Ịjọọnụ 16

16
1“M maanị aa kà ịrẹyị ọnọnịị wụ nịnị, agụvị asị ụ na jị mị ịrẹka nịnị. 2Ẹ vaa dụ wụ nịnịị jịnẹẹ hụụnị irehi Ohomorihi. Mị ka ụmẹ hyakụ aa vẹ, dị aza ana aa wụ wụ nịnị, ro o ka vị ẹnị aa mẹ̀ ịsa ozozaa yị Ohomorihi nị. 3Ẹ vavọọ vaa mẹ wụ nịnị, agụvị ka ẹnịnị ẹ yị yẹ Ada amị, avọọ ẹnịnị ẹ̀ yị mẹ̀ rẹ yẹ mị nị. 4Mâ maanị jintu sị ọọ kà a wụ nịnị, agụvị ịjị ụmẹ ọnọọ òo si tù, wa tamayị nịnị ka mâ vịdị sị ọọ kà a wụ nịnị. Mẹ yị vịdị kà ịrẹyị ẹnịnịị wụ nịnị hụrẹ ụmọrụmọ, agụvị ka mị yị yà ịdị awụ nịnị.”
Ịsa ọnị Ụhwẹ Ọnịnị vaa mẹ
5“Ama booro aanị, maa nọ ịdị Ọza ana tụ́ mị vẹ ẹhẹ. Ẹ yị va nyị ọza awụ nịnị ana họ̀ mị ka ịzị maa nọ. 6M mẹ̀ va aa kà a wụ nịnị aanị, ayị awụ nịnị ọ va ta du. 7Ama dị ma kà ịzẹyịza wụ nịnị ka màa na, ọ dahi yị wụ nịnị hu nị. Mẹ̀ yị na, Ohunẹnọzayị ọnọọ ọ yị vaa vẹ ịdị awụ nịnị. Màa zị na, dị mị tụ́ ọọ ve tù wu nịnị. 8Ịjị Ohunẹnọzayị ọnọọ ọ̀ọ vẹ, ọ vaa sị zụ̀ anẹhẹ ka ệ rị ịvị, dị ọ rẹ mẹ ka ẹ̀ yẹ ịrẹyịzẹyịza beri ọkarẹyị Ohomorihi. 9Ẹnịnị ệ rị ịvị, agụvị ka ẹnịnị ẹ yị sị ayị tụra mị. 10Ohunẹnọzayị ọnọọ rẹ vaa sị zụ̀ wa ịsị ẹ vị ịrẹyịzẹyịza, agụvị ka maa nọ ịdị Ada amị, we yi kuku re mi nịnị. 11Ọ rẹ vaa sịị zụ̀ ịsị ẹ vị ọkarẹyị Ohomorihi, agụvị ka Ohomorihi ọ sị ịvị jị yị ohinọyị ẹhẹ ọnọnị da.
12“Mị yaanị yị nyị ịrẹyị ọrụrụ-ọrụrụ ana a vọrọ ka ma kà wụ nịnị; ama wẹ yị kụkụ zụ za a nịnị booro aanị. 13Ama ịhị Ụhwẹ Ọnịnị anaā sịị ịzẹyịzaa zụ̀, ọ̀ọ vẹ, ọ vaa mẹ ka wa yẹ avaba ịzẹyịza nịnị. Ọ yị vaa dà ẹ́ẹngụ anịị kà; ịrẹyị ọnọ ọ̀ọ wụ́ kẹnẹ, ọ vaa kà nị. Ọ rẹ vaa sịị zụ̀ wụ nịnị ịsa ana aa vẹ ụhwọọ. 14Ọ vaa sị igirimaa yị mị, agụvị ka ịrẹyị amị ọ vaa kà a wụ nịnị nị. 15Avaba ịsị Ada anị ọ̀ọ nyị vị áamị; agụvị avọọ mị kà a ka ịrẹyị amị ọ vaa kà a wụ nịnị nị.”
Ayodu ọnịrị ịrajẹ
16Dị Ijeesu rẹ ka, “Òo kù chee, we yi kuku vee re mi nịnị; òo re nee kù chee, di u ree re mi nịnị.” 17Dị ezirẹma anị ẹnyị aa họ̀ ẹngụ ka, “Ẹngụ ịrẹyị ịsị aa kà a yị aanị kẹ, ‘Òo kù chee, we yi kuku vee re mi nịnị; òo re kù chee, u vee re mi nịnị.’ Ọ rẹ ka, ‘agụvị ka ọnị aa nọ ịdị Ada anị.’ ” 18Dị ẹ ka, “Sị ẹ vị iruvo òo kù chee ọnọọ? Yẹ yị yẹ ịsị aa kà ịrẹyị anị o.” 19Ijeesu ọ sị yẹ ka eyee sì ka ẹnị ẹ̀ họ̀ ọnị use ịrẹyị. Dị ọ kà a yị wa ka, “Mị ka òo kù chee, we yi kuku vee re mi nịnị, òo re ne kù chee, u re vee re mi nịnị. Ịsị ụ waa họ̀ ẹngụ awụ nịnị use anị ọ́ọ́ vị ọnọọ nị? 20Ịzẹyịza m maa kà a wụ nịnị nị, u vee nowu, di u wee sụ ùnè nịnị, ama dị anẹhẹ ẹnị aa jẹ. Ayị awụ nịnị vee du, ama ayodu awụ nịnị vaa vara ayohine. 