Ịjọọnụ 10
10
Ụhịrẹyị oseratẹmẹ
1Ijeesu ka, “Ịzẹyịza m maa kà a wụ nị, ọza ẹnẹ ẹ̀ yị zị oze obooro ngụ irehi ịzị aā kụ́ atẹmẹ hi, dị ọ na zị oze ọsa hịrẹ ngụ eehi nị, oyi obooro ọ́za ọnọọ vị nị. 2Ọza ana àa zị oze obooro ngụ irehi atẹmẹ, ọza ọnọọ ọ vị ọza ana aa tẹsị atẹmẹ obooro nị. 3Ẹngụ ọza ọnọọ, ọza ene ee sere oze vaa na oze yọ. Atẹmẹ nịnị vaa wụ́ ọngwẹ anị, ọ màa hị́ wa ịrẹha, dị aa kụ́ waa nọ ẹhẹ. 4Ọ̀ọ raà kụ́ wa hi ẹhẹ, dị ọ tụ́ ọvịdị ẹnịnị, dị atẹmẹ anị aa dụ ọọ ịrẹma, agụvị ka ệ yẹ ọngwẹ anị. 5Àa vị ọzọgaa yọ, atẹmẹ anị ẹ yị vaa zẹẹ ka ẹnị ẹ̀ saasa a na, ama vi eyee zwee yọ nị, agụvị ka ẹnịnị ẹ yị yẹ ọngwẹ ọzọga.”
6Ijeesu ô che ụhịrẹyị ọnọọ yị aza, ama ẹ yị yẹ ịsị aa sịị kà a yị ẹnị.
Iruvo ụhịrẹyị ọnọọ
7Dị Ijeesu va kà a yị wa ka, “Ịzẹyịza m maa kà a wụ nị, ẹmị ọnọnị ọ vị oze irehi atẹmẹ nị. 8Avaba aza ana vọ ana dọ ọvịdị amị vẹ, vị oyi obooro. Ama atẹmẹ nịnị ẹ yị sị ụtọ pe ịrẹyị ẹnịnị. 9Ẹmị ọnọnị ọ vị oze obooro nị. Ọza ana àa zị oze obooro ọnọọ ngụ eehi, ọ vaa há. Ọ vaa ngụ eehi, dị aa jịnẹ, di ee re ịsa ana vaa sị ẹngụ anịị hunẹnẹ. 10Oyi vị anaā vẹ kẹnẹ ka oni ò ve yi ịsa, dị ọnị ọ̀ wụ̀ ọza, di oni ò re du ịsa ha. Àa vị ẹmịị yọ, ẹmị vị ana vẹ ẹhẹ ka ma sị ẹhẹ obooro-obooro yị aza, ana ahịka ọza o yi zụ sị irenu juwe anị.
