Ịjọọnụ 19
19
 mẹ̀ ọkarẹyị ka a kanyị Ijeesu za ọchapavahị
1Di Ipayireti ka à za Ijeesu, di è tụ́ ọọ ịjapa nị. 2Dị isoja nịnị ẹnẹẹ mẹ ọkẹkẹrẹkụ ikeyi-ikeyi, di e si kú Ijeesu ịrẹsụ nị. Dị ẹ rẹ sị awuru ohinọyị ovivi chire e nị. 3Dị ẹyaa kụ́ ọọ ka, “Taarụ, ohinọyị Aniju nịnị.” Dị ẹyaa nya a arụhwọtọ nị.
4Di Ipayireti rẹ jịnẹ ne tù aza ẹnẹẹ nị. Dị ọ kà a yị wa ka, “Re, maa sị ọọ jịnẹẹ vee tù wu nịnị, dị ụ wa yẹ nịnị ka me yi re ịvị ịnị ụvọ anị.” 5Dị Ijeesu jịnẹ vẹ, di o kú ọkẹkẹrẹkụ ikeyi-ikeyi ọnọọ, di o re chire awuru ohinọyị ovivi ọnọọ nị. Dị Ipayireti kà a yị aza ẹnẹẹ ka, “Wee re nịnị, ọnọrụ ọnọọ yọ!” 6Ịjị ohirẹsụ ẹbanyị irehi Ohomorihi ọnịrị iporisi irehi Ohomorihi ree, dị ẹ ka, “Kanyị ọọ za apavahị! Kanyị ọọ za apavahị!” Dị Ipayireti ka, “Ẹwụ nịnị ụvọta ọ̀ sị ọọ, dụ wa na kanyị ọọ za apavahị nịnị, agụvị ka ẹ yị nị ịvị ene emi re ịnị ụvọ anị.” 7Dị Aniju nịnị tụ́ ọọ ohi, dị ẹ ka, “Yâ nyị ọda ọnya. Anka ọda ayị ọnọọ, vị a vọrọ ka ò sú nị, agụvị ka aa hị́ ẹngụ anị Ozi Ohomorihi nị.”
8Ịjị Ipayireti vavọọ wụ́ ịrẹyị ọnọọ, angwa o re hí ọọ hu avọọ. 9Dị ọ rẹ varẹma nọ ini eehi, dị ọ na họ̀ Ijeesu ka ịzị ọ hụrẹ vẹ nị. Ama Ijeesu o yi tụ́ ọ ohi. 10Dị Ipayireti va kà a yọ ka, “We yi tụ́ mi ohi ịrẹyịị? Wáá yẹ ka mâ nyị ọda ọyịhụrẹ wụ ụvọ, dị mị rẹ nyị ọda ọyịkanyị wụ za apavahị nị?” 11Dị Ijeesu ka, “Wẹ yị yaanị nyị ụkata ọyịmẹ̀ mị ịsọnyị-ịsọnyị, ẹ̀ yị vị oni Ohomorihi sị ụkata ọnọọ yị wụ. Ọza ana sị mị chire wu ụvọ, ịvị anị banyị hu nị.” 12Ípayireti mẹ̀ maanị wụ́, di o kuku ee sì ka ọnị ọ̀ hụrẹ Ijeesu ụvọ nị. Ama dị Aniju nịnị nowu tụ́ ẹba, dị ẹ ka, “Wàa hụrẹ ọnọrụ ọnọnị ụvọ, wẹ yị kụkụ vị ọta ohinọyị Aniroomi. Ọza ana àa sị ẹngụ anị vị ohinọyị, ọ sị kwẹẹtẹ tù ohinọyị Aniroomi.”
13Ịjị Ipayireti vavọọ wụ́ ịrẹyị ọnọọ, dị ọ sị Ijeesu jịnẹ vẹ nị. Dị ọ va yaayịtẹ aha ọkarẹyị anị nị. Aā hị́ ịzọọ “Oze ịrẹta”, ama Igabata Ániheberuū hị́ ọọ nị. 14Ụmẹ agogo ịhịnọnyị ẹnẹnẹ ọ vị ịhị ọnọọ nị. Ịhị ọnọọ ẹ́nịnị siī tenyi ẹngụ zí Eche Ọyịparahu nị. Dị Ipayireti kà a yị Aniju nịnị ka, “Ohinọyị awụ nịnị yọ!” 15Di e nowu zẹtẹ, dị ẹ ka, “Sị ọọ hụrẹ oze! Sị ọọ hụrẹ oze! Na kanyị ọọ za apavahị!” Dị Ipayireti họ̀ wa ka, “Ma kanyị ohinọyị awụ nịnị za apavahịị?” Di ohirẹsụ ẹbanyị irehi Ohomorihi tụ́ ohi, dị ẹ ka, “Yẹ yị nyị ohinọyị ọsa, ẹ̀ yị vị ohinọyị Aniroomi.” 16Dị Ipayireti sị Ijeesu chire wa ụvọ ka à na kanyị ọ za apavahị nị. Dị ẹ sị Ijeesu, dị ẹyaa na nị.