21Ọnyẹnẹẹ àaa barẹẹ, ayị anị vị ene vee du, agụvị ka ụmẹ ụyọrị anị o si tù. Ama ọ̀ọ sị ozi anị ma, dị ayị ụyọrị anị kuku hi ọ, agụvị ka ọ kụkụ aa jẹ ka ọnị ọ sị ozi ma va ngụ ịnị ẹhẹ. 22Ayị awụ nịnị o si du booro aanị, ama mị vanaa vẹ vee hee wu nịnị; ịjọnọọ ayị awụ nịnị vee hine ẹtẹẹtẹrẹ. Ẹ yị nyị ọza ana va zụụ dọ wụ nịnị ẹngụ ayohine ọnọọ.
23“Ịhị ẹkụhị ọnọọ òo si tù, wẹ yị vaa họ̀ mị use ịsọnyị-ịsọnyị nịnị. Ịzẹyịza m maa kà a wụ nị, ịsa tụra ịsa ọnị ụ wàa họ̀ Ada amị use ịnị ịrẹha amị nịnị, ọ vaa sịị yị wụ nịnị. 24Pooro ve tù ọyaanị, ẹ̀ yị nyị ịsị u họ̀ use ịnị ịrẹha amị nịnị da. Huse ịsa nịnị, u vee ree dọ nịnị! Ọnọọ ọ vaa mẹ ka ịrajẹ awụ nịnị ọ̀ zụ gụ nị.”
Ijeesu ọ sị ẹbẹẹba ẹhẹ nyị
25Dị Ijeesu ka, “Ịrẹyị ẹnẹnị vị ọnị mị vịdị aa sị ụhịrẹyịị kà a wụ nịnị. Ama ụmẹ aa vẹ, ọnị mẹ̀ yị kụkụ vaa sị ụhịrẹyịị kà ịrẹyịị wụ nịnị. Mị kụkụ vaa kà ịrẹyị Ada amịị zụ̀ wụ nịnị chapaa kẹnẹ nị. 26Ịnị ịhị ọnọọ, u vee họ̀ use ịsa hụụnị ụvọ Ada amị ịnị ịrẹha amị nịnị. Mẹ yị kà a ka ẹma vaa dá ịpẹẹ yị Ada amị agụvị awụ nịnị nị, oo! 27Ada amị ọnị ụvọta ô sì ịrẹyị awụ nịnị, agụvị ka wê sì ịrẹyị amị nịnị, dị ụ rẹ dọ wụ́ nịnị ka ịdị Ohomorihi mị hụrẹ vẹ nị. 28Ịzẹyịza, ịdị Ada amị mị hụrẹ dị mị vẹ ịnị ẹhẹ nị. Mị raa hụụnị ẹhẹ, dị ma nọ ịdị Ada amị.”
29Dị ezirẹma anị kà a yọ ka, “Ịhịịn, wee re ụ mẹ̀ kụkụ aa kà ịrẹyị chapaa, dị ụ wẹ̀ yị kụkụ sị ụhịrẹyị kà ịrẹyị. 30Ya sị yẹ booro aanị ka wâ yẹ avaba ịsa, ẹ yị kụkụ nyị ka ọza ọ̀ọ họ̀ wụ use ịrẹyị. Ọsọnị ộ mẹ̀ ka ya dọ wụ́ ka ịdị Ohomorihi ụ hụrẹ vẹ nị.” 31Dị Ijeesu tụ́ wa ohi ka, “Aanịka vụ ụ yị va dọ wụ́ nịnị aanị nị? 32Ụmẹ aa vẹ, ộ hyakụ si tù booro aanị, ana a vaa gara wụ nịnịị hi, dị ọzọza zị nọ eehi anị, dị ụ kụkụ navọ ẹmị ịnya nịnị. Ama mẹ yị vị ẹmị ịnya, agụvị ka Ada amị ộ yà pe mi. 33Maa kà ịsa ẹnẹnịị wụ nịnị, agụvị dị ẹmịrị ẹwụ nịnị ọ̀ zụ vị ọnya, dị ụ wa nyị ẹngwọọrọ nịnị. Ụ vaa rị ụya nịnị ẹtẹẹtẹrẹ ịnị ẹhẹ, ama ngwara eyi hi nịnị, agụvị ka ma sị ẹbẹẹba ẹhẹ nyị!”

موجودہ انتخاب:

Ịjọọnụ 16: EBTP

سرخی

شئیر

کاپی

None

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in