Ịjọọnụ 7

Ijeesu ọnịrị ẹyịnyara anị

1Ịrẹma ẹnẹẹ, di Ijeesu aa ngụ Igariri zịịzị nị. O yi sì ka ọnị ọ̀ varẹma nọ Ijudiya, agụvị ka Aniju nịnị ene hi ịzọọ, ee sì ka ẹnị ẹ̀ wụ ọ. 2#Ire 23.34; Ọda 16.13Aniju nịnị aa vaa rị eche ẹnịnị ọnya ana aā hị́ Eche Ajẹngụ. 3Dị ẹyịnyara Ijeesu kà a yọ ka, “Hụụ ịzẹnị, dị ụ wa nọ Ijudiya, di ezirẹma awụ ene hi ịzọọ ẹ̀ nyẹngụ re ụkọrọ ọnị ụ waa mẹ! 4Ọza ene èee sì ka eyi ọ̀ yẹ ọnị, ọ mā sị ụkọrọ anị tẹ. Ụ mẹ̀ maanị aa mẹ̀ ụkọrọ ẹnẹnị aanị, sị ẹngụ awụ zụ̀ anẹhẹ dị è re e!” 5Ẹyịnyara Ijeesu ịnyẹmba ẹnị ẹyị hyakụ sị ayị tụra a bẹẹ.

6Dị Ijeesu kà a yị wa ka, “Ụmẹ amị o yi tù, ama avaba ụmẹ vị ụmẹ ẹwụ nịnị. 7Anẹhẹ ẹ yị zụ nyị ịhyẹrẹ awụ nịnị, ama ẹyaa nyị ịhyẹrẹ ẹmị, agụvị ka mịị̄ kà a yị wa ka ẹ yaa mẹ̀ ịsa odivi. 8Ẹwụ nịnị ọ̀ọ hịrẹẹ nọ ini eche ọnọọ! Ẹmị ẹ̀ yị nọ, agụvị ka ụmẹ amị oò yi tù.” 9Ịjị ọ maanị sị kà, dị ọ yị yà Igariri nị.

Ijeesu ộ nọ ini Eche Ajẹngụ

10Ịjị ẹyịnyara anị si hu, dị Ijeesu ọnị raa hịrẹẹ nọ ini eche ọnọọ nị. Ama vi o were na nị, ọ yị sị ẹngụ tụ́ ẹhẹ na ọ maa na. 11Dị Aniju nịnị ee sì ọọ ịzị ẹ yà rị eche nị. Dị ẹ ka, “Ịzị ọ yà kẹ?” 12Dị aza tangwa aa kà ịrẹyị Ijeesu nyamaa nị. Aza ẹnyị ka ọza ọyịza ọ vị nị; aza ẹnyị ka eyiye, vi ee vene aza nị. 13Ama ẹ yị nyị ọza ana nyayịnẹ kà ịrẹyị anị tụ́ ẹhẹ, agụvị ka eyee hí angwa ọdọvịdị Aniju nịnị.

14Ịjị a sị ngụ achẹva eche, dị Ijeesu nọ ini irehi Ohomorihi, dị ọ na zụ̀ aza ịsa nị. 15O si hí wa irenu, dị ẹ ka, “Ọ́nọrụ ọnọnị mẹmẹ maanị yẹ ịsa, ịrẹma ọnọ ọ̀ yị kọsẹ iwe da?” 16Dị Ijeesu tụ́ wa ohi, dị ọ ka, “Ịsị maa sịị zụ̀ aza aanị, ẹ yị vị ịrẹyị ẹmị ụvọta ọ vị, ama ịrẹyị Ọza ana tụ́ mị vẹ ẹhẹẹ yọ nị. 17Ọza ana àa mẹ̀ ịsa ọnị o sì, vaa yẹ ịsị maa sịị zụ̀ aza aanị, àa vị ịrẹyị Ohomorihii yọ nị, à vị ka ẹ́ẹngụ amị kẹnẹ m maa dàa kà nị. 18Ọza ana àaa dà ẹngụ anịị kà, vị ene ee sì ụbanyị yị ẹngụ anị. Ama ọza ene èee sì ụbanyịị yị ọza ana tụ́ ọọ, ọnị ọ vị ọnịzẹyịza nị, o mē vene ọza. 19Aanịka Imosiisi ọ yị vịdị sị ọdaa wụ nịnị? Áá nyị ọza awụ nịnị ana saasa ọda ọnọọ? Sị ẹ vẹ di u wee sì ka wa wụ̀ mị nịnị?”