 kanyị Ijeesu za apavahị
(Imt 27.32-44; Ịmk 15.21-32; Irk 23.26-43)
17Dị Ijeesu jịnẹ tụ́ ẹhẹ, dị ọ za apavahị anị, dị ọ sị ọ aa nọ aha ọnya aanị ana aā hị́ “Aha akokoro ịrẹsụ” ọnị Anihiburu anaā hị́ ịzọọ “Ịgọrịgọt”. 18Dị a kanyị Ijeesu za apavahị tụ́ ịzọọ nị. Dị a rẹ kanyị aza ẹnị ẹẹva za apavahị tụ́ eyi ẹnyị eyi ọsa, di Ijeesu ọnị yà ịnị akakana ẹnịnị nị. 19Ipayireti chẹrẹ ịsa ọnya, dị ọ vàa kú apavahị Ijeesu nị. Ịsa ọnọọ chẹrẹ yị: “Ijeesu Anịnazarẹtị, Ohinọyị Aniju.” 20Aniju ọrụrụ-ọrụrụ ệ kà ịsa ọnọọ ọnị ọ vavọọ chẹrẹ, agụvị ka ịzị a kanyị Ijeesu za apavahị tụ́, ộ gụrị ẹkụra ẹtẹẹtẹrẹ. Â sị ẹkụra Ihiburu chẹrẹ ẹ, dị a rẹ sị ẹkụra Iratini beri Igiriki vavọọ chẹrẹ ẹ nị. 21Dị ohirẹsụ ẹbanyị irehi Ohomorihi Aniju nịnị na kà a yị Ipayireti ka, “Asị ụ chẹrẹ ẹ ka, ‘Ohinọyị Aniju’ ama kà a ka, ‘Ọ ka ọnị ọ vị ohinọyị Aniju nị.’ ” 22Dị Ipayireti ka, “Ịsị mị sị chẹrẹ, ma sị ọ chẹrẹ da.”
23Ịjị isoja nịnị raà kanyị Ijeesu za apavahị, dị ẹ kụ́ awuru anị, dị ẹ gà a hi oze ẹẹna nị. Dị isoja ọnya-ọnya ẹnịnị kụ́ oze ọnya-ọnya nị. Dị ẹ rẹ vavọọ sị ọtịnịnẹ awuru anị nị. Ọtịnịnẹ awuru anị vị ene e hí ọnya kẹnẹ, ọza ọ yị gẹ ẹ. 24#Ahẹ 22.18Dị isoja nịnị ẹnẹẹ kà a yị ẹngụ ka, “Asị ị na a, ama à vẹ ya jị osisii tụ́ ọọ, dị ya yẹ ọza ana àa vọrọ ka ọ̀ sị ọọ!” Ọnọọ ộ mẹ̀ agụvị ịsa ana a chẹrẹ tụ́ ini Iwe Ohomorihi ọ̀ zụ sẹ ka, “Ẹ́ẹ gà ịta amị hi ẹngụ ẹnịnị ụvọ; ệ jị osisii agụvị ọtịnịnẹ awuru amị.” Ịsị isoja nịnị ẹnẹẹ mẹ ọ vị ọnọọ nị.
25Ọnyị Ijeesu ọnịrị onyeyiza ọnyị anị beri Imeri ose Ikiropasị ọnịrị Imeri Anịmagịdara ệ jẹẹ gụrị apavahị Ijeesu. 26Ijeesu ô re ọnyị anị ọnịrị ozirẹma anị oni o sì ịrẹyị anị ka ẹ jẹẹ ịzọọ. Dị ọ kà a yị ọnyị anị ka, “Ịnya, ozi ewu yị!” 27Dị ọ rẹ kà a yị ozirẹma ọnọọ ka, “Ọnyị awụ yị, oo!” Hụrẹ ụmẹ ọnọọ, dị ozirẹma ọnọọ kụkụ sị Imeri ka ọ̀ na ra ini eehi anị nị.
Íjeesu meme sú
(Imt 27.45-56; Ịmk 15.33-41; Irk 23.44-49)
28 #
Ahẹ 69.21; 22.15 Ijeesu ộ yẹ ka booro aanị ọnị ọ sị avaba ịsa mẹ ta. Agụvị dị Iwe Ohomorihi ọ̀ zụ sẹ, dị ọ ka enyi aa kụ̀ ọnị nị. 29Â nyị ẹnya ọnya aanị ana yà ịzọọ, eche ọsụrẹyị vị ohihi tụ́ ịnị anị. Dị ẹ sị awẹ, dị ẹ jị ọọ ngụ eche ọnọọ nị. Dị ẹ sị ọọ tụ́ ịrẹsụ ọchị ọnya aanị, dị ẹ sị ọọ tụ́ Ijeesu irenu nị. 30Dị Ijeesu hú eche ọnọọ, dị ọ ka, “Ma sị mẹ ta.” Dị ọ ká ịrẹsụ hi, dị ọ hụrẹ ụhwẹ anị ụvọ nị.