11“Ẹmị ọnọnị ọ vị ọza anaā tẹsị atẹmẹ ẹtẹẹtẹrẹ nị. Ọza anaā tẹsị atẹmẹ anị ẹtẹẹtẹrẹ vị anaā sịị ụhwẹ anịị tịtẹẹ yị atẹmẹ anị. 12Àa vị ọza ana a dọ ka òo sere atẹmẹ kẹnẹ yọ nị, ẹ yị vị ọza anaā tẹsị atẹmẹ ọ vị, ẹ yị rẹ vị ọnị ụvọta ọ nyị atẹmẹ ẹnẹẹ. Agụvị avọọ òo re ka akatapooro aa vẹ, dị ọ navọ atẹmẹ hi ẹtẹ, di o si zwe. Dị akatapooro ọnị kụkụ za atẹmẹ ẹnyị, dị ọ gara ana vọ và ha. 13Ọza ana a vavọọ dọ ka òo sere atẹmẹ vị eneē zwe, agụvị ka vị a dọ ọ ụkọrọ kẹnẹ nị; ẹ yị nyị ịzị ịrẹyị atẹmẹ ẹnẹẹ gẹ ẹ. 14#Imt 11.27; Irk 10.22Ama ẹmị ụvọta ọ vị ọza anaā tẹsị atẹmẹ ẹtẹẹtẹrẹ nị. Mâ yẹ aza amị, dị aza amị ẹnị rẹ yẹ ẹmị nị, 15anka Áda amị mẹ̀ yẹ mị, dị ẹmị rẹ yẹ Ada amị. Mị vaa sị ụhwẹ amịị tịtẹẹ yị atẹmẹ amị. 16Ma rẹ nyị atẹmẹ ọsa, ana ahịka e yi hi ini irehi atẹmẹ ọnọnị. Â nyị ka ma kụ́ wa vẹ, ẹnị rẹ vaa wụ́ ọngwẹ amị. Ọnya avaba ẹnịnị kụkụ vaa vị nị, ọza ịnya ọ vaa tẹsị ẹnịnị nị. 17Ada amị ô sì ịrẹyị amị, agụvị ka ẹmị ụvọta ọ navọ ụhwẹ amị tịtẹ nị, ka ma rẹ varẹma sị ọọ. 18Ẹ yị vị ọza aa dọ mị ụhwẹ, ẹmị ụvọta ọ hụrẹ ẹ ụvọ nị. Mâ nyị ụkata ọyịnavọ ụhwẹ amị tịtẹ, ma rẹ nyị ụkata ọyị sị ọọ varẹma. Ọda ana Ada amị mẹ mị ọ vị ọnọọ nị.”
19Aniju nịnị ẹ rẹ kụ́ gà hi agụvị ịrẹyị ẹnẹẹ. 20Aza ọrụrụ-ọrụrụ ẹnịnị aa kà a ka, “Ộ nyị ụhwẹ echu, vi ee che uvu nị! Sị ẹ vẹ di u wee batọ ịrẹyị anị nịnị?” 21Dị aza ẹnyị ẹnị raa kà a ka, “Wáá yẹ ka ẹ yị vị ịrẹyị ọza ana nyị ụhwẹ echu aa kà aanị! Echu ọ́ọ́ zụ há ogweyi eyi anị?”
Ọdọvịdị Aniju nịnị ê yi Ijeesu
22Ụmẹ o si tù ẹnẹ ẹ sịị̄ tamayị ụmẹ ene e sị sị irehi Ohomorihi tụ́ irenyi yọ. Ijerusarẹmị ẹ yàā rị eche ọnọọ nị. Ụmẹ ọnọọ vị ụmẹ ọgụ. 23Dị Ijeesu aa zị ụsẹ ini irehi Ohomorihi ájẹhẹ Isoromọnị nị. 24Dị Aniju nịnị wara gụ kara a, dị ẹ ka, “Ịzị u vị ene ee sì ka yaa jẹẹ ne tù? Àa vị ẹwa vị Ikirisiti ọnọọ nị, wẹ rẹ̀ kụkụ kà a yị gedebee!” 25Dị Ijeesu tụ́ ohi, dị ọ ka, “Mâ vịdị sị ọọ kà a wụ nịnị, ama we yi sì ka wa dọ wụ́ nịnị. Ụkọrọ ẹbanyị-ẹbanyị ọnị mị hyakụ aa sị ịrẹha Ada amịị mẹ, vị onivenu ịrẹyị amị. 26Ama wẹ yị zẹẹ ka wa dọ wụ́ nịnị, agụvị ka wẹ yị vị atẹmẹ amị nịnị, anka m mẹ̀ vịdị kà a wụ nịnị. 27Atẹmẹ amị vị anaā wụ́ ọngwẹ amị, mâ yẹ wa, ẹnịnịị̄ dụ mị ịrẹma. 28Maa mẹ ka ẹnịnị ẹ̀ yàra pooro zịna-zịna; e mē vene vu ẹtẹ paa, ẹ yị nyị ọza ana rẹ nyẹngụ dọ wa hụrẹ mị ụvọ. 29Ada amị ana kụ́ wa chire mi ụvọ, o huna avaba ọza nị; ẹ yị nyị ọza ana zụ dọ wa hụrẹ Ada amị ụvọ. 30Ẹmịrị Ada amị vị ọnya.”
31Dị Aniju nịnị rẹ raà kụ́ ụvọ kụ́ ịrẹta ka eni è ne e hi ọọ nị. 32Dị Ijeesu ka, “Ma raà mẹ̀ ụkọrọ ozoza-ozoza éyi awụ nịnị ana Ada amị sị ụkata mị ka ma mẹ. Ye re ana a vọrọ ka we si ne mi ịrẹta ịnị ụkọrọ ẹnẹẹ nịnị?” 33#Ire 24.16Dị Aniju nịnị tụ́ ọọ ohi, dị ẹ ka, “Yẹ yị hụ agụvị ụkọrọ ozoza ọnyọọnyị ne wu ịrẹta. Ama yee sì ka ye ne wu ịrẹta, agụvị ka waa kà ịrẹyị odivii hi Ohomorihi. Ọza rị ẹyị ị́rẹsụ kẹnẹ ụ vị nị, ama wee sì ka wa sị ẹngụ awụ vara Ohomorihi.”
34 #
Ahẹ 82.6
Dị Ijeesu ka, “Â chẹrẹ tụ́ ịnị ọda awụ nịnị ka Ohomorihi ka: ‘Ẹwụ nịnị vị ene véné Ohomorihi.’ 35Yâ yẹ ka ọza ọ yị zụ vara ịrẹyị ini Iwe Ohomorihi pooro. Aza oni Ohomorihi kà ịrẹyị Ohomorihii yị, Ohomorihi ộ kà a ka ê véné Ohomorihi. 36Àa vị ẹmịị yọ, Ada amị ọ nyị mị, dị ọ tụ́ mị vẹ ẹhẹ nị. Màa va kà a ka Ozi Ohomorihi mị vị nị, dị ụ ka m maa kà ịrẹyị odivii hi Ohomorihi nịnị nịị? 37Mẹ̀ yị mẹ̀ ụkọrọ ana Ada amị ka ma mẹ, asị ụ dọ mị wụ́ nịnị! 38Ama àa vị ụkọrọ Ada amị m maa mẹ̀ nị, wàa daka ka wẹ yị yaanị dọ mị wụ́ nịnị, â vọrọ ka wa dọ mị wụ́ nịnị agụvị ụkọrọ ẹbanyị-ẹbanyị ọnị maa mẹ̀. Ọnị ọ vaa mẹ ka wa yẹ pooro nịnị ka ẹmịrị Ada amị vị ọnya, ẹmịrị Ada amị ọ rẹ vabẹ.”
39Di e re yee sì ka ẹnị ẹ̀ za Ijeesu nị, ama dị ọ sị tụ̀ wa ụvọ nị. 40#Ịjọ 1.28Dị Ijeesu rẹ varẹma nọ akẹnẹ Okuha Ịjọdanị, ịzị Ịjọọnụ vịdị yà aa mẹ ọyịhwenyii yị aza, dị ọ na yà ịzọọ nị. 41Dị aza ọrụrụ-ọrụrụ rẹ ká a nọ ịzọọ nị. Dị ẹ ka, “Ịjọọnụ ọ yị mẹ̀ ụkọrọ apọtẹrẹwa, ama avaba ịrẹyị ọnị ọnọrụ ọnọnị kà vị ịzẹyịza.” 42Dị aza ọrụrụ-ọrụrụ sị ayị tụra a ịzọọ nị.
موجودہ انتخاب:
Ịjọọnụ 10: EBTP
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ebira First Bible © Bible Society of Nigeria, 2014.