ndi akilomita kuso̱k be azining. 14Á sen tsang á fe̱ natoon ike̱re̱ i ta nye cei. 15Nizen ba tá sen tsang á fe̱ itak'e ne aYeso be rice wu be̱ a tú se̱ ba nong a tá tseng mak be ba. 16Amma a sak ba tú ren baba baꞌ.
17Ayong aYeso tú rip ba ye, “Akye̱ ne yin sen tsang i fe̱ yin ne i tseng yin e̱?”
Iyong á nyeseng kyo̱o̱n á tá tsibik ányisi ba. 18Azining kaye̱e̱r ba riyerek wu ta nye aKiliyopas tú rip ye, “Wan ne i nye aner atsen na aUshalima tsek, i ta dun ike̱ng i tá nye azong kaye̱e̱r inom na a?”
19Ayong a tu rip ba ye, “Akye̱ kuri ike̱re̱ e̱?”
Ne á fe̱ be wu ye, “Natoon aYeso aner aNazaret. A nye aner kuzarap Adakunom. A be kukyem ku ninye ike̱re̱ ne kufe̱ kanu nasho̱o̱n Adakunom ne ánerawe cice̱r. 20Ágbang átsi be ágwo̱m yir tú sok á tá no̱o̱k nong ase̱ á tú ku te̱n amok riku, ne á ku tigak. 21Amma yir tsang i ni te yir riye̱ yir ye, wu ne a nye afe a tana shesh áner Isarela. To̱, di kunom kufe ataar be kunye ike̱re̱ na. 22Gip be anong ányining ákak ba afa á tá se mak be yir bun á ti no̱o̱k yir azhing. Á ne nure̱k'e bop nadiding na, 23á se se̱ kukom'e baꞌ. Á be̱ á ti tak yir ye ba di ámaleka afa á tá fe̱ be ba ye a nye atser. 24Áfudang yir ákak tseng nure̱k'e, á se di'me kyo̱ndi ányining'e tá fe̱, amma á tú ku di baꞌ.”
25Ne aYeso fe̱ be ba ye, “Yin áfunam ákak, akye̱ kuri aye̱ ne yin be yin i ta won dar i ni no̱o̱k yin katsak nike̱re̱ áner kuzarap Adakunom tá fe̱ e̱? 26Aser, sang ma aKiristi so̱ risam ike̱re̱ na cice̱r, a ta ra se̱ kuyiik wu aꞌa?” 27A san i ku taas ba ike̱re̱ i ta se kaye̱e̱r Afumung rife̱ Adakunom cei natoon rice wu, kum nizen aMusa ma nizen áfe kuzarap'e cei.
28Á tá fa be̱ bubarak be kaban kuwo̱p kaya ba tu ku be, ne aYeso nye kyo̱ndi wu tà wesek nasho̱o̱n. 29Á tú nye akusuk, ne á fe̱ be wu ye, “Kusuk, ko̱so̱ be yir kamok kunom n be̱ bubarak ku ta kpa.” Ayong a tseng mak be ba.
30Nizen aYeso tá se be iya naya mak be ba, a sok abiredi, a tá tonong Adakunom riye̱ rikan, ne a te̱se̱ng ne a san ku nyesek ba. 31Iyong ányisi ba ma karak, á tu ren, ne á ni ti zhau niba. 32Á naka risim ye, “Nizen iya a tá se be kufe̱ kanu be yir niren, ne a karak Áfumung rife̱ Adakunom, ma aye̱ yir shirim caang aꞌa?”
33Áner afa'me wor á dorok gbashak nong á tá be na aUshalima. Azong ne á se se̱ ámanzo kuso̱k be azining ame be áfe a ta se be ba naka tusung. 34Á sen fe̱ be ba ye, “I nye katsak! Agwo̱m Ágwo̱m n dorok ma an tonong rice wu nufe aSiman.” 35Ne áner afa ame ku tak ba ike̱ng i tu ku se̱ ba niren, be kuri iren iya ba tá kyem á ren ye a nye aYeso nizen a tá te̱se̱ng abiredi.
aYeso tonong rice wu nufe álimazhiri wu
(aMat 28.16-20; aMar 16.14-18; aYoh 20.19-23)
36Kum ne á ru fe̱ itak'e ne aYeso be rice wu wor a ti wuruk natite ba. A tá fe̱ be ba ye, “Kameneng riye̱ se mak be yin!”
37Iyong á te febek be inyim, á sor ye ike̱ng iya ba ta di nye itseng. 38Ayong aYeso fe̱ be ba ye, “Akye̱ sak yin daam yin e̱? Yin ti be yin agak riye̱ e̱? 39Di yin ibo̱k'i be atak'i. Mi na be rice mi! Ni ra yin ta fok yin, itseng be kuro̱m be ikup kyo̱ndi yin ta di yin mi ta be baꞌ.”
40A tá fa fe̱ anong, ne a ku tonong ba ibo̱k be atak wu. 41Gip be anong á ti no̱o̱k katsak baꞌ, kamok riye̱ rikan be azhing. Ayong a tú rip ba ye, “Yin be yin ike̱ng kuya aze aꞌa?” 42Iyong á tú no̱o̱k izos a tan reer. 43Ayong aYeso shan a tá ya, ne ba ye̱re̱k.
44Ne a fe̱ be ba ye, “Ike̱ng mi ta ka tak yin'ong, kum ne mi rusek be yin, ye ma a shining koakye i ta se ni izibir natoon'i kaye̱e̱r Itsi aMusa tá zibir be afumung áner kuzarap Adakunom ne aZabura.”
45Ayong a tú sak ba á ta ren ike̱ng afumung'e ta fe̱. 46Ne a bun a fe̱ be ba ye, “Ike̱ng i ta se ni izibir na ye. aKiristi'me tà so̱ risam, a tà ku, ne a dorok nure̱k katuk afe ataar. 47A ta taas ánerawe ninaro̱ ze̱r ze̱r itak natoon kushishing kuse be kure̱ng rine̱n kaye̱e̱r riyerek wu, A ta san'e na aUshalima. 48Yin ne i di yin ike̱re̱ na, yin ne i ta tas yin ákak. 49Mi tà ka tom yin ike̱ng Ada mi tá tsang a ni sak ye a tà ka no̱o̱k yin, amma sor yin kaye̱e̱r kuwo̱p na, ma a tà kis yin be kukyem kuya ku ta ne naza.”
A sok aYeso a tá tseng'e naza
(aMar 16.19-20)
50Ayong aYeso tú ko̱k ba kasho̱o̱n nong á tá wuruk niren bubarak be aBetani, ne a sok ibo̱k naza a tú ku te ba kuce̱. 51Kum ne an gang ku ka te ba kuce̱'me baꞌ, nong a ta kam be ba. A tú sok a tá tseng'e kaye̱e̱r kaza. 52Iyong á tu ya iben, ne á ku bun na aUshalima be riye̱ rikan dide̱ng. 53Álimazhiri'me yiir sor kaye̱e̱r agbang kutu kuya Adakunom iben'e koakye izen, ne á kerek Adakunom.
موجودہ انتخاب:
aLuka 24: izrNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc