Lukas 15
15
Daut Jlikjnis vom veloarnet Schop un daut Jlikjnis von de veloarne Drachma
1Oba doa kjeemen noda no am aule Zollbeaumta un Sinda, am to hieren; 2un de Farisäa aus uk de Schreftjelieede grunsten un säden: Disa nemt Sinda aun un at met an.
3Oba hee räd to an dit Jlikjnis un säd: 4Woon Maun von junt, dee 100 Schop haft un eent von an veloaren haft, lat nich de 99 enne Wiltnis un jeit däm veloarnen no (hinjaraun), bot hee daut finjt? 5Un wan hee daut jefungen haft, lajcht hee daut met Freid opp siene Schulren; 6un wan hee nehus kjemt, roopt hee de Frind un de Nobasch toop, un sajcht to an: Freit junt met mie, dan ekj ha mien veloarnet Schop jefungen. 7Ekj saj junt: Sooväl mea Freid woat em Himmel sennen äwa eenen omdenkjenden (bekjieeden) Sinda, dee Busse deit, mea aus äwa 99 Jerajchte, dee daut omdenkjen (de Busse) nich brucken.
8Ooda waut vere Fru, dee 10 Drachma haft, wan see eene Drachma veloaren haft, stekjt nich eene Laump aun en fäacht daut Hus un sieekjt sorjfeltich, bot see dee finjt? 9Un wan see dee jefungen haft, roopt see de Frind un Nobasch toop un sajcht: Freit junt met mie, dan ekj ha de Drachma jefungen, dee ekj veloaren haud. 10Soo saj uk ekj junt, es Freid ver de Enjel Gottes äwa eenen omdenkjenden (bekjieeden) Sinda (ooda de Busse deit).
Daut Jlikjnis vom veloarnen Sän
11Oba hee säd: Een Maun haud twee Säns; 12un de jinjsta von an säd toom Voda: Voda, jeff mie daut Deel daut mie jehieet, vom Habungoot. Un hee deeld an daut Habungoot. 13Un no een poa Doag neem de jinjsta Sän aules toop un reisd wajch en een wiedet (framdet) Launt, un doa vekwosd hee sien Goot, endäm hee wilt läwd. 14Oba aus hee aules vebrukt haud, kjeem eene jewaultje Hungaschnoot äwa jan Launt, un hee funk aun Mangel to lieden. 15Un hee jinkj han un schloot sikj eenem de Birja von janem Launt aun, un dee schekjt am opp siene Akasch, Schwien to heeden. 16Un am velangd, sikj saut to äten von (met) de Schooten, dee de Schwien frauten; un kjeena jeef am dee. 17Oba en sikj jegonen, säd hee: Wooväl Doagesleena bie mienem Voda ha Äwafluss aun Broot, oba ekj kom hia om derch (fa) Hunga. 18Ekj well mie oppmoaken un no mien Voda gonen, un well to am sajen: Voda, ekj ha jesindicht jäajen dän Himmel un ver die, 19ekj sie nich mea wieet, dien Sän jenant to woaren; moak mie aus eenen von diene Doagesleena. 20Un hee muak sikj opp un jinkj no sienem Voda. Oba aus hee noch wiet auf wia, sach am sien Voda un späad (ennalich) Erboarmen, un rand, foll am om sienen Hauls un kust am. 21Oba de Sän säd to am: Voda, ekj ha jesindicht jäajen dän Himmel un ver die, ekj sie nich mea wieet, dien Sän jenant to woaren. 22Oba de Voda säd to siene Kjnajchts: Brinjt schwind daut baste Kjleet rut un trakjt am daut aun un jeft eenen Rinkj aun siene Haunt un Schoo aune Feet; 23un brinjt daut jemaste Kaulf un schlacht daut, un lot ons äten un froo sennen, 24dan disa mien Sän wia doot un es wada toom Läwen jekomen, hee wia veloaren un es jefungen worden. Un see fungen aun froo to sennen.
25Oba sien elsta Sän wia oppem Flekj; un aus hee kaum un dichta nom Hus kjeem, hieed hee Musikj un Daunzen. 26Un hee roopt eenen vonne Kjnajchts no sikj un fruach, waut es daut. 27Oba dee säd to am: Dien Brooda es jekomen, un dien Voda haft daut jemaste Kaulf jeschlacht, wiels hee am jesunt trigj jekjräajen haft. 28Oba hee wort doll un wull nich nengonen. Oba sien Voda kjeem rut un bedd am. 29Oba hee auntwuad un säd to sien Voda: Kjikj! Soo väle Joaren deen ekj die, un ekj ha niemols een Jeboot äwagonen; un mie hast du niemols een Bockje jejäft, doamet ekj met miene Frind lostich wia; 30oba aus disa dien Sän, dien Habungoot met Huaren oppjefräten haft, jekomen es, hast du am daut jemaste Kaulf jeschlacht. 31Oba hee (de Voda) säd to am: Kjint, du best emma bie mie, un aules daut Mienje es dient. 32Oba maun mott froo sennen un sikj freien; dan disa dien Brooda wia doot un es toom Läwen jekomen un veloaren un es jefungen worden.
موجودہ انتخاب:
Lukas 15: PBJHF
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© SW-Radio e.V.