Mateo 1
1
Yesu Kristo weku kpa
(Luka 3.23-38)
1Yesu Kristo, David biɔ, Abraham bi ɔ, fɔmi he womi ji nɛ ɔ nɛ. 2Abraham fɔ Isak, nɛ Isak fɔ Yakob, nɛ Yakob fɔ Yuda kɛ e nyɛmimɛ ɔmɛ. 3Yuda kɛ Tamar fɔ Perez kɛ Zera, nɛ Perez fɔ Hezron, nɛ Hezron fɔ Ram; 4nɛ Ram fɔ Aminadab, nɛ Aminadab fɔ Naasson, nɛ Naasson fɔ Salmon; 5nɛ Salmon kɛ Rahab fɔ Boaz, nɛ Boaz kɛ Rut fɔ Obed, nɛ Obed fɔ Isai; 6nɛ Isai fɔ matsɛ David enɛ matsɛ David kɛ Uria yo ɔ fɔ Salomo.
7Nɛ Salomo fɔ Rehabeam, nɛ Rehabeam fɔ Abia, nɛ Abia fɔ Asa, 8nɛ Asa fɔ Yehosafat, nɛ Yehosafat fɔ Yoram, nɛ Yoram fɔ Uzia; 9nɛ Uzia fɔ Yotam, nɛ Yotam fɔ Ahaɛ, nɛ Ahaɛ fɔ Hezekia; 10nɛ Hezekia fɔ Manase, nɛ Manase fɔ Amon, nɛ Amon fɔ Yosia; 11nɛ Yosia fɔ Yékonia kɛ e nyɛmimɛ ɔmɛ benɛ a ba ngɔ mɛ nyɔguɛ kɛ ho Babilon ya a.
12Benɛ a ngɔ mɛ nyɔguɛ kɛ ho Babilon ya se ɔ, Yokonia fɔ Sealtiel, nɛ Sealtiel fɔ Zerubabel; 13nɛ Zerubabel fɔ Abiud, nɛ Abiud fɔ Eliakim, nɛ Eliakim fɔ Azor; 14nɛ Azor fɔ Sadok, nɛ Sadok fɔ Akim, nɛ Akim fɔ Eliud; 15nɛ Eliud fɔ Eleazar, nɛ Eleazar fɔ Matan, nɛ Matan fɔ Yakob; 16nɛ Yakob fɔ Yosef nɛ ji Maria nɛ fɔ Yesu nɛ a tsɛɛ lɛ Kristo ɔ huno ɔ.
17Lɛɛ yi nɔhi tsuo nɛ je Abraham nɔ kɛ ba su David nɔ ɔ, yi nɔ nyɔngma kɛ eywiɛ; nɛ kɛ je David nɔ kɛ ba su benɛ a ngɔ mɛ nyɔguɛ kɛ ya Babilon ɔ, yi nɔ nyɔngma kɛ eywiɛ; nɛ kɛ je Babilon nyɔguɛ ngɔmi ɔ kɛ ba su Kristo nɔ ɔ, yi nɔ nyɔngma kɛ eywiɛ.
Yesu Kristo fɔmi
(Luka 2.1-7)
18Jeha nɛ ɔ, bɔ nɛ Yesu Kristo fɔmi ɔ ngɛ ji nɛ ɔ nɛ: e nyɛ Maria a, benɛ Yosef ya bi e si nɛ e na we nɛ e kpee lɛ ɔ, Maria na kaa e hɛɛ muklii kɛ je Mumi klɔuklɔu ɔ mi. 19Se Yosef, e huno ɔ, akɛnɛ dalɔ ji lɛ nɛ e hla we kaa e bɔ lɛ ahlua a, e susu kaa e maa ngmɛɛ e he kpoo. 20Se benɛ e ngɛ ni nɛ ɔmɛ kulaa a he susue ɔ, oʼɛ, Nyɔmtsɛ ɔ bɔfo je e he kpo ngɔ tsɔɔ lɛ ngɛ nlami mi, nɛ e de lɛ ke: “Yosef, David bi, koo ye o yo Maria a ngɔmi gbeye, se hɔ nɛ e hɛɛ nɛ ɔ ɔ, e je Mumi Klɔuklɔu ɔ mi; 21e ma fɔ binyumu, nɛ o maa wo lɛ biɛ ke Yesu, ejakaa e ma he e ma a yi wmai kɛ je a he yayami ɔmɛ a mi.”
22Se a pee enɛ ɔmɛ tsuo konɛ nɔ́ nɛ Nyɔmtsɛ ɔ de kɛ gu gbalɔ ɔ nɔ ɔ nɛ ba mi ke: 23“Oʼɛ, zangmayo ɔ ma na muklii, nɛ e ma fɔ binyumu, nɛ a maa wo lɛ biɛ ke: Yimanuel” (e sisi ji: “Mawu kɛ wɔ ngɛ”).
24Lɔ ɔ he ɔ, benɛ Yosef hɛ̃ tsɛ̃ kɛ je mahɛ ɔ mi ɔ, e pee bɔ nɛ Nyɔmtsɛ ɔ bɔfo ɔ de lɛ ɔ, nɛ e ngɔ e yo ɔ; 25se e li lɛ nyumu kɛ yo hluu kɛ ya su be nɛ e fɔ e bi tete ɔ, nɛ e wo lɛ biɛ ke Yesu.
موجودہ انتخاب:
Mateo 1: DAN77
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Dangme New Testament © United Bible Societies, 1977.