20Dị ọkọnị aza ẹnẹẹ tụ́ Ijeesu ohi, dị ẹ ka, “Wáá yẹ ka ụhwẹ echu yà ịnị ẹngụ awụ? Ene ee sì ka ọnị ọ̀ wụ wụ?” 21Dị Ijeesu kà a yị wa ka, “Mâ mẹ̀ ụkọrọ ọbanyị ọnya, o si hí avaba awụ nịnị irenu. 22#Ire 12.3; Oyn 17.10Imosiisi ộ vịdị kà a wụ nịnị ka waa jị ozi ewu nịnị ụvẹvẹnẹ, ama ẹ yị vị Imosiisi ọnị ụvọta ọ kà a, ohiku awụ nịnị o nyima anị nị. Ụụ̄ hyakụụ jị ozi ọnọrụ awụ nịnị ụvẹvẹnẹ ịnị ẹkụhị ụhwọtụ. 23#Ịjọ 5.9Waa jị ozi ewu nịnị ụvẹvẹnẹ ịnị ẹkụhị ụhwọtụ, agụvị asị ụ jịnẹ ọda Imosiisi nịnị. Sị ẹ vavẹ dị ụ waa kụ́ ayịị hi mi nịnị, agụvị ka mâ mẹ ọza ụkụ saka-saka ịnị ẹkụhị ụhwọtụ? 24Asị ụ rẹ̀ mẹ̀ ọkarẹyị eyi-eyi nịnị, waa sị ịzẹyịzaa mẹ̀ ọkarẹyị nịnị.”

Ijeesu ọ́ọ́ vị Ikirisiti ọnọọ nị?

25Dị Anijerusarẹmị ẹnyị ka, “Aanịka ẹ yị vị ọza ene eyee sì ka ẹnị ẹ̀ wụ yị? 26Wee re! Ọnị aa kà ịrẹyị eyi ịnọyị-ịnọyị, dị ẹ̀ yị nyị ọza ana kanyị ọọ aanị nọ! Ẹwáá ka vị ọdọvịdị nịnị sị dọ ka ịzẹyịza ọnị ọ vị Ikirisiti ọnọọ nị? 27Ama ẹ yâ yẹ ịzị ọnọrụ ọnọnị hụrẹ vẹ. Ịhị Ikirisiti ọnọọ ọ̀ọ vẹ, ẹ yị vaa nyị ọza ana yẹ ịzọọ hụrẹ vẹ.”

28Íjeesu màa zụ̀ aza ịsa ini irehi Ohomorihi, dị ọ kà ịrẹyị tụ́ ẹba nị, dị ọ ka, “Wáá yẹ mị nịnị? Wáá rẹ yẹ ịzị mị hụrẹ vẹ nịnị? Ẹ yị vị ẹmị ụvọta ọ tụ́ ẹngụ amị vẹ ẹhẹ. Ọza ana tụ́ mị vẹ ẹhẹ vị ọnịzẹyịza; ama wẹ yị yẹ ẹ nịnị. 29Ama ẹmị â yẹ ẹ, agụvị ka ịdị anị mị hụrẹ vẹ nị; ọnị ọ rẹ tụ́ mị vẹ ẹhẹ nị.” 30Ịjọnọọ di eyee sì ka ẹnị ẹ̀ za a nị; ama ẹ yị nyị ọza ana sị ụvọ kanyị ọọ, agụvị ka ụmẹ anị oò yi tù. 31Ama aza ọrụrụ-ọrụrụ ịnị ọkọnị aza ẹnẹẹ ệ sị ayị tụra a, dị ẹ ka, “Áá nyị Ikirisiti ana kụkụ vaa vẹ, ana ahịka ọ kụkụ vaa mẹ̀ ụkọrọ apọtẹrẹwa ene huna ana ọza ọnọnị aa mẹ aanị?”

Ijeesu ka ọnị vaa nọ aha ọsa

32Anihwarisi nịnị ệ wụ́ ka aza tangwa vavọọ aa kà ịrẹyị Ijeesu. Agụvị avọọ dị ẹnịrị ohirẹsụ ẹbanyị irehi Ohomorihi tụ́ iporisi irehi Ohomorihi ka ẹ̀ na za Ijeesu vẹ nị. 33Dị Ijeesu ka, “Mị vaa yàa pe wu nịnị chee, dị ma va nọ ịdị Ọza ana tụ́ mị vẹ ẹhẹ. 34U vee sì mi nịnị, di u we yi kuku re mi nịnị; agụvị ka ịzị maa nọ, wẹ yị zụ nọ ịzọọ nịnị.” 35Dị Aniju nịnị aa kà a yị ẹngụ ka, “Ịzị ị yẹ ka ọ vaa nọ, di ye yi zụ re e? Ẹwáá ka vị ọ vaa nọ ịdị Anigiriki ịzị Aniju gara hi, dị ọ̀ naa zụ̀ Anigiriki nịnị ịsa ịzọọ nị?” 36Ẹngụ ịrẹyị ịsị aa hị́ avọọ, ka, “U vee sì mi nịnị, di u we yi zụ re mi nịnị; ịzị màa yà, wẹ yị va zụụ vẹ ịzọọ nịnị?”

Ijeesu ọ vị enyi anaā mẹ ka ọza ọ̀ yàra nị

37 # Ire 23.36 Ẹkụhị ọdịrẹma eche ọnọọ, o hu keekere nị. Ịhị ọnọọ, dị Ijeesu kwẹẹtẹ jẹẹ, di o nowu dị ọ ka, “Ọza ene enyi àaa kụ̀, ọ̀ọ ká mịị vẹ, di ò ve hú enyi obooro! 38#Ezk 47.1; Iza 14.8Â kà a tụ́ ini Iwe Ohomorihi ka enyi anaā mẹ ka ọza ọ̀ yàra obooro, vee sìi hụụnị ayị ọza ana àa sị ayị tụra mịị jịnẹ.” 39Ịrẹyị ọnọnị oni Ijeesu kà aanị vị ịnị ịpa Ụhwẹ Ọnịnị, oni Ohomorihi vaa sị yị aza ana sị ayị tụra a, agụvị ka Ohomorihi ọọ̀ yị sị Ụhwẹ Ọnịnị yị aza ịnị ụmẹ ọnọọ, agụvị ka Ijeesu ọọ̀ yị dọ ụbanyị.

Aza ẹnẹẹ ẹ kụ́ gà hi

40Aza mẹ̀ wụ́, Íjeesu mẹ̀ maanị kà, dị aza ẹnyị ẹnịnị ka, “Ịzẹyịza, ọnọrụ ọnọnị ọ vị Ọnịsẹ ọnọọ nị.” 41Dị aza ẹnyị ka, “Ọnị ọ vị Ikirisiti ọnọọ nị.” Ama dị aza ẹnyị ka, “Aanịka Igariri Íkirisiti ọnọọ vaa hụrẹẹ vẹ nị? 42#2 Ịsa 7.12; Imi 5.2Áá vi Iwe Ohomorihi kà a ka ịpa evere Idevidi Íkirisiti vaa hụrẹẹ vẹ nị; dị ahịka Ịbẹtịrẹhẹmị a yà ma a nị. Ịzọọ Ídevidi vịdị ra nị.” 43Agụvị avọọ aza ẹnẹẹ ẹ kụ́ gà hi agụvị Ijeesu. 44Aza ẹnyị yaanị sì ka ẹnị ẹ̀ za a, ama ẹ yị nyị ọza ana sị ụvọ kanyị ọọ.

Ọdọvịdị Aniju nịnị ẹ yị dọ Ijeesu wụ́

45Dị iporisi ẹnẹẹ vavẹ ve tù ohirẹsụ irehi Ohomorihi ọnịrị Anihwarisi nịnị nị. Dị ẹ họ̀ iporisi ẹnẹẹ ka, “Sị ẹ vẹ dụ wẹ̀ yị za a vẹ nịnị?” 46Dị iporisi ẹnẹẹ ka, “Ẹẹ̀ yị nyị ọza ana maanị kà ịrẹyị anka ọnọrụ ọnọọ da o.” 47Dị Anihwarisi nịnị tụ́ ohi, dị ẹ ka, “Vị ọ́ọ́ rẹ sị ẹwụ nịnị vene bẹẹ nị? 48Áá nyị ọdọvịdị nịnị, àa vị Anihwarisi nịnị oni u re ka ộ dọ ọ wụ́ da? 49Ọkọnị aza ẹnẹnị ẹnị vị ẹnẹ ẹ̀ yị yẹ ọda Ohomorihi, dị ẹ dọ ọ wụ́, o du waa kù!”

50 # Ịjọ 3.1,2 Inikodemọsị ana vịdị vẹ ịdị Ijeesu ịrahụ, ọnị rẹ vị ọnya ịnị ẹnịnị. Dị ọ kà a yị wa ka: 51“Wáá yẹ ka ọda ayị ọ yị zẹẹ ka à jị ịvị yị ọza, ẹ̀ yị vị a zẹẹ ka ọ̀ kụ́ irenu anị, dị à yẹ ịsị ọ mẹ?” 52Dị ẹnịnị ka, “Anigariri ẹwụ wáá rẹ vị nị? Na zama Iwe Ohomorihi re, di u we re ka ẹ̀ yị nyị ọnịsẹ ikonya ana chị hụrẹ Igariri vẹ da.” 53[Dị ọzọza si hu aa nọ eehi anị nị.

موجودہ انتخاب:

Ịjọọnụ 7: EBTP

سرخی

شئیر

کاپی

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

IWE ỌNỊNỊ کے بارے میں مزید معلومات حاصل کریں

Ịjọọnụ 7