Ê gù ọha chire Ijeesu akaha
31Ịhị ọnọọ vị ẹkụhị ene e siī tenyi ẹngụụ zí ẹkụhị ụhwọtụ. Ẹnịnị ẹ mā zẹẹ ka oku ọ̀ gẹ ịrẹsụ apavahị ne tù ẹkụhị ụhwọtụ. Ẹkụhị ụhwọtụ ọnọọ vị irenyi. Agụvị avọọ, dị Aniju nịnị na kà a yị Ipayireti ka eni èe nee che ẹchụkụ ahụ aza ẹnẹẹ, dị ẹnị ẹ̀ kụ́ wa hụụ ịzọọ.
32Dị isoja nịnị vẹ, di e che ẹchụkụ ahụ ọnịpaapa ọnịrị ọza ẹnẹsa ana a kanyị ẹnịrị Ijeesu za apavahị nị. 33E mè ve tù Ijeesu dị ẹ ve tù ka oni ô wusu da, dị ẹnịnị è yi kuku che e ẹchụkụ ahụ nị. 34Dị ọnya ini isoja nịnị ẹnẹẹ sị ọha, di o gù ọ chire Ijeesu akaha, dị anya ọnịrị enyi ká va jịnẹ nị. 35Ọza ene re ka ộ vavọọ mẹ, ọ́ kà a, agụvị dị ẹwụ nịnị ọ̀ rẹ zụ dọ wụ́. Ịrẹyị ọnọọ kà vị ịzẹyịza; ọ rẹ yẹ ka ịzẹyịza ọ́nị aa kà nị. 36#Kụra 12.46; Ịrị 9.12; Ahẹ 34.20Ịsa ẹnẹẹ ệ mẹ, agụvị dị ịrẹyị ana a kà tụ́ ini Iwe Ohomorihi ọ̀ zụ sẹ, ka, “Ọza o yi vee che ẹchụkụ anị ikonya.” 37#Iza 12.10; Ẹtẹ 1.7Iwe Ohomorihi ọ rẹ kà a aha ọsa ka, “E vee re ọza ẹnẹ ẹ vịdị kà ọha ngụ.”
A mẹmẹ nee oku Ijeesu
(Imt 27.57-61; Ịmk 15.42-47; Irk 23.50-56)
38Â nyị ọnọrụ ọnya aanị ana aā hị́ Ijosẹẹhụ Anarịmatịya. Ozirẹma Ijeesu ọ vị ini ewere nị, agụvị ka angwa Aniju nịnị ee hí ọọ. Dị ọ na dá ịpẹ yị Ipayireti ka ọnị aa naa sị oku Ijeesuu hụụ ịzọọ nị. Dị Ipayireti ka ooho nị. Ijosẹẹhụ ộ na, dị ọ na sị ọọ nị. 39#Ịjọ 3.1,2Inikodemọsị ene vịdị ne tù Ijeesu ịrahụ, ộ saasa Ijosẹẹhụ na. Dị ọ sị eturare ana aā hị́ imiiri ọnịrị aaro ene e hura vabẹ za nị. Eturare ọnọọ ộ rata ẹtẹẹtẹrẹ (ẹhụụ ampo anọ ẹẹva avọọ ọ vị nị). 40Dị ẹ sị oku Ijeesu, dị ẹ sị ịta ọvwọọvụ, dị ẹ sị eturare ọnọọ tụ́ ọọ, di e si chire e ikuma nị. Avọọ Ániju nịnị memeē ne oku nị.
41Ịzị a yà kanyị Ijeesu za apavahị aanị, ụbazị ọnya yà ịzọọ. Ịnị ụbazị ọnọọ, â nyị ụsị ọnya aanị ana a chị tụ́ ịnị ịrẹta, ọwọọwa ọ vị nị; ọza ọọ̀ yị sị oku ọnyọọnyị tụ́ ọọ da. 42Dị ẹ sị oku Ijeesu tụ́ ịzọọ nị, agụvị ka ụmẹ ẹkụhị ụhwọtụ Aniju nịnị ee vee tù, dị ịzọọ ộ rẹ gụrị ẹtẹ nị.
موجودہ انتخاب:
Ịjọọnụ 19: EBTP
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ebira First Bible © Bible Society of Nigeria, 2014.