ULÚKU 23
23
É le Ujísɔ̄si bī ga iyɔ̄bū Upáyílēti
(Umát 27.1-2,11-14; Umák 15.1-5; Ujɔ́n 18.28-38)
1Ɛjɛ̄ɛ̄jī igwú ā nyāŋjɛ anɔ́ɔ é le Ujísɔ̄si bī ga iyɔ̄bū Upáyílēti á. 2Abɔ́ɔ ā, é gbɔɔ́ ō kpɛlā ce ɔ́ bōōbū bá gē ka kahíníī, “Alɔ kwú ɔ̄cɛ ā abɔ̄ yɔ̄ gē yá kú ācɛ ɔlɛ́ alɔ kéē cīlɛ̄fú, yɔ̄ ī da uwá kéē híīī dɔlɛ́ lɛ ɔcɛ́nɛ̄hi, Usísa ŋ́. Ó klla ka ka anúɔ wɛ Ohɔ́nyɛtá, nōo wɛ ɔcɛ́ kú alɔ ā á. 3Upáyílēti da ɔ́ ɔ̄kā kahíníī, “Awɔ wɛ ɔcɛ́ kú ācɛ Ujíyu á nɛɛ?” Ujísɔ̄si tá ɔ̄ ohi kahíníī, “Awɔ ka ka ami á n.” 4Anɔ́ɔ Upáyílēti da aótrɛ̄yí kú ācogwɛ́ɛya ā mɛ́mla ójīla ā kahíníī, “Ń má ɔdōōbɔ̄bí dúúmā ō bī le ŋmó ɔ̄cɛ ā ɛpɔ̄bí ŋ́.” 5Amáŋ ācɛ ā labɔ̄ nū kwɔtū lɔfú fíyɛ́ yɔ̄ ī ka kahíníī, “Ɔdā nōó yɔ̄ ī nwū ācɛ ā gē yá kú ɔtū kú uwā kóō wu kllicō kéē cīlɛ̄fú ɛjɛ̄ɛ̄jī Ujudíya. Ó gbɔɔ́ ŋmá Ujudíya anɔ́ɔ abālɔbányā ó kē gā amānyā ɛɛ́.
Uhérɔ̄du da Ujísɔ̄si ɔ̄kā
6Eko nɛ̄ Upáyílēti le ɛ̄nyā pó ā, ó dɔɔ̄kā kahíníī, “Ɔ̄cɛ ā wɛ ɔ̄cɛ Ugálīli nɛɛ?” 7Eko nōó le jé ka Ujísɔ̄si ɔ́ɔ wɛ ɔ̄cɛ ajɛ nɛ̄ Uhérɔ̄du ī gbō ā, ó lɛ ɔ́ tū gé lɛ Uhérɔ̄du, nōo yɔ̄ Ujerúsālɛm eko ɔ́ɔmā ā. 8Eko nɛ̄ Uhérɔ̄du le Ujísɔ̄si má ā, ɔtū le he ɔ́ nɛ̄hi ohígbū koó húmáyī tíne kóō lɛ ɔ́ má eyī gbojī ɛɛ́. Ó yɔ̄ ī leyice kóō má Ujísɔ̄si cɛ́ɛ́ kóō lɛ ɔdā ō hídáagó ōhī yá ipéyī nū. 9Uhérɔ̄du da Ujísɔ̄si ɔ̄kā alɛwa, amáŋ Ujísɔ̄si í cíla odóódu ŋ́. 10Aótrɛ̄yí kú ācogwɛ́ɛya ā mɛ́mla aútíca kú íne bá abɔ́ɔ kpɔ́ gē kpɛ́lā ce Ujísɔ̄si lɔfú lɔfú. 11Uhérɔ̄du mɛ́mla aícɔ́ɔja kú nū yá Ujísɔ̄si okónu klla yá ɔ̄ ɛbɛ́ dúú. Anɔ́ɔ Uhérɔ̄du cɛ̄ lɛ aícɔ́ɔja kú nū lɛ awulú olɔhi kpó klá ɔ́ iyē, anɔ́ɔ é kwú ɔ́ ú kwúcē gé lɛ Upáyílēti á. 12Uhérɔ̄du mɛ́mla Upáyílēti nēe tɛtɛ wɛ olɛlā ā kwú pīya aóklóbīya ícíícɛ ɔ́ɔmā.
Upáyílēti le Ujísɔ̄si ŋmɛ́pɔbí kéē lɛ ɔ́ ŋmó
(Umát 27.15-26; Umák 15.6-15; Ujɔ́n 18.39—19.16)
13Upáyílēti lɛ aótrɛ̄yí kú ācogwɛ́ɛya, aótrɛ̄yí ā mɛ́mla ācɛ ā hīgwú tɔ̄hā, 14anɔ́ɔ ó da uwá kahíníī, “Aá bī ɔ̄cɛ ā gē um anɔ́ɔ aá ka kóō yɔ̄ ī wu ɔtū kú ācɛ klíico kéē cīlɛ̄fú. Abālɔbányā, n le ɔ̄kā da ɔ̄ ipéyī aá amānyā. Ń kē má ɔdōōbɔ̄bí dúú ō bī le ŋmó ɔ̄ ɛpɔ̄bí ipú ɔdā nɛ̄ aá kpó ce ɔ́ ā ŋ́. 15Uhérɔ̄du í kē ŋmó ɔ̄ ɛpɔ̄bí ŋ́ dúú, ohígbū ka anú je ɔ́ kwúcē gé lɛ alɔ á. Ó lɛ ɔdā dúú nɛ̄ ɔ̄cɛ ā yá nēe cíkā ō ŋmó ɔ̄ ŋ́. 16Ohígbū ɔ́ɔmā n géē cɛ̄ lɛ aícɔ́ɔja lɛ ɔ́ gɔ́ cɛ́ɛ́ n habɔ̄ ɔ̄ tá kóō nyɔ̄.” 17Eko kú ɛ̄cī ucɛ kú onyatá dóódu, Upáyílēti gē hɛ́ alagbá éyi tá lɛ uwá piíí.
18Amáŋ ɛjɛ̄ɛ̄jī ɛwa ā dɛ̄gba tɛ́ɛcɛ kahíníī, “Lɛ Ujísɔ̄si ŋmó, ká ā lɛ Ubárābasi hɛ́tá lɛ alɔ!” 19(Ubárābasi wɛ ɔ̄cɛ nēé tagbá ohígbū abɔ̄ nōó lɛ ipú ɔ̄cɛ nēé ŋmó ɛplá eko nɛ̄ ācɛ cīlɛ̄fú ipú igelī ā.) 20Upáyílēti tine kóō le Ujísɔ̄si hɛ́tá, anɔ́ɔ ó klla le ɛlā ka lɛ ācɛ ā kpɔ́ á. 21Amáŋ é dɛ̄gba kpɔ́ kahíníī, “Lɛ ɔ́ nyɔ́kpá! Lɛ ɔ́ nyɔ́kpá!” 22Upáyílēti klla le da uwá igbo ɔmɛtá kpɔ́ kahíníī, “Amáŋ ɔdōōbɔbí nyá nōó yá ā? Ń má ɔdā dúú nōó yá nōo cíkā kéē ŋmó ɔ̄ ní. N cɛ̄ lɛ uwá lɛ ɔ́ gɔ̄ cɛ́ɛ́ n lɛ ɔ́ hɛ́tá kóō nyɔ̄.” 23Amáŋ é bá yɔ̄ gē dɛ̄gba gbōmgbōm kéē lɛ Ujísɔ̄si nyɔ́kpá, anɔ́ɔ igbīhāajɛ ā ɛgba nēe dɛ̄ ā cɛ̄ lɛ uwá le yálé. 24Anɔ́ɔ Upáyílēti le ɛpɔ̄bí nēé tíne ā ŋmó Ujísɔ̄si á. 25Ó lɛ ɔ̄cɛ nēé tíne ā hɛ́tá lɛ uwá, ɔ̄cɛ nēe tāgbá ohígbū abɔ̄ nōó lɛ ipú ɔ̄cɛ nēé ŋmó eko nēé bá yɔ̄ ī cīlɛ̄fú ā. Anɔ́ɔ ó kwú Ujísɔ̄si ú tū uwā abɔ̄ kéē yá ɔdā nōo he uwá ɔtū mla anú á.
Aícɔ́ɔja kú Uróm le Ujísɔ̄si nyɔ́kpá
(Umát 27.32-44; Umák 15.21-32; Ujɔ́n 19.17-27)
26Aícɔ́ɔja kú Uróm le Ujísɔ̄si bī ŋmá agblɔ̄cɛ́ kú Upáyílēti, anɔ́ɔ abɔ̄ é bá yɔ̄ ī nyɔ̄ ā, é jīla ɔnyīlɔ kú Usayírini nōo ŋmá ɛhɔ̄ yɔ̄ ī ga igelī ā ɔwɛ. É le ɔ́ kwú abɔ̄fú, kwú ɔcɔ́nyɔ́kpá ú ce ɔ́ ɔkɔ kóō bī ɔ̄ tá Ujísɔ̄si ɔkwu. 27Ɛwa nɛ̄hi kú ācɛ kwúcē ɔ́. Ācɛnyā nēe bá yɔ̄ ī tɛ̄gíkwū nɛ̄hi ohígbū nū ā wɛ dúú. 28Ujísɔ̄si leyī pīya má uwā anɔ́ɔ ó kahíníī, “Ācɛnyā kú Ujerúsālɛm! Aá híīī jikwū ohígbū ŋ́, amáŋ aá jikwū ohígbū iyī aá mɛ́mla ayípɛ̄ ɔlɛ́ aá. 29Ohígbū ka, eko yɔ̄ ī wā nɛ̄ ācɛ géē ka kahíníī, ‘Ācɛnyā nēé ma ayí jéjéē ɛ́ɛ ŋ́, ɔgɔ̄ma nōó bī ɔyí jéjéē ɛ́ɛ́ ŋ́ mɛ́mla amɛ̄ nɛ̄ ɔyí í gwá jéjéē ɛ́ɛ́ ŋ́ ma gwéeyē!’ 30#Uhos 10.8; Mafú 6.16Eko ɔ́ɔmā géē wɛ eko nɛ̄ ācɛ géē ka ka eyī yá aá kú ɛfu kóō le wúla klá aá! Ká ɛfu kóō lɛ aá kpó tayínū ipú nū!’ 31Ohígbū ka ɔ́dāŋ kéē yá aɔ́dā ɛ́gɛ́nyā eko nɛ̄ ɔcí wɛ ɛ̄mɛ̄ɛ̄mɛ̄ kpɔ́ ɛ́ɛ́ mā, é géē yá ɔdā nōo bɔ̄bí fíyɛ́ ɛ̄nyā eko nɛ̄ ɔcí le ŋmókókó.”
32Aícɔ́ɔja ā klla le ācɛ ɔhá nēe yá ɔdōōbɔ̄bí bītá gɛɛcɛ kéē géē lɛ uwá kpó ŋmó mla Ujísɔ̄si. 33Eko nēé gā ɛga nēé hi ka “Ákōklō ɛyí” ā, aícɔ́ɔja kú Uróm le Ujísɔ̄si mɛ́mla aúwī ɛpa ā nyɔ́kpá abɔ́ɔ. Uwī éyi yɔ̄ abɔ̄lɔ́ná kú nū, ɔhá kē yɔ̄ abɔ̄lúfīyē kú nū. 34#Aíjē 22.18Ujísɔ̄si kahíníī, “Ádā um, kwú yá ācɛ nēe bá nyā ɛhi. É jé ɔdā nēé bá yɔ̄ ī yá ā ŋ́.” 35#Aíjē 22.7Ācɛ háyi bá gē cokē, amáŋ aótrɛ̄yí ā bá gē yá ɔ́ okónu kahíníī, “Ó nya ācɛ ɔhá tá, kóō lɛ iyī nū nyatá ɔ́dāŋ ka anú wɛ Ohɔ́nyɛtá nɛ̄ Ɔwɔicō fu á!” 36#Aíjē 69.21Aícɔ́ɔja ā kōō yá ɔ̄ okónu dúú. É le tá ɛgiyí nū le ejé omákáká bī gé lɛ ɔ́, 37anɔ́ɔ é da ɔ́ kahíníī, “Le iyī uwɔ nyatá ɔ́dāŋ ka awɔ wɛ ɔcɛ́ kú ācɛ Ujíyu á,” 38É lɛ ɔkpá tá bá ɔcɔ́nyɔ́kpá kú nū kahíníī, “Ɛ̄nyā wɛ ɔcɛ́ kú ācɛ Ujíyu á.”
39Éyi kú ācɛ o yá ɔdōōbɔ̄bí nēé nyɔ́kpá mla anú ā cá ɔ̄ ɛcá kahíníī, “Ó wɛ awɔ wɛ Ohɔ́nyɛtá ā ŋ́ nɛɛ? Lɛ iyī uwɔ mla alɔ nyatá!” 40Ɔ̄cɛ ɔmpa ā, le ɛgba dɛ̄ tū ɔ̄ kahíníī, “Á yúúfi Ɔwɔicō ŋ́ nɛɛ? É ŋmó uwɔ ɛdɔ ɛpɔ̄bí ékpó mla anú. 41Ákú alɔ ā le kpaakpa, ohígbū ka ɔdā nōo cíkā lɛ ɔdā nɛ̄ alɔ yá ā nɛ̄ alɔ yɔ̄ ī mīyɛ yɔ̄ á. Amáŋ anú ā í yá ɔdōōbɔ̄bí dúúmā ŋ́.” 42Anɔ́ɔ ó da Ujísɔ̄si kahíníī, “Gbɛlá kwú um, Ujísɔ̄si, eko nɛ̄ a géē wā í cɔcɛ́ ā!” 43Ujísɔ̄si da ɔ́ kahíníī, “N cokónu ga awɔ ka ícɛ nyā a géē yɔ̄ ɔkpáncō mla um.”
Ujísɔ̄si gekwú ɛyí ɔ̄cɔ́nyɔ́kpá
(Umát 27.45-56; Umák 15.33-41; Ujɔ́n 19.28-30)
44 #
Oyɛb 26.31-33
Ó wɛ ɛpla oje igwɛ́ɛpa kú ɔlɛ́ɛnɔ ɛ́ɛ́ nɛ̄ ɛnɔ í fíyajɛ gɛ ŋ́ má. Anɔ́ɔ ajɛ kwú dobū kpímm klá odúúdú ɛga dóódu jāā gbó oje ɛtá kú ɔlɛ́ɛnɔ. 45Anɔ́ɔ īlī nōo hɛ́ Agblīihɔ-nɛ̄hi ā igbó ā kwu híla ŋmá icō wāajɛ á. 46#Aíjē 31.5Ujísɔ̄si je ɔkɔ gicō lɛ ɛgba dɛ̄, “Ádā um, n kwú odo kú um tá uwɔ abɔ̄!” Ó le ɛ̄nyā ka anɔ́ɔ ó gekwú á. 47Otrɛ̄yí kú aícɔ́ɔja kú Uróm ā le ɔdā nōo yá ā mā, anɔ́ɔ ó cɛ̄tra Ɔwɔicō kahíníī, “Ɔkwɛ̄yi nɛ, ɔ̄cɛ ā wɛ ɔ̄cɛ okpaakpa.” 48Eko nɛ̄ ācɛ nēe jīla bá gē cokē ā le ɔdā nōo yá ā má ā, é kwúcē ga ɔlɛ́ yɔ̄ gē tɛgíkwū. 49#Ulúk 8.2,3Ɛjɛ̄ɛ̄jī ācɛ nēe jé Ujísɔ̄si lɔɔlɔhi ā, mɛ́mla ācɛnyā nēe kwúcē ɔ̄ ŋmá Ugálīli ā, háyi ɛcɛɛcɛ kéē má ɔdā nōo yɔ̄ ī yá ā.
Ujósɛ̄fu kú Arimatéya le Ujísɔ̄si nyi
(Umát 27.57-61; Umák 15.42-47; Ujɔ́n 19.38-42)
50Ó lɛ ɔ̄cɛ éyi nēé í hī Ujósɛ̄fu, ó ŋmá Arimatéya, igelī éyi kú Ujudíya. Ó wɛ ɔ̄cɛ olɔhi nēé gē lɛ ojīlīmā ce ɔ́ nɛ̄hi. Ó yɔ̄ ī gbēyī eko nɛ̄ Ɔwɔicō í wā ī lé ɔcɛ́ ipú ɛcɛ nyā ā. 51Náána nōó wɛ éyi kú ígwu kú aótrɛ̄yí kú ācɛ ā, ó cɛ̄ tɔ̄há mla ɔdā nēé ŋmótu klla lɛ ɔ́ yá gaajɛ ā ŋ́. 52Ó le tá iyɔ̄bu Upáyílēti gaá ba ɔ́ kóō kwú okwū kú Ujísɔ̄si ú lɛ anúɔ. 53Ó kwú okwū kú Ujísɔ̄si ú wāajɛ ŋmá ɛyí ɔcɔ́nyɔ́kpá, lɛ ɔ́ gbo mla igbogbo kú ahilíki, anɔ́ɔ ó kwú ɔ̄ ú nyɔ̄ í gwutá ipú unóji nēé bū tá ipú ápátɛ́cɔ̄ o lɔfú nɛ̄hi nēé lɛ okwū dúú tá ipú nū jéjéē ɛ́ɛ́ ŋ́ mā. 54Ó wɛ ɛ̄cī kú otutū, ɛ̄cī Usábāti ā kē gáā gbɔɔ́ ɛɛ́. 55Ācɛnyā nēe kwúcē Ujísɔ̄si ŋmá Ugálīli ā le yɛ mla Ujósɛ̄fu gaá le únóji ā má mla ɛ́gɛ́nɛ̄ é je okwū kú Ujísɔ̄si gwutá anú lɛ ā ā. 56#Oyɛb 20.10; Obla 5.14Anɔ́ɔ é kwúcē ga ɔlɛ́ nyɔ̄ gaá le anɔ̄ mɛ́mla ɔdā okpócu o nya okwū ā iyē tútū á. Ɛ̄cī usábāti ā, é mlɛ́nyɔ̄ ɛ́gɛ́nɛ̄ íne ā ka lɛ ā.
موجودہ انتخاب:
ULÚKU 23: IFBCL